མགོན་པོ་སྐྱིད་ལགས་ལ་རང་ཁྱིམ་དུ་པུས་མོ་དང་སྐེད་པར་མུ་མཐུད་དུ་སྨན་བཅོས་བྱེད་བཞིན་ཡོད་ཀྱང་ད་ལྟའང་འགྲོ་སྐྱོད་ལ་དཀའ་ངལ་ཡོད་འདུག
འདི་ལོའི་ཕྱི་ཟླ་ ༨ ཚེས་ ༡༨ ཉིན་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཨ་ཆད་འུ་ཐུག་གིས་ལྷ་སའི་གཡག་མགྲོན་ཁང་གི་ཐོག་རྩེག་གཉིས་པ་ནས་མཆོངས་ཏེ་རྨས་སྐྱོན་ཆེན་པོ་བྱུང་བའི་གནས་ཚུལ་ཐོན་ཡོད་པ་ལྟར། འདི་ལོའི་ཕྱི་ཟླ་ ༡༠ ཚེས་ ༣༡ ཉིན་བོད་ནས་བརྙན་ཐུང་དང་པར་རིས་འབྱོར་བའི་ནང་། མགོན་པོ་སྐྱིད་ལགས་ཀྱི་པུས་མོ་དང་སྐེད་པ་སོགས་སྐྲངས་ནས་འགྲོ་སྐྱོད་ལའང་དཀའ་ངལ་འཕྲད་བཞིན་ཡོད་འདུག འདི་ག་བོད་ཀྱི་དུས་བབ་གསར་ཁང་གི་འབྲེལ་ཡོད་གནས་ཚུལ་མཁོ་སྤྲོད་པས། ཁོང་མོ་ད་ལྟའང་སྒོ་ཕྱི་ནང་དུ་འགྲོ་སྐྱོད་བྱེད་རྒྱུར་དཀའ་ངལ་ཡོད་པས། རང་ཁྱིམ་དུ་མུ་མཐུད་ནས་སྨན་བཅོས་བྱེད་བཞིན་ཡོད་སྐོར་བརྗོད་བྱུང་།
མགོན་པོ་སྐྱིད་ལགས་ཀྱིས་ཕྱི་ལོ་ ༢༠༡༠ ནས་བཟུང་གཅུང་པོ་རྡོ་རྗེ་བཀྲ་ཤིས་ལགས་ཀྱི་ཚེ་བཙོན་གྱི་ཁྲིམས་ཆད་ལ་བསྐྱར་ཞིབ་དགོས་པ་དང་། ཁོང་དང་ཁོང་གི་ཁྲིམས་རྩོད་པ་ངོ་ཐུག་ཏུ་བཅུག་དགོས་པའི་ཞུ་འབོད་ལས་འགུལ་སྣ་མང་སྤེལ་ཡོད་ཀྱང་། རྒྱ་ནག་གཞུང་གིས་ཁོང་མོའི་ཁྲིམས་མཐུན་གྱི་ཞུ་འབོད་ལ་ངོས་ལེན་རྩ་བ་ནས་བྱས་མེད་པ་མ་ཟད། ཁོང་མོར་ཐེངས་མང་ཉེས་རྡུང་བཏང་པ་དང་བཀག་ཉར་བྱས་ཡོད་པ་རེད།
འདི་ལོའི་ཕྱི་ཟླ་ ༨ ཚེས་ ༡༨ ཉིན་མགོན་པོ་སྐྱིད་ལགས་ཀྱིས་སླར་ཡང་ཞུ་འབོད་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་ཁོང་མོ་བཙན་གྱིས་གཡག་མགྲོན་ཁང་དུ་བཅུག་སྟེ་ཕྱི་རུ་ཐོན་བཅུག་མེད་པས། ཨ་ཆད་འུ་ཐུག་གིས་གཡག་མགྲོན་ཁང་གི་ཐོག་རྩེག་གཉིས་པ་ནས་མཆོངས་ཏེ་རང་སྲོག་གཅོད་རྩིས་བྱས་རྐྱེན། པུས་མོ་དང་སྐེད་པ་སོགས་ལ་རྨས་སྐྱོན་ཆེན་པོ་ཕོག་ཡོད་པ་རེད། ཡིན་ནའང་དུས་ཐོག་ཏུ་རྒྱ་གཞུང་་ཉེན་རྟོག་པས་ཁོང་མོར་མྱུར་སྐྱོབ་སྨན་བཅོས་བྱེད་དུ་བཅུག་མེད་པ་རེད།
ཕྱི་ལོ་ ༢༠༠༨ ལོར་བོད་ནང་གི་ས་བྱི་ལོའི་ཞི་རྒོལ་ཆེན་མོའི་སྐབས་སུ་རྡོ་རྗེ་བཀྲ་ཤིས་ལགས་མཉམ་ཞུགས་དང་སྐུལ་སློང་བྱས་པའི་མ་ཉེས་ཁ་གཡོགས་ཀྱིས་ཟླ་མང་པོའི་རིང་འཛིན་བཟུང་བྱས་ཏེ་མནར་གཅོད་བཏང་། ཁོང་དང་ལྷན་དུ་ཕུ་བོ་རྡོ་རྗེ་ཚེ་བརྟན་ལགས་ཀྱང་འཛིན་བཟུང་བྱས་ནས་ལོ་གཉིས་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༠ ཟླ་ ༦ ཚེས་ ༢༦ ཉིན་ལྷ་ས་མི་དམངས་འབྲིང་རིམ་ཁྲིམས་ཁང་གིས་གསང་བའི་ཁྲིམས་བཤེར་བྱས་ཏེ་རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཚེ་བཙོན་གྱི་ཁྲིམས་ཐག་བཅད་པ་དང་རྡོ་རྗེ་ཚེ་བརྟན་ལགས་སུ་ལོ་དྲུག་གི་བཙོན་འཇུག་ཁྲིམས་ཐག་བཅད། ད་ལྟའི་ཆར་རྡོ་རྗེ་བཀྲ་ཤིས་ལགས་ཀྱི་ནང་མིར་ཁྲིམས་རྩོད་པར་ཐུག་འཕྲད་ཀྱིས་ཞུ་གཏུགས་བྱེད་པའི་ཐོབ་ཐང་དང་རྡོ་རྗེ་བཀྲ་ཤིས་ལགས་སུའང་བཙོན་ཁང་དུ་ཐུག་འཕྲད་ཙམ་ཡང་བྱེད་དུ་འཇུག་གི་མེད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པདྨ་མཚོ།
