སྲིད་སྐྱོང་མཆོག་གིས་རྒྱལ་སྤྱིའི་ཆོས་ལུགས་རང་དབང་ཚོགས་ཆེན་ཐེངས་ལྔ་པའི་ཐོག་བོད་དོན་གསུང་བཤད་གནང་།

ཅེག་སྤྱི་མཐུན་རྒྱལ་ཁབ་ཀྱི་རྒྱལ་སྤྱིའི་ཆོས་ལུགས་རང་དབང་ཚོགས་ཆེན་ཐེངས་ལྔ་པའི་ཐོག་སྲིད་སྐྱོང་མཆོག་གིས་རྒྱལ་སྤྱིའི་སྤྱི་ཚོགས་ཀྱིས་བོད་དོན་ཐོག་མུ་མཐུད་རྒྱབ་སྐྱོར་གནང་དགོས་པའི་འབོད་སྐུལ་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཡུ་རོབ་ཅེག་སྤྱི་མཐུན་རྒྱལ་ཁབ་ཏུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཟླ་ ༡༡ ཚེས་ ༡༢ ཉིན་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕོ་བྲང་དུ། ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་ལས་ཁུངས་ཀྱི་གོ་སྒྲིག་འོག རྒྱལ་སྤྱིའི་ཆོས་ལུགས་རང་དབང་ཚོགས་ཆེན་ཐེངས་ལྔ་པ་འཚོགས་ཡོད་ཅིང་། མཛད་སྒོའི་ཐོག་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་མཆོག་དང་། བོད་མིའི་སྲིད་སྐྱོང་སྤེན་པ་ཚེ་རིང་མཆོག རྒྱལ་སྤྱིའི་ཆོས་ལུགས་རང་དབང་ཚོགས་ཆེན་གྱི་ཚོགས་གཙོ་རོ་བྷིར་རེ་ཧཱ་ཁི་(Robert Rehák)ལགས རུ་སོག་དོན་གཅོད་ཏེ་ལོ་རིན་པོ་ཆེ་མཆོག ༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་དཔལ་བཟང་པོ་མཆོག བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་སོགས་འཛམ་གླིང་རྒྱལ་ཁབ་བཞི་བཅུ་ལྷག་ནས་ཚོགས་བཅར་བ་མཉམ་ཞུགས་གནང་ཡོད་འདུག་ལ། ཚོགས་ཆེན་ཐོག་དམིགས་བསལ་༸གོང་ས་རྒྱལ་བ་རིན་པོ་ཆེ་མཆོག་གི་འཚེ་མེད་ཞི་བ་དང་འགྲོ་བ་མིའི་ཆེ་མཐོང་ལ་གཅེས་སྤྲས་བྱས་པའི་དབུ་ཁྲིད་ཀྱི་མཛད་རྗེས་ལ་ཆེ་བསྟོད་ཞུས་ཡོད་འདུག

ཚོགས་ཆེན་ཐོག་སྲིད་སྐྱོང་མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་དཔེ་མཚོན་རང་བཞིན་དང་། རྒྱ་ནག་གཞུང་གིས་བོད་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་ཐོག་དམ་དྲག་བྱེད་བཞིན་པར་རྒྱལ་སྤྱིའི་སྤྱི་ཚོགས་ནས་དོ་སྣང་བྱ་དགོས་པའི་སྐོར་དང་། ཨ་རིའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་བྱུང་པའི་སྐོར། དེ་བཞིན་ཡུ་རོབ་རྒྱལ་ཁབ་བདུན་གྱིས་༸གོང་ས་མཆོག་གི་ཡང་སྲིད་ངོས་འཛིན་བོད་མི་རང་ཉིད་ཀྱིས་གནང་དགོས་པའི་ཐུན་མོང་གི་གསལ་བསྒྲགས་བསྐྱངས་ཏེ་རྒྱལ་སྤྱིའི་ཐོག་ནས་བོད་མི་རྣམས་ལ་གདུང་སེམས་མཉམ་སྐྱེད་ཤུགས་ཆེར་གནང་ཡོད་སྐོར་སོགས་གསུངས་འདུག

ཟླ་འདིའི་ཕྱི་ཚེས་ ༡༡ ཉིན་ཅེག་སྤྱི་མཐུན་རྒྱལ་ཁབ་ཀྱི་རྒྱལ་སའི་ཝི་ནོ་ཧ་རཱ་ཌི་གློག་བརྙན་ཁང་(Vinohrady)དུ།  ཅེག་བོད་དོན་རྒྱབ་སྐྱོར་ཚོགས་པ་དང་། ཝ་ཁེ་ལེབ་ཧ་ཝེལ་གྱི་དཔེ་མཛོད། གླིང་ཕྲན་མཐུན་ཚོགས་བཅས་ཀྱི་མཉམ་འབྲེལ་གྱི་གོ་སྒྲིག་འོག ༸གོང་ས་མཆོག་གི་སྐུའི་གོ་སྟོན་དང་ཅེག་སྲིད་འཛིན་ཟུར་པ་སྐུ་ཞབས་ཝ་ཁེ་ལེབ་ཧཱ་ཝེལ་ (Vaclav Havel) མཆོག་དགུང་གྲངས་ ༨༩  འཁྲུངས་སྐར་སྲུང་གཙིའི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་རྩོམ་པ་པོ་ཀེ་ཊེ་རི་ན་བྷུར་སི་ཀོ་བ་ཇེཀ་ (Kateřina Bursíková Jacques) ལགས་དང་ཀེ་ཊེ་རི་ན་པོ་རོ་ཆ་ཛོ་ཀ་བ་ (Kateřina Procházková) ལགས་ཀྱིས་བརྩམས་པའི་ཏཱ་ལའི་བླ་མ་དང་ཧཱ་ཝལ། དྲང་བདེན་དང་བྱམས་བརྩེའི་དམག་དཔུང་ཞེས་པའི་དཔེ་དེབ་ཅིག་དབུ་འབྱེད་གནང་ཡོད་འདུག

མཛད་སྒོ་དེའི་ཐོག་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་པེ་ཊར་པ་ཝེལ་ (Petr Pavel) མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ཅེག་གྲོས་ཚོགས་གོང་མའི་ཚོགས་གཞོན་ལྕམ་སྐུ་ཇི་ཊི་ཀ་སེ་ཌི་ལོ་ཝ་ (Jitka Seitlova) མཆོག རྒྱལ་ས་པ་རག་གི་གྲོང་སྡེ་སྤྱི་ཁྱབ་པ་བོ་ཧུ་སི་ལ་བི་སི་བོ་ད་ (Bohuslav Svoboda) ལགས་ཀྱིས་གཙོས། ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་ཁག་གཅིག་དང་།  ༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་བཅས་ཕེབས་གནང་ཡོད་འདུག

སྲིད་སྐྱོང་སྤེན་པ་ཚེ་རིང་མཆོག་གིས་སྲིད་འཛིན་ཟུར་པ་ཝ་ཁེ་ལེབ་ཧཱ་ཝེལ་མཆོག་གི་མཛད་རྗེས་དང་། ༧གོང་ས་རྒྱལ་བ་རིན་པོ་མཆོག་ནས་འཛམ་གླིང་སྤྱི་ཡོངས་ལ་བསྩལ་བའི་བཀའ་སློབ་ལ་དྲན་གསོ་བྱེད་པའི་དུས་སྟོན་གལ་ཆེན་ཞིག་ཆགས་ཡོད། དེ་བཞིན་ཁོང་རྣམ་པ་གཉིས་ཀྱིས་དམར་ཤོག་སྲིད་གཞུང་གི་གཉའ་གནོན་འོག་མི་མང་བཅིངས་གྲོལ་གཏོང་བའི་འཐབ་རྩོད་ལ་དཀའ་སྡུག་མྱངས་ཡོད་མོད། ད་ལྟའི་ཆར་ཅེག་སྤྱི་མཐུན་རྒྱལ་ཁབ་ནི་རང་བཙན་གྱི་རྒྱལ་ཁབ་ཅིག་ཆགས་ཡོད་ཀྱང་། ད་དུང་བོད་ནི་རྒྱ་ནག་གཞུང་གི་གཉའ་གནོན་འོོག་དཀའ་སྡུག་མྱོང་བཞིན་ཡོད། ༧གོང་ས་རྒྱལ་བ་རིན་པོ་ཆེ་མཆོག་ནས་དུས་རྒྱུན་དུ་མགོན་པོ་གང་ཉིད་མཆོག་འཛམ་གླིང་འདིའི་མི་དུང་ཕྱུར་བརྒྱད་ཀྱི་ནང་ནས་གཅིག་ཡིན་པ་དང་། དེ་བཞིན་འགྲོ་བ་མི་ཞིག་ཡིན་པའི་ཆ་ནས་བྱམས་བརྩེ་དང་། རང་དབང་། ཆེ་མཐོང་། དམངས་གཙོ་བཅས་ཀྱི་རིན་ཐང་གོང་འཕེལ་གཏོང་བ་ནི་ལས་འགན་ཞིག་ཡིན་གསུང་གི་ཡོད། ད་ལྟའི་ཆར་ཅེག་སྤྱི་མཐུན་རྒྱལ་ཁབ་ཀྱིས་དམངས་གཙོའི་ཐོབ་ཐང་ལོངས་སུ་སྤྱོད་བཞིན་པ་ལྟར། བོད་མི་རྣམས་ཀྱིས་༧གོང་ས་མཆོག་གི་དབུ་ཁྲིད་ལམ་སྟོན་འོག་བཙན་བྱོལ་དུ་དམངས་གཙོའི་ལམ་ལུགས་ལག་བསྟར་བྱེད་བཞིན་ཡོད་ཅེས་དང་། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་སཱི་ཤེས་ཡོན་སློབ་གསོའི་སྐོར་ལ་འགྲེལ་བརྗོད་གནང་འདུག

མཛད་འཆར་ལྟར་ན། ཕྱི་ཟླ་ ༡༡ ཚེས་ ༡༤ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཅེག་གི་མཛད་རིམ་རྣམས་གྲུབ་རྗེས་འཇར་མན་ནང་ཕེབས་ཏེ། ད་ལྟའི་བོད་ནང་དང་བཙན་བྱོལ་གྱི་གནས་བབ། རྒྱ་ནག་གིས་བོད་ནང་དུ་ལག་བསྟར་བྱེད་བཞིན་པའི་དྲག་གནོན་སྲིད་ཇུས་སོགས་ཀྱི་སྐོར་གསུང་བཤད་གནང་བ་དང་། གནད་ཡོད་མི་སྣར་ཐུག་འཕྲད་བགྱིས་ཏེ་བོད་དོན་ལ་རྒྱབ་སྐྱོར་སྔར་ལྷག་ཡོང་ཐབས་གནང་བཞིན་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲེིག་བྱེད་མཁན། པདྨ་མཚོ།