རྒྱ་ནག་རྒྱལ་ཡོངས་ཀྱི་སྐབས་ཉི་ཤུ་བའི་ཚོགས་ཆེན་ཐེངས་ ༤ པ་ཟེར་བ་འཚོག་ལ་ཉེ་བའི་སྐབས་འདིར། ཞི་ཅིན་ཕིན་གྱིས་རྒྱ་ནག་བཅིང་གྲོལ་དམག་གི་དམག་དཔོན་མཐོ་གྲས་དགུ་དམར་ཤོག་ཚོགས་ཁོངས་ནས་ཕྱིར་ཕུད་དང་གོ་གནས་མེད་པར་བཟོས་ཏེ། སྒེར་གཅོད་ཀྱི་སྲིད་དབང་སྲ་བརྟན་དུ་གཏོང་མུས་ཡིན་འདུག
རྒྱ་ནག་གཞུང་འབྲེལ་གོ་ལའི་དུས་བབ་ཀྱིས་དེ་འབྲེལ་གནས་ཚུལ་སྤེལ་བ་ལྟར་ན། ཕྱིར་ཕུད་བཏང་བའི་དམག་གི་དཔོན་རིགས་ཀྱི་ཁྲོད་དུ། རྒྱ་ནག་དམར་ཤོག་ཚོགས་པའི་དབུས་ཆབ་སྲིད་ལྷན་ཚོགས་ཀྱི་ཚོགས་མི་དང་རྒྱ་ནག་མི་དམངས་བཅིང་གྲོལ་དམག་གི་དབུས་དམག་སྤྱི་གཞོན་པ་ཧེ་ཝི་ཏུང་ (He Weidong) དང་། རྒྱ་ནག་དབུས་ཆབ་སྲིད་ལྷན་ཚོགས་ཀྱི་ཚོགས་མི་དང་དམག་སྲིད་ལྷན་ཁང་གི་སྲིད་དོན་ཚན་པའི་འགན་འཛིན་མེའོ་ཧྭ། དབུས་དམག་སྲིད་ལྷན་ཁང་གི་སྲིད་དོན་ཚན་པའི་འགན་འཛིན་གཞོན་པ་དང་བཅིང་གྲོལ་དམག་གི་དམག་སྤྱི་ཧུ་ཧོང་ཅོན་(He Hongjun)། དབུས་དམག་སྲིད་བཀོད་འདོམས་ཁང་གི་འགན་འཛིན་གཞོན་པ་ཟུར་བ་ཝང་ཞོའུ་པེན་(Wang Xiubin)། བཅིང་གྲོལ་དམག་གི་ཤར་རྒྱུད་བཀོད་འདོམས་དམག་སྤྱི་ཟུར་བ་ལིན་ཤང་ཡཱང་(Lin Xiangyang)། རྒྱ་ནག་བཅིང་གྲོལ་དམག་གི་སྒྲིག་ཁྲིམས་ཞིབ་དཔྱོད་ཁང་གི་འགན་འཛིན་ཟུར་བ་ཆིན་ཧྲོ་ཐོན་(Qin Shutong) དང་ཡེན་ཧྭ་ཀྲི་ (Yuan Huazhi) གཉིས། བཅིང་གྲོལ་དམག་གི་མེ་ཤུགས་འཕུར་མདེལ་གྱི་བཀོད་འདོམ་དཔོན་ཝང་ཧོ་པེན་(Wang Houbin)། བཅིང་གྲོལ་དམག་གི་ཉེན་རྟོག་སྡེ་ཁག་གི་བཀོད་འདོམས་པ་ཟུར་བ་ཝང་ཁྲོན་ནིན་ (Wang Chunning) བཅས་འདུག
དེ་འབྲེལ་རྒྱ་ནག་རྒྱལ་སྲུང་ལྷན་ཁང་གི་གནས་ཚུལ་ལྟར་ན། བཅིང་གྲོལ་དམག་གི་དམག་སྤྱི་དེ་དག་གིས། དམར་ཤོག་ཚོགས་པའི་སྒྲིག་ཁྲིམས་ལ་སྒྲིག་འགལ་ཚབས་ཆེན་བྱས་པ་དང་། གོ་གནས་ལ་བརྟེན་ནས་ཁྲིམས་འགལ་གྱིས་དངུལ་འབོར་ཆེན་ལྐོག་ཟ་བྱས་པའི་དོགས་གཞི་ཡོད་པ་མ་ཟད། ཁོ་ཚོའི་གྱོད་དོན་ཧ་ཅང་ཚབས་ཆེན་དང་ཉེན་ཁ་ཆེ་བའི་མཇུག་འབྲས་འབྱུང་སྲིད་པས། ད་ལྟ་རྒྱ་ནག་དབུས་སྒྲིག་ཁྲིམས་ཞིབ་བཤེར་ལས་ཁུངས་ཟེར་བས། དམག་སྤྱི་དེ་དག་ལ་ཞིབ་བཤེར་བྱེད་བཞིན་པ་ཡིན་འདུག
རོའུ་ཊར་གསར་ཁང་གིས་སྤེལ་བའི་གནས་ཚུལ་ལྟར་ན། རྒྱ་ནག་བཅིང་གྲོལ་དམག་གི་དམག་དཔོན་དགུ་ཕྱིར་ཕུད་བཏང་བའི་གནས་ཚུལ་དེ། རྒྱ་ནག་རྒྱལ་ཡོངས་ཀྱི་སྐབས་ཉི་ཤུ་བའི་ཚོགས་ཆེན་ཐེངས་ ༤ ཟེར་བ་མ་འཚོག་གོང་ཏག་ཏག་ལ་ཡོངས་བསྒྲགས་བྱས་པ་དང་། ཚོགས་ཆེན་དེའི་སྟེང་དམར་ཤོག་ཚོགས་ཁོངས་ནས་ཕྱིར་ཕུད་བཏང་བ་དང་ཚབ་གསར་བསྐོ་བ་སོགས་ཀྱི་མཐའ་མའི་ཐག་གཅོད་ལེན་གྱི་ཡོད་འདུག་ལ། རྒྱ་ནག་རྒྱལ་ཡོངས་ཀྱི་སྐབས་ཉི་ཤུ་བའི་ཚོགས་ཆེན་ཐེངས་བཞི་བ་ཟེར་བ་དེ་ཟླ་འདིའི་ཚེས་ ༢༠ ནས་ ༢༣ བར་འཚོགས་གཏན་ཁེལ་ཡོད་འདུག
བཅིང་གྲོལ་དམག་གི་དམག་དཔོན་རྣམས་ལ་ལྐོག་ཟ་རུལ་སུངས་དང་དབང་ཆ་ལོག་སྤྱོད་སོགས་ཀྱི་ཉེས་ནག་ཕོག་བཞིན་པའི་གནད་དོན་འདིའི་ཐད། རྒྱལ་སྤྱིའི་ཨེ་ཏི་ལན་ཊིག་ལྷན་ཚོགས་ཀྱི་ཉམས་ཞིབ་པ་ཝན་ཐེ་སན་ (Wen-Ti Sung) ལགས་ཀྱིས། ཞི་ཅིན་ཕིན་གྱིས་ཁང་པ་གཙང་བཟོ་བྱེད་བཞིན་ཡོད། ཧེ་ཝི་ཏུང་དང་མེའོ་ཧྭ་གཉིས་གཞུང་འབྲེལ་ཐོག་ནས་ཕྱིར་ཕུད་བཏང་བ་དེས། ཞི་ཅིན་ཕིན་ལ་སྐབས་ཉི་ཤུ་བའི་ཚོགས་ཆེན་ཐེངས་ ༤ སྟེང་དབུས་བཅིང་གྲོལ་དམག་གི་ལྟེ་བར་དམག་སྤྱི་གསར་པ་བསྐོ་གཞག་བྱེད་པའི་གྲ་སྒྲིག་ཡོད་པས་རེད། ཅེས་བརྗོད་འདུག
རྒྱ་ནག་གཞུང་འབྲེལ་གོ་ལའི་དུས་བབ་ཀྱིས། ཐེངས་འདིར་བཅིང་གྲོལ་དམག་གི་དམག་དཔོན་དགུའི་ནག་ཉེས་ཡོངས་བསྒྲགས་བྱས་པ་དེས། དམག་དོན་ནང་ལྐོག་ཟ་རུལ་སུངས་ཀྱི་ཆ་ཤས་ཕྲ་མོ་ཙམ་ཡང་སྦས་སྐུང་བྱེད་ས་མེད་པའི་ལངས་ཕྱོགས་གསལ་པོ་མཚོན་ཡོད་པ་དང་། དེ་ནི་ཞི་ཅིན་ཕིན་སྟག་དང་སྤྲང་མ་མཉམ་རྡུང་གི་སྲིད་ཇུས་འོག་དམར་ཤོག་ཚོགས་པ་དང་དམག་དཔུང་གི་ལྐོག་ཟ་རུལ་སུངས་ཀྱི་གནད་དོན་ལ་རྒོལ་རྡུང་བཏང་བའི་ལས་དོན་ལ་གྲུབ་འབྲས་གལ་ཆེན་ཐོབ་པ་མཚོན་གྱི་སྐོར་བརྗོད་འདུག
ཧེ་ཝི་ཏུང་ (He Weidong) ནི་ཕྱི་ལོ་ ༡༩༦༦ ནས་ ༡༩༧༦ བར་ཏེ། རིག་གནས་གསར་བརྗེའི་རྗེས་ནས་ལས་ཐོག་རྒྱ་ནག་དབུས་དམག་སྤྱི་ཆེན་མོ་གཞོན་པ་ཞིག་ཕྱིར་ཕུད་བཏང་བ་ཐོག་མར་གྱུར་ཡོད་པ་དང་། ཁོ་ནི་རྒྱ་ནག་གི་དམག་གི་སྒྲིག་འཛུགས་ཀྱི་མགོ་ཁྲིད་མཐོ་ཤོས་ཨང་གཉིས་པ་དེ་ཡིན་ཞིང་། ཞི་ཅིན་ཕིན་གྱི་བློ་ཐག་ཉེ་བའི་དམག་སྤྱི་ཞིག་ཡིན་ཀྱང་འདུག ཁོ་འདི་ལོའི་ཕྱི་ཟླ་ ༣ པ་ནས་གར་ཡོད་སོགས་ཀྱི་གནས་ཚུལ་མི་ཤེས་པར་གྱུར་ཏེ། ཁ་སང་གཞི་ནས་ཡོངས་གྲགས་ཐོག་ཉེས་ཆད་བཅད་པ་བསྒྲགས་ལ། གཞན་ཡང་གནས་རིམ་མི་འདྲ་བའི་བཅིང་གྲོལ་དམག་གི་དམག་དཔོན་ཧུ་ཧོང་ཅོན་དང་ཝང་ཞོའུ་པེན། ལིན་ཤང་ཡཱང་། ཆིན་ཧྲོ་ཐོན། ཡེན་ཧྭ་ཀྲི་དང་ཝང་ཧོ་པེན། ཝང་ཁྲོན་ནིན་སོགས་ཀྱི་གནས་ཚུལ་གོ་ཐོས་མེད་པར་གྱུར་ནས་ཟླ་མང་པོ་ཕྱིན་ཡོད་ཀྱང་ད་སྔ་བར་ཡོངས་བསྒྲགས་བྱས་མེད་པ་རོའུ་ཊར་གསར་ཁང་གིས་བརྗོད་འདུག
གསར་འགོད་པ། སྐལ་བཟང་སྦྱིན་པ།
