ལོ་ངོ་ ༡༢༠༠ ལྷག་གི་ནང་པའི་གནས་ཤིག་ལ་མཐུན་རྐྱེན་ཞན་པའི་དཀའ་ངལ་འཕྲད།

ལོ་ངོ་ ༡༢༠༠ ལྷག་གི་ལོ་རྒྱུས་ལྡན་ཞིང་རྒྱ་གར་ལྷོ་ཕྱོགས་ཀྱི་མངའ་སྡེ་ཀེ་རི་ལའི་ནང་པའི་གནས་གཅིག་པུ་དེར་མཐུན་རྐྱེན་ཞན་པོ་ཡིན་པས་གནས་མཇལ་བར་དཀའ་ངལ་འཕྲད་ཀྱི་ཡོད་སྐོར་བརྗོད་འདུག

The Karumadikuttan memorial is located in the village of Karumadi, near Ambalapuzha in the Alappuzha district of Kerala, India. Photo: Kerala Tourism Department

དེ་རིང་རྒྱ་གར་གྱི་བང་ཆེན་གསར་པ་ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་ལྷོ་ཕྱོགས་ཀྱི་མངའ་སྡེ་ཀེ་རི་ལའི་ནང་དུ་ཡོད་པའི་ནང་པ་སངས་རྒྱས་པའི་ཤུལ་བཞག་གི་གནས་ཤིག་ལ་ད་ལྟའང་རྨང་གཞིའི་ཉར་ཚགས་དང་གནས་མཇལ་བའི་མཐུན་རྐྱེན་སོགས་བསྐྲུན་ཐུབ་ཀྱི་མེད་པའི་གནས་ཚུལ་ཐོན་འདུག་ཅིང་། ནང་པ་ནེ་ཤོ་བྷོ་དྷི་ (Nishu Boudh) ཞུ་བ་ཞིག་གིས་ད་ལྟ་ནང་པའི་གནས་དེར་མཇལ་བར་འགྲོ་སྐབས་ལམ་བར་དུ་གློག་མེད་ཁར་འཐུང་ཆུ་དང་གསང་སྤྱོད་སོགས་ཀྱང་མེད་པ་དང་ལྷག་པར་དུ་གནས་དེའི་ལོ་རྒྱུས་ཀྱི་གལ་གནད་སོགས་ཤེས་རྟོགས་ཐུབ་པའི་ཡིག་ཆ་གང་ཡང་མེད་པས། གནས་དེར་མཐུན་རྐྱེན་མཐུན་རྐྱེན་བསྐྲུན་རྒྱུ་གལ་ཆེན་ཡིན་སྐོར་སྐོར་བརྗོད་འདུག

ཕྱི་ལོ་ ༡༩༦༥ ལོར་༸གོང་ས་རྒྱལ་བ་རིན་པོ་ཆེ་མཆོག་ནང་པའི་གནས་ཡུལ་དེར་དངོས་སུ་ཕེབས་ནས། གནས་ཡུལ་སྲུང་སྐྱོབ་སོགས་ཀྱི་ལས་གཞིའི་ཆེད་དུ་ཧིན་སྒོར་འབུམ་ལྔ་ཞལ་འདེབས་སུ་ཕུལ་མྱོང་བ་དང་། ཀེ་རི་ལའི་འབྲེལ་ཡོད་ས་གནས་གཞུང་ལས་ཁང་གིས་ཞལ་འདེབས་དེ་ལ་བརྟེན་ནས་སངས་རྒྱས་ཀྱི་སྐུ་བརྙན་དེའི་སྟེང་དུ་ལྷ་ཁང་ཆུང་ཆུང་ཞིག་བཞེངས་ཡོད་འདུག དེ་ནས་ཕྱི་ལོ་ ༢༠༡༤ ལོར་ཀེ་རི་ལ་མངའ་སྡེའི་གནའ་རྫས་རྟོག་ཞིབ་ལས་ཁུངས་ཀྱིས་སངས་རྒྱས་ཀྱི་སྐུ་བརྙན་དེའི་མཐའ་རུ་ར་སྐོར་ཞིག་དང་ངལ་གསོ་ཁང་ཞིག་གསར་དུ་བསྐྲུན་ཡོད་པ་མ་ཟད། སྐོར་སྲུང་བ་གཅིག་ཀྱང་ལྟ་སྲུང་གི་སླད་དུ་བཞག་ཡོད་འདུག

ཀ་རུ་མ་དྷི་ཀུ་ཏན་རྗེས་དྲན་ཁང་ (Karumadikuttan Memorial) ཞེས་པ་ནི་ཀེ་རི་ལ་མངའ་སྡེ་ཁྱོན་ཡོངས་སུ་ཡོད་པའི་ནང་པའི་གནས་གཅིག་པུ་དེ་ཡིན་ཞིང་། ཀ་རུ་མ་དྷི་ཀུ་ཏན་ (Karumadi) ཞེས་པ་ནི་གནས་ཆགས་སའི་ས་གནས་གྲོང་གསེབ་ཀྱི་མིང་ཡིན་སྟབས། གནས་ཡུལ་གྱི་མིང་ལའང་ཀ་རུ་མ་དྷི་ཀུ་ཏན་རྗེས་དྲན་ཁང་ཞེས་བཏགས་ཡོད་པ་ལས། དོན་དངོས་ཐོག་གནས་དེར་སངས་རྒྱས་ཀྱི་སྐུ་རྟེན་ཞིག་ཡོད་པ་དང་། དེ་ནི་ཕྱི་ལོ་ ༡༩༣༠ ལོར་དབྱིན་ཇིའི་ཨར་ལས་འཆར་འགོད་པ་རོ་བྷར་ཊི་ (Robert Bristow) ལ་ཐོག་མར་རྙེད་སོན་བྱུང་ཡོད་འདུག

ཀེ་རི་ལ་མངའ་སྡེའི་གནའ་རྫས་རྟོག་ཞིབ་ལས་ཁུངས་ཀྱིས། ཀ་རུ་མ་དྷི་ཀུ་ཏན་རྗེས་དྲན་ཁང་གི་སངས་རྒྱས་ཀྱི་སྐུ་བརྙན་དེ། དུས་རབས་ ༩ བ་ནས་ ༡༤ བར་བྱུང་བའི་སྐུ་བརྙན་ཞིག་ཡིན་པར་ཡིད་ཆེས་བྱེད་ཀྱི་ཡོད་པ་དང་། ལོ་རེའི་ཕྱི་ཟླ་ ༥ ཚེས་ ༡ ཉིན་ཀེ་རི་ལའི་ནང་པ་སྟོང་ཕྲག་མང་པོ་གནས་དེར་འཛོམས་ཏེ་སངས་རྒྱས་བཅོམ་ལྡན་འདས་སྐུ་བལྟམས་པ་དང་སངས་རྒྱས་པ། མྱ་ངན་ལས་འདས་པ་བཅས་ཀྱི་དུས་ཆེན་སྲུང་གཙི་ཞུ་སྲོལ་ཡོད་མུས་ཡིན་འདུག་ལ། ཀ་རུ་མ་དྷི་ཀུ་ཏན་རྗེས་དྲན་ཁང་ནི་སྤྱི་ལོ་སྔོན་གྱི་དུས་རབས་ ༣ ནང་ཀེ་རི་ལ་མངའ་སྡེ་རུ་ནང་ཆོས་དར་ཁྱབ་བྱུང་རྗེས་ཀྱི་ཤུལ་ལུས་རིག་དངོས་གཅིག་པུ་དེ་ཡང་ཡིན་འདུག

གསར་འགོད་པ། སྐལ་བཟང་སྦྱིན་པ།