ཕྱི་ལོ་ ༢༠༢༥ ལོའི་ནོ་སྦེལ་ཞི་བདེའི་གཟེངས་རྟགས་དེ་ཝེ་ནི་ཛུ་ལ་རྒྱལ་ཁབ་ཀྱི་དམངས་གཙོའི་ཐོབ་ཐང་ཆེད་ཞི་བའི་ལས་འགུལ་སྤེལ་མཁན་ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་སུ་ཐོབ་འདུག
དེ་རིང་ཕྱི་ཚེས་ ༡༠ ཉིན་ནོ་སྦེལ་གཟེངས་རྟགས་ལྷན་ཚོགས་ཀྱིས་གསལ་བསྒྲགས་སྤེལ་བ་ལྟར་ན། ཝེ་ནི་ཛུ་ལཱ་རྒྱལ་ཁབ་ཀྱི་དམངས་གཙོའི་ཐོབ་ཐང་འཐབ་རྩོད་པ་ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ (Maria Corina Machado)ལགས་ཀྱིས། སྙིང་སྟོབས་ཆེན་པོས་མུན་ནག་གི་ཁྲོད་དུ་དམངས་གཙོའི་མེ་ལྕེ་སྒྲོན་པར་ཆེད་བསྟོད་དུ་ ༢༠༢༥ ལོའི་ནོ་སྦེལ་ཞི་བདེའི་གཟེངས་རྟགས་འབུལ་གཏན་ཁེལ་ཡོད་འདུག
ནོ་སྦེལ་གཟེངས་རྟགས་ཚོགས་ཆུང་གི་གསལ་བསྒྲགས་ནང་། ཝེ་ནི་ཛུ་ལའི་དམངས་གཙོའི་ལས་འགུལ་གྱི་དབུ་ཁྲིད་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་ནི་ཉེ་དུས་ཀྱི་ལ་ཌིན་ཨ་མེ་རུ་ཀའི་མི་མང་གི་སྙིང་སྟོབས་ཀྱི་དཔེ་མཚོན་ཁྱད་པར་བ་ཞིག་ཡིན། ཁོང་མོ་ནི་ཁ་གཏད་ཆབ་སྲིད་ཚོགས་པ་ཁ་ཐོར་དུ་འགྲོ་སྐབས་གཅིག་གྱུར་བཟོ་མཁན་གྱི་གལ་གནད་ཅན་གྱི་མི་སྣ་ཞིག་ཡིན། དེ་ནི་རང་དབང་གི་འོས་བསྡུ་དང་སྲིད་གཞུང་གི་སྐུ་ཚབ་གཉིས་ཀྱི་ཐུན་མོང་གི་དགོས་འདུན་ལ་ཁ་གཏད་གཅོག་ཐབས་ཤིག་རེད། དེའི་ནང་དུ་དམངས་གཙོའི་དོན་སྙིང་གནས་ཡོད། ང་ཚོ་ཐུན་མོང་གི་འདོད་པ་ནི་མི་མང་གི་སྲིད་དབང་སྲུང་སྐྱོབ་བྱ་རྒྱུ་དེ་རེད། ང་ཚོས་མོས་མཐུན་མེད་པ་གཅིག་པ་ཡིན་ཡང་། དམངས་གཙོའི་ལམ་ལུགས་ལ་ཉེན་ཁ་འཕྲད་བཞིན་པའི་སྐབས། སྔར་ལས་ལྷག་པའི་སྒོ་ནས་ཐུན་མོང་གི་རྨང་གཞི་འདི་སྲུང་སྐྱོབ་བྱ་རྒྱུ་གལ་ཆེན་པོ་རེད། ཅེས་དང་། ནོ་སྦེལ་གཟེངས་རྟགས་ཚོགས་ཆུང་གིས་ལོ་མང་པོའི་རིང་བཙོན་ཁང་དང་། ཁྲོམ་གཞུང་བཅས་སུ་རང་དབང་གི་ཆེད་དུ་ཞི་བའི་ངོ་རྒོལ་བྱས་ཏེ། འཛམ་གླིང་ལ་འགྱུར་བ་གཏོང་མཁན་གྱི་སྙིང་སྟོབས་ཆེ་བའི་བུད་མེད་དང་སྐྱེས་པ་མང་པོར་བསྟོད་བསྔགས་བྱས་ཡོད། འདས་པའི་ལོ་འདི་དག་གི་ནང་དུ་ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་ཀྱིས་སྦས་སྐུང་བྱས་ཏེ་འཚོ་བ་སྐྱེལ་དགོས་བྱུང་ཡོད་ལ། ཁོང་མོའི་སྲོག་ལ་ཉེན་ཁ་འཕྲད་བཞིན་པའི་གནས་སྟངས་བྱུང་ཡོད་ཀྱང་། རང་ཉིད་ཀྱི་རྒྱལ་ཁབ་ནང་གནས་སྡོད་ཀྱིས་མི་མང་ས་ཡ་མང་པོར་སེམས་ཤུགས་སྦྱིན་ཡོད། ཅེས་གསལ་འདུག
གསར་འགོད་པས་ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་ཀྱི་བདེ་འཇགས་སྐོར་ལ་གཟེངས་རྟགས་ལྷན་ཚོགས་ཀྱི་བསམ་བློ་བཏང་ཡོད་མེད་དྲིས་པར། ནོ་སྦེལ་གཟེངས་རྟགས་ལྷན་ཚོགས་ཀྱི་ཚོགས་གཙོ་ཧྥི་རེ་ཌི་ནེ་(Frydne) ལགས་ཀྱིས། ང་ཚོས་ལོ་ལྟར་འོས་མི་ཚང་མའི་ཆེད་དུ་བགྲོ་གླེང་བྱས་པ་ཡིན། ལྷག་པར་དུ་གཟེངས་རྟགས་ཐོབ་མཁན་གྱི་ཚེ་སྲོག་ལ་ཉེན་ཁ་ཚབས་ཆེན་འཕྲད་བཞིན་པའི་སྐབས་ང་ཚོས་ཕྱིར་བསྒྲགས་བྱས་ཡོད་པ་མ་རེད། ཅེས་འགྲེལ་བརྗོད་གནང་འདུག ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་ཀྱིས་ནོ་སྦེལ་གསར་འགོད་ལྷན་ཚོགས་ཐོག ང་རང་ནོ་སྦེལ་ཞི་བདེའི་གཟེངས་རྟགས་ཐོབ་པར་ཧང་སངས་བྱུང་། ང་ཚོ་དགའ་སྤྲོའི་ངང་ནས་ཧང་སངས་ནས་བསྡད་ཡོད། ངས་ཡིད་ཆེས་བྱ་ཐུབ་ཀྱི་མི་འདུག ཅེས་ཁ་པར་བརྒྱུད་ཡང་ནས་བསྐྱར་དུ་བརྗོད་ཡོད་འདུག
ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ལགས་ནི་ཕྱི་ལོ་ ༡༩༦༧ ལོར་ཝེ་ནི་ཛུ་ལཱ་རྒྱལ་ཁབ་ཀྱི་ཁཱ་རཱ་ཁཱ་སི་རུ་སྐྱེས་ཡོད་ཅིང་། ཁོང་མོས་ཨིན་ཌི་རི་གཙུག་ལག་སློབ་གླིང་(Andrés Bello Catholic University) ནས་འཕྲུལ་རིག་ཐོག་ཉེ་བའི་གཙུག་ལག་རབ་འབྱམས་ཀྱི་སློབ་གཉེར་གནང་ཡོད་པ་དང་། དཔལ་འབྱོར་གཙུག་ལག་སློབ་གླིང་(Instituto de Estudios Superiores de Administración)ནས་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༩༢ ལོར་ཨ་ཌི་ནི་ཡ་ཐེབས་རྩ་(Atenea Foundation) ཞེས་པ་ཞིག་བཙུགས་ཏེ་དྭ་ཕྲུག་རྣམས་ལ་རོགས་སྐྱོབ་བྱས། ཕྱི་ལོ་ ༢༠༠༢ ལོར་རྒྱལ་སྤྱིའི་མཉམ་འབྲེལ་ཆབ་སྲིད་ཚོགས་པའི་ནང་དུ་ཞུགས། ཕྱི་ལོ་ ༢༠༡༢ ལོར་ཝེ་ནི་ཛུ་ལཱའི་སྲིད་འཛིན་གྱི་འོས་མིར་ལངས་ཡོད་ཀྱང་ཐོབ་མི་འདུག ཕྱི་ལོ་ ༢༠༡༤ ལོར་ཝེ་ནི་ཛུ་ལཱའི་སྲིད་གཞུང་ལ་ངོ་རྒོལ་བྱེད་མཁན་ཁྲོད་མགོ་ཁྲིད་པ་གཙོ་བོ་ཞིག་ཡིན་པ་དང་། ཕྱི་ལོ་ ༢༠༡༡ ནས་ ༢༠༡༤ ཝེ་ནི་ཛུ་ལཱ་གྲོས་ཚོགས་འཐུས་མིར་བདམས་འདུག ཕྱི་ལོ་ ༢༠༢༤ ལོར་ཁ་གཏད་ཆབ་སྲིད་ཚོགས་པའི་སྲིད་འཛིན་འོས་མི་འགོག་ཆེད་འོས་མིར་ལངས་ཡོད་ཀྱང་ཐོབ་མེད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
