རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་ཐབས་ལ་ཤུགས་སྣོན་སྔར་ལྷག་བྱེད་ཀྱི་འདུག  

འདི་ལོའི་རྒྱ་ནག་དབུས་དམར་ཤོག་ཆབ་སྲིད་ལྷན་ཁང་གིས་རྒྱལ་ཡོངས་ཀྱི་ཆོས་ལུགས་རྒྱ་ནག་ཅན་དུ་བསྒྱུར་བར་བརྒྱུད་རིམ་ལྡན་པའི་སྒོ་ནས་སྐུལ་འདེད་གཏོང་བའི་ཐུན་མོང་གི་སློབ་སྦྱོང་ཚོགས་འདུ་ཐེངས་  ༢༢ པ་ཟེར་བ་ཞིག་བསྡུས་ཏེ་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བར་ནུས་ཤུགས་སྔར་ལྷག་གདོན་དགོས་ལུགས་བརྗོད་འདུག

འདི་ལོའི་ཕྱི་ཟླ་ ༩ ཚེས་ ༢༩ ཉིན་གྱི་ཕྱི་དྲོར་རྒྱ་ནག་དབུས་དམར་ཤོག་ཆབ་སྲིད་ལྷན་ཁང་གིས། རྒྱལ་ཡོངས་ཀྱི་ཆོས་ལུགས་རྒྱ་ནག་དུ་བསྒྱུར་བར་བརྒྱུད་རིམ་ལྡན་པའི་སྒོ་ནས་སྐུལ་འདེད་གཏོང་བའི་ཐུན་མོང་གི་སློབ་སྦྱོང་ཚོགས་འདུ་ཐེངས་  ༢༢ པ་ཟེར་བ་ཞིག་བསྡུས་ཏེ། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་བོད་བརྒྱུད་ནང་བསྟན་ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་མཐུན་པར་ཧུར་ཐག་བྱ་དགོས་སོགས་བརྗོད་འདུག

སྐབས་དེར་ཞི་ཅིན་ཕིན་གྱིས། ལོ་རྒྱུས་ཀྱི་ཉམས་མྱོང་ཕྱོགས་བསྡོམས་བྱས་ཏེ་བེད་སྤྱོད་བྱེད་པ་དང་། ཆོས་ལུགས་ལས་དོན་དངོས་ལ་གཞི་ཚུགས་པ་སོགས་བྱས་ཏེ་ཆོས་ལུགས་རྒྱ་ནག་ཅན་དུ་བསྒྱུར་བར་བརྒྱུད་རིམ་ལྡན་པའི་སྒོ་ནས་སྐུལ་འདེད་གཏང་དགོས་ཤིང་། ཆོས་ལུགས་རྣམས་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་པར་ཁྲིད་སྟོན་ཧུར་ཐག་བྱ་དགོས་ལུགས་དང་། རྒྱ་ནག་གིས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བའི་ཁྲིད་སྟོན་མཐའ་འཁྱོངས་བྱས་ཏེ། ཆོས་ལུགས་ཀྱི་མགོ་ཁྲིད་པ་དང་དད་ལྡན་མི་སྣས་རྒྱལ་ཁབ་དང་། ལོ་རྒྱུས། མི་རིགས། རིག་གནས། ཆོས་ལུགས་བཅས་ལ་ལྟ་བ་ཡང་དག་པ་འཛུགས་པར་ཁྲིད་སྟོན་དང༌། ངོས་འཛིན་ལྔ་ཟམ་མི་ཆད་པར་ཇེ་དྲག་ཏུ་གཏང་དགོས་ལུགས་སོགས་བཤད་འདུག

འདི་ལོའི་ཕྱི་ཟླ་ ༧ ཚེས་ ༦ ཉིན་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱལ་མཚན་ནོར་བུ་ལགས་ལ་ཐུག་འཕྲད་བྱེད་སྐབས། ཞི་ཅིན་ཕིན་གྱིས་བློ་བརྟན་འགྱུར་མེད་ཀྱི་ཐོག་ནས་མེས་རྒྱལ་གཅིག་གྱུར་ཟེར་བ་དང་། རྒྱལ་ཁབ་ཀྱི་ཆེད་དུ་སྤྱི་ཚོགས་ཀྱི་འདུ་ཤེས་བརྟན་པོ་བསྐྲུན་རྒྱུར་ལས་དོན་ཡག་པོ་བྱ་དགོས་པ། བོད་བརྒྱུད་ནང་བསྟན་དེ་ཀྲུང་གོ་ཅན་དུ་བསྒྱུར་བ། བོད་ལྗོངས་དེང་རབས་ཅན་དུ་འཛུགས་སྐྲུན་བྱེད་པར་མུ་མཐུད་དུ་ནུས་པ་འདོན་དགོས་ལུགས་སོགས་བཀོད་མངགས་བྱས་ཡོད་འདུག

བོད་བརྒྱུད་ནང་བསྟན་རྒྱ་ནག་ཏུ་བསྒྱུར་བའི་སྲིད་ཇུས་ཀྱི་ཆ་ཤས་སུ་གཏོགས་པའི་དྲྭ་རྒྱའི་ཆོས་ལུགས་ཆ་འཕྲིན་ཞབས་ཞུ་དོ་དམ་བྱ་ཐབས་ཟེར་བ་དེ་ཕྱི་ལོ་ ༢༠༢༢ ལོར་ལག་བསྟར་བྱས་པའི་ནང་དུ།  འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང་སྒྲ་སྒམ། པར་དང་ཡི་གེ། བརྙན་སོགས་ཀྱི་ཐབས་ལམ་བརྒྱུད་དེ་སྤྱི་ཚོགས་ཁྲོད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གྱི་སྐུ་ཚབ་བམ་ཡང་ན་གཙོ་གཉེར་བ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཆོས་ལུགས་ཁྲིམས་ཡིག་ཁག་ལ་རྒྱུས་མངའ་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་དང་། ཆོས་ལུགས་ཁྲིམས་སྒྲིག་ལ་འགལ་བ་མ་ཡིན་པ་དགོས་འདུག དེ་བཞིན་ཆོག་མཆན་ཡི་གེ་དེ་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱོད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་སོགས་བཀོད་ཡོད་པ་རེད།

ཕྱི་ལོ་ ༢༠༢༠ ལོའི་ཟླ་ ༨ ཚེས་ ༢༨ དང་ ༢༩ ཉིན་པེ་ཅིན་དུ་བསྡུས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་ཆེན་ཐེངས་ ༧ པ་ཟེར་བའི་ཐོག  ཞི་ཅིན་ཕིན་གྱིས་བོད་བརྒྱུད་ནང་བསྟན་ད་དུང་རྒྱ་ནག་ཅན་དུ་གྱུར་མེད་པ་དེར་ཤུགས་སྣོན་རྒྱག་དགོས་སྐོར་གྱི་གཏམ་བཤད་སྤེལ་ཏེ། བོད་ཁུལ་གང་སར་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་དགོས་པའི་སྐུལ་འདེད་ཀྱི་བྱ་འགུལ་སྔར་ལས་ཤུགས་ཆེར་སྤེལ་ཡོད་པ་དང་། ལོ་དེའི་ཕྱི་ཟླ་ ༡༡ ཚེས་ ༡༢ ཉིན་ལྷ་སར་བོད་བརྒྱུད་ནང་བསྟན་དགོངས་འགྲེལ་ལས་དོན་དཔྱད་གླེང་གྲོས་ཚོགས་ཟེར་བ་ཞིག་བསྡུས་ཏེ། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བའི་ཁ་ཕྱོགས་རྒྱུན་འཁྱོངས་བྱས་ཏེ་དུས་རབས་ཀྱི་འཕེལ་རྒྱས་དང་མཉམ་འདྲེས་ཧུར་ཐག་དགོས་སྐོར་གྱི་གཏམ་བཤད་སྤེལ། ལོ་དེའི་ཕྱི་ཟླ་ ༤ པའི་ནང་རྒྱ་ནག་གཞུང་གིས་བོད་ཀྱི་ལྷ་ལྡན་གཙུག་ལག་ཁང་གཙོས་དགོན་སྡེ་ཁག་གི་འཛུགས་སྐྲུན་བཟོ་བཀོད་དང་ཐ་ན་ཆོས་ལུགས་ཀྱི་ཅ་དངོས་རྣམས་ཀྱང་རྒྱ་ནག་གི་ཁྱད་ཆོས་ཅན་དུ་བསྒྱུར་དགོས་སྐོར་ནན་བརྗོད་བྱས་ཏེ། ཐ་ན་དགོན་པའི་འདུ་ཁང་དང་མཆོད་རྟེན། མ་ཎི་འཁོར་ལོའི་ངོས་སུ་མི་རིགས་མཐུན་སྒྲིལ་དང་མེས་རྒྱལ་ལ་དགའ་ཞེན། རྒྱལ་གཅེས་ཆོས་གཅེས་ཀྱི་བསམ་བློ་གོང་སྤེལ་ཟེར་བ་སོགས་ཀྱི་དྲིལ་བསྒྲགས་འབོད་ཚིག་རིགས་འབྲི་བཞིན་ཡོད་པ་རེད།

ཕྱི་ལོ་ ༢༠༡༢ ལོར་ཞི་ཅིན་ཕིན་གྱིས་རྒྱ་ནག་དམར་ཤོག་ཚོགས་པའི་དབང་ཆ་བཟུང་བ་ནས་བཟུང་། ཕྱི་ལོ་ ༢༠༡༤ ལོར་《རྒྱལ་ཁབ་བདེ་འཇགས་དེབ་སྔོན་པོ་》ཟེར་བ་ཞིག་དང་། ཕྱི་ལོ་ ༢༠༡༨ ལོར་《ཆོས་ལུགས་ལས་དོན་སྲོལ་ཡིག》། 《རྒྱལ་ཁབ་ཀྱི་ཆོས་དད་རང་མོས་འགན་སྲུང་སྲིད་བྱུས་དང་ལག་བསྟར།》དེ་བཞིན་ཕྱི་ལོ་ ༢༠༢༢ ལོར་《དྲྭ་རྒྱའི་ཆོས་ལུགས་ཆ་འཕྲིན་ཞབས་ཞུ་དོ་དམ་བྱ་ཐབས་》བཅས་བོད་ནང་ཆོས་ལུགས་དང་འབྲེལ་བའི་ཡིག་ཆ་བཞི་བཏོན་ཡོད་པ་མ་ཟད། བོད་ནང་ཆོས་ལུགས་དམ་དྲག་དང་དགོན་སྡེ་སོགས་དོ་དམ་སླད་སྲོལ་ཡིག་བཅུ་གྲངས་ཤིག་བཀྲམ་ཡོད། ཕྱི་ལོ་ ༢༠༡༧ ལོར་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཡིན་པ་དང་ད་ལྟ་བཙོན་དུ་ཡོད་པའི་ཝུའུ་དབྱིན་ཅི་(吴英杰)ཡིས་བོད་ལྗོངས་ཆོས་ལུགས་ཚོགས་ཆེན་ཐོག་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་དགོས་པ་ཕྱིར་བསྒྲགས་བྱས་ཡོད་པ་དང་། དེ་ནི་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ་ཟེར་བ་ཡོངས་གྲགས་ཕྱིར་བསྒྲགས་བྱས་པ་ཐོག་མ་དེ་ཆགས་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།