༸གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་ཕུལ། 

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་ལ་ཕེབས་ནས་བོད་མི་སྤྱི་ལ་བཀའ་སློབ་གནང་རྒྱུའི་ཉི་མ་ཞིག་ཤར་གྱི་རེད་ཅེས་བཀའ་སློབ་སྩལ་འདུག 

དེ་རིང་བཞུགས་སྒར་༧རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་སློབ་ཁྱིམ་སློབ་ཟུར་ཁག་ཅིག་དང་། མི་ལོ་ཉི་ཤུ་ལྷག་བོད་ཁྱིམ་དུ་ཕྱག་ལས་གནང་མཁན་ཁག དེ་བཞིན། སོག་ཡུལ་དང་མོན་རྟ་དབང་སོགས་ནས་ཕེབས་པའི་དད་ལྡན་དོན་གཉེར་ཅན་མི་གྲངས་ ༣༥༠ ལྷག་ལ་མཇལ་ཁ་སྩལ་ཡོད་པ་དང་། སྐབས་དེར་བོད་ཁྱིམ་གྱི་སློབ་ཟུར་ཚོས་༸གོང་ས་མཆོག་ལ་༧རྒྱལ་བའི་བཀའ་དྲིན་རྗེས་དྲན་གྱི་གཟེངས་རྟགས་ཤིག་ཀྱང་ཕུལ་ཡོད་པ་རེད།

དེའི་ཐད་བོད་ཁྱིམ་སྤྱི་ཁྱབ་ཡིག་ཚང་གི་སློབ་ཟུར་འབྲེལ་མཐུད་པ་དོན་འགྲུབ་ཚེ་རིང་ལགས་ཀྱིས་འདི་གའི་གསར་འགོད་པར། དེ་རིང་བོད་ཁྱིམ་གྱི་སློབ་ཟུར་སྡེ་ཚན་ངོས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་གཟེངས་རྟགས་ཤིག་ཕུལ་ཡོད། དེ་བཞིན་བོད་ཁྱིམ་གྱི་ཁྱིམ་ཚང་ཉི་ཤུ་ཡི་སློབ་ཟུར་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་ཨ་མ་རྗེ་བཙུན་པདྨ་མཆོག་ལ་གཟེངས་རྟགས་ཤིག་ཕུལ་སོང་། ད་བར་༧གོང་ས་རྒྱལ་བ་རིན་པོ་ཆེ་མཆོག་དང་ཨ་མ་རྗེ་བཙུན་པདྨ་མཆོག་རྣམ་གཉིས་ཀྱི་ཐུགས་རྗེ་བཀའ་དྲིན་ལ་བརྟེན་ནས་བོད་ཕྲུག་མང་པོ་ཞིག་འཚར་ལོངས་བྱུང་ཡོད་རེད་ལ། ད་ལྟའི་ཆར་འཛམ་གླིང་གང་སར་ཕྱག་ལས་གནངས་དང་གནང་མུས་རེད། དེ་འདྲ་ཡིན་དུས་ད་ལན་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་དང་ཨ་མ་རྗེ་བཙུན་པདྨ་མཆོག་ལ་གཟེངས་རྟགས་ཤིག་ཕུལ་བ་རེད། ཅེས་དང་། དེ་རིང་མཇལ་ཁའི་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། བོད་ལ་ཕེབས་ནས་བོད་མི་སྤྱི་ལ་བཀའ་སློབ་གནང་རྒྱུའི་ཉི་མ་ཞིག་ཤར་གྱི་རེད་ཅེས་བཀའ་སློབ་སྩལ་སོང་། ཞེས་བརྗོད་བྱུང་། 

ཡང་དོན་འགྲུབ་ཚེ་རིང་ལགས་ལགས་ཀྱིས། ཕྱི་ལོ་ ༡༩༩༩ ལོར་དྷ་སྟེང་བོད་ཁྱིམ་གྱི་འཛིན་གྲྭ་བཅུ་པ་འཐོན་མཁན་གྱི་སློབ་མ་དྲུག་ཅུ་ལྷག་ཅིག་དེ་རིང་འདིར་འཛོམས་ནས། ༧གོང་ས་རྒྱལ་བ་རིན་པོ་ཆེ་མཆོག་མུ་མཐུད་དུ་སྐུ་ཚེ་ཞབས་པད་བརྟན་སླད་དང་། མཛད་འཕྲིན་སྔར་བཞིན་རྒྱས་པའི་རྟེན་འབྲེལ་གྱི་མཚོན་ཆེད་དུ། ཐུབ་དབང་གི་སྐུ་ཞིག་ཕུལ་ཡོད། དེ་རིང་མི་ལོ་ཉི་ཤུ་ཙམ་གྱི་རྗེས་སུ་སློབ་ཟུར་མང་དག་ཅིག་ལྷན་འཛོམས་བྱེད་ཡོང་དུས་དགའ་སྐྱོ་ཟུང་འབྲེལ་གྱི་ཚོར་བ་ཞིག་དང་། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་རེས་གཟའ་ལྷག་དཀར་ཉིན་མཇལ་དུས། དགའ་སྐྱོ་ཟུང་འབྲེལ་གྱི་ཚོར་བ་ཞིག་བྱུང་། ཞེས་བརྗོད་བྱུང་། 

དེ་བཞིན་དགའ་ལྡན་ཕོ་བྲང་ཡིག་ཚང་གི་༧གོང་ས་རྒྱལ་བ་རིན་པོ་ཆ་ེམཆོག་གི་མཛད་འཆར་ལྟར་ན། ཕྱི་ཟླ་ ༡༡ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ཐེག་ཆེན་ཆོས་གླིང་གཙུག་ལག་ཁང་དུ་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་(CST) ཁག་བདུན་གྱི་སློབ་མ་ཟུར་པ་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་བཅས་ནས་འཚོག་གཏན་འཁེལ་བའི་བཀའ་དྲིན་རྗེས་དྲན་གྱི་མཛད་སྒོར་ཆིབས་བསྒྱུར་བསྐྱང་རྒྱུ། ཕྱི་ལོ་ ༢༠༢༦ ཟླ་ ༢ ཚེས་ ༢༣ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་ཚོགས་པ་གཉིས་ནས་ཇི་ལྟར་གསོལ་བ་བཏབ་པ་ལྟར་ཚེ་དཔག་མེད་དྭགས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།