རྒྱ་ནག་དབུས་ཞིང་ལས་བློན་ཆེན་ཟུར་བ་ཐང་རེན་ཅན་ལ་རྒྱ་སྒོར་ས་ཡ་ ༢༢༨ ལྷག་ལྐོག་ཟ་བྱས་པའི་ཉེས་མིང་འོག་སྲོག་ཁྲིམས་བཅད་འདུག
ཟླ་འདིའི་ཕྱི་ཚེས་ ༢༨ ཉིན་རྒྱ་ནག་གི་བྱང་ཤར་ཅི་ལིན་ཞིང་ཆེན་མི་དམངས་ཁྲིམས་ཁང་ཞིག་གིས། རྒྱ་ནག་གི་ཞིང་ལས་བློན་ཆེན་ཟུར་བ་ཐང་རེན་ཅན་ཟེར་བར་རྒྱ་སྒོར་ས་ཡ་ ༢༢༨ ལྷག་གི་རྒྱུ་དངོས་ལྐོག་ཟ་བྱས་པའི་ཉེས་མིང་འོག་ལོ་གཉིས་ཕར་འགྱངས་ཀྱིས་སྲོག་ཁྲིམས་བཅད་འདུག
ཅི་ལིན་ཞིང་ཆེན་མི་དམངས་ཁྲིམས་ཁང་དེས། ཐང་རེན་ཅན་གྱིས་ཕྱི་ལོ་ ༢༠༠༧ ནས་ ༢༠༢༤ བར་དངུལ་དམར་དང་རྒྱུ་དངོས་སོགས་རྒྱ་སྒོར་ས་ཡ་ ༢༢༨ ལྷག་ལྐོག་ཟ་བྱས་ཡོད། བྱ་སྤྱོད་དེས་རྒྱལ་ཁབ་དང་མི་མང་ལ་གྱོང་གུད་ཚབས་ཆེན་བཟོས་ཡོད་པས་སྲོག་ཁྲིམས་བཅད་པ་ཡིན་ཞེས་བརྗོད་ཡོད་པར་མ་ཟད། ཐང་རེན་ཅན་གྱིས་རང་ཉིད་ཀྱི་ནག་ཉེས་ངོས་ལེན་བྱས་ཏེ་བློ་འགྱོད་སྐྱེས་ཡོད་སྐོར་ཡང་བརྗོད་འདུག
དེ་འབྲེལ་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༤ ལོའི་ཟླ་ ༥ ཚེས་ ༨ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལས་ཁུངས་ཟེར་བས། ཐང་རེན་ཅན་ལ་སྒྲིག་འགལ་གྱི་གནད་དོན་ཡོད་པའི་ངོས་འཛིན་འོག་ཞིབ་བཤེར་བྱེད་མགོ་བཙུགས་ཏེ། ལོ་དེའི་ཕྱི་ཟླ་ ༩ ཚེས་ ༡༣ ཉིན་རྒྱ་ནག་གི་ཞིང་ལས་བློན་ཆེན་གྱི་ལས་གནས་ནས་ཕྱིར་ཕུད་བཏང་ཞིང་། ལོ་དེའི་ཟླ་ ༡༡ ཚེས་ ༡༥ ཉིན་དམར་ཤོག་ཚོགས་པའི་ཚོགས་མིའི་ཁོངས་ནས་ཕྱིར་ཕུད་བཏང་ཡོད་འདུག
ཕྱི་ལོ་ ༢༠༡༢ ལོར་ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་ནས་བཟུང་། ཁོས་སྟག་དང་སྦྲང་མ་མཉམ་རྡུང་། གཏན་འབེབས་བརྒྱད་དང་སྤྱོད་ངན་བཞི་ཟེར་བ་སོགས་ཀྱི་སྲིད་ཇུས་འདྲ་མིན་ལག་བསྟར་གྱིས། རང་ཉིད་ཀྱི་སྲིད་དབང་གཅིག་བསྡུ་ཡོང་ཐབས་སུ། ལངས་ཕྱོགས་ཕྲན་བུ་ཙམ་ཡང་མི་མཐུན་པའི་དམར་ཤོག་དཔོན་རིགས་རྣམས་ལ་ཉེས་མིང་འདྲ་མིན་གཡོགས་ཏེ་ཁྲིམས་ཆད་གཅོད་ཀྱིན་ཡོད་པ་ལྟར། ཐང་རེན་ཅན་ནི་རྒྱ་ནག་དབུས་སྒྲིག་ཁྲིམས་ཞིབ་བཤེར་ལས་ཁུངས་ཀྱི་ཐོ་གཞུང་ནག་པོའི་ཁོངས་སུ་ཚུད་པའི་དཔོན་རིགས་མཐོ་གྲལ་གསར་ཤོས་དེ་ཡིན་ལ། དམིགས་བསལ་ཕྱི་ལོ་ ༢༠༢༠ ལོའི་ཞི་ཅིན་ཕིན་གྱི་ནང་ཁུལ་དཔོན་རིགས་ཚར་གཅོད་ཀྱི་ལས་འགུལ་འོག་ཉེན་རྟོག་པ་དང་ཁྲིམས་རྩོད་པ། ཁྲིམས་དཔོན་སོགས་ཞི་ཡིས་སྣེ་འཁྲིད་པའི་དམར་ཤོག་ཚོགས་པར་བློ་དཀར་དགོས་པ་དང་ཤིན་ཏུ་དྭངས་གཙང་ཡིན་པ། རྦད་དེ་བློས་འགེལ་ཆོག་པ་བཅས་ཡིན་དགོས་ཀྱི་ཡོད་འདུག
ཐང་རེན་ཅན་ནི་ཕྱི་ལོ་ ༡༩༦༢ ལོར་ཁྲང་ཆིན་དུ་སྐྱེས། ཕྱི་ལོ་ ༡༩༨༣ ལོར་ཁྲི་ཏུའུ་གྲོང་ཁྱེར་གྱི་ལྷོ་ནུབ་གཙུག་ལག་སློབ་ཆེན་ནས་དཔལ་འབྱོར་དང་ཚོང་ལས་རིག་པའི་ཐོག་སློབ་མཐར་ཕྱིན་རྗེས། རྒྱ་ནག་དམར་ཤོག་ཚོགས་པའི་ཁོངས་སུ་ཞུགས་ཏེ་ཞིང་ལས་བློན་ཆེན་ལས་ཁུངས་ཀྱི་ལས་བྱེད་པར་གྱུར། ཕྱི་ལོ་ ༢༠༡༤ དང་ ༢༠༡༥ ལོར་གཱང་ཝང་སི་རང་སྐྱོང་ཁུལ་གྱི་སྤྱི་ཁྱབ་གཞོན་པ་དང་དབུས་སྤྱི་ཁྱབ་གཞོན་པར་བསྐོས། ཕྱི་ལོ་ ༢༠༡༧ ལོར་ཀན་སི་ཞིང་ཆེན་གྱི་མགོ་ཁྲིད་དུ་བསྐོས། ཕྱི་ལོ་ ༢༠༢༠ ལོར་རྒྱ་ནག་དབུས་ཞིང་ལས་དང་གྲོང་གསེབ་ལས་དོན་ལྷན་ཁང་གི་བློན་ཆེན་དུ་བསྐོས་ཡོད་འདུག
གསར་འགོད་པ། སྐལ་བཟང་སྦྱིན་པ།
