རྒྱ་གཞུང་གིས་བོད་ཀྱི་དགེ་འདུན་པ་རྣམས་ལ་རྒྱལ་གཅེས་ཟེར་བའི་བསམ་བློ་སྤེལ་ཆེད་རྒྱ་ནག་ཏུ་ལྟ་སྐོར་ཁྲིད།

རྒྱ་ནག་གཞུང་གིས་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ་ཟེར་བའི་མིང་ཆེན་པོ་ཞིག་བཤད་ཀྱི་ཡོད་ཀྱང་། བོད་བརྒྱུད་ནང་བསྟན་དང་སྐད་ཡིག་གི་ངོས་འཛིན་གྱི་མཚོན་པའི་བོད་མི་རིགས་ཀྱི་ངོ་བོ་རྩ་མེད་གཏོང་བཞིན་ཡོད།

ཞི་ཅིན་ཕིང་གི་ཆོས་ལུགས་ལས་དོན་སྐོར་གྱི་རྒྱས་བཤད་གལ་ཆེན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ། ཆོས་ཕྱོགས་ཀྱི་མི་སྣ་རྒྱ་ནག་ཏུ་ཁྲིད་དེ་འདུ་ཤེས་གསུམ་གྱི་སློབ་གསོ་ཟེར་བའི་ལས་འགུལ་སྤེལ་བཞིན་ཡོད་པ་ལྟར།  ཉེ་ལམ་བོད་གཞིས་ཀ་རྩེ་ཁང་དམར་རྫོང་གི་ཆོས་ཕྱོགས་མི་སྣ་ ༡༦ རྒྱ་ནག་ཏུ་ལྟ་སྐོར་ཁྲིད་དེ། དམར་པོའི་ལོ་རྒྱུས་ལ་བསྐྱར་ཞིབ་དང་རྒྱལ་ཁབ་ཀྱི་འཕོ་འགྱུར་རླབས་ཆེན་ཉམས་སུ་མྱོང་ཟེར་བའི་མིང་ཐོག་ནས་པེ་ཅིན་དང་ཁྲིན་ཏུའུ་སོགས་ནས་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཡོད་འདུག

འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས་སུ་རྒྱ་གཞུང་གིས་བོད་ཀྱི་ཆོས་ཕྱོགས་ཀྱི་མི་སྣ་རྒྱ་ནག་ནང་ལྟ་སྐོར་དུ་ཁྲིད་དགོས་པའི་དམིགས་ཡུལ་སྐོར་ལ་དྲིས་པར་ཁོང་མོས། ཕྱི་ལོ་ ༡༩༩༦ ནས་བཟུང་རྒྱ་ནག་གཞུང་གིས་བོད་ནང་དུ་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་ཡོད། བོད་རང་སྐྱོང་ལྗོངས་ཟེར་བའི་མགོ་ཁྲིད་ཚེ་རྡོར་གྱི་སྐབས་སུ་བོད་དོན་ཐོག་ངོ་རྒོལ་བྱེད་མཁན་གྲྭ་བཙུན་མང་པོ་ཡོད་པ་དང་། ལྷག་པར་དུ་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ནང་དུ་གྲྭ་བཙུན་མང་པོས་ལས་འགུལ་སྤེལ་བར། རྒྱ་གཞུང་གིས་བོད་ནང་གཏན་གནས་མེད་པར་བཟོ་མཁན་གཙོ་བོ་གྲྭ་བཙུན་ཡིན་པར་བསྒྲགས་ཡོད། བོད་རང་སྐྱོང་ལྗོངས་ཟེར་བའི་མགོ་ཁྲིད་ཁྲིན་ཆོན་ཧའོ་ཡིས་དགོན་པའི་ནང་གཏན་སྡོད་ཀྱི་ལས་དོན་ཚོགས་ཆུང་བཙུགས་ཏེ། དཔེ་བཟང་གི་དགོན་པ་དང་རྒྱལ་ཞེན་ཅན་གྱི་གྲྭ་བཙུན་བདམས་ཐོན་བྱས་པའི་ལས་གཞི་སྤེལ་བ་རེད། དེའི་ཁྲོད་རྒྱ་ནག་གཞུང་གིས་ལས་ཀ་བྱེད་ཕྱོགས་ལ་འདོད་པ་མེད་པའི་རྣམ་འགྱུར་བསྟན་ཚེ་དགོན་པ་ནས་ཕྱིར་ཕུད་གཏོང་གི་ཡོད། རྒྱ་གཞུང་གི་ལས་དོན་ལ་དགའ་ཞེན་བྱེད་མཁན་གྱི་རྒྱལ་ཞེན་པའི་མིང་ཐོག་ནས་ལྟ་སྐོར་དུ་འཁྲིད་བཞིན་ཡོད། དེ་ཡང་རྒྱ་ནག་གཞུང་གིས་ལྟ་སྐོར་དུ་ཁྲིད་པའི་དམིགས་ཡུལ་གཙོ་བོ་ཞིག་རེད། དེ་བཞིན་རྒྱ་ནག་གཞུང་གིས་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ་ཟེར་བའི་མིང་ཆེན་པོ་ཞིག་བཤད་ཀྱི་ཡོད་ཀྱང་། བོད་བརྒྱུད་ནང་བསྟན་དང་སྐད་ཡིག་གི་ངོས་འཛིན་གྱི་མཚོན་པའི་བོད་མི་རིགས་ཀྱི་ངོ་བོ་དེ་རྩ་མེད་གཏོང་བཞིན་ཡོད། འདུ་ཤེས་གསུམ་དང་འདུ་ཤེས་བཞི་སོགས་ཀྱི་སློབ་གསོ་ཟེར་བའི་འབབ་ས་ཚང་མ་རྒྱ་གཞུང་གིས་བོད་ཀྱི་གྲྭ་བཙུན་རྣམས་ལ་དམ་དྲག་བྱེད་ཆེད་རེད། རྒྱ་ནག་གཞུང་གིས་བོད་དབང་བསྒྱུར་བྱེད་པར་འགོག་རྐྱེན་འཕྲད་ས་གཙོ་བོ་ཞིག་ནི་བོད་ཀྱི་དགོན་སྡེའི་གྲྭ་བཙུན་རྣམས་ཆགས་ཡོད་པས། བོད་ཀྱི་དགོན་སྡེ་ཁག་ཏུ་རྒྱ་གཞུང་གིས་དཔལ་འབྱོར་གྱི་རོགས་སྐྱོར་སོགས་རྒྱབ་ལྗོངས་འདྲ་མིན་གྱི་མིང་ཐོག་ནས་ལས་གཞི་སྤེལ་བཞིན་ཡོད། དམིགས་བསལ་བོད་ཀྱི་ཆོས་ཕྱོགས་ཀྱི་མི་སྣ་རྒྱ་ནག་ནང་ལྟ་སྐོར་ཁྲིད་དགོས་དོན་ཡང་རྒྱ་གཞུང་གི་ཆབ་སྲིད་དྲིལ་བསྒྲགས་བྱེད་པའི་ལག་ཆ་ཞིག་ཆགས་ཡོད། ཅེས་འགྲེལ་བརྗོད་གནང་བྱུང་།

ཕྱི་ལོ་ ༢༠༡༡ ལོ་ནས་བཟུང་རྒྱ་ནག་གཞུང་གིས་བོད་ཀྱི་ཆོས་ཕྱོགས་ཀྱི་མི་སྣ་རྒྱ་ནག་ནང་ལྟ་སྐོར་དུ་ཁྲིད་པའི་མགོ་བཙུགས་ཡོད་ཅིང་།  ཕྱི་ལོ་ ༢༠༢༡ ལོར་ཞི་ཅིན་ཕིང་གིས་དམར་ཤོག་གི་ལོ་རྒྱུས་དང་སློབ་གསོ་དྲིལ་བསྒྲགས་ཤུགས་ཆེན་བྱས་ཏེ་དམར་ཤོག་གི་ཡུལ་སྐོར་སོགས་ཀྱི་མིང་ཐོག་ནས་ལས་འགུལ་སྤེལ།   དེའི་ཁྲོད་རྒྱ་གཞུང་གིས་བོད་ཀྱི་ས་གནས་ཁག་ཅིག་ནས་བོད་ཀྱི་ཆོས་ཕྱོགས་ཀྱི་མི་སྣ་ཁག་ཅིག་རྒྱ་ནག་ནང་ལྟ་སྐོར་དུ་ཁྲིད་འདུག། ཕྱི་ལོ་ ༢༠༢༤ ཟླ་ ༡༠ ཚེས་ ༨ ནས་ཉིན་གྲངས་བརྒྱད་རིང་གཞིས་ཀ་གྲོང་ཁྱེར་ཆོས་ལུགས་མཐུན་ཚོགས་ཟེར་བའི་གོ་སྒྲིག་འོག ཆོས་ཕྱོགས་ཀྱི་མི་སྣ་གྲངས་ ༣༢  དམར་ཤོག་ཀྱི་ལོ་རྒྱུས་དྲན་གསོ་ཞེས་པའི་མིང་འོག་ཏུ་ཧྲང་ཧའེ་སོགས་སུ་ལྟ་སྐོར་ཁྲིད་འདུག   ཕྱི་ལོ་ ༢༠༢༥ ཟླ་ ༥ ཚེས་ ༢༦ ཉིན་ནས་ཉིན་གྲངས་བཅུ་རིང་བོད་ལྗོངས་ནང་བསྟན་སློབ་གླིང་ཟེར་བའི་དགེ་འདུན་པ་གྲངས་ ༤༠ རྒྱ་ནག་གི་ཀྲེ་ཅང་དང་ཧྲང་ཧའེ་སོགས་སུ་ལྟ་སྐོར་དུ་ཁྲིད་ཡོད་པ་དང་། དེ་བཞིན་འདི་ལོའི་ཕྱི་ཟླ་ ༩ པའི་མཇུག་ནས་ཉིན་གྲངས་ ༡༦  རིང་བོད་ཀྱི་གཞིས་ཀ་རྩེ་ཁང་དམར་རྫོང་གི་ཆོས་ཕྱོགས་ཀྱི་མི་སྣ་ ༡༦ པེ་ཅིང་དང་ཁྲིན་ཏུའུ་སོགས་སུ་ལྟ་སྐོར་དུ་ཁྲིད་འདུག ལོ་གཉིས་བསྟུད་མར་གཞིས་ཀ་རྩེའི་ཆོས་ཕྱོགས་ཀྱི་མི་སྣ་ཁག་དམར་ཤོག་གི་ལོ་རྒྱུས་དྲན་གསོའི་མིང་ཐོག་ནས་ལྟ་སྐོར་དུ་ཕྱིན་འདུག དེ་ཡང་གཙོ་བོ་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བའི་སྲིད་ཇུས་དང་། འདུ་ཤེས་གསུམ་གྱི་སློབ་གསོ་སོགས་སྤེལ་སླད་རྒྱ་ནག་ཏུ་ལྟ་སྐོར་དུ་ཁྲིད་བཞིན་ཡོད་པ་ཞིག་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།