༧སྐྱབས་རྗེ་ཀུན་བདེ་གླིང་རྟ་ཚག་རྗེ་སྤྲུལ་
སུད་སི་དང་ལིག་ཏེན་སིཊ་ཡན་ལན་བོ
རིན་པོ་ཆེ་མཆོག་གི་ཕྱག་མཛོད་བློ་བཟང་ངག་དབང་ལགས་ཀྱི
ཟླ་འདིའི་ཕྱི་ཚེས་ ༡ ཉིན་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས། འཇར་མན་བོད་ཁང་གིས་ཇི་ལྟར་གསོལ་འདེབས་ཞུས་པ་ལྟར། འཇར་མན་བོད་ཁང་དུ་བོད་རིགས་དང་། ཡུལ་མི། ཕྱི་རྒྱལ་བ་སོགས་ལ་སེམས་ཞུམ་པ་མེད་པའི་སྙིང་རྗེ་དང་། དེང་རབས་ཀྱི་གནོན་ཤུགས་ལ་ནང་ཆོས་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་དྲིས་ལན་གནང་འདུག་ལ། ཕྱི་ཆེས་ ༢ ཉིན་ས་གནས་བོད་མི་ཚོར་རྗེ་བཙུན་འཕགས་མ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་། བོད་མི་རྣམས་མཐུན་ལམ་རྡོག་རྩ་གཅིག་སྒྲིལ་གནང་དགོས་པ་ཤིན་ཏུ་ནས་གལ་གནད་ཆེན་པོ་ཡིན་པའི་སྐོར་བཀའ་སློབ་ལམ་སྟོན་གནང་། ཕྱི་ཟླ་ ༡༠ ཚེས་ ༢༩ ཉིན་སུད་སི་གྲོས་ཚོགས་ཁང་དུ་ཕེབས་ཏེ། རྒྱལ་ཡོངས་ལྷན་ཚོགས་ཀྱི་འཐུས་མི་ལྕམ་སྐུ་ལི་རིན་སི་(Laurence Fehlmann Rielle)ལགས་དང་མཇལ་འཕྲད་གནང་སྟེ། བོད་སྤྱི་དང་ལྷག་པར་དུ་སུད་སིའི་ནང་གནས་སྡོད་བྱེད་མུས་ཡིན་པའི་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། བོད་མི་རྣམས་ལ་མུ་མཐུད་ནས་རོགས་འདེགས་དང་རྒྱབ་སྐྱོར་གནང་དགོས་པའི་རེ་སྐུལ་གནང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་གཙོས། སུད་སི་དང་ལིག་ཏེན་སིཊ་ཡན་བོད་རིགས་ཚོགས་པའི་ཚོགས་གཙོ་བགྲེས་གཞོན་རྣམ་གཉིས་དང་རྒྱུན་ལས། གཞོན་ནུ་དང་བུད་མེད་ཚོགས་པ་སོགས་ཚོགས་པ་ཁག་ཅིག་ཀྱང་ཕེབས་འདུག་ལ། ཕྱི་ཚེས་ ༣༠ ཉིན་སུད་སི་གཞོན་ནུ་ལྷན་ཚོགས་དང་། མཐོ་རིམ་སློབ་མའི་འབྲེལ་མཐུད་པ་གཉིས་ཀྱི་གོ་སྒྲིག་འོག སུད་སི་རྒྱལ་ས་ཛུ་རིག་མཐོ་སློབ་ཏུ་ནང་ཆོས་ངོ་སྤྲོད་དང་དྲི་བ་དྲིས་ལན་གནང་ཡོད་འདུག
ཕྱི་ཟླ་ ༡༠ ཚེས་ ༢༦ ཉིན་སུད་སི་བྷ་སལ་ས་གནས་བོད་རིགས་ཚོས་གསོལ་འདེབས་ཞུས་པ་བཞིན། མི་མང་ལ་རྗེ་བཙུན་མ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་། འཕགས་པའི་བདེན་པ་བཞི་དང་འབྲེལ་བའི་ནང་ཆོས་ངོ་སྤྲོད་དང་། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེད་བཞིན་བོད་མི་རྣམས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་དགོས་པའི་བཀའ་སློབ་གནང་། ཕྱི་ཚེས་ ༢༧ ཉིན་སུད་སི་སུད་སི་རི་ཀོན་ཆོས་འཁོར་དགོན་དུ་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་ཞབས་རིམ་གྱི་ཚོགས་མགོན་དང་། མི་མ་དང་དགེ་འདུན་པ་ཡོངས་ལ་ནང་ཆོས་ཉམས་ལེན་ཇི་ལྟར་གནང་དགོས་མིན་སྐོར་གྱི་བཀའ་སློབ་དང་། ཕྱི་ཚེས་ ༢༩ ཉིན་དགའ་ལྡན་ཆོས་འཁོར་གླིང་ཆོས་ཚོགས་ནང་དུ་བློ་གྲོས་རིན་པོ་ཆེ་མཆོག་གིས་གཙོས་ཆོས་ཚོགས་ཀྱི་ཚོགས་མི་དང་སློབ་མ་རྣམས་ལ་མ་གཅིག་ལབ་སྒྲོན་ནས་བརྒྱུད་པའི་གཅོད་ཉམས་སུ་ལེན་པར་སྙིང་རྗེ་ཆེན་པོ་དང་སྟོང་པ་ཉིད་ཀྱི་ལྟ་བུའི་རྩིས་ཟིན་དགོས་པའི་གལ་གནད་དང་འབྲེལ་བའི་བཀའ་སློབ་གནང་། ཕྱི་ཚེས་ ༢༩ ཉིན་སུད་སིའི་རྒྱལ་ས་སྦན་དུ་ཡོད་པའི་ཞིང་གཤེགས་དམ་པ་བླ་མ་བཟོད་པ་རིན་པོ་ཆེའི་ཆོས་ཚོགས་ལོངས་སྐུ་ཨེཕ་པི་ཨེམ་ཊིར་འཕགས་པའི་བདེན་པ་བཞི་དང་འབྲེལ་བའི་བཀའ་ཆོས་དང་བཀའ་སློབ་གནང་།
རིན་པོ་ཆེ་མཆོག་གི་མཛད་འཆར་ལྟར་ན། དེ་རིང་ཕྱི་ཚེས་ ༥ ཉིན་སི་པིན་བོད་ཀྱི་དུས་བསྟོན་དབུ་འབྱེད་དང་བོད་ཁང་ནང་ཚོགས་མཆོད་སྨོན་ལམ་ལ་ཕེབས་རྒྱུ་དང་། ཕྱི་ཚེས་ ༦ ཉིན་དགོང་དྲོ་ཆུ་ཚོད་ ༦ ཐོག་༧གོང་ས་༧རྒྱལ་བ་རིན་པོ་ཆེ་མཆོག་གི་གོ་སྟོན་དང་སྟབས་བསྟུན་༧སྐུའི་མཛད་རྣམ་ཁག་འགྲེམས་སྟོན་དབུ་འབྱེད་གནང་རྒྱུ། ཕྱི་ཚེས་ ༧ ཉིན་༼བོད་དེ་རྒྱ་ནག་གི་ཆ་ཤས་ནམ་ཡང་མིན།༽ ཞེས་པའི་ཕྱག་དེབ་སི་པན་སྐད་ཡིག་སྐད་ཐོག་འཐོན་པ་དེ་རིན་པོ་ཆེ་མཆོག་ནས་དབུ་འབྱེད་གནང་རྒྱུ་དང་། བོད་ནང་གི་འགྲོ་བ་མིའི་ཐོབ་ཐང་དང་ད་ལྟའི་གནས་སྟངས་སྐོར་ལ་བཀའ་སློབ་་གནང་རྒྱུ། ཕྱི་ཚེས་ ༨ ཉིན་སུད་སི་ཟློས་གར་ཚོགས་པས་གདན་ཞུས་ལྟར་བོད་ཀྱི་ཟློས་གར་འཁྲབ་སྟོན་ལ་ཆེད་ཕེབས་གནང་རྒྱུ། ཕྱི་ཚེས་ ༩ ཉིན་མི་མང་ལ་སྒྲོལ་མའི་རྗེས་གནང་གནང་རྒྱུ་བཅས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
