འཛམ་གླིང་ཡུལ་གྲུ་གང་སར་གནས་པའི་བོད་དང་བོད་དོན་རྒྱབ་སྐྱོར་བའི་ཚོགས་སྡེ་ཁག་ ༡༥༠ ལྷག་གིས་རྒྱ་ནག་གི་རྒྱལ་སྟོན་དུས་ཆེན་ཟེར་བར་ངོ་རྒོལ་ལས་འགུལ་སྤེལ་ཏེ། བོད་ཀྱི་བདེན་མཐའ་མ་སེལ་བར་དུ་རྒྱ་ནག་དམར་ཤོག་ཚོགས་པའི་ཁ་གཏད་དུ་ལངས་རྒྱུ་ཡིན་པའི་བསྒྲགས་གཏམ་སྤེལ།
དེ་རིང་ཕྱི་ཟླ་ ༡༠ ཚེས་ ༡ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་དུས་སྟོན་དང་བསྟུན་ནས། ཐའེ་ཝན་གྱི་རྒྱལ་ས་ཐའེ་པེ་རུ་ཡོད་པའི་གྲོས་ཚོགས་ཁང་དུ། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་དང་། ཤར་ཊུ་ཀི་སི་ཐན། ལྷོ་སོག་དང་ཧོང་ཀོང་། ཐའེ་ཝན་འགྲོ་བ་མིའི་ཐོབ་ཐང་ཚོགས་པ་སོགས་ཀྱི་གོ་སྒྲིག་འོག རྒྱ་དམར་ལ་ཁ་གཏད་དང་གཉའ་གནོན་ལ་ངོ་རྒོལ། འགྲོ་བ་མིའི་ཐོབ་ཐང་ནམ་ཡང་ཕྱིར་བཤོལ་བྱེད་མི་སྲིད་ཅེས་པའི་འབོད་ཚིག་འོག་ནས་གསར་འགོད་ལྷན་ཚོགས་ཤིག་བསྐྱངས་ཡོད་ཅིང་། ཐེངས་འདིའི་གསར་འགོད་ལྷན་ཚོགས་ཐོག་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཝོ་པེ་ཡེ་ལགས་དང་གྲོས་ཚོགས་འཐུས་མིའི་ཧོང་ཀོང་རྒྱབ་སྐྱོར་ཚོགས་པའི་ཚོགས་གཙོ་ཧོང་ཇའེ་ལགས། ཐའེ་པེ་གྲོང་ཁྱེར་གྱི་སྤྱི་ཁྱབ་པ་སབ་རེ་ན་ལིམ་ལགས། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས། ཕྱི་སྡོད་ཧོང་ཀོང་བའི་སྤྱི་ཁྱབ་དྲུང་ཆེ་ཧྥོང་ལགས། ཐའེ་ཝན་ཡུ་གུར་རྒྱབ་སྐྱོར་ཚོགས་པའི་ཚོགས་གཙོ་ཧེ་ཁྲའོ་ཏུང་ལགས། འགྲོ་བ་མིའི་ཐོབ་ཐང་ལས་འགུལ་བ་ལི་མེ་ཁྲི་སོགས་ཡོད་འདུག
དེ་འབྲེལ་ཚོགས་སྡེ་ཁག་དེ་དག་གིས་བསྒྲགས་གཏམ་ཞིག་སྤེལ་བའི་ནང་། ཕྱི་ཟླ་ ༡༠ ཚེས་ ༡ ཉིན་རྒྱ་ནག་གི་རྒྱལ་སྟོན་དུས་ཆེན་ཞེས་འབོད་པའི་ཉིན་འདིར་རྒྱ་ནག་གི་མི་གྲངས་དུང་ཕྱུར་ ༡།༤ ནང་ན་དངོས་གནས་དགའ་སྤྲོ་ཚོར་མཁན་ག་ཚོད་ཅིག་ཡོད་དམ། རྒྱལ་ཁབ་གཞན་གྱི་མི་ག་ཚོད་ཀྱིས་ལྷག་བསམ་རྣམ་དག་གིས་དེ་ལ་རྟེན་འབྲེལ་ཞུ་ཡི་ཡོད་དམ། ང་ཚོ་བོད་དང་། ཧོང་ཀོང་། ཤར་ཏུར་ཀི་སི་ཐན། ལྷོ་སོག་པོ། ཐེ་ཝན་བཅས་ཀྱི་ཞི་བའི་སྤྱི་ཚོགས་ཀྱི་ཚོགས་སྡེ་ཁག་གིས་ཉིན་འདིར་ཡར་ལངས་ནས་རྒྱ་ནག་གི་དྲག་གནོན་ལ་ངོ་རྒོལ་བྱ་རྒྱུ་དང་འགྲོ་བ་མིའི་ཐོབ་ཐང་རྩོད་ལེན་བྱ་རྒྱུ་ནམ་ཡང་ཕྱིར་འཐེན་བྱེད་མི་སྲིད་ཅེས་རྒྱ་གཞུང་ལ་སྐད་ཆ་བཤད་རྒྱུ་བདམས་ཡོད། རྒྱ་ནག་དམར་པོའི་གཞུང་གསར་འཛུགས་ཀྱིས་མུ་མཐུད་གནས་པ་དེས་རྒྱལ་སྤྱིའི་སྤྱི་ཚོགས་ལ་ཕན་འབྲས་བཟང་པོ་གང་ཡང་ཐོན་མེད་ཁར། དེའི་ཚབ་ཏུ་ཕྱིའི་རྒྱལ་ཁབ་ཁག་ཏུ་སྲིད་དབང་སྒེར་གཅོད་པའི་དབང་འཛིན་རིང་ལུགས་ཁྱབ་སྤེལ་བྱས་པ་དང་། རྒྱ་ནག་རང་གི་མི་དམངས་ལའང་བཙན་གནོན་བྱས་དང་བྱེད་མུས་ཡིན་པ་མ་ཟད། ཁྱིམ་མཚེས་རྒྱལ་ཁབ་ཁག་ཏུ་དབང་སྒྱུར་དང་དམར་ཤོག་གི་ཤུགས་རྐྱེན་རྒྱ་སྐྱེད་གཏོང་བའི་བྱ་སྤྱོད་སྤེལ་ནས་རང་དབང་དང་མང་གཙོ། འགྲོ་བ་མིའི་ཐོབ་ཐང་སོགས་ལ་རྡོག་རོལ་གཏོང་མུས་ཡིན། གནད་དོན་འདི་དག་ལས་རྒྱ་ནག་གིས་ཁྲིམས་འགལ་ཐོག་ས་ཁུལ་འདྲ་མིན་གྱི་ནང་སྲིད་ལ་ཐེ་གཏོགས་དང་གོ་ལ་སྤྱིའི་བདེ་འཇགས་དང་འཕེལ་རྒྱས་ལ་གཏོར་བརླག་གཏོང་གི་ཡོད་པ་མངོན་གསལ་ཆགས་ཡོད། ཅེས་བརྗོད་འདུག
བོད་ཀྱི་གནད་དོན་དང་འབྲེལ་ནས། རྒྱ་ནག་གཞུང་གིས་བོད་ནང་དུ་ཡུན་རིང་དབང་སྒྱུར་གྱི་ཐབས་ལམ་སྤྱད་དེ་བོད་ཀྱི་རིག་གཞུང་དང་ཆོས་ལུགས་ལ་གཏོར་བརླག་གཏོང་བཞིན་ཡོད། བོད་ཀྱི་དགོན་སྡེ་ཁག་དང་གྲྭ་བཙུན་རྣམས་ལ་ལྟ་རྟོག་ནན་མོ་བྱེད་བཞིན་ཡོད། བོད་ཀྱི་སྐད་ཡིག་སློབ་གསོར་གོ་རིམ་ལྡན་པའི་ངང་ཚོད་འཛིན་དང་ཆོས་དད་རང་དབང་དང་རིག་གཞུང་སོགས་ལ་ཕྱོགས་ཡོངས་ནས་དྲག་གནོན་བྱས་དང་བྱེད་མུས་ཡིན། ཉེ་བའི་ལོ་ཤས་གོང་ནས་རྒྱ་ནག་གིས་སྔར་ལྷག་གི་གཞི་རྒྱ་ཆེ་བའི་བཅའ་སྡོད་སློབ་གྲྭའི་ལམ་ལུགས་ལག་བསྟར་བྱས་ཏེ། བོད་རིགས་བྱིས་པ་སྟོང་ཕྲག་མང་པོ་ཁྱིམ་ཚང་དང་ཁ་ཐག་རིང་བའི་ཁོར་ཡུག་ཏུ་བཙན་ཤེད་ཀྱིས་བཀག་འགོག་བྱས་ཡོད། དེ་མཚུངས་བཞིན། རྒྱ་ནག་དམར་ཤོག་ཚོགས་པས་མུ་མཐུད་བོད་བརྒྱུད་ནང་བསྟན་གྱི་སྲོལ་རྒྱུན་ལ་ཐེ་གཏོགས་བྱེད་བཞིན་ཡོད་ཅིང་། ༸གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་སྐུའི་ཡང་སྲིད་འདེམས་སྒྲུག་གི་བདག་དབང་མེད་ཚུལ་བརྗོད་ནས་མ་འོངས་པའི་ཆོས་ཕྱོགས་ཀྱི་དབུ་འཁྲིད་སྐོར་ལ་གཡོ་ཇུས་འཐེན་བཞིན་ཡོད་སྐོར་སོགས་བརྗོད་འདུག
དེ་བཞིན། ཧོང་ཀོང་ལ་ཁས་ལེན་བྱས་པའི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་རྩ་མེད་དུ་བཟོས་ཏེ། ཆུ་ཚ་པོའི་ནང་སྦལ་བ་སྐོལ་བའི་འཐབ་ཇུས་ལག་བསྟར་གྱིས། ཧོང་ཀོང་མི་མང་ལ་དམར་ཤོག་གི་ཆབ་སྲིད་སློབ་གསོ་སྤྲོད་ཀྱིན་པ་དང་རིག་གཞུང་རྩ་བརླག་ཏུ་གཏོང་བ། གསར་འགོད་རང་དབང་ལ་དྲག་གནོན་སོགས་བྱས་ཏེ། ཁྲིམས་ཀྱི་དབང་སྒྱུར་དང་རང་དབང་ཡོངས་འཕྲོག་བཅོམ་བྱས་ཡོད་སྐོར་དང་། ཤར་ཊུ་ཀི་སི་ཐན་གྱི་ཡུ་གུར་བ་ས་ཡ་མང་པོ་སློབ་གསོ་བསྒྱུར་བཀོད་ཁང་ཟེར་བའི་ནང་དུ་བཅུག་སྟེ་ཆབ་སྲིད་སློབ་གསོ་སྤྲད་པ་དང་། སྐད་ཡིག་དང་རིག་གཞུང་རྒྱུན་འཛིན་གྱི་རང་དབང་འཕྲོག་པ། དེ་བཞིན་བཙན་གྱིས་གཉེན་སྒྲིག་བྱེད་དུ་བཅུག་པ་དང་མངའ་སྤྲུམ་མེད་པར་བཟོས་པ་སོགས་མི་རིགས་རྩ་གཏོར་གྱི་སྲིད་ཇུས་ལག་བསྟར་བྱས་དང་བྱེད་མུས་ཡིན་སྐོར། དེ་བཞིན་ལྷོ་སོག་པོའི་ནང་དུ་རྒྱ་གཞུང་གིས་མི་རིགས་རྩ་གཏོར་གྱི་སྲིད་ཇུས་ལག་བསྟར་བྱས་ཏེ། སོག་པོའི་སྐད་ཡིག་དང་རིག་གནས། སྲོལ་རྒྱུན་གྱི་ཤེས་ཡོན་སོགས་རིམ་བཞིན་རྩ་བརླག་གཏོང་གི་ཡོད་པའི་ཁར། རྒྱ་གཞུང་འབྲེལ་གྱི་ཁེ་ལས་ཁང་ཁག་གིས་སོག་པོའི་མཐའ་མེད་པའི་རྩྭ་ཐང་གི་སྐྱེ་ཁམས་ཁོར་ཡུག་གི་གཏེར་ཁ་སྔོག་འདོན་བྱས་ཏེ། སོག་པོ་ཙམ་དུ་མ་ཟད་ཁྱིམ་མཚེས་རྒྱལ་ཁབ་ཁག་ལའང་གནོད་ཤུགས་ཐེབས་ཡོད་སྐོར། ཐའེ་ཝན་དང་ཐའེ་ཝན་མི་མང་རྒྱུན་དུ་རྒྱ་ནག་གི་དམག་དོན་གྱི་འཇིགས་སྐུལ་དང་ཁེར་རྐྱང་གི་ཕྱི་འབྲེལ་གྱི་གནས་སྟངས་འོག་འཚོ་བ་སྐྱེལ་དགོས་ཀྱི་ཡོད་པ་དང་། རྒྱ་གཞུང་གིས་ཐེ་ཝན་གྱི་རྒྱལ་སྤྱིའི་མཁའ་ལམ་ཕྱི་འབྲེལ། མི་ང་གི་འཕྲོད་བསྟེན། ལུས་རྩལ། རིག་གནས་བཅས་ལ་དངོས་ཤུགས་བརྒྱུད་གསུལ་གྱི་ཐོག་ནས་གནོན་ཤུགས་སྤྲོད་ཀྱིན་ཡོད་པ་མ་ཟད། དུས་ནས་དུས་སུ་ཐའེ་ཝན་གྱི་ས་མཚོ་གནམ་གསུམ་གྱི་ཁུལ་དུ་དམག་དོན་སྦྱོང་བརྡར་བྱས་ཏེ། ཐའེ་ཝན་གྱི་མང་གཙོ་དང་བདེ་འཇགས་ལ་ཉེན་ཁ་བསྐྲུན་གྱི་ཡོད་སྐོར་སོགས་བརྗོད་འདུག
གཞན་ཡང་། ཨ་རི་དང་ཡུ་རོབ། རྒྱ་གར་སོགས་འཛམ་གླིང་ཡུལ་གྲུ་གང་སར་ཁྱབ་ཡོད་པའི་བོད་རང་བཙན་སློབ་ཕྲུག་ཚོགས་པ་དང་ཁེ་ན་ཌའི་བོད་དོན་ལྷན་ཚོགས། བོད་དོན་འབྲེལ་མཐུད་ཁང་སོགས་བོད་དང་བོད་དོན་རྒྱབ་སྐྱོར་བའི་ཚོགས་སྡེ་ཁག་ ༡༤༥ ཡིས། རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་ཉིན་མོ་ནི་རྒྱ་ནག་དམར་ཤོག་ཚོགས་པའི་སྲིད་དབང་སྒེར་སྤྱོད་ལ་ངོ་རྒོལ་བྱེད་པའི་ཉིན་མོ་ཞིག་ཡིན་པ་མ་ཟད། བོད་ཀྱི་བདེན་མཐའ་སེལ་ཏེ་བོད་ལ་རང་དབང་མ་ཤར་གྱི་བར་དུ་བོད་དོན་འཐབ་རྩོད་རྒྱུན་མཐུད་རྒྱུ་ཡིན་པའི་ཡོངས་ཁྱབ་བསྒྲགས་གཏམ་ཞིག་སྤེལ་འདུག་ལ། བསྒྲགས་གཏམ་ནང་། ཕྱི་ལོ་ ༢༠༢༥ ལོའི་ཨ་རིའི་རང་དབང་ཁང་པའི་སྙན་ཐོར་བོད་ནི་འཛམ་གླིང་གི་རང་དབང་ཆེས་མེད་སའི་ས་ཁུལ་དུ་ངོས་འཛིན་བྱུང་བ་གསལ་འདུག་པ་དང་། ད་སྔ་བར་བོད་མི་སྟོང་ཕྲག་མང་པོ་གང་བྱུང་འཛིན་བཟུང་བཀག་ཉར་གྱིས་གར་སོང་ཆ་མེད་དུ་གྱུར་བ་དང་དཀྲོངས་པ། ཚེ་བཙོན་བྱས་པ་སོགས་བྱུང་ཡོད་པ་མ་ཟད། མཐའ་ན་སོ་སོའི་ས་ཆ་དང་ཆོས་ལུགས་དད་མོས། སྐད་ཡིག་དང་རིག་གཞུང་སོགས་སྲུང་སྐྱོབ་བྱེད་པའི་ཐོབ་ཐང་མེད་ཅིང་། མགོན་པོ་སྐྱིད་ལགས་གཙོས་པའི་གྲྭ་བཤེར་བཟང་རྒྱ་མཚོ་ལགས་དང་གླུ་བ་ཨ་སངས། མཚོ་སྔོན་ཚེ་རིང་། སྒོ་ཤེས་རབ་རྒྱ་མཚོ། ཨ་ཉག་སེང་སྒྲ། ཀརྨ་བསམ་འགྲུབ། བྱམས་པ་ཆོས་འཕེལ། རིན་ཆེན་སྐྱིད། ཡེ་ཤེས་ཆོས་སྒྲོན། བཀྲ་ཤིས་དབང་ཕྱུག་སོགས་ཀྱིས་ཞི་བའི་ལས་འགུལ་སྤེལ་ནས་བོད་ཀྱི་སྐད་ཡིག་དང་རིག་གཞུང་། ཁོར་ཡུག་སོགས་སྲུང་སྐྱོབ་བྱས་པར་ཉེས་མིང་འདྲ་མིན་གཡོགས་ཏེ་བཙོན་འཇུག་དང་སྲོག་ཁྲིམས་ཀྱི་འཇིགས་སྐུལ་བྱས་ཡོད་ལ། ད་དུང་ཡང་བོད་མི་རྣམས་ལ་དྲང་བདེན་མིན་པའི་ཁྲིམས་ཆད་དང་སྡིགས་ར་སྐུལ་མུས་ཡིན་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
