༸གོང་ས་སྐུ་འཕྲེང་དྲུག་པའི་སྐོར་ལ་རྒྱལ་སྤྱིའི་ལྷན་ཚོགས་ཤིག་འཚོག་གཏན་ཁེལ།

འདི་ལོའི་ཕྱི་ཟླ་ ༡༢ ཚེས་ ༣ ནས་ ༦ བར་རྟ་དབང་དུ་༸གོང་ས་སྐུ་འཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོ་མཆོག་གི་མཛད་རྣམ་དང་འབྲེལ་བའི་རྒྱལ་སྤྱིའི་ལྷན་ཚོགས་ཤིག་འཚོག་གཏན་ཁེལ་འདུག

བོད་ཀྱི་ས་མཚམས་དང་རྒྱ་གར་གྱི་བྱང་ཤར་མངའ་སྡེ་ཨ་རུ་ན་ཅལ་ནང་། ཟླ་རྗེས་མར་༸གོང་ས་སྐུ་འཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོ་མཆོག་གི་རྒྱལ་སྤྱིའི་ལྷན་ཚོགས་ཐོག་མ་དེ་འཚོག་གཏན་ཁེལ་ཡོད་ཅིང་། ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། ཚོགས་འདུ་དེ་ནི་ཆོས་ལུགས་དང་རིག་གཞུང་། ཤེས་ཡོན་བཅས་གཅིག་ཏུ་བསྒྲིལ་བའི་རྟ་དབང་གི་དུས་སྐབས་གལ་ཆེན་ཞིག་ཡིན་ཁར། ༸རྒྱལ་བ་ཚངས་དབྱངས་རྒྱ་མཚོའི་མཛད་འཕྲིན་ཁག་འཛམ་གླིང་མི་མང་ལ་ངོ་སྤྲོད་བྱེད་པར་དམིགས་པ་ཞིག་ཡིན་སྐོར་བརྗོད་འདུག

༸གོང་ས་སྐུ་འཕྲེང་དྲུག་པའི་སྐོར་གྱི་རྒྱལ་སྤྱིའི་ལྷན་ཚོགས་ཞེས་པ་དེ་བསྟན་འགྱུར་རིན་པོ་ཆེའི་ལམ་སྟོན་དང་ཨ་རུ་ན་ཅལ་མངའ་སྡེ་ཆོས་རིག་ལས་ཁུངས་དང་ཐུབ་བསྟན་བཤད་སྒྲུབ་གླིང་ཆོས་ཚོགས་གཉིས་ཀྱི་གོ་སྒྲིག་འོག འདི་ལོའི་ཕྱི་ཟླ་ ༡༢ ཚེས་  ༣ ནས་ ༦ བར་ནང་རྟ་དབང་དུ་འཚོག་གཏན་ཁེལ་ཡོད་པ་དང་། ལྷན་ཚོགས་ཐོག་འཛམ་གླིང་རྒྱལ་ཁབ་འདྲ་མིན་ནས་༸རྒྱལ་བ་ཚངས་དབྱངས་རྒྱ་མཚོའི་སྐོར་ལ་ཉམས་ཞིབ་གནང་མཁན་གྱི་ཕྱི་རྒྱལ་བ་ ༡༥ དང་། བོད་བརྒྱུད་ནང་བསྟན་དང་རྒྱ་གར་གྱི་ནང་པའི་མཁས་དབང་། ཉམས་ཞིབ་པ་དང་རྩོམ་པ་པོ་སོགས་ཆེད་མཁས་པ་མང་པོ་འཛོམས་ཀྱི་ཡོད་འདུག་ལ། ལྷན་ཚོགས་དེ་བརྒྱུད་ནས་༸རྒྱལ་བ་ཚངས་དབྱངས་རྒྱ་མཚོའི་མཛད་རྗེས་ཁག་ལ་བསྐྱར་དུ་འཚོལ་ཞིབ་བྱ་རྒྱུ་དང་དམིགས་བསལ་རྟ་དབང་གི་ནང་པའི་ཤུལ་བཞག་རིག་གནས་ལའང་འཚོལ་སྙེག་གསར་པ་ཞིག་གནང་འཆར་ཡོད་འདུག

མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་སྒེར་གྱི་ཨེག་སི་དྲ་རྒྱའི་སྟེང་། འཛམ་གླིང་གིས་༸གོང་ས་སྐུ་འཕྲེང་དྲུག་པ་ཚངས་དབྱངས་རྒྱ་མཚོའི་སྐོར་ལ་ཤེས་པ་ཧ་ཅང་ཉུང་ཉུང་ཡིན། རྒྱལ་དབང་ཚངས་དབྱངས་རྒྱ་མཚོ་རྟ་དབང་ནང་འཁྲུངས་པ་དང་ཆོས་ལུགས་ཀྱི་མི་སྣ་གལ་ཆེན་ཞིག་ཡིན་ཞིང་། ཁོང་གི་སྙན་ངག་གི་འོད་ཟེར་གྱིས་མི་རབས་ནས་མི་རབས་ལ་ཡིད་འཕྲོག་གི་ཡོད། དེར་བརྟེན། ང་ཚོར་རྒྱལ་དབང་ཚངས་དབྱངས་རྒྱ་མཚོའི་སྐུ་ཚེའི་མཛད་རྣམ་དང་ལྟ་གྲུབ། ནམ་ཡང་ཡལ་མི་སྲིད་པའི་ཁོང་གི་བཀའ་དགོངས་སོགས་འཛམ་གླིང་ལ་ངོ་སྤྲོད་པའི་འགན་ཡོད་ཅེས་དང་ཚོགས་འདུ་དེ་ནི་ཆོས་ལུགས་དང་རིག་གཞུང་། ཤེས་ཡོན་གཅིག་སྒྲིལ་བྱེད་པའི་རྟ་དབང་ལོ་རྒྱུས་ཀྱི་དུས་སྐབས་ཤིག་ཡིན་སྐོར་གསུངས་འདུག

དེ་ཡང་༸རྒྱལ་བའི་འཁྲུངས་རབས་གསོལ་འདེབས་ལས། སྨྱོས་གདུང་མཚོ་སྣའི་ལ་འོག་ཡུལ་དུ་བལྟམས། །རིག་འཛིན་གྲུབ་པའི་གོ་འཕང་མཐོན་པོར་གཤེགས། །རིག་པ་བརྟུལ་ཞུགས་སྤྱོད་པས་གདུལ་བྱ་སྐྱོང༌། །རིན་ཆེན་ཚངས་དབྱངས་རྒྱ་མཚོར་གསོལ་བ་འདེབས། ། ཞེས་གསུངས་པ་ལྟར་ྋརྒྱལ་བ་ཚངས་དབྱངས་རྒྱ་མཚོ་མཆོག་ནི། རབ་བྱུང་བཅུ་གཅིག་པའི་ཆུ་ཕག་ལོ་སྟེ་སྤྱི་ལོ་ ༡༦༨༣ ལོར་མོན་ལ་འོག་ཡུལ་གསུམ་དུ་ཡབ་བཀྲ་ཤིས་བསྟན་འཛིན་དང༌། ཡུམ་ཚེ་དབང་ལྷ་མོ་གཉིས་ཀྱི་སྲས་སུ་སྐུ་འཁྲུངས། དགུང་ལོ་བཅུ་གསུམ་གྱི་སྟེང་ནས་སྡེ་སྲིད་སངས་རྒྱས་རྒྱ་མཚོས་ྋརྒྱལ་བ་སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོའི་ཡང་སྲིད་དུ་ངོས་འཛིན་ཡོངས་གྲགས་མཛད་དེ་ལྷ་སར་ཕེབས། པཎ་ཆེན་སྐུ་ཕྲེང་ལྔ་པ་བློ་བཟང་ཡེ་ཤེས་ལས་དགེ་ཚུལ་གྱི་སྡོམ་པ་བཞེས། མཚན་ལ་བློ་བཟང་རིག་འཛིན་ཚངས་དབྱངས་རྒྱ་མཚོ་ཞེས་གསོལ། ཕྱི་ལོ་ ༡༦༩༦ ལོའི་ཟླ་ ༡༢ ཚེས་ ༥ ཉིན་ཕོ་བྲང་པ་ཏཱ་ལར་གསེར་ཁྲི་མངའ་གསོལ་མཛད། ཕྱི་ལོ་ ༡༧༤༦ ལོར་བོད་མདོ་སྨད་དུ་སྐུ་མྱ་ངན་ལས་འདས།

གསར་འགོད་པ། སྐལ་བཟང་སྦྱིན་པ།