ཉིན་གྲངས་གཉིས་རིང་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་གིས་༧གོང་ས་མཆོག་གི་ཆབ་སྲིད་མཛད་འཕྲིན་སྐོར་ལ་དམིགས་བསལ་འགྲེམས་སྟོན་ཞིག་བྱེད་བཞིན་འདུག
དེ་རིང་ཕྱི་ཟླ་ ༡༡ ཚེས་ ༡༤ དང་ ༡༥ ཉིན་གྲངས་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་གི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་ཡོངས་སུ་བཞེས་ཏེ་ལོ་ངོ་ ༧༥ འཁོར་བའི་དུས་དྲན་ཀྱི་པར་རིས་འགྲེམས་སྟོན་གནང་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་དང་། བོད་མིའི་སྒྲིག་འཛུགས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། དྷ་ས་ཁུལ་གྱི་སེར་སྐྱ་མི་མང་བཅས་འཛོམས་སོང་།
ཐེངས་འདིའི་འགྲེམས་སྟོན་སྐོར་ལ་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་ཡོངས་སུ་བཞེས་ཏེ་ལོ་ངོ་ ༧༥ འཁོར་བའི་དུས་དྲན་དང་བསྟུན། ཕྱི་དྲིལ་བོད་ཀྱི་འགྲེམས་སྟོན་ཁང་གིས་༧གོང་ས་མཆོག་གི་མཛད་པ་འཕྲིན་ལས་ཀྱི་ཚབ་མཚོན་ཙམ་ཞིག་འགྲེམས་སྟོན་བྱེད་བཞིན་ཡོད། དེ་ཡང་༧གོང་ས་མཆོག་ནས་དམིགས་བསལ་ཆབ་སྲིད་ཀྱི་ཐུགས་འགན་བཞེས་ཏེ་མཛད་པ་འཕྲིན་ལས་གང་བསྐྱངས་པ་པར་རིས་ལམ་ནས་གོ་རྟོགས་སྤེལ་བཞིན་ཡོད། ཐེངས་འདིའི་འགྲེམས་སྟོན་ནང་སྡེ་ཚན་གཙོ་བོ་གསུམ་ཆགས་ཀྱི་ཡོད། དང་པོ་ཕྱི་ལོ་ ༡༩༤༠ ནས་ ༡༩༥༩ ལོའི་བར་གྱི་བོད་རང་བཙན་མ་ཤོར་གོང་༧གོང་ས་མཆོག་ནས་ཐུགས་འགན་གཙོ་བོ་གང་དག་བཞེས་ཡོད་པའི་སྐོར་ཡིན། དེའི་ཁྲོད་ཀྱི་གལ་ཆེ་ཤོས་ཤིག་ནི་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་༧གོང་ས་མཆོག་ནས་ཆོས་སྲིད་གཉིས་ཀྱི་དབུ་ཁྲིད་ཐུགས་འགན་བཞེས་པའི་པར་རིས་འགྲེམས་སྟོན་དེ་ཡིན། དེའི་སྐབས་སུ་༧གོང་ས་མཆོག་ནས་བོད་ནང་དུ་བསྒྱུར་བཅོས་གཏོང་བའི་ཐུགས་མོས་ཡོད་ཀྱང་། རྒྱ་གུང་ཁྲན་ཏང་གིས་བོད་ནང་བཙན་འཛུལ་བྱས་པའི་རྐྱེན་གྱིས། ཕྱི་ལོ་ ༡༩༥༤ དང་ ༡༩༥༦ ལོར་༧གོང་ས་མཆོག་ཕྱི་རྒྱལ་ཁག་ཏུ་ཕེབས་ཏེ་འཚེ་མེད་ཞི་བའི་ལམ་ལ་ཐུགས་མོས་ཡོད་པ་གསལ་ཡོད། གཉིས་པ་ཕྱི་ལོ་ ༡༩༥༩ ལོ་ནས་ ༡༩༧༤ ལོའི་བར་གྱི་༧གོང་ས་མཆོག་གི་མཛད་པ་འཕྲིན་ལས་ཀྱི་སྐོར་ཡིན། དེའི་ཁྲོད་ཀྱི་གལ་ཆེ་ཤོས་གཙོ་བོ་དེ་རྩ་ཁྲིམས་རིན་པོ་ཆེ་ཆགས་ཀྱི་འདུག བོད་ཀྱི་ཆབ་སྲིད་འཕོ་འགྱུར་ཁྲོད་རྩ་ཁྲིམས་རིན་པོ་ཆེ་གཏན་འབེབས་བྱས་པ་དེས། མ་འོངས་བར་བོད་རང་བཙན་འཐོབ་ཚེ་རྩ་ཁྲིམས་རིན་པོ་ཆེ་གཞིར་བཞག་སྟེ་ལས་དོན་བསྒྲུབ་དགོས་པ་ཞིག་ཆགས་ཡོད། བཙན་བྱོལ་བོད་གཞུང་དང་། སློབ་གྲྭ། དགོན་སྡེ་སོགས་འཛུགས་སྐྲུན་བྱས་ཏེ་བརྟན་པོ་ཆགས་པ་ཡང་དུས་ཡུན་དེའི་ནང་དུ་བྱུང་ཡོད།
གསུམ་པ་ཕྱི་ལོ་ ༡༩༧༣ ལོའི་རྗེས་སུ་༧གོང་ས་མཆོག་ཕྱི་རྒྱལ་ཁག་ཏུ་ཞབས་སོར་འཁོད་ཡོད་ཅིང་། ད་ལྟའི་བར་དུ་༧གོང་ས་མཆོག་ཕྱིའི་རྒྱལ་ཁབ་ ༦༢ ནང་ཐེངས་ ༥༠༠ ཆིབས་བསྒྱུར་གནང་ཡོད་པ་དང་། དེའི་ཁྲོད་རྒྱལ་ཁབ་འདྲ་མིན་གྱི་གཟེངས་རྟགས་གྲངས་ ༣༤༡ ཕུལ་ཡོད་འདུག དེའི་ནང་ནས་ཀྱང་མང་ཤོས་ཨ་རིས་ཕུལ་བ་ཞིག་རེད། ཉམས་ཞིབ་པ་རྣམས་ལ་མཚོན་ན་འགྲེམས་སྟོན་འདི་བརྒྱུད་ནས་ཉམས་ཞིབ་ཀྱི་གོ་སྐབས་ཡག་པོ་ཞིག་འདུག དེ་བཞིན་གལ་ཆེ་ཤོས་ཤིག་ནི་ཕྱི་ལོ་ ༡༩༦༠ ཟླ་ ༢ ཚེས་ ༣ ཉིན་གནས་མཆོག་རྡོ་རྗེ་གདན་དུ། བོད་ཀྱི་མནའ་གན་མཐུ་མོ་ཆེ་བཞག་པའི་འདྲ་བཤུས་འགྲེམས་སྟོན་དུ་བཞག་ཡོད། འདི་ནི་ཕྱི་ལོ་ ༡༩༦༠ ལོ་ནས་བཟུང་༧གོང་ས་རྒྱལ་བ་རིན་པོ་ཆེ་མཆོག་གི་དབུ་ཁྲིད་འོག མདོ་དབུས་ཁམས་གསུམ་རྡོག་རྩ་གཅིག་སྒྲིལ་གྱིས་བོད་ཀྱི་མ་འོངས་བའི་མདུན་ལམ་ཆེད་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ཡིན་པའི་མནའ་བསྐྱལ་པ་དེ་ཧ་ཅང་གལ་ཆེན་པོ་ཆགས་ཀྱི་འདུག མནའ་གན་མཐུ་མོ་ཆེ་འཇོག་མཁན་གྱི་མི་བཅུ་བདུན་ཡོད་པའི་མིང་ཡང་བཀོད་ཡོད། སྐབས་རེར་ཆབ་སྲིད་འཕོ་འགྱུར་མང་པོ་ཕྱིན་ཏེ་རྩ་བ་འདོར་བཞིན་ཡོད་པས། ཕྱི་དྲིལ་བོད་ཀྱི་འགྲེམས་སྟོན་ཁང་གི་དྲན་གསོའི་ངོ་བོ་ཐོག ༧གོང་ས་མཆོག་གི་དབུ་ཁྲིད་འོག་ང་ཚོས་རྡོག་རྩ་གཅིག་སྒྲིལ་གྱི་ནུས་པ་ཐོན་དགོས་པ་གལ་ཆེན་པོ་རེད། ཅེས་འགྲེལ་བརྗོད་གནང་བྱུང་།
༧གོང་ས་མཆོག་གི་མཛད་འཕྲིན་སྐོར་ལ་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་གསར་འགོད་པར། ༧གོང་ས་མཆོག་གི་མཛད་པ་འཕྲིན་ལས་ཁྲོད་གལ་ཆུང་ཆེ་ཞུ་ཕོད་ཀྱི་མི་འདུག ཚང་མར་སོ་སོའི་གནད་འགག་དང་དགོས་པ་རྒྱུ་མཚན་ཡོད་པ་རེད། ཐེངས་འདིའི་འགྲེམས་སྟོན་ནང་དུ་བོད་ཀྱི་མནའ་གན་མཐུ་མོ་ཆེ་འདུག དེ་ནི་༧གོང་ས་མཆོག་གི་མཛད་པ་ནང་ནས་གལ་ཆེ་ཤོས་ཤིག་རེད། སྔར་ཆོས་རྒྱལ་མེས་དབོན་རྣམ་གསུམ་གྱི་སྐབས་སུ་བོད་ཆོལ་ཁ་གསུམ་གཅིག་ཏུ་བསྒྲིལ་ཡོད་ཀྱང་། བར་ལམ་ནས་རྒྱ་སྡེ་དང་བོད་སྡེ་སོགས་ཀྱི་འགྱུར་བ་མང་པོ་ཕྱིན་ཡོད་པ་རེད། ༧རྒྱལ་དབང་སྐུ་ཕྲེང་བཅུ་བཞི་པའི་སྐུ་དུས་སུ་བོད་ཆོལ་ཁ་གསུམ་དགའ་ལྡན་ཕོ་བྲང་གི་ཁོངས་སུ་གཅིག་སྒྲིལ་ཐུབ་པ་དེ་རླབས་ཆེན་པོ་དང་གནད་འགག་ཆེན་པོ་རེད་དྲན་གྱི་འདུག ༧གོང་ས་མཆོག་ནས་བོད་པ་ཡོངས་རྫོགས་ཕན་ཚུན་གཅིག་ཕན་གཅིག་གྲོགས་ཀྱི་འཆམ་པོ་གནས་དགོས་པའི་དགོངས་གཞི་ཡོད་པ་རེད། བོད་ཀྱི་ཆིག་སྒྲིལ་ཐོག་༧གོང་ས་མཆོག་ནས་སྐུ་ལས་མང་པོ་བསྐྱོན་པ་རེད། བོད་ཀྱི་ལོ་རྒྱུས་ཁྲོད་དམངས་གཙོའི་ལམ་ལུགས་ཀྱང་ཐེངས་དང་པོ་བྱུང་བ་རེད། ཅེས་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
