རྒྱ་ནག་གཞུང་གིས་བོད་ཕྲུག་ས་ཡ་གཅིག་ཙམ་བཅའ་སྡོད་སློབ་གྲྭའི་ནང་བཙན་གྱིས་བཅུག་པའི་དམར་པོའི་སྲིད་བྱུས་ལ་རྒྱལ་སྤྱིའི་ཐོག་ནས་སྐྱོན་བརྗོད་གནང་བཞིན་པ་དེ་ལས་གཡོལ་བའི་ཆེད་དུ་རྒྱལ་སྤྱིའི་ཚོགས་འདུ་ཟེར་བ་ཞིག་བསྡུས་འདུག
རྒྱ་ནག་དམར་གཞུང་གིས་ཕྱི་ལོ་ ༢༠༢༥ ལོ་བསླེབ་སྐབས་རྒྱལ་ཡོངས་མི་མང་གི་བརྒྱ་ཆ་ ༨༥ ཡིས་རྒྱའི་སྐད་ཡིག་གཙོ་བོར་བེད་སྤྱོད་པ་དང་། ཕྱི་ལོ་ ༢༠༣༥ ལོ་བསླེབ་སྐབས་རྒྱལ་ཡོངས་ཀྱི་གྲོང་གསེབ་དང་གྲངས་ཉུང་མི་རིགས་ཁྲོད་རྒྱའི་སྐད་ཡིག་ནི་སྲོག་ཤིང་ལྟ་བུ་ཞིག་ཏུ་བསྒྱུར་བའི་འཆར་གཞི་ལག་བསྟར་གཟབ་ནན་བྱེད་བཞིན་ཡོད་པ་ལྟར། བོད་ཁུལ་དུ་བཅའ་སྡོད་སློབ་གྲྭ་མང་པོ་ཆེད་འཛུགས་བྱས་ཏེ་བྱིས་པ་ལོ་ ༤ ཙམ་ནས་བཟུང་ཕ་མ་སོགས་ཁྱིམ་མིར་ཁ་བྲལ་དུ་བཅུག་པའི་རྐྱེན་གྱིས་བོད་ཀྱི་སྤྱི་ཚོགས་དང་སྐད་ཡིག་རིག་གཞུང་ལ་ཧ་ཅང་ཁ་ཐག་རིང་པོ་ཆགས་ཏེ། ཐ་ན་ཕ་མ་དང་བུ་ཕྲུག་བར་སྐད་བརྡ་མ་འཕྲོད་པའི་དཀའ་ངལ་འཕྲད་བཞིན་ཡོད་པར་བརྟེན། ཨ་རི་དང་ཡོ་རོབ་སོགས་ཀྱིས་བོད་མི་ཚོར་སོ་སོའི་ཆོས་དང་རིག་གཞུང་སྐད་ཡིག་སྦྱོང་བའི་རང་དབང་སྤྲོད་དགོས་པ་དང་། བོད་ཕྲུག་རྣམས་བཙན་གྱིས་བཅའ་སྡོད་སློབ་གྲྭའི་ནང་འཇུག་བཞིན་པ་མཚམས་འཇོག་དགོས་པའི་འབོད་སྐུལ་རིམ་པར་གནང་ཡོད་པ་སོགས་ལས་གཡོལ་ཆེད། ཉེ་སྔོན་ཕྱི་ཟླ་ ༡༠ ཚེས་ ༢༧ ཉིན་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་གློག་རྡུལ་ཚན་རྩལ་སློབ་ཆེན་དུ། བཅའ་སྡོད་སློབ་གསོ་དང་མཐོ་སྒང་འཕེལ་རྒྱས་ཀྱི་རྒྱལ་སྤྱིའི་བགྲོ་གླེང་ཚོགས་འདུ་ཟེར་བ་ཞིག་བསྡུས་ཏེ། ཨ་རི། དབྱིན་ཡུལ། ཁེ་ན་ཌ་སོགས་ཀྱི་ཆེད་མཁས་མི་སྣས་བཅའ་སྡོད་སློབ་གྲྭའི་སློབ་གསོ་ནི་སློབ་གསོ་དོ་མཉམ་ཡོང་ཐབས་གལ་ཆེན་ཡིན་སྐོར་དང་། མི་རིགས་མང་པོའི་བར་གྱི་འབྲེལ་འདྲིས་དང་བརྗེ་རེས་ལ་སྐུལ་འདེད་གཏོང་ཐུབ་པ་སོགས་ཀྱི་དགེ་མཚན་ཡོད་སྐོར་བརྗོད་ཡོད་ལུགས་བསྒྲགས་འདུག
ཚོགས་ཐོག་ཏུ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཁང་ཟེར་བའི་སྤྱི་ཁྱབ་འགན་འཛིན་གཞོན་པ་བཀྲ་བློ་ཡིས། བོད་ཀྱི་བཅའ་སྡོད་སློབ་གྲྭ་ནི་མི་རིགས་རིག་གནས་ལ་བརྩི་འཇོག་དང་ཐུན་མོང་མ་ཡིན་པའི་རང་བྱུང་དང་ས་ཁམས་ཆ་རྐྱེན་ལ་བསྟུན་ནས་རིམ་བཞིན་འཕེལ་རྒྱས་བྱུང་བའི་སློབ་གསོའི་དཔེ་སྟོན་ཞིག་ཡིན་པ་མ་ཟད། དུས་རབས་ཉི་ཤུ་བའི་ལོ་རབས་ ༥༠ ནང་ནས་བཟུང་བོད་རང་སྐྱོང་ལྗོངས་ཀྱི་ས་གནས་སྲིད་གཞུང་གི་རྟ་ཐོག་སློབ་གྲྭ་དང་སྦྲ་གུར་སློབ་གྲྭ་སོགས་སློབ་གྲྭའི་ཐབས་ལམ་སྣ་ཚོགས་ཚུད་པའི་འབྲོག་པའི་ས་གནས་དང་འཚམ་པའི་ཤེས་ཡོན་གྱི་རྣམ་པ་འཚོལ་ཞིབ་བྱེད་མགོ་ཚུགས་ཡོད། དུས་རབས་ཉི་ཤུའི་ལོ་རབས་ ༨༠ ནས་བཟུང་བཅའ་སྡོད་སློབ་གསོ་ལ་རྒྱལ་ཁབ་གཞུང་ནས་རྒྱབ་སྐྱོར་ཤུགས་ཆེན་ཐོབ་སྟེ། སློབ་གསོའི་སྤུས་ཚད་འཕེལ་རྒྱས་དང་སློབ་གསོའི་འདྲ་མཉམ་ལ་སྐུལ་འདེད་གཏོང་བའི་ཐབས་ལམ་གལ་ཆེན་ཞིག་ཏུ་གྱུར་ཡོད། ཅེས་བརྗོད་འདུག
དེ་བཞིན་ཚོགས་འདུའི་ཐོག་བཅའ་སྡོད་སློབ་གྲྭའི་སློབ་གསོ་ནི་སློབ་གསོ་འདྲ་མཉམ་འཕེལ་རྒྱས་ལ་སྐུལ་འདེད་གཏོང་བའི་ཐབས་ལམ་གལ་ཆེན་ཞིག་ཡིན་པས་མཐོ་སྒང་དང་གྲངས་ཉུང་མི་རིགས་ས་ཁུལ་དུ་གལ་ཆེའི་ནུས་པ་འདོན་གྱི་ཡོད་པ་དང་། དེས་སློབ་གསོའི་ཐོབ་ཐང་དང་སློབ་ཁྲིད་ཀྱི་ཆུ་ཚད་གོང་འཕེལ་བཏང་བ་ཙམ་མིན་པར་མི་རིགས་ཕན་ཚུན་བར་རིག་གནས་བརྗེ་རེས་དང་མཉམ་འདྲེས་ལ་སྐུལ་འདེད་བཏང་་ཡོད། རྒྱ་ནག་གཞུང་གིས་བཅའ་སྡོད་སློབ་གྲྭའི་སློབ་གསོ་འཚོལ་ཞིབ་བྱས་པ་བརྒྱུད། མཐོ་སྒང་དུ་གནས་བའི་གྲངས་ཉུང་མི་རིགས་ཀྱི་ས་གནས་སུ་སློབ་གསོ་འདྲ་མཉམ་དུ་འཕེལ་རྒྱས་སུ་གཏོང་བར་ཕན་ཐོགས་ཆེན་པོ་བྱུང་ཡོད་ལུགས་བསྒྲགས་འདུག
ཕྱི་ལོ་ ༢༠༢༣ ལོའི་ཟླ་ ༡༢ ཚེས་ ༡༤ ཉིན་ཧྥ་རན་སིའི་གྲོང་ཁྱེར་སི་ཊར་སི་སྦག་ (Strasbourg) ཏུ་ཚོགས་པའི་ཡུ་རོབ་གྲོས་ཚོགས་སྟེང་། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ཙམ་རང་གི་ཕ་མ་དང་ཁ་བྲལ་དུ་བཏང་ནས་བཅའ་སྡོད་སློབ་གྲྭར་བཅུག་སྟེ། རྒྱ་སྒྱུར་སློབ་གསོ་སྤེལ་བའི་སྲིད་ཇུས་ལག་བསྟར་འཕྲལ་དུ་མཚམས་འཇོག་དགོས་པའི་གྲོས་ཆོད་ཅིག་གཏན་འབེབ་བྱུང་ཡོད་ཅིང་། གྲོས་ཆོད་དེའི་ནང་རྒྱ་ནག་གི་མགོ་ཁྲིད་ཞི་ཅིན་ཕིང་གི་སྣེ་ཁྲིད་འོག་རྒྱ་གཞུང་གིས་བོད་ནང་དྲག་གནོན་དང་དམ་དྲག་ཤུགས་ཆེན་གྱི་ལམ་ལུགས་དང་སྲིད་ཇུས་ལག་བསྟར་འོག བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པས། ཡུ་རོབ་མཐུན་ཚོགས་དང་རྒྱ་ནག་བར་གྱི་འབྲེལ་ལམ་ནང་འགྲོ་བ་མིའི་ཐོབ་ཐང་ལ་བརྩི་འཇོག་དང་། དམངས་གཙོ་དང་དེའི་ཁྲིམས་ལུགས་གཙོ་གནད་ངེས་པར་དུ་དགོས་པ་དང་། རྒྱ་ནག་གི་དཔོན་རིགས་ཀྱིས་དབང་ཆ་བེད་སྤྱད་དེ་བོད་ནང་གི་བྱིས་པ་ལོ་ན་ ༤ ནས་ ༡༨ བར་གྱི་ཕྲུ་གུ་རྣམས་ལ་བོད་ཀྱི་སྐད་ཡིག་དང་རིག་གཞུང་སོགས་གཞི་རྩའི་སློབ་སྦྱོང་མི་སྤྲོད་པར་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤེལ་བཞིན་པའི་ལམ་ལུགས་ལག་བསྟར་དང་། ལམ་ལུགས་དེའི་འོག་ནས་བོད་ཀྱི་སྐད་ཡིག་དང་རིག་གཞུང་། ལོ་རྒྱུས་སོགས་རྩ་མེད་གཏོང་སླད་བོད་ཕྲུག་བརྒྱ་ཆ་ ༨༠ ཙམ་དང་། ཡང་ན་བོད་ཕྲུག་ས་ཡ་ ༡ ཙམ་ཕ་མ་དང་ཁ་བྲལ་དུ་བཏང་ནས་རྒྱ་སྒྱུར་སློབ་གསོ་སྤྲོད་པའི་ཐོག རང་གི་སྐད་ཡིག་དང་རིག་གཞུང་སྲུང་སྐྱོབ་སླད་གཞུང་སྒེར་གཉིས་ཀྱི་སློབ་གྲྭ་འཛུགས་མི་ཆོག་པ་སོགས་དམ་དྲག་སྔར་ལྷག་བྱེད་པའི་སྐོར་དང་། དེ་སྔ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེད་ལས་པ་རྣམས་ཀྱིས་བོད་ནང་གི་བཅའ་སྡོད་སློབ་གྲྭའི་སྲིད་ཇུས་དང་། བོད་ཕྲུག་རྣམས་ཕ་མ་དང་ཁ་བྲལ་དུ་བཅུག་པ་སོགས་རང་གི་སྐད་ཡིག་དང་རིག་གཞུང་བཀོལ་སྤྱོད་བྱེད་མི་བཅུག་པ་སོགས་ལ་བློ་འཚབ་ཡོད་པ་དང་། གཏན་འཇགས་སློབ་གྲྭ་བཙུགས་པའི་སྲིད་ཇུས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་དང་འགལ་གྱི་ཡོད་པ་དང་། བོད་ཀྱི་སྐད་ཡིག་དང་རིག་གཞུང་སོགས་རྩ་མེད་གཏོང་ཐབས་ཀྱི་སྲིད་ཇུས་སྐོར་སོགས་བཀོད་ཡོད་པ་རེད།
ཕྱི་ལོ་ ༢༠༢༠ ཟླ་ ༡༡ ཚེས་ ༣༠ ཉིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ལ་སྙན་ཞུ་ཞིག་ཕུལ་ཡོད་པའི་ནང་། རྒྱལ་ཚོགས་འགྲོ་བ་མིའི་ཐོང་ཐང་ལྷན་ཁང་གིས་བོད་ནང་གི་བྱིས་པ་རྣམས་ཁྱིམ་མི་དང་ཁ་བྲལ་ནས་རྒྱ་གཞུང་གི་བཅའ་སྡོད་སློབ་གྲྭར་སྐྱེལ་བཞིན་ཡོད་པའི་སྙན་ཐོའི་ཐོག་དོ་སྣང་གནང་དགོས་པའི་རེ་འདུན་ཞུས་ཡོད། ང་ཚོས་སྲིད་ཇུས་འདི་ནི་འགྲོ་བ་མིའི་ཐོབ་ཐང་རྡོག་རོལ་དང་། སྐད་ཡིག་རིག་གཞུང་རྩ་གཏོར་གཏོང་བའི་ཉེན་ཚབས་ཆེ་བའི་གནད་དོན་ཞིག་ཏུ་ངོས་འཛིན་བྱེད་ཀྱི་ཡོད་ལ། རྒྱལ་ཚོགས་ནས་ཞིབ་འཇུག་ནན་མོ་བྱ་དགོས་པའི་རེ་བ་ཞུ་བཞིན་ཡོད། ཨ་རིའི་གྲོས་ཚོགས་རྒྱ་ནག་ལས་དོན་ཚོགས་ཆུང་གིས་རྒྱ་གཞུང་གི་གྲངས་ཉུང་མི་རིགས་ཀྱི་དབང་ཚད་ཐད་ཀྱི་གནད་དོན་རྣམས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཁག་ལ་སྙན་སེང་ཞུས་ཡོད་ཅེས་བློ་འཚབ་ཆེན་པོ་འབོད་སྐུལ་གནང་ཡོད་པ་རེད།
ཕྱི་ལོ་༢༠༢༡ ལོའི་རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་གི་སྙན་ཐོའི་ནང་དུ། རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་འཇུག་གི་ཡོད་པ་དང་། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་སྐོར་སོགས་བཀོད་ཡོད་པ་རེད།
ཕྱི་ལོ་ ༢༠༢༡ ལོར་རྒྱ་ནག་གཞུང་ཕྱོགས་ཀྱི་སློབ་གསོའི་ཡིག་ཆ་ཁག་གི་ནང་དུ། ཕྱི་ལོ་ ༢༠༢༥ ལོར་བསླེབ་སྐབས་རྒྱལ་ཡོངས་མི་མང་གི་བརྒྱ་ཆ་ ༨༥ ཡིས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སྟེ་རྒྱའི་སྐད་ཡིག་གཙོ་བོར་བེད་སྤྱོད་པ་དང་། ཕྱི་ལོ་ ༢༠༣༥ ལོར་བསླེབ་སྐབས་རྒྱལ་ཡོངས་ཀྱི་གྲོང་གསེབ་དང་གྲངས་ཉུང་མི་རིགས་ཁྲོད་རྒྱའི་སྐད་ཡིག་ནི་སྲོག་ཤིང་ལྟ་བུ་ཞིག་ཏུ་བསྒྱུར་བའི་འཆར་གཞི་ལག་བསྟར་དོ་ནན་དགོས་སྐོར་སྐུལ་འདེད་ནན་པོ་བཏང་དང་གཏོང་བཞིན་ཡོད་པ་མ་ཟད། བོད་ཁུལ་གྱི་དགོན་སྡེ་ཁག་ལའང་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་ལྟ་སྤྱོད་གོང་འཕེལ་དུ་གཏོང་བ་ཞེས་པའི་སྲིད་ཇུས་འོག བླ་གྲྭ་རྣམས་ལའང་རྒྱ་ཡིག་རྒྱ་སྐད་ཐོག་དམར་ཤོག་ཀྱི་ཆབ་སྲིད་སློབ་གསོ་ཤུགས་ཆེན་སྤྲོད་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
