དགའ་ལྡན་ཁྲི་ཟུར་༸རྗེ་བཙུན་བློ་བཟང་བསྟན་འཛིན་མཆོག་དགོངས་པ་རྫོགས།

དེ་རིང་སྔ་དྲོར་སྐྱབས་རྗེ་དགའ་ལྡན་ཁྲི་ཟུར་༸སྐྱབས་རྗེ་རྗེ་བཙུན་བློ་བཟང་བསྟན་འཛིན་མཆོག་དགུང་གྲངས་ ༩༠ ཐོག་དགོངས་པ་རྫོགས།

དེ་རིང་སྔ་དྲོའི་ཆུ་ཚོད་ ༩ དང་སྐར་མ་ ༥༥ ཡས་མས་ཤིག་ལ་དགའ་ལྡན་ཁྲི་ཟུར་༸སྐྱབས་རྗེ་རྗེ་བཙུན་བློ་བཟང་བསྟན་འཛིན་མཆོག་དགུང་གྲངས་ ༩༠ སྟེང་རྒྱ་གར་ལྷོ་ཕྱོགས་སེར་བྱེས་གྲྭ་ཚང་གི་གཟིམ་ཆུང་དུ་ཕོ་བའི་སྙུང་གཞི་ཡི་རྐྱེན་གྱིས་དགོངས་པ་རྫོགས་པའི་གནས་ཚུལ་ཐོན།

༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ནི་ཕྱི་ལོ་ ༡༩༣༤ ལོར་སྐུ་འཁྲུངས་ཞིང་དགུང་གྲངས་བདུན་ནས་བཟུང་ཆོས་ཞུགས་གནང་སྟེ། ཕྱི་ལོ་ ༡༩༥༩ ལོར་༸གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་རྒྱ་གར་ནང་བཙན་བྱོལ་དུ་ཕེབས་ཡོད་པ་དང་། དགུང་ལོ་ ༡༧ ལ་ཕེབས་སྐབས་སེར་བྱེས་མཁས་སྙན་གྲ་ཚང་གི་གཙང་པ་ཁང་ཚན་ནང་ཞུགས་ཏེ། ཕྱི་ལོ་ ༡༩༧༩ ལོར་ཊཱིཀྐའི་སྐྱོར་དཔོན་གནང་ནས་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱོར་བར་བརྩི་བཞག་སྐྱོར་རྒྱུས་མཚོན་སྒྲིག་ལམ་གྱི་རིམ་པ་རྣམས་མི་ཉམས་གོང་འཕེལ་གནང་། ཕྱི་ལོ་ ༡༩༨༡ ལོར་༧གོང་ས་མཆོག་གིས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོར་ཕེབས་པ་དང་། ༧གོང་ས་མཆོག་གི་བཀའ་དགོངས་བཞིན་རྒྱུད་གྲྭ་པ་རྣམས་ཀྱི་ཆེད་དུ་སྔགས་དང་མཚན་ཉིད། རིག་གནས། སྐད་ཡིག་གཞན་སོགས་ཀྱི་སློབ་ཚན་གཏན་འབེབས་དང་། སློབ་གྲྭ་གསར་འཛུགས་གནང་།

ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཤིང་། འགྲེལ་པ་བཞི་སྦྲགས་དང་དཔལ་གསང་བ་འདུས་པའི་བསྐྱེད་རིམ། རྗེ་བཙུན་ཤེས་རབ་སེང་གེས་མཛད་པའི་ཊཱིཀྐ་ལེའུ་དང་པོ་ནས་བརྒྱད་པའི་མཚམས་སྦྱོར་བརྩི་བཞག་གནང་། དམ་པ་ཁོང་གིས་༧གོང་ས་མཆོག་གཙོ་བྱས་པའི་དམ་པ་མང་པོ་བསྟེན་ཏེ་དབང་ཁྲིད་མན་ངག་སོགས་གསན་བསམ་ཉམས་བཞེས་མཛད་པར་མ་ཟད། ༢༠༡༠ ལོར་བྱང་རྩེ་ཆོས་རྗེར་ཕེབས་ཤིང་། ཕྱི་ལོ་༢༠༡༧ལོའི་ཟླ་ ༦ ཚེས་ ༢༤ ཉིན་༸གོང་ས་རྒྱལ་བ་རིན་པོ་ཆེ་མཆོག་ནས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་ཁྲི་ཐོག་བརྒྱ་དང་བཞི་པར་བསྐོ་གཞག་གི་བཀའ་ཡིག་རིན་པོ་ཆེ་སྩལ་གནང་མཛད་ཡོད་པ་དང་། ལོ་དེའི་ཕྱི་ཟླ་༨ ཚེས་ ༤ ཉིན་འཕགས་ཡུལ་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བླ་སྤྱི་དང་། དགའ་ལྡན་ཁྲི་ཐོག་ཁང་གཉིས་སུ་ཁྲི་འདོན་གྱི་མཛད་སྒོ་འཚོགས་ཏེ་དགའ་ལྡན་གསེར་ཁྲི་རིན་པོ་ཆེར་མངའ་གསོལ།

གསར་འགོད་པ། དཔལ་ལྡན།