ཧི་མ་ཅལ་གྱི་རྒྱལ་སའི་ཁུལ་དུ་ཐུགས་བསྐྱེད་དམ་བཅའ་བཞིའི་སྐོར་ལ་འགྲེམས་སྟོན་གནང་།

བོད་མི་མང་སྤྱི་འཐུས་ལྷན་ཚོགས་དང་སིམ་ལ་སྤྱི་ཁྱབ་ལས་ཁུངས་ཀྱི་གོ་སྒྲིག་འོག་ཧི་མ་ཅལ་གྱི་རྒྱལ་ས་སིམ་ལའི་ཁུལ་༸གོང་ས་མཆོག་གི་ཐུགས་སྐྱེད་དམ་བཅའ་བཞིའི་སྐོར་གྱི་འགྲེམས་སྟོན་གནང་།

བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༢༥ ལོ་ཧྲིལ་པོར་༸སྐུའི་གོ་སྟོན་དང་འབྲེལ་བྱམས་བརྩེའི་ལོར་སྲུང་གཙི་ཞུ་ཡི་ཡོད་པ་ལྟར། ཟླ་འདིའི་ཕྱི་ཚེས་ ༣ ཉིན་བོད་མི་མང་སྤྱི་འཐུས་ལྷན་ཚོགས་དང་། སིམ་ལ་སྤྱི་ཁྱབ་ལས་ཁུངས། ཧི་མ་ཅལ་མངའ་སྡེའི་སིམ་ལའི་གཙུག་ལག་སློབ་གཉེར་ཁང་བཅས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༣ ཉིན་སིམ་ལའི་ཧི་མ་ཅལ་མངའ་སྡེའི་གཙུག་ལག་སློབ་གཉེར་ཁང་དུ་ཐོག་དང་པོར་༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་དང་། ༸མགོན་པོ་གང་ཉིད་མཆོག་གིས་གསོལ་སྩལ་གནང་བའི་བོད་མིའི་མང་གཙོ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་ཞིག་གོ་སྒྲིག་ཞུས་ཡོད་འདུག

བོད་མི་མང་སྤྱི་འཐུས་ལྷན་ཚོགས་ཀྱི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། མཛད་སྒོའི་སྟེང་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སློབ་དཔོན་མཱ་ཧཱ་ཝིར་སིངྒ་ (Shri Prof Mahavir Singh) ལགས་ཕེབས་ཏེ་འགྲེམས་སྟོན་དབུ་འབྱེད་གནང་བ་དང་སྦྲགས། ཁོང་ནི་༸གོང་ས་རྒྱལ་བ་རིན་པོ་ཆེ་མཆོག་ལ་དད་གུས་ཆེན་པོ་ཡོད་མཁན་ཞིག་ཡིན་པ་དང་། མགོན་པོ་གང་ཉིད་ཀྱིས་འཛམ་གླིང་ཞི་བདེ་ཡོང་ཐབས་སུ་མུ་མཐུད་སྐུ་ངལ་བསྐྱོན་བཞིན་པར་ཡིད་སྨོན་ཆེན་པོ་བྱེད་བཞིན་ཡོད་ལ། ༸གོང་ས་མཆོག་གི་ཐུགས་རྗེའི་བཀའ་དྲིན་འོག་བཙན་བྱོལ་ནང་བོད་མི་ཚོས་མང་གཙོ་ལམ་ལུགས་ཚད་ལྡན་ལག་བསྟར་གནང་བཞིན་པར་ཡི་རངས་སྐྱེ་ཡི་ཡོད་སྐོར་གསུངས་འདུག ཚོགས་དྲུང་ལས་ཁུངས་ཀྱི་ཟུང་དྲུང་ཚེ་རིང་ལྷ་མོ་ལགས་ཀྱིས་འགྲེམས་སྟོན་གྱི་དགོས་དམིགས་རྒྱབ་ལྗོངས་སོགས་ངོ་སྤྲོད་གནང་གྲུབ་མཚམས། སྐུ་མགྲོན་གཙོ་བོ་མཆོག་ལ་དྲན་རྟེན་ཕྱག་རྟགས་ཕུལ་ཞིང་། སིམ་ལ་སྤྱི་ཁྱབ་ལས་ཁུངས་ཀྱི་ལས་བྱེད་བདེ་ཆེན་རབ་འབྱམས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་འདུག

དེ་བཞིན། ཟླ་འདིའི་ཕྱི་ཚེས་ ༢ ཉིན་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་ངྷི་མཆོག་གི་འཁྲུངས་སྐར་དང་བསྟུན། བོད་མི་མང་སྤྱི་འཐུས་ལྷན་ཚོགས་དང་སིམ་ལ་སྤྱི་ཁྱབ་ལས་ཁུངས་ཟུང་འབྲེལ་གྱི་གོ་སྒྲིག་འོག སིམ་ལ་སཾ་བྷོ་ཊ་སློབ་གྲྭའི་ནང་༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་དང་གསོལ་སྩལ་གནང་བའི་བོད་མིའི་མང་གཙོ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གནང་ཡོད་ཅིང་། སྐབས་དེར་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་ཁྲལ་བསྡུའི་བློན་ཆེན་སྐུ་ཞབས་ཇཱ་གྷཏ་སིངྒ་ནི་གྷི་ (Shri Jagat Singh Negi) ལགས་དང་སིམ་ལ་སྤྱི་ཁྱབ་ལྷག་པ་ཚེ་རིང་ལགས། ཚོགས་དྲུང་ལས་ཁུངས་ཀྱི་ཟུང་དྲུང་ཚེ་རིང་ལྷ་མོ་ལགས་བཅས་གཙོས་པའི་འབྲེལ་ཡོད་ལས་བྱེད་རྣམ་པ་དང་། སིམ་ལ་སཾ་བྷོ་ཊ་སློབ་གྲྭའི་སློབ་སྤྱི་ལགས་ཀྱིས་གཙོས་པའི་དགེ་རྒན་སློབ་ཕྲུག་རྣམས་དང་ས་གནས་མི་མང་བཅས་འཛོམས་ཡོད་འདུག