སྦེལ་ཇམ་བོད་ཀྱི་གཞོན་སྐྱེས་འབྲེལ་མཐུད་འདུ་འཛོམས་ཐེངས་གཉིས་པ་འཚོགས།

སྦེལ་ཇམ་བོད་ཀྱི་གཞོན་སྐྱེས་འདུ་འཛོམས་དེ་བཙན་བྱོལ་དུ་གནས་པའི་གཞོན་སྐྱེས་ཚོའི་ཁྲོད་དུ་བོད་མིའི་བདེན་དོན་ལ་འགན་འཁུར་བ་དང་མཐུན་སྒྲིལ་གྱི་འདུ་ཤེས་གོང་འཕེལ་གཏོང་རྒྱུར་དམིགས་པ་ཞིག་ཡིན་འདུག

ཉེ་ལམ་སྦེལ་ཇམ་གྱི་རྒྱལ་ས་སྦར་སིལ་དུ། སྦེལ་ཇམ་བོད་ཀྱི་སྐུ་ཚབ་དོན་ཁང་གི་གོ་སྒྲིག་འོག སྦེལ་ཇམ་བོད་ཀྱི་གཞོན་སྐྱེས་འབྲེལ་མཐུད་འདུ་འཛོམས་ཐེངས་གཉིས་པ་ཚོགས་ཡོད་ཅིང་། ཚོགས་ཐོག་ཏུ་སྦེལ་ཇམ་བོད་ཀྱི་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། སྦེལ་ཇམ་སྐུ་ཚབ་དོན་ཁང་གི་ཡོ་རོབ་བོད་དོན་ཞུ་གཏུག་འབྲེལ་མཐུད་པ་དོན་གྲུབ་རྒྱལ་པོ་ལགས། སྦེལ་ཇམ་དང་བླངས་བོད་དོན་ཞུ་གཏུག་ལས་འགུལ་གྱི་འབྲེལ་མཐུད་པ་ཟུར་པ་བསྟན་འཛིན་དཔལ་སྒྲོན་ལགས་དང་ བསོད་ནམས་རབ་བརྟན་ལགས། དེ་བཞིན་སྦེལ་ཇམ་ས་གནས་ཀྱི་བོད་རིགས་གཞོན་སྐྱེས་གྲངས་ ༢༦ བཅས་མཉམ་ཞུགས་གནང་ཡོད་འདུག

སྐབས་དེར་སྦེལ་ཇམ་སྐུ་ཚབ་དོན་གཅོད་བདེ་ཁང་རིག་འཛིན་ཆོས་སྒྲོན་ལགས་ཀྱིས། ཐེངས་འདིའི་འདུ་འཛོམས་ཀྱི་དམིགས་ཡུལ་གཙོ་བོ་ནི་བཙན་བྱོལ་ནང་གི་བོད་ཀྱི་གཞོན་སྐྱེས་རྣམས་ཀྱིས་བོད་མི་རིགས་ཀྱི་ངོ་བོ་སྲུང་སྐྱོབ་ཐུབ་པ་དང་། མཐུན་སྒྲིལ་གྱི་འདུ་ཤེས་གོང་འཕེལ་གཏོང་བ། བོད་ཀྱི་བདེན་དོན་འཐབ་རྩོད་ཐོག་འགན་འཁུར་བའི་ནུས་པ་གོང་སྤེལ་གཏོང་རྒྱུ་བཅས་ཡིན་འདུག རྒྱལ་སྤྱིའི་སྤྱི་ཚོགས་ཀྱི་གནས་སྟངས་དང་འབྲེལ་བའི་ཐོག་ནས་བོད་དོན་ལ་དོ་སྣང་བྱ་རྒྱུ་དང་། བོད་ཀྱི་འཐབ་རྩོད་རྒྱུན་གནས་ཆེད་བོད་རིགས་གཞོན་སྐྱེས་རྣམས་ཀྱི་འོས་འགན། དེ་བཞིན་བོད་དོན་ཞུ་གཏུག་ཐོག་བོད་ཀྱི་གཞོན་སྐྱེས་རྣམས་མཉམ་ཞུགས་གནང་དགོས་པའི་གལ་གནད་སྐོར་འགྲེལ་བརྗོད་གནང་འདུག

སྦེལ་ཇམ་དོན་གཅོད་ཁང་གི་བོད་རིགས་འབྲེལ་མཐུད་པ་དོན་གྲུབ་རྒྱལ་པོ་ལགས་ཀྱིས་འདི་ལོ་འཛམ་གླིང་ཡོངས་སུ་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་སྲུང་གཙི་བྱེད་བཞིན་ཡོད་པ་དང་བསྟུན། འཛམ་གླིང་གི་རྒྱལ་ཁབ་མང་པོའི་ཁྲོད་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་དང་། ༧གོང་ས་མཆོག་གི་དགོངས་གཞི་སོགས་ངོ་སྤྲོད་བྱེད་བཞིན་ཡོད་པས། བོད་རིགས་གཞོན་སྐྱེས་རྣམས་ཀྱིས་དུས་དང་མཐུན་པའི་ཐོག་རྒྱལ་སྤྱིའི་སྡིངས་ཆའི་གོ་སྐབས་བཟུང་སྟེ། ༧གོང་ས་མཆོག་གི་དགོངས་གཞི་དང་མཐུན་པའི་ལས་གཞི་སྤེལ་དགོས་པ་མ་ཟད། བོད་ནང་གི་ཛ་དྲག་གནས་སྟངས་ཐོག་རྒྱལ་སྤྱིའི་སྤྱི་ཚོགས་སུ་གོ་རྟོགས་སྤེལ་བར་མཉམ་ཞུགས་གང་མང་གནང་སྟེ་འབད་བརྩོན་བྱ་དགོས་སྐོར་བརྗོད་འདུག

དེ་བཞིན་སྦེལ་ཇམ་དྭང་བླངས་བོད་དོན་ཞུ་གཏུག་ལས་འགུལ་གྱི་འབྲེལ་མཐུད་པ་ཟུར་པ་བསྟན་འཛིན་དཔལ་སྒྲོན་ལགས་དང་བསོད་ནམས་རབ་བརྟན་ལགས་ཀྱིས། སྦེལ་ཇམ་བོད་རིགས་གཞོན་སྐྱེས་འདུ་འཛོམས་ཐེངས་གཉིས་པའི་ཐོག་ས་གནས་གཞོན་སྐྱེས་མང་པོ་མཉམ་ཞུགས་གནང་བར་དགའ་བསུ་ཞུས་ཡོད་པ་མ་ཟད། སྐབས་དེར་དྭང་བླངས་བོད་དོན་ཞུ་གཏུག་ལས་འགུལ་ནང་རྒྱལ་སྤྱི་དང་ས་གནས་རྒྱལ་ཁབ་ནང་དུ་བོད་དོན་ཞུ་གཏུགས་ཀྱི་གནས་སྟངས་དང་གལ་ཆེན་རང་བཞིན་སྐོར་ངོ་སྤྲོད་ཞུས་ཏེ། མ་འོངས་བར་བོད་དོན་ཞུ་གཏུག་ལས་འགུལ་སྤེལ་ཕྱོགས་དང་ཚགས་ཚུད་ཡོང་ཐབས་སྐོར་ལ་བགྲོ་གླེང་གནང་ཡོད་འདུག སྐབས་དེར་༧གོང་ས་མཆོག་ནས་དམངས་གཙོ་གནང་བའི་ལེགས་སྐྱེས་ཞེས་པའི་དངོས་བཤུས་གློག་བརྙན་ཞིག་གཟིགས་འབུལ་ཞུས་ཡོད་པ་དང་། སྦེལ་ཇམ་བོད་ཀྱི་སྐུ་ཚབ་དོན་གཅོད་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་གློག་བརྙན་དེ་དང་འབྲེལ་ནས་ཚོགས་བཅར་བ་རྣམས་ཀྱིས་དྲི་བར་ལན་འདེབས་གནང་ཡོད་འདུག

འདི་ལོའི་ཕྱི་ཟླ་ ༨ ནང་སྦེལ་ཇམ་སྐུ་ཚབ་དོན་ཁང་ནས་སྦེལ་ཇམ་སྦྲག་ཁང་ལ་འབྲེལ་ལམ་གྱིས་༧གོང་ས་མཆོག་གི་༧སྐུའི་གོ་སྟོན་བྱམས་བརྩེའི་ལོ་སྲུང་བརྩིའི་སླད་དྲན་རྟེན་སྦྲག་ཐམ་ཁག་ཅིག་འདོན་སྤེལ་ཞུས་ཡོད་འདུག འདི་ལོ་ཕྱི་ཟླ་ ༩ ཚེས་༢༡ ཉིན་སྦེལ་ཇམ་སྐུ་ཚབ་དོན་གཅོད་ལས་ཁུངས་ཀྱི་སྣེ་ཁྲིད་འོག་སྦེལ་ཇམ་༸རྒྱལ་བའི་གོ་སྟོན་གོ་སྒྲིག་ཚོགས་ཆུང་ནས་སྦར་སིལ་གྲོང་ཁྱེར་ནང་བྱམས་བརྩེ་དང་ཞི་བདེ། བདེ་ཐང་བཅས་ཀྱི་ཁ་བྱང་འོག་བོད་མི་ ༧༠ ལྷག་ནས་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་ཏེ་༸རྒྱལ་བའི་གོ་སྟོན་བྱམས་བརྩེའི་ལོ་སྲུང་བརྩི་ཞུས་ཡོད་འདུག

གསར་འགོད་པ། བྱམས་པ་ཚེ་རིང། རྩོམ་སྒྲིག་བྱེད་མཁན། སྐལ་བཟང་སྦྱིན་པ།