བཙན་བྱོལ་བོད་མིའི་སློབ་གྲྭ་ཁག་སྤྱིའི་ཤེས་ཡོན་གྱི་ལས་དོན་ལ་དབྱེ་ཞིབ་གནང་སླད་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་མཆོག་གིས་རྒྱ་གར་དབུས་ཁུལ་དུ་གཞུང་འབྲེལ་སྐོར་སྐྱོད་གནང་བཞིན་འདུག
ཟླ་འདིའི་ཕྱི་ཚེས་ ༣༠ ནས་ཕྱི་ཟླ་ ༡༡ ཚེས་ ༧ བར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་རྒྱ་གར་དབུས་ཁུལ་དུ་རྟེན་གཞི་བྱས་པའི་སློབ་གྲྭ་ཁག་ཏུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༣༡ ཉིན་ཤེས་རིག་བཀའ་བློན་མཆོག་གིས་སྦན་ད་ར་ནོར་རྒྱས་གླིང་གཞིས་ཆགས་ཀྱི་ཕ་མ་རྣམས་ལ་ཐུག་འཕྲད་ཀྱིས་སློབ་ཕྲུག་རྣམས་ཀྱི་ཤེས་ཡོན་ཡར་རྒྱས་གཏོང་ཕྱོགས་སྐོར་གསུང་བཤད་གནང་ཡོད་འདུག་ལ། ཐེངས་འདིའི་གཞུང་འབྲེལ་འཚམས་གཟིགས་ནི་དགེ་རྒན་དང་སློབ་ཕྲུག ལས་བྱེད་སོགས་ལ་་ཐུག་འཕྲད་གནང་སྟེ་སློབ་གྲྭ་སྤྱིའི་ཤེས་ཡོན་གྱི་ལས་དོན་ལ་དབྱེ་ཞིབ་བྱེད་པར་དམིགས་པ་ཞིག་ཡིན་འདུག
ཁ་སང་ཕྱི་ཚེས་ ༣༠ ཉིན་ཤེས་རིག་བཀའ་བློན་མཆོག་གིས་སྦན་ད་ར་གྷོ་ཌན་གའུ་སཾ་བྷོ་ཊ་ཉིན་སློབ་ཏུ་གཟིགས་ཞིབ་ཀྱིས་སློབ་གྲྭའི་སྤྱི་ཡོངས་ཀྱི་གནས་སྟངས་ལ་རྒྱུས་ལོན་གནང་ཞིང་། དགེ་རྒན་གྱི་ལམ་སྟོན་དང་ལྟ་རྟོག་འོག་སློབ་ཕྲུག་གིས་སྣེ་ཁྲིད་དེ་ཞོགས་ཚོགས་གཙོ་སྐྱོང་བྱས་པར་བསྔགས་བརྗོད་དང་། དེའི་ཐོག་ནས་སློབ་ཕྲུག་གིས་མཉམ་ཞུགས་དང་འགན་འཁུར་གྱི་ཡོད་པ་མཚོན་ཐུབ་ལ། སློབ་ཕྲུག་རྣམས་ཀྱིས་རོལ་ཆ་དང་ལག་རྩལ་སོགས་སྦྱོང་བཞིན་པར་ཡི་རངས་བསྔགས་བརྗོད་གནང་ཞིང་། ལས་རིམ་དེ་དག་གིས་བོད་མིའི་ངོ་བོ་དང་རིག་གཞུང་སྲུང་སྐྱོབ་བྱེད་པར་གལ་ཆེའི་ནུས་པ་འདོན་གྱི་ཡོད། ཅེས་དང་། སློབ་གྲྭའི་གནས་སྟངས་ལ་གཞིགས་ནས་སློབ་ཕྲུག་གི་གྲངས་འབོར་མང་ཉུང་ལ་མ་ལྟོས་པར་ཤེས་ཡོན་གྱི་སྤུས་ཚད་ལེགས་པོ་སྤྲོད་རྒྱུ་གལ་ཆེན་ཡིན་སྐོར་དང་། སློབ་གྲྭ་ཆེ་ཆུང་གང་འདྲ་ཞིག་ཡིན་རུང་སློབ་ཕྲུག་རྣམས་ལ་ཤེས་ཡོན་དང་བཟང་སྤྱོད་ཀྱི་སློབ་གསོ་སྤྲོད་དགོས་གལ་ཆེ་སྐོར་སོགས་གསུངས་འདུག
ཕྱི་ཚེས་ ༢༩ ཉིན་གྱི་སྔ་དྲོར་ཤེས་རིག་བཀའ་བློན་མཆོག་ནཱག་པུར་ (Nagpur) དུ་ཕེབས་འབྱོར་བྱུང་སྟེ། ནཱག་པུར་བོད་མིའི་སྐྱབས་བཅོལ་སུད་ཚོང་གི་ཁྲོམ་རྭར་ཕེབས་ཏེ། ཚོང་པ་ ༧༥ ཙམ་ལ་ཐུག་འཕྲད་གནང་ཡོད་ཅིང་། སྐབས་དེར་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། བོད་མི་སུད་ཚོང་བ་རྣམས་ཀྱིས་སོ་སོའི་ལས་ལ་བརྩོན་པའི་ཐོག་སྒྲིག་འཛུགས་ལྡན་པའི་ཐོག་ནས་གཅིག་ཕན་གཅིག་གྲོགས་གནང་བཞིན་པར་བསྔགས་བརྗོད་གནང་བ་དང་། ཚོང་གི་ལས་དོན་གཉེར་སྐབས་རྒྱ་གར་གྱི་ཡུལ་མི་དང་ལྷན་དུ་འབྲེལ་ལམ་ལེགས་པོ་དགོས་གལ་ཆེ་བ་དང་། ༧གོང་ས་རྒྱལ་བ་རིན་པོ་ཆེ་མཆོག་གིས་གཙོས་རྒྱ་གར་གཞུང་མང་གཉིས་བཀའ་དྲིན་ཆེན་པོ་ཡིན་སྐོར་སོགས་གསུངས་འདུག
ཕྱི་ཚེས་ ༢༨ ཉིན་ཤེས་རིག་བཀའ་བློན་མཆོག་ལྡི་ལི་སྐུ་ཚབ་དོན་ཁང་དུ་ཤེས་རིག་དཔར་ཁང་དགེ་རྩ་ཚོགས་པའི་འགན་འཛིན་ལྷན་ཚོགས་ཐེངས་ ༥༤ པར་མཉམ་ཞུགས་ཀྱིས་ཤེས་རིག་དཔར་ཁང་གི་འཛིན་སྐྱོང་དང་འབྲེལ་བའི་གནད་དོན་མང་དག་ཅིག་གི་ཐོག་གྲོས་གཞི་གཏན་འབེབས་བཞིན་བཀའ་བསྡུར་གནང་བ་དང་། འཛིན་སྐྱོང་ཚགས་ཚུད་ཡོང་སླད་བྱེད་སྒོ་ཁག་ནར་འགྱངས་མེད་པར་ཐག་གཅོད་གནང་དགོས་པའི་ལམ་སྟོན་གནང་ཡོད་འདུག
མཛད་འཆར་ལྟར་ན། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་མན་སྤར་ཕན་བདེ་གླིང་གཞིས་ཆགས་དང་ཨོ་ཌི་ཤ་ཕུན་ཚོགས་གླིང་གཞིས་ཆགས་སུ་ཡོད་པའི་བོད་པའི་སློབ་གྲྭ་ཁག་ཏུ་གཞུང་འབྲེལ་སྐོར་སྐྱོད་གནང་རྒྱུ་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
