ཇེན་གོ་ཡིས་གསང་མྱུལ་བྱས་པའི་ནག་ཉེས་འོག་ལོ་བཞི་དང་ཟླ་དགུའི་རིང་བཙོན་འཇུག་ཁྲིམས་ཐག་བཅད།

འཇར་མན་གྱི་གཡས་ཕྱོགས་ཆབ་སྲིད་ཚོགས་པའི་གྲོས་ཚོགས་འཐུས་མིའི་ལས་རོགས་ཇེན་གོ་ཡིས་གསང་མྱུལ་བྱས་པའི་ཉེས་མིང་འོག་བཙོན་འཇུག་ཁྲིམས་ཐག་བཅད་འདུག

Jian Guo (R) had denied spying for China during his trial

ཁ་སང་ཕྱི་ཚེས་ ༣༠ ཉིན་འཇར་མན་གྱི་གྲོང་ཁྱེར་དྷེ་རེ་སི་ཌན་དུ་ཡོད་པའི་ཆེས་མཐོའི་ཁྲིམས་ཁང་གིས། འཇར་མན་གྱི་གཡས་ཕྱོགས་ཆབ་སྲིད་ཚོགས་པའི་གྲོས་ཚོགས་འཐུས་མིའི་མེཀ་སི་མི་ལི་ཡན་ (Maximilian Eugen Krah) ལགས་ཀྱི་ལས་རོགས་ཇེན་གོ་ (Jian Guo) ཟེར་བས་རྒྱ་ནག་ལ་གནས་ཚུལ་མཁོ་སྤྲོད་བྱས་ཏེ་གསང་མྱུལ་བྱས་པའི་ནག་ཉེས་འོག ལོ་བཞི་དང་ཟླ་བ་དགུའི་རིང་བཙོན་འཇུག་ཁྲིམས་ཐག་བཅད་ཡོད་འདུག

འདས་ལོའི་ཕྱི་ཟླ་ ༤ པའི་ནང་ཇེན་གོ་འཛིན་བཟུང་བྱས་པའི་གནས་ཚུལ་ཐོན་རྗེས། ཇེན་གོ་ཟེར་བ་ཚུད་པའི་ཚོགས་ཆུང་ཞིག་གིས་ཕྱི་ལོ་ ༢༠༡༨ ལོར་བཞུགས་སྒར་དྷ་རམ་ས་ལར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང། དེ་བཞིན་ཇེན་གོ་ཡིས་བཙན་བྱོལ་བོད་མིའི་སྒྲིག་འཛུགས་ཀྱི་འབྲེལ་ཡོད་ཚོགས་པ་མང་པོ་དང་འབྲེལ་བ་བྱས་པ་སོགས་བོད་མི་དང་ཕྱི་ཕྱོགས་སུ་གནས་སྡོད་མང་གཙོ་དོན་གཉེར་བ་དང་། རྒྱ་གཞུང་དང་ལྟ་སྤྱོད་མི་མཐུན་པ་རྣམས་ཀྱི་གནས་ཚུལ་མཁོ་སྒྲུབ་བྱས་ཏེ་རྒྱ་ནག་གཞུང་ལ་གནས་ཚུལ་མཁོ་སྤྲོད་བྱས་ཡོད་པའི་གནས་ཚུལ་བརྒྱུད་ལམ་དུ་ཐོན་ཡོད་པ་རེད།

Jian Guo (third from right), a former director of the German branch of the Federation for a Democratic China and secretary-general of the Chinese Republican Party. In 2018, he visited Dharamsala, India, and met with the Dalai Lama.

འཇར་མན་གྱི་དྷེ་རེ་སི་ཌན་ (Dresden) གྲོང་ཁྱེར་དུ་ཡོད་པའི་ཆེས་མཐོའི་ཁྲིམས་ཁང་གིས། ཇེན་གོ་ཡིས་འདས་པའི་ལོ་ངོ་ལྔ་ཙམ་གྱི་རིང་རྒྱ་ནག་གི་གསང་བའི་ལས་ཁུངས་སུ་གྲོས་ཚོགས་ཀྱི་བགྲོ་གླེང་དང་། ཐག་གཅོད་ཇི་བྱས་སྐོར་གྱི་གནས་ཚུལ་རྣམས་མཁོ་སྤྲོད་དང་། འཇར་མན་ནང་ཡོད་པའི་རྒྱ་ནག་གི་མང་གཙོ་དོན་གཉེར་བའི་ཚོགས་པ་དང་། རྒྱ་ནག་དང་ལྟ་སྤྱོད་མི་མཐུན་པའི་ཚོགས་པ་ཁག་དང་མི་སྒེར་སོགས་ལ་སོ་ལྟ་བྱེད་ཀྱི་ཡོད་པའི་ནག་ཉེས་འོག འདས་ལོའི་ཕྱི་ཟླ་ ༤ པའི་ནང་འཛིན་བཟུང་བྱས་ཡོད་པ་རེད། དེ་བཞིན་ཕྱི་ལོ་ ༢༠༠༢ ནས་ལོ་ངོ་ ༢༠ ལྷག་གི་རིང་ཇེན་གོ་ཡིས་རྒྱ་ནག་གི་གསང་བའི་ལས་ཁུངས་སུ་གསང་མྱུལ་གྱི་ལས་ཀ་བྱས་ཡོད་པའི་ཐོག ཕྱི་ལོ་ ༢༠༡༩ ནས་ ༢༠༢༤ བར་གྲོས་ཚོགས་ནས་གལ་ཆེའི་ཡིག་ཆ་ ༥༠༠ བསྡུ་རུབ་བྱས་ཏེ་གསང་བའི་ཐོག་ནས་རྒྱ་ནག་གཞུང་ལ་མཁོ་སྤྲོད་བྱས་ཡོད་པ་སོགས་བདེན་དཔང་ར་སྤྲོད་བྱུང་འདུག འོན་ཀྱང་། ཁོས་ནག་ཉེས་དེ་དག་ལ་ངོས་ལེན་བྱས་མི་འདུག

ཕྱི་ལོ་ ༢༠༢༤ ཟླ་ ༤ པ་ནས་ད་བར་ལོ་གཅིག་དང་ཟླ་བ་ལྔ་འགྲོ་བཞིན་ཡོད་ཀྱང་། རྒྱ་ནག་གཞུང་གིས་ཇེན་གོའི་གནད་དོན་ཐད་ལན་འདེབས་གསལ་བཤད་གང་ཡང་བྱས་མེད་པ་རེད། དེ་བཞིན་ཇེན་གོ་དང་མཉམ་དུ་རྒྱ་རིགས་ཀྱི་བུད་མེད་ཡཱ་ཆི་ (Yaqi X) ཟེར་བ་ཞིག་ཀྱང་འཛིན་བཟུང་བྱས་ཏེ། ལོ་གཅིག་དང་ཟླ་བ་དགུའི་རིང་བཙོན་འཇུག་ཁྲིམས་ཐག་བཅད་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།