བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བཅུ་གཅིག་པ་དབུ་འཛུགས་གནང་སོང་།

དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེས་ལོ་རྒྱུས་དང་རིག་ཚན་གང་གི་ཐད་ནས་ཀྱང་རིགས་གཅིག་རྐང་འཛིན་དེ་གལ་ཆེན་པོ་ཆགས་བསྡད་ཡོད་ཅེས་གསུངས་སོང་།

དེ་རིང་ཕྱི་ཚེས་ ༣ ཉིན་གྱི་སྔ་དྲོ་ཆུ་ཚོད་ ༩།༢༠ སྟེང་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཟླ་འདིའི་ཕྱི་ཚེས་ ༣ དང་ ༤ ཉིན་རིང་གི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བཅུ་གཅིག་པ་དེ་དབུ་འཛུགས་གནང་སོང་བ་དང་། ཚོགས་འདུ་དབུ་འབྱེད་ཀྱི་མཛད་སྒོའི་སྟེང་སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་དང་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་དང་སྲིད་བྱུས་ཉམས་ཞིབ་ཁང་གི་འགན་འཛིན་གཅིག་ལྕོགས་ཀརྨ་ཆོས་དབྱིངས་ལགས། བོད་ཀྱི་ལོ་རྒྱུས་མཁས་དབང་ཇོ་སྲས་བཀྲ་ཤིས་ཚེ་རིང་ལགས། དེ་བཞིན་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་ཝཱ་ཎ་གཙུག་ལག་སློབ་གཉེར་ཁང་། ས་རཱ་མཐོ་སློབ་སོགས་ནས་ཕེབས་པའི་ཚོགས་བཅར་བ་དང་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ལས་བྱེད་བཅས་འཛོམས་པའི་ཐོག ཡང་སྟེང་རིན་པོ་ཆེ་དང་ཀརྨ་ཆོས་དབྱིངས་རྣམ་གཉིས་ཀྱིས་ཚོགས་འདུ་དང་འབྲེལ་བའི་གསུང་བཤད་གནང་སོང་ལ། ཇོ་སྲས་བཀྲ་ཤིས་ཚེ་རིང་ལགས་ཀྱིས་བགྲོ་གླེང་གི་ཚོགས་ཐུན་དང་པོའི་སྟེང་གསུང་བཤད་གནང་སོང་།

བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཅིག་ལྕོགས་ཀརྨ་ཆོས་དབྱིངས་ལགས་ཀྱིས་ཕེབས་བསུའི་གསུང་བཤད་གནང་སྐབས། ད་ལྟ་རྒྱ་ནག་གཞུང་གིས་བོད་ནང་སྲིད་ཇུས་འདྲ་མིན་ཞིག་ལག་བསྟར་བྱེད་བཞིན་པ་དང་ལྷག་པར་དུ་བོད་མི་རིགས་རྩ་མེད་དུ་གཏོང་བའི་སྲིད་ཇུས་ལག་བསྟར་བྱས་ནས་འགྲོ་བཞིན་ཡོད། ད་ལྟ་ཉམས་ཞིབ་པ་ཚོས་རྒྱ་ནག་གཞུང་གིས་བོད་ཀྱི་སྐོར་ལ་འཁྱོག་བཤད་ལུང་པ་གང་བྱས་ནས་བསྡད་ཡོད་པའི་ཐད་ཞིབ་འཇུག་བྱས་ཏེ་གདོང་ལེན་གནང་རྒྱུ་གལ་ཆེན་ཡིན། བོད་པའི་རྩ་དོན་འཐབ་རྩོད་དང་འབྲེལ་བའི་ཐོག་ལ་རྩོམ་ཡིག་འབྲི་བ་དང་སྐད་ཆ་བཤད་པ། ཡིག་ཆ་འགྲེམས་སྤེལ་སོགས་བྱ་རྒྱུ་ནི་ང་ཚོའི་འགན་ཆགས་བསྡད་ཡོད། ང་ཚོ་བོད་པའི་ཉམས་ཞིབ་པ་ཡིན་ཟེར་བཞིན་རྒྱལ་སྤྱིའི་ཆབ་སྲིད་སོགས་ཀྱི་སྐོར་ལ་ཉམས་ཞིབ་བྱ་རྒྱུ་གལ་ཆེན་ཡིན་ཡང་བོད་དང་བོད་རྒྱའི་བཀའ་རྙོག་སོགས་ལ་འབྲེལ་བ་མ་བཏགས་ཚེ་དགེ་མཚན་གང་ཡང་མཐོང་གི་མི་འདུག ང་ཚོ་བོད་ཀྱི་སྲིད་བྱུས་ཉམས་ཞིབ་ཁང་དང་བོད་པའི་ཚོགས་སྡེ་ཁག དེ་བཞིན། བོད་མི་སྒེར་བ་སོགས་སུ་ཡིན་ཡང་ཚང་མས་བོད་ཀྱི་རྩ་དོན་དང་བོད་རྒྱའི་དཀའ་རྙོག་སེལ་ཐབས་བྱ་རྒྱུ་དེ་གཙོ་བོ་ཆགས་བསྡད་ཡོད་ཅེས་གསུངས་སོང་།

སྐུ་མགྲོན་གཙོ་བོ་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེས། དེ་རིང་ཉམས་ཞིབ་པའི་ཁྲོད་ལོ་རྒྱུས་དང་བརྡ་སྤྲོད། ཆབ་སྲིད། ནང་ཆོས་ལ་ཉམས་ཞིབ་གནང་མཁན་ཡང་འདུག རྣམ་པ་ཚོས་ང་ཚོ་བོད་ཀྱི་ལོ་རྒྱུས་དང་ཆབ་སྲིད། བརྡ་སྤྲོད། ནང་དོན་རིག་པའི་སྡེ་ཚན་བྱེ་བྲག་པར་ཞིབ་འཇུག་བྱས་ཏེ། ཆེད་མཁས་པ་དང་རིགས་གཅིག་རྐང་འཛིན་གནང་བཞིན་པར་ཧ་ཅང་དགའ་བོ་བྱུང་། གལ་ཆེན་པོ་རེད། འདས་པའི་ལོ་ངོ་བཅུ་ཕྲག་དུ་མའི་གོང་ནས་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་རིགས་གཅིག་རྐང་འཛིན་པ་དགོས་ཀྱི་འདུག་ཅེས་ཡང་ཡང་གསུངས་ཡོད། ལོ་རྒྱུས་ལ་སོགས་དཔེར་ན་ནང་དོན་རིག་པར་ཆ་མཚོན་ན་དབུ་མ་རིགས་གཅིག་རྐང་འཛིན་པ་དང་ཕར་ཕྱིན་རིགས་གཅིག་རྐང་འཛིན་པ་དགོས་ཀྱི་འདུག རིགས་གཅིག་རྐང་འཛིན་བྱས་པ་ཡིན་ན། ཕར་ཕྱིན་དང་འབྲེལ་བའི་རིགས་གཅིག་རྐང་འཛིན་པས་ཕར་ཕྱིན་དང་འབྲེལ་བའི་གཞུང་ལུགས་ཆ་ཚང་ལ་བལྟས་ཏེ། གཙང་མ་དང་ཆ་ཚང་བ། ཁུངས་བརྟན་པོ་ཡག་པོ་ཞིག་ཡོང་ཐུབ་ཀྱི་ཡོད། དེར་བརྟེན། གཞུང་ཆེན་པོ་སོ་སོར་རིགས་གཅིག་རྐང་འཛིན་པ་དགོས་ཀྱི་འདུག་ཅེས་བཀའ་སློབ་གནང་ཡོད། དངོས་ཡོད་གནས་ཚུལ་ལའང་དགོས་ཀྱི་ཡོད། རིགས་གཅིག་རྐང་འཛིན་བྱས་པ་ཡིན་ན། གོང་དུ་ཞུས་པ་བཞིན་གཞུང་སོ་སོའི་དགོངས་པ་དང་དོན་ཆ་ཚང་མཁྱེན་རྟོགས་ཐུབ་པའི་རིགས་གཅིག་རྐང་འཛིན་པ་ཡོང་ཐུབ་ཀྱི་ཡོད། དེ་མིན་ང་ཚོས་ཐོས་བསམ་བྱེད་བཞིན་པའི་སྐབས་མི་གཅིག་གིས་གཞུང་ཚང་མར་གཟིགས་ཀྱི་ཡོད་པ་དང་གཞུང་འཁྲིད་པའི་སྐབས་སུ་དགེ་ལགས་གཅིག་གིས་གཞུང་ལུགས་ཚང་མ་འཁྲིད་ཀྱི་ཡོད་ལ། མི་ཚེ་ཧྲིལ་པོའི་དེའི་སྟེང་དུ་བཏང་བ་ཡིན་ན་དེར་དམིགས་བསལ་གྱི་ནུས་པ་ཞིག་ཡོད་ཀྱང་། རིགས་གཅིག་རྐང་འཛིན་བྱས་པ་ཡིན་ན། དེ་ལས་ལྷག་གིས་ཞིབ་ཚགས་དང་ཚགས་ཚུད་པོ་ཡོང་གི་རེད་བསམས་ནས་རྒྱུན་དུ་སེམས་ནང་འཁོར་བསྡད་ཡོད། བོད་ལ་གང་ཟག་གཅིག་གིས་གཞུང་བཀའ་པོད་ཆ་ཚང་ལ་སློབ་གཉེར་བྱས་པ་དང་གཞུང་ལུགས་བྲིས་པ་སོགས་བྱས་ཚེ་གཞུང་ལུགས་རང་སྐྱ་ལ་མཁས་པ་ཟེར་ནས་མཁས་པའི་ཚུལ་ཆོས་ལོན་པ་ཏན་ཏན་ཡོང་གི་ཡོད་རྒྱུ་རེད། ཁག་ཅིག་ལ་མཚན་ཉིད་ཆ་ཚང་བ་ཞིག་ཡོང་གི་ཡོད་པ་དང་མང་པོ་ཞིག་ལ་མཚན་ཉིད་ཆ་ཚང་བ་ཞིག་ཡོང་གི་ཡོད་མེད་ཧ་གོ་མ་སོང་། གང་ལྟར་ང་ཚོས་རྒྱ་གར་ལ་བལྟས་པ་ཡིན་ན། དབུ་མའི་བསྟན་བཅོས་རྩོམ་མཁན་གྱི་མཁས་པ་ཞིག་ཡིན་ན་དབུ་མ་རང་མ་གཏོགས་ཕར་ཕྱིན་སོགས་ཀྱི་དགོངས་འགྲེལ་མཛད་པ་ཞེ་དྲགས་མཐོང་རྒྱུ་མི་འདུག དེར་བརྟེན། ལོ་རྒྱུས་དང་རིག་ཚན་གང་གི་ཐད་ནས་ཀྱང་རིགས་གཅིག་རྐང་འཛིན་དེ་གལ་ཆེན་པོ་ཆགས་བསྡད་ཡོད། ཅེས་གསུངས་སོང་།

ཐེངས་འདིའི་ཚོགས་འདུའི་ཐོག་བོད་པའི་མཐོ་སློབ་ཁག་ཏུ་འབུམ་རམས་པ་དང་འབུམ་རམས་སློབ་མ། གཙུག་ལག་རབ་འབྱམས་པའི་སློབ་སྦྱོང་གནང་བཞིན་པ་སོགས་ཁྱོན་ཚོགས་བཅར་བ་ ༢༦ གིས་མཉམ་ཞུགས་བྱས་ཏེ། དེང་རབས་ལོ་རྒྱུས་དང་ཆབ་སྲིད། བརྡ་སྤྲོད། བོད་ཀྱི་ཆབ་སྲིད་དང་སྤྱི་ཚོགས། བོད་ཀྱི་ལོ་རྒྱུས། གནའ་དེང་རྩོམ་རིག་གི་སྐོར། གནའ་རབས་ཆོས་ལུགས་དང་ལོ་རྒྱུས། ཡིག་ཚགས་ཀྱི་སྐོར། བོད་ཀྱི་བརྩམས་སྒྲུང་དང་ལེགས་བཤད་སོགས་ཀྱི་སྐོར་ལ་རྩོམ་ཡིག་སྒྲོག་སྦྱངས་དང་བགྲོ་གླེང་གནང་རྒྱུ་ཡིན་འདུག

གསར་འགོད་པ། སྐལ་བཟང་སྦྱིན་པ།