རྩོམ་པ་པོ། ཨུ་རྒྱན་བསྟན་པ།
རྩོམ་ཁུངས། བོད་ཀྱི་དུས་བབ།
སྐལ་རྡོར་ལགས་ཀྱིས་ ༢༠༢༥།༡༡།༡༧ ཉིན་དྲ་ལམ་བརྒྱུད་ཁོང་སྲིད་སྐྱོང་འོས་མིར་ལངས་རྒྱུའི་གསལ་བསྒྲགས་གནང་བ་ནི་རྗེས་སུ་ཡི་རང་གི་གནས་ཡིན་མོད། འོས་མིར་བཞེངས་དགོས་པའི་རྒྱུ་མཚན་གསུང་སྐབས། ད་ལྟའི་ཆར་བོད་དོན་འཐབ་རྩོད་དང་། ཆིག་སྒྲིལ། རོགས་དངུལ་བཅས་གནད་དོན་གསུམ་ཉམ་ཆག་སོང་ཡོད་པའི་དབང་གིས་དེ་དག་བསྐྱར་གསོའི་ཆེད་དུ་འོས་གཞིར་ལངས་ཀྱི་ཡོད་ལུགས་བགྲངས་པ་དེ་ནི། བཀའ་ཤག་སྔོན་མ་དང་ད་ལྟ་གཉིས་བསྡུར་ནས། ད་ལྟའི་བཀའ་ཤག་ལ་ཉམ་ཆག་གི་སྐྱོན་འཛུགས་གནང་གི་ཡོད་པས། དེ་ཐེངས་ཀྱི་འོས་བསྡུའི་ཁ་ཕྱོགས་ག་འདྲ་ཞིག་ཏུ་འགྲོ་མིན་ཐད་བློ་གཡེང་བྱུང་།
དངོས་གནས་བྱས་ན་ ༢༠༢༡ ལོའི་འོས་བསྡུ་ཆེན་མོའི་སྐབས་སུ། སྔོན་འགྲོ་དང་དངོས་གཞིའི་འོས་གཞིར་ལངས་མཁན་ཚང་མས་ཕན་ཚུན་སྐྱོན་བརྗོད་བྱེད་རེས་མ་ཡིན་པར། སོ་སོའི་སྲིད་ཇུས་ལངས་ཕྱོགས་དྲིལ་བསྒྲགས་ལ་ཤུགས་བརྒྱབས་ཡོད་པ་དེས། འདས་པའི་ལོ་བཞི་ལྷག་རིང་བཙན་བྱོལ་བོད་མིའི་སྤྱི་ཚོགས་དུམ་བུར་གྱེས་པ་ནས་ཆིག་སྒྲིལ་གྱི་ཕྱོགས་སུ་བསྐྱོད་རྒྱུར་ནུས་པ་ཆེན་པོ་ཐོན་ཡོད་པས། འོས་བསྡུ་སྔ་མའི་ལེགས་ཆ་དེ་རྒྱུན་མཐུད་རྒྱུ་ནི་སྲིད་སྐྱོང་འོས་མི་ཞིག་གི་གཞི་རིམ་གྱི་འགན་ཁུར་དང་། སྤྱི་སྒེར་གཉིས་ཕན་གྱི་ཐབས་ལམ་ཞིག་ཡིན་པ་སྨོས་མ་དགོས།
ཡིན་ནའང་། སྐལ་རྡོར་ལགས་ཀྱིས་སྲིད་སྐྱོང་འོས་གཞིར་ལངས་དགོས་དོན་གསུང་སྟངས་དེ་ནི་སྲིད་སྐྱོང་ཟུར་པ་བློ་བཟང་སེང་གེ་ལགས་ཀྱིས་ཉེ་ལམ་སྤྱི་ཚོགས་ནང་ཡོངས་གྲགས་སུ་གསུང་གླེང་གནང་དང་གནང་བཞིན་པ་ཤ་སྟག་ཡིན་པས། མི་མང་པོ་ཞིག་གིས་དེ་ལ་བློ་འཚབ་ཡོང་གི་ཡོད།
སྲིད་ཟུར་ཁོང་འོས་གཞིར་ལངས་རྒྱུའི་ཆ་རྐྱེན་ལྡན་བཞིན་དུ་ནང་མིའི་དཀའ་ངལ་ངལ་གླེང་སྟེ་ད་རེས་ལངས་ཀྱི་མིན་གསུངས་ཟིན་པས། དངོས་གནས་བྱས་ན་ཞལ་བཙུམ་ནས་བཞུགས་ན་ལན་ཤོས་ཡིན་ཡང་། དེ་ལས་ལྡོག་སྟེ་སྲིད་སྐྱོང་འོས་མི་ཡིན་པའི་ཚུལ་གྱིས་ད་ལྟའི་བཀའ་ཤག་གིས་ལས་དོན་ལ་སྤྱི་མ་སྤོམ་གྱི་སྐྱོན་འཛུགས་གནང་དང་གནང་བཞིན་པའི་ཁར། སྐལ་རྡོར་ལགས་ཀྱང་ཐེངས་འདིའི་འོས་བསྡུ་ཆེན་མོ་དེ་སྐྱོན་མཚང་འདྲུ་རེས་(Negative Campaign ) ཀྱི་ཁ་ཕྱོགས་སུ་ལྷུང་དུ་བཅུག་ཡོད། གལ་སྲིད་སྐལ་རྡོར་ལགས་ཀྱིས་ཞིབ་འཇུག་མ་གནང་བར་སྲིད་ཟུར་གྱི་གསུང་སྒྲོས་གཞི་མེད་དེ་རིགས་སྒྲོགས་རྐྱང་གནང་ན། བཀའ་ཤག་གིས་ཐད་ཀར་དགག་ལན་གནང་གི་ཡོད་མེད་ལ་མ་ལྟོས་པར། སྐྱོན་འཛུགས་དེ་རིགས་ཐེར་འདོན་བྱེད་མཁན་རིམ་པར་ཐོན་རྒྱུ་ཡིན་པ་ངེས་བརྟན་ཐོག ཡོངས་གྲགས་ཆགས་ཟིན་པའི་སྐལ་རྡོར་ལགས་སྒེར་གྱི་དེ་སྔའི་ལས་དོན་ནོར་འཁྲུལ་རིགས་ཕྱོགས་གང་ས་ནས་གླེང་སློང་བྱེད་ངེས་ཡིན་པས། བསམ་བློ་བཞི་གསུམ་བཅུ་གཉིས་མི་གཏོང་ཀ་མེད་ཡིན།
སྐལ་རྡོར་ལགས་ད་ཐེངས་སྲིད་སྐྱོང་འོས་གཞིར་བཞེངས་རྒྱུའི་ཀུན་སློང་དང་དམིགས་ཡུལ་གང་ཡིན་ཚོད་དཔག་དགོས་དོན་མེད་ནའང་། ཡོངས་གྲགས་ཐོག་ཡིན་ལ་མིན་ལ་གསུངས་ཚར་ཏེ། གློ་བུར་དུ་འོས་གཞིར་ལངས་རྒྱུའི་གསལ་བསྒྲགས་གནང་བ་དེས། གྲ་སྒྲིག་འཐུས་ཚང་ཞིག་མེད་པའི་སྣང་བ་འགོག་མེད་སྟེར་བ་མ་ཟད། ༢༠༢༡ ནས་ད་བར་བོད་མིའི་སྒྲིག་འཛུགས་དང་སྤྱི་ཚོགས་ཀྱི་གནས་སྟངས་ལ་རྒྱུན་ལོན་མེད་པས། གཞན་གྱི་ཟེར་རྗེས་སུ་འབྲངས་ནས་བཀའ་མོལ་གང་བྱུང་མང་བྱུང་གནང་གི་འདུག་བསམ་བསམ་མང་པོ་ཞིག་ལ་མཐོང་སྣང་ཐུན་མོང་དུ་བྱུང་འདུག
བོད་དོན་འཐབ་རྩོད་ལ་མཚོན་ན། ད་ལྟའི་སྲིད་སྐྱོང་ལས་ཐོག་སྤེན་པ་ཚེ་རིང་ལགས་ལོ་རེར་བོད་དོན་ཞུ་གཏུག་ཆེད་འཛམ་གླིང་རྒྱལ་ཁབ་གང་སར་སྐོར་སྐྱོད་གནང་གི་ཡོད་པ་དང་། སྲིད་སྐྱོང་དང་བཀའ་བློན་རྣམ་པས་རྒྱལ་ཁབ་ཁག་གི་ཆབ་སྲིད་འགོ་ཁྲིད་དང་། གྲོས་ཚོགས་འཐུས་མི་ཐུག་འཕྲད། རྒྱལ་སྤྱིའི་ཆབ་སྲིད་ཀྱི་སྡིངས་ཆ་ཁག་དང། བློ་འདོན་ལྟེ་གནས་དང་མཐོ་སློབ་ཁག་ཏུ་བགྲོ་གླེང་གཏམ་བཤད། རྒྱལ་ཁབ་རིམ་པའི་གསར་འགྱུར་བརྒྱུད་ལམ་གྲགས་ཆེན་ཁག་གི་བཅར་འདྲི་དང་ལེན་བརྒྱུད་བོད་དོན་ཞུ་གཏུག་དང་དྲིལ་བསྒྲགས་རྒྱ་ཁྱབ་འགྲོ་བཞིན་པའི་ཁར། རྒྱལ་ཁབ་ ༡༩ ནང་དང་བླངས་བོད་དོན་ཞུ་གཏུག་ལས་འགུལ་རུ་ཁག་བཙུགས་ཏེ། ཚོགས་མི་གྲངས་ ༨༠༠ ཙམ་གྱིས་བོད་དོན་ཞུ་གཏུག་ལས་འགུལ་ནུས་ལྡན་སྤེལ་བ་སོགས་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་བོད་དོན་འཐབ་རྩོད་སྐོར་དེ་སྔ་བྱུང་མ་མྱོང་བའི་ས་ཁྱབ་རྡོ་ཁྱབ་ཏུ་འགྲོ་བཞིན་འདུག་ལ། ཨ་རི་གཞུང་གིས་བོད་རྒྱའི་རྩོད་རྙོག་སེལ་ཐབས་ལ་སྐུལ་འདེད་ཀྱི་ཁྲིམས་ཡིག་གཏན་འབེབས་དང་། ཁེ་ན་ཌ་དང་། དབྱིན་ལན། ཨོ་སི་ཀྲི་ལི་ཡ་སོགས་རྒྱལ་ཁབ་མང་པོའི་གྲོས་ཚོགས་དང་། རྒྱལ་སྤྱིའི་སྡིངས་ཆ་གལ་ཆེ་ཁག་ཏུ་བོད་དོན་གྲོས་ཆོད་དང་བགྲོ་གླེང་རྒྱུན་མཐུང་ཡོང་གི་ཡོད་པ་དང་། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། བོད་དོན་རྒྱབ་སྐྱོར་ཚོགས་པ་ཁག་འཐུས་སྒོ་ཇེ་ཚང་དང་། ནུས་པ་ཇེ་ཆེར་སོང་ཡོད་པ་འདི་དག་བཙན་བྱོལ་བོད་མི་ཀུན་གྱི་མཐོང་ལམ་ན་ཁྲ་ལམ་མེར་ཡོད་པས། བོད་དོན་འཐབ་རྩོད་ཉམ་ཆག་ཏུ་སོང་ལུགས་ཀྱི་ཁུངས་སྐྱེལ་དཔང་རྟགས་གང་ནས་ཁྱེར་ཡོང་གི་ཡིན་ནམ། དེ་བཞིན་བཀའ་ཤག་སྐབས་འདིའི་རིང་རྒྱ་ནག་གཞུང་དང་མཉམ་དུ་མངོན་གསལ་མེད་པའི་འབྲེལ་བ་འཛིན་བཞིན་པའི་སྐོར་སྲིད་སྐྱོང་གིས་ལན་མང་གསུངས་ཡོད་པས། སྤྱི་མ་སྤོམ་གྱི་སྡོམ་ཚིག་དེ་ལྟ་བུ་མ་གསུངས་ན་ཡག་པོ་འདུག་བསམ།
ཆིག་སྒྲིལ་ཟེར་བ་འདི་སྤྱི་ཚོགས་དང་སྒྲིག་འཛུགས་ཀྱི་གཞི་རྟེན་གཙོ་བོ་དེ་ཡིན་པས། བཀའ་ཤག་སྐབས་སྔ་རྗེས་ཀྱི་བསྒྲགས་ཚིག་ནང་བཀོད་ཡོད་པ་དང་། ད་ལྟ་ཆིག་སྒྲིལ་ཉམ་ཆག་ཏུ་སོང་ཡོད་རེད་ཟེར་དུས། དྲི་བ་མང་པོ་ཞིག་རང་བཞིན་གྱིས་ཡོང་གི་ཡོད་རེད། བཀའ་ཤག་སྐབས་འདིས་བཅའ་ཁྲིམས་བསྐྱར་བཅོས་སོགས་ཐབས་ཤེས་མང་པོ་གནང་སྟེ། ལས་ཁུར་དམ་འབུལ་བྱེད་ཐུབ་ཀྱི་མེད་པའི་སྤྱི་འཐུས་ལྷན་ཚོགས་བསྐྱར་གསོ་དང་། སྒོ་རྒྱག་ལ་ཉེ་བའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་ག་འདེམས་བསྐོ་བྱེད་ཐུབ་འདུག་པ་མ་ཟད། འདས་པའི་ལོ་བཞི་ལྷག་རིང་གཞིས་ཆགས་དང་། དགོན་པ་གྲྭ་ཚང་། བོད་མི་འདུ་གནས་བཅས་པར་ཐེངས་གཉིས་རེར་ཆེད་བསྐྱོད་ཀྱིས་གནས་ཚུལ་འགྲེལ་བཤད་དང་། དྲི་བ་དྲིས་ལན་གྱི་ལམ་ནས་བཀའ་ཤག་གི་ལས་དོན་བྱེད་ཕྱོགས་དང་ཕུགས་དམིགས་ངོ་སྤྲོད་བརྒྱུད་མཐར་ལྷུང་གི་བསམ་ཚུལ་འཛིན་མཁན་ཁག་ཅིག་ཡོད་པ་དེ་དག་གི་སྣང་བ་རྣམ་རྟོག་ཀྱང་སེལ་ཐུབ་འདུག་ལ། ཟུར་སྐྱོང་དང་རང་སྐྱོང་སྒྲིག་འཛུགས་ཁག་གི་སྒྲིག་གཞི་བསྐྱར་བཅོས་དང་། འཛིན་སྐྱོང་ལེགས་བཅོས་ཐོག བོད་ནས་གསར་འབྱོར་བ་དང་། དཀའ་ངལ་ཅན་གྱི་ས་ཁུལ་དང་ཁ་འཐོར་དུ་གནས་སྡོད་བྱེད་མཁན་བོད་མི་ཡོངས་རྫོགས་རུབ་སྡོད་སྤྱི་ཚོགས་ཀྱི་ལས་གཞི་ཁོངས་བཅུག་སྟེ། གཞིས་སྤོ་ལས་དོན་ཡག་ཐག་ཆོད་འགྲོ་བཞིན་པ་སོགས་ཆིག་སྒྲིལ་མི་ཡོང་བའི་རྐྱེན་རྩ་ཕལ་ཆེ་བ་བཀག་འདུག་པས། ད་ལྟ་ཆིག་སྒྲིལ་ཉམས་འདུག་ཟེར་བ་དེའི་མ་ཉམས་གོང་གི་ཚད་གཞི་གང་ཞིག་གི་ཐོག་འཇོག་གི་ཡོད་དམ། ལྷག་པར་དུ་བཀའ་ཤག་སྐབས་འདིའི་རིང་སྤྱི་ཚོགས་ནང་དབུ་མ་དང་རང་བཙན་གྱི་ལངས་ཕྱོགས་འཛིན་མཁན་རྣམས་བོད་དོན་འཐབ་རྩོད་ཐོག་ནུས་པ་མཉམ་སྤུངས་བྱེད་དུ་བཅུག་ཐུབ་ཡོད་པའི་གྲུབ་འབྲས་མངོན་སུམ་མཐོང་བཞིན་དུ་ཆིག་སྒྲིལ་ཉམས་འདུག་གསུངས་ན། དེ་ནི་བོད་ཀྱི་གཏམ་དཔེར་མཁྲིས་ནད་ཅན་གྱིས་དུང་དཀར་སེར་པོར་མཐོང་ཞེས་པའི་དཔེ་ལྟར་རེད་མི་འདུག་གམ།
རོགས་དངུལ་སྐོར་ལ་བཀའ་ཤག་སྐབས་འདིས་གྲོས་ཚོགས་སུ་རྩིས་ལོ་ ༢༠༢༢་་༢༣ དང་། ༢༠༢༣་་༢༤། ༢༠༢༤་་༢༥། ༢༠༢༥་་༢༦ བཅས་ཀྱི་སྔོན་རྩིས་གཏམ་བཤད་ཁག་ལ་བལྟས་ན། རྩིས་ལོ་ ༢༠༡༦་་༡༧ ལོའི་སྔོན་རྩིས་མ་དངུལ་ཧིན་སྒོར་ས་ཡ་ ༡༩༤༡་༠༡ ནས་ ༢༠༢༠་་༢༡ ལོར་ས་ཡ་ ༣༥༤༣་༨༩ ཡིན་པ་དང་། ༢༠༢༣་་༢༤ ལོར་ས་ཡ་ ༥༣༠༡་༩༨ གསལ་འདུག་པས། བཀའ་ཤག་སྐབས་སྔོན་མའི་རྩིས་ལོ་ ༢༠༢༠་་༢༡ དང་བསྡུར་ན་ད་ལྟའི་བཀའ་ཤག་གིས་བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ཧིན་སྒོར་ས་ཡ་ ༡༧༥༨ ལྷག་ཐབས་ཤེས་བྱེད་ཐུབ་འདུག་པ་དེ་འཕར་སྣོན་བརྒྱ་ཆ་ ༤༩་༦ ཙམ་བྱུང་འདུག་པ་ཁོ་ནས་རོགས་དངུལ་ཉམ་ཆག་ཕྱིན་འདུག་ཟེར་མཁན་དེ་ཚོ་ཚང་མའི་ཁ་ལ་རྡོ་རྗེ་རྒྱ་གྲམ་གྱི་ལྕགས་གཟེར་རྒྱག་ཆོག་གི་ཡོད། ༢༠༢༤ ལོར་ཨ་རིའི་སྲིད་གཞུང་གསར་པས་རོགས་དངུལ་བཀག་རྗེས། ཟླ་གསུམ་བཞི་པའི་འགྲོ་གྲོན་ཧིན་སྒོར་དུང་ཕྱུར་གཅིག་དང་བྱེ་བ་བདུན་ལྷག་བཀའ་ཤག་གིས་ཐབས་འཚོལ་གནང་སྟེ་བར་བརྒལ་བཀའ་འཁྲོལ་ཞུས་པ་དང་། ཨ་རིའི་ PRM རོགས་ཚོགས་ཀྱི་རོགས་དངུལ་རྣམས་ ༢༠༢༥།༣།༧ ཉིན་བསྐྱར་གསོ་ཐུབ་འདུག་པའི་སྐོར་འདི་ལོའི་སྔོན་རྩིས་གྲོས་ཚོགས་ཀྱི་ལས་རིམ་ནས་མཐོང་ཐུབ་ལ། ཨ་སྒོར་ས་ཡ་ ༦་༨ བསྐྱར་གསོ་བྱུང་ལུགས་ཕྱི་ཟླ་ ༧ ཚེས་ ༢ ཉིན་སྲིད་སྐྱོང་གིས་བོད་མིའི་ཆོས་ཚོགས་ཐེངས་ ༡༥ པའི་གསར་འགོད་ལྷན་ཚོགས་སྐབས་གསུངས་འདུག་པས། རོགས་དངུལ་ཞན་པོ་ཆགས་ལུགས་ཀྱི་ཀླན་ཀ་དེ་རིགས་ལ་གཞི་འཛིན་ས་ག་རེ་ཡོད་དམ། གལ་སྲིད་སྐལ་རྡོར་ལགས་སྐུ་སྒེར་ལ་ད་ལྟའི་བཀའ་ཤག་ལས་ལྷག་པའི་རོགས་དངུལ་ཐབས་འཚོལ་གྱི་ནུས་པ་ཡོད་གསུང་གི་ཡོད་པ་བདེན་ན། ཨ་རིའི་བོད་དོན་དམིགས་བསལ་འབྲེལ་མཐུད་ལས་ཁུངས་ཀྱི་ལས་བྱེད་ Todd Stein ལགས་ཀྱིས་སྐལ་རྡོར་དང་སྤེན་པ་ཚེ་རིང་གཉིས་བྱང་ཨ་རིའི་སྐུ་ཚབ་དོན་གཅོད་བྱེད་སྐབས་ཨ་རི་གཞུང་ལ་འབྲེལ་གཏུགས་ཀྱི་གྲངས་ཀ་གཤིབ་བསྡུར་བྱས་ཏེ། སྤེན་པ་ཚེ་རིང་ལགས་ཀྱིས་ལོ་གཅིག་རིང་ཨ་རིའི་འཛིན་སྐྱོང་དང་གྲོགས་ཚོགས་འཐུས་མི་ཐུག་འཕྲད་ཟླ་རེར་ཆ་སྙོམས་ ༡༠་༩ དང་། སྐལ་རྡོར་ལགས་ཀྱིས་ལོ་གསུམ་རིང་ཟླ་རེར་ ༡་༩ ལས་བྱུང་མེད་སྐོར་ཨ་རིའི་ཁྲིམས་དོན་ལས་ཁུངས་ཀྱི་དྲ་ཚིགས་ནས་དྲངས་ཏེ་བཏོན་ཡོད་པ་དེ་བརྗེད་མི་རུང་ལ། སྲིད་ཟུར་དང་ཁྱེད་རང་མཉམ་འབྲེལ་ཐོག་ལས་འགན་མ་འཁྱུར་གོང་གི་དབང་ཆ་བཀོལ་ཏེ་ཨ་རི་གཞུང་གི་རོགས་དངུལ་སྒེར་གྱི་ལས་འཆར་ཐོག་རག་ཐབས་ཇི་གནང་གི་དྲི་བ་སོགས་ད་དུང་ཡོང་རྒྱུ་བསྡད་པ་མང་པོ་ཞིག་ཡོད་དེ་ཚོ་སྣང་མེད་དུ་འཇོག་ཆོག་པ་ཞིག་རེད་བསམ་གྱི་མི་འདུག
སྲིད་སྐྱོང་འོས་བསྡུའི་རེ་ལྟོས་བྱ་རུང་བའི་གྲུབ་འབྲས་གལ་ཆེ་ཤོས་ཤིག་ནི། འོས་གཞི་སོ་སོའི་ཆབ་སྲིད་དང་འཛིན་སྐྱོང་གི་ལྟ་བ་ལངས་ཕྱོགས་སྤྱི་ཚོགས་ནང་རྒྱ་ཁྱབ་ཏུ་དྲིལ་བསྒྲགས་དང་གླེང་སློང་བྱས་ཏེ། མང་ཚོགས་ཀྱི་དོ་སྣང་སྒྲིག་འཛུགས་ཐོག་འདྲེན་རྒྱུ་དེ་ཡིན་དགོས་ལ། ལྷག་པར་དུ་ད་ལྟའི་བཀའ་ཤག་གི་རྩ་དོན་སྒྲུབ་ཕྱོགས་དང་། སྤྱི་ཚོགས་ཀྱི་བདེ་དོན་སྒྲུབ་ཕྱོགས་ཐོག་མ་འགྲིག་པ་དང་མ་འཐུས་པ་གང་ཡོད་ཁུངས་ལུང་ལྡན་པའི་ཐོག་ནས་ཐེར་འདོན་དང་། ཡོ་བསྲང་གི་ཐབས་ཤེས་འདོན་རྒྱུ་གལ་ཆེ་ཡིན་པ་མ་ཟད། སྲིད་སྐྱོང་ལས་ཐོག་སྒེར་གྱི་གཞུང་དོན་དང་འབྲེལ་བའི་བསམ་བློའི་ཁྱེར་སོ་དང་གཏམ་སྤྱོད་ལ་དགེ་འདོན་སྐྱོན་སེལ་གྱི་དཔྱད་འཇོག་བྱ་རྒྱུ་ནི་མང་གཙོ་ཡུལ་ལུང་ཀུན་གྱི་སྤྱི་སྲོལ་ཆགས་ཡོད། དཔེར་ན། སྐལ་རྡོར་ལགས་ཀྱིས་བྱས་རྗེས་ཆེ་ཤོས་སུ་བགྲངས་པའི་གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་བཀའ་ཤག་གིས་སྒོ་རྒྱག་པའི་སྲིད་ཇུས་བཟུང་བ་དེར་བགྲོ་གླེང་གཏིང་ཟབ་གནང་རྒྱུར་སུ་ཞིག་གིས་མ་འདོད་པ་བྱེད་དམ།
ཕངས་པ་ཞིག་ལ། སྐལ་རྡོར་ལགས་ད་ཐེངས་སྲིད་སྐྱོང་འོས་མིར་བཞེངས་དགོས་པའི་རྒྱུ་མཚན་གསུམ་གསུངས་པ་དེ་དག་རྐང་པ་ལངས་ས་ནས་འཁྱོགས་ཚར་འདུག་བསམ་པ་ཞིག་བློ་ལ་འགོག་མེད་དུ་ཤར་བྱུང་། སྐལ་རྡོར་ལགས་ཀྱིས་སྒྲིག་འཛུགས་ནང་ཞབས་ཞུ་བསྒྲུབས་པའི་ཉམས་མྱོང་གི་ཐོག་ནས་བལྟས་ན། དོན་གཅོད་ཀྱི་ལས་རྒྱུན་རིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་འཁྲིས་སུ་དོལ་རྒྱལ་བསྟེན་མཁན་བཅར་དུ་བཅུག་པ་དང། ༸གོང་ས་མཆོག་ San Diego university ཆིབས་བསྒྱུར་སྐྱོང་སྐབས། ཕྱི་ལོགས་ལ་བོད་པ་ཚང་མ་ཚོགས་ཁང་ནང་ཡར་བཅུག་སྟེ། དོལ་རྒྱལ་རྗེས་འབྲང་པ་ཚོར་ངོ་རྒོལ་སྐད་འབོད་ཀྱི་བཀའ་འཁྲོལ་ཐོབ་ཏུ་བཅུག་པ། སྒྲིག་གཞི་ལ་ལྟོས་མེད་ཀྱིས་དོན་གཅོད་ཀྱི་གོ་གནས་ཐོག་ནས་སྲིད་སྐྱོང་འོས་བསྡུའི་ལས་རིམ་ནང་ཐེ་ཞུགས་ཤུགས་ཆེར་བྱས་པ་སོགས་ཀྱི་ནོར་འཁྲུལ་གྲོས་ཚོགས་ནང་བགྲོ་གླེང་གནང་དགོས་ཐུག་པ་མ་ཟད། ཞིབ་འཇུག་ཚོགས་ཆུང་ཡང་འཛུགས་དགོས་བྱུང་ཡོད་ལ། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་པར་མར་ཕབ་པའི་སྐོར་དང་། དོན་གཅོད་གསར་རྙིང་རྩིས་སྤྲོད་བྱེད་སྐབས། དོན་ཁང་གི་ loptop རྩིས་མ་སྤྲད་པར་སུད་སི་བར་དུ་འཁྱེར་ཏེ་ཚུར་སློག་སྐབས་གཞུང་འབྲེལ་ཨི་མེལ་དང་ཡིག་ཆ་ལྟ་ཅི་ operating system ཡན་ཆད་མེད་པ་བཟོས་ནས་བཏང་ཡོད་པ་སོགས་ཁྲིམས་ཞིབ་ཁང་གི་ཁ་མཆུ་ཨང་ ༢༠ པའི་བཅད་ཁྲ་ནང་བཀོད་ཡོད་པའི་སྒེར་གྱི་སྐྱོན་གནད་དེ་རིགས་ ༢༠༢༡ ལོར་དྲི་གླེང་བྱེད་མཁན་བྱུང་མེད་ནའང་། སྐྱོན་མཚང་འདྲུ་རེས་ཀྱི་འོས་བསྡུའི་ཁ་ཕྱོགས་སུ་ཕྱིན་པ་ཡིན་ན། སྐལ་རྡོར་ལགས་ཀྱི་གནས་ཚུལ་མང་པོ་ཞིག་དྲ་རྒྱའི་བརྒྱུད་ལམ་ནས་སྔོག་ཆོག་ཆོག་ཡོད་པས། སོ་སོར་སྐྱོན་བརྗོད་གང་གནང་ལ་ལན་འདེབས་གནང་ནས་བཞུགས་ཀྱི་ཡིན་ནམ། ཡང་ན་སོ་སོའི་མ་འོངས་འཆར་སྣང་ངོ་སྤྲོད་གནང་གི་ཡིན་དགོངས་པ་བཞེས་རན་ཡིན།
སྐལ་རྡོར་ལགས། སྲིད་ཟུར་ལ་ནུས་པ་ཇི་ཡོད་ ༢༠༢༡ ལོའི་འོས་བསྡུ་ཆེན་མོའི་སྐབས་ཚང་མས་མཐོང་ཟིན་པ་རེད། ཁྱེད་ལ་བཀའ་ཤག་སྔ་མའི་ཁུར་པོ་ཁུར་རྒྱུའི་འགན་ཁུར་ཡོད་མ་རེད། སྐྱོན་མཚང་འདྲུ་རེས་ཀྱི་འོས་བསྡུའི་ལམ་ལ་སོང་ན་གྱོང་རག་མཁན་དེ་ཁྱེད་རང་རེད། རྐང་པ་འཛུགས་ས་ནས་འཁྱོགས་ན་གོམ་པ་སྤོ་ཐུབ་ཀྱི་མ་རེད། དེ་ལས་རང་དབང་གི་ཐོག་ནས་སོ་སོའི་རྣམ་དཔྱོད་རྩལ་སྤྲུགས་ཀྱིས་ཆབ་སྲིད་དང་འཛིན་སྐྱོང་གི་འཆར་སྣང་གསར་པ་དང་། རིགས་ལམ་གསར་པ། ཐབས་ཤེས་གསར་པ་བཏོན་ནས། ཐེངས་འདིའི་སྲིད་སྐྱོང་འོས་བསྡུའི་གྲོས་གཞི་དོན་སྙིང་ལྡན་པ་ཞིག་བཟོས་ཏེ། འོས་བསྡུའི་རྒྱལ་ཁ་ཐོབ་ཐབས་ཐོག་འབད་བརྩོན་གནང་རོགས་ཞུ་གི་ཡོད།
སྐལ་རྡོར་ལགས་མུ་མཐུད་སྐྱོན་མཚང་འདྲུ་རེས་ཀྱི་འོས་བསྡུའི་ཁ་ཕྱོགས་སུ་ཕེབས་ན། དེའི་ཁ་ཕྱོགས་སྒྱུར་ཐབས་ཐོག་བོད་མི་མང་པོ་ཞིག་རིམ་པ་བཞིན་ཐོན་ཡོང་གི་རེད། །
མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།
ང་ཚོས་སྲིད་སྐྱོང་དང་གྲོས་ཚོགས་འཐུས་མིར་ནོར་འཁྲུལ་བྱེད་མཁན་ཞིག་འདེམས་མ་ཐག་སྔོན་འགོག་བྱེད་རྒྱུ་ཧ་ཅང་གལ་ཆེ། ང་ཚོས་བོད་དབུས་གཞུང་གི་ལམ་ལུགས་ཆ་ཚང་འཛུགས་སྐྲུན་བྱེད་པར་གང་དགོས་པ་དེ་བརླག་ཐུབ་ཀྱི་མ་རེད། བོད་ཀྱི་རྩ་དོན་མ་སེལ་བར་དུ་དབུས་བོད་མིའི་འཛིན་སྐྱོང་ནི་ང་ཚོའི་མདུན་ལམ་ཡིན། མི་སུ་ཞིག་གིས་ཁྱད་པར་གང་རུང་ལ་འགན་འཁྲི་འཁུར་དགོས། ལྷག་པར་དུ་ལྐོག་ཟ་རུལ་སུངས་དང་། བདེ་འཇགས་ལ་གཏོར་བརླག་གཏོང་བའི་བྱ་སྤྱོད་གང་རུང་དང་། ཉེས་འཛུགས། རྐུ་འཕྲོག་བྱེད་པ། གནས་ཚུལ་ནོར་འཁྲུལ་ཅན་ཁྱབ་སྤེལ་བྱེད་པ། མགོ་སྐོར་གཏོང་བ་དང་། རྫུན་བཤད་པ་དང་དམིགས་ཡུལ་ལྡན་པའི་སྒོ་ནས་མགོ་སྐོར་གཏོང་བ། བོད་མི་རིགས་དང་ང་ཚོའི་མ་འོངས་པའི་མདུན་ལམ་ལ་ཉེན་ཁ་བཟོ་མཁན་གང་ཡིན་རུང་ཁྲིམས་ལྟར་འགན་འཁྲི་བདའ་འདེད་དང་ཉེས་ཆད་གཅོད་དགོས།
རྐང་པ་འཛུགས་ས་ནས་འཁྱོགས་ཚར་བའི་སྐལ་རྡོར་ལགས།
གོང་དུ་གསལ་བའི་གསར་གནས་འགོ་བརྗོད་འདི་བོད་ཀྱི་དུས་བབས་ནང་ཨུ་རྒྱན་བསྟན་པ་ལགས་ངོ་བོ་ཅན་ནས་བརྩམས་ནས་སྤེལ་བ་གསལ། དེའི་ནང་སྲིད་སྐྱོང་འོས་མི་སྐལ་རྡོར་ལགས་སུ་སྐྱོན་བརྗོད་མང་དག་ཅིག་ཞུས་གནང་འདུག ལྷག་དོན་དབུ་དཀར་ཚང་སྐལ་བཟང་རྡོ་རྗེ་ལགས་ཀྱི་འོས་བསྡུའི་འཆར་སྣང་། མཐུན་སྒྲིལ་དང་། བོད་དོན་དྲིལ་བསྒྲགས་རྒྱ་བསྐྱེད། རང་ཁ་རང་གསོ་དང་དཔལ་འབྱོར་སྲ་བརྟན་བཅས་དོན་ཚན་གསུམ་དེ་དག་ད་ཡོད་སྲིད་སྐྱོང་ལ་སྐྱོན་འཛུགས་ཡིན་པར་ངོས་འཛིན་གྱིས་གོང་གི་དོན་ཚན་དང་འབྲེལ་པའི་སྲིད་སྐྱོང་གིས་བྱས་རྗེས་ལན་འདེབས་རྒྱས་ཙམ་གནང་བ་སོ་སོའི་འདོད་མོས་ཀྱང་། སྐལ་རྡོར་ལགས་ནས་དུས་བབས་བརྒྱུད་སྲིད་སྐྱོང་འོས་མིར་ལངས་དགོས་པའི་རྒྱུ་མཚན་གསལ་བཤད་གནང་འདུག་པར་ངོས་ལེན་མེད་ཐོག་ད་དུང་འཆར་གཞི་མེད་དང་བོད་མིའི་སྤྱི་ཚོགས་ནང་མྱོང་བ་མེད་པའི་སྐྱོན་བརྗོད་སོགས་གནང་བ་ནི་སོ་སོའི་བྱས་ན་འགྲིག་པ་དང་མིའི་བྱས་ན་སྐྱོན་དུ་མཐོང་བ་མཁྱེན་ཚར་རེད་བསམས། སྤྱིར་སྐལ་རྡོར་ལགས་སུ་སྐྱོན་བརྗོད་ཞུས་པར་ངས་ལན་ཞུ་དགོས་མིན་འདུག་ཀྱང་ཁྱེད་རྣམ་ནས་གསུངས་པའི་དོན་ཚན་གསུམ་ཐད་གསལ་བཤད་ཕྲན་ཙམ་མ་ཞུས་ན་བདེན་པར་ངོས་འཛིན་གྱིས་ང་ཚོར་དགོས་པའི་སྲིད་སྐྱོང་མང་མོས་ཅན་དེར་དོ་ཕོག་ཐེབས་སྲིད་ན་གལ་པོ་ཆེ་ན་ནན་གཏན་མ་ཞུ་མཐའ་མེད་ཆགས་འདུག་པ།
མཐུན་སྒྲིལ། བོད་ཀྱི་བདེ་དོན་བསྒྲུབ་རྒྱུར་ཆ་རྐྱེན་གཙོ་བོའམ་མེད་དུ་མི་རུང་དེ་ཆོལ་གསུམ་ཆོས་ལུགས་བཅས་པའི་མཐུན་སྒྲིལ་དེ་ཉམས་ནས་སྲིད་སྐྱོང་སྤེན་ཚེ་ལགས་སྐབས་གྲོས་ཚོགས་དང་དམངས་གཙོའི་ལམ་ལུགས་ཐད་དཀའ་ངལ་ག་ཚོད་བྱུང་སོང་། གྲོས་ཚོགས་འཚོགས་མ་ཐུབ་པ་དང་ཐུབ་ནའང་བར་མཚམས་ཆད་ནས་ལས་དོན་ཞུ་མ་ཐུབ་པའི་དཀའ་ངལ་ག་ཚོད་བྱུང་སོང་། དེ་རྣམས་སྒྲིག་གཞི་སྐྱོ་བའི་ལན་མིན། དེ་དག་གང་མཚམས་ཤིག་ཁོང་གི་མི་གཤི་དང་གང་མཚམས་ཤིག་ཐབས་བྱུས་སྐྱོ་བའི་རྐྱེན་ལས་བྱུང་བ་རེད། ཐམས་ཅད་མགུ་བ་སུས་ཀྱང་དཀའ་ཡང་མང་མོས་ལོང་ཙམ་ཞིག་ཀྱང་བྱུང་མ་སོང་ང་། མཐར་བོད་མི་མང་པོ་ཞིག་རྡ་སར་འཛོམས། གཞན་མང་པོ་ཞིག་ནས་ས་གནས་སོ་སོར་ཆོས་འཐུས་རྩིས་པའི་སྤྱི་འཐུས་རྣམ་པ་དང་། གཞུང་གི་མཛད་གཙོ་སྲིད་སྐྱོང་སོགས་ནམ་ཕེབས་སུ་བསམ་འཆར་ཞུ་འབོད་། གང་ལྟར་ཡང་ད་བར་བྱུང་མ་མྱོང་བའི་དཀའ་སྡུག་ལ་བསམ་ཤེས་དགོས་པའི་འབོད་སྐད་ཞུ་ནས་མཐར་འགྲིག་ཙམ་གྱིས་འགྲོ་ཐུབ། ཡིན་ཀྱང་ཁྱེད་ཚོར་དེར་ཕྱོགས་ཤེས་མེད་པར་ད་དུང་ལམ་ལུགས་བཟང་པོར་གས་ཆག་ཀྱིས་བཅོས་པ་སྲིད་སྐྱོང་སྤེན་ཚེ་ལགས་ཀྱི་འཇོན་ནུས་སུ་རྩིས་པ་འུ་ཐུག་ཐབས་ཟད་སྐད་ཆ་མ་རེད་དམ། འཇོན་པོ་ཡོད་ནས་ལམ་ལུགས་བཟང་པོར་གོང་འཕེལ་གཏོང་དགོས་པ་ག་ན་འདུག མཐུན་སྒྲིལ་ཉམས་འདུག་ཉམས་འདུག་ཅེས་པའི་དུས་དེ་ག་དུས་འགོ་བཙུགས་ཞེས་ན་སྤེན་ཚེ་ལགས་སྲིད་སྐྱོང་འོས་མིར་བཞེངས་དུས་ནས་གཙོ་བྱས། དེ་ཡང་ཁོང་རང་ལ་བདེན་པ་ཐོབ་ཆེད་རྙོག་རྩོད་འདྲ་མི་འདྲ་བཤད། གཞུང་གི་ཡིག་ཆ་ཁག་ཀྱང་དགོས་གནད་ཆེ་མེད་དུ་བེད་སྤྱད། ཁོ་བའི་ཐབས་བྱུས་ཡིན་མིན་ལ་མ་བལྟོས་པར་ཕྱོགས་གཏོགས་འགས་བློ་སེང་ལ་ངོ་བརྒོལ་རྒྱབ། ལོ་ཤས་ཕྱིན་པའི་གཞུང་གིས་ངོས་བཞེས་ཐོབ་པའི་རྩིས་ལའང་རྙོག་གླེང་གིས་མཐར་ཨ་རིའི་ཡུལ་ཁྲིམས་ལའང་འཇུག་ཉེན་བྱུང་གནས་སོགས་ནས་མཐར་མཐུན་སྒྲིལ་མེད་པའི་ཕྱོགས་ཞེན་དེ་འགོ་བརྩམས།
ཁོང་གི་མི་གཤིས་ཐད། ཁོང་ནས་ལོ་མང་གྲོས་ཚོགས་ནང་སོགས་ཕྱག་ལས་གནང་སྐབས་གནས་དུས་སོ་སོའི་གྲོས་ཚོགས་དང་གཞུང་གི་མཛད་གཙོ་ཁག་འགར་ངོ་སྲུང་གི་བྱ་ཐབས་ལ་མི་དགའ་མཁན་གྲོས་ཚོགས་འཐུས་མི་མི་ཉུང་བ་ཞིག་ནས་ད་ཆ་ཁོང་གིས་གཞུང་འཛིན་དང་ཐབས་བྱུས་སུ་མི་འདོད་པའི་ལན་འདེབས་ཞུས་རེད། སྒེར་མི་དགའ་བའི་ཁོག་ནད་དེས་སྤྱི་དོན་ལ་གྱོང་བཏང་བར་དགའ་གུས་ཡེ་ནས་མེད་ཀྱང་བྱ་ཐབས་དཀའ་བའི་གནས་ཤིག་དང་སྤྱི་དོན་དུ་གོམ་པ་མདུན་སྤོས་མེད་པར་རྒྱུན་རིང་ལུས་པའི་གྱོང་ཁ་ཆེན་པོ་རག་པར་སེམས་མ་བཟོད་མཉམ་ད་དུང་དེ་ལྟར་མི་ཡོང་ཆེད་སྲིད་སྐྱོང་གསར་པ་ཞིག་འདེམས་ཐབས་མ་བྱུང་ན་སྤེན་ཚེ་ལགས་རང་ཉིད་ནས་བསམ་ཤེས་མེད་སྟབས་སྐད་མ་རྒྱབ་དཀའ་མེད་དུ་གྱར། དེ་སྔ་ཁོང་གྲོས་ཚོགས་ནང་ཕྱག་ལས་གནང་སྐབས་སྒེར་གྱི་གནད་དོན་ཐད་གྲོས་ཚོགས་ནང་བཀའ་མོལ་སྡུག་ཆ་། མ་རབས་ཚད་མེད་དེ་ལྟར་གནང་བ་འཐུས་ཀྱི་ཨ་ཡོད་སྙམ་པའི་སྐབས་དུས་བརྗེད་དཀའ་བ་དང་བསམ་དཀའ་བའི་གནས་ཤིག་ཀྱང་བྱུང་མ་སོང་ངམ། དེ་ན་ད་དུང་ཁོང་ལ་ལོ་ལྔ་སླར་སྲིད་སྐྱོང་གོ་སྐབས་ཐོབ་ན་བོད་མིར་མེད་དུ་མི་རུང་པའི་མཐུན་སྒྲིལ་དེ་ཡོང་ས་དཀའ་གནས་མིན་འདུག་གམ། དེ་ལས་རང་རེའི་འཐབ་བརྩོད་ཀྱི་གནས་སྟངས་དེ་ཡར་རྒྱས་ཤིག་ཡོང་རེ་ཨེ་འདུག་ཅེས་དྲི་བ་་ཞུ་ཡི་ཡོད་ལགས།།
བོད་དོན་དྲིལ་བསྒྲགས་རྒྱ་བསྐྱེད། གནས་དོན་ཐད་ཉིན་ཤས་སྔོན་ཨ་མའི་བུ་ཆུང་ལགས་སུ་ལན་འདེབས་ཞུས་པ་ལྟར་ཨ་རི་གྲོས་ཚོགས་སོགས་ནང་བོད་དོན་དུ་ཕན་པའི་གྲོས་ཆོད་འཇོག་ཐབས་བྱུང་ན་སུས་བྱས་མིན་ལ་མ་བལྟོས་བར་བོད་སྤྱི་བར་ཕན་པའི་དགེ ཡིན་ཀྱང་འགྲུབ་འབྲས་སུ་མངོན་བསྟོད་དགོས་ན་ལས་སུ་འཇུག་པོར་ཞུ་དགོས་གལ་ལས་སྲིད་སྐྱོང་ལ་ཆེར་མིན། ཡུ་རོབ་ནང་དུའང་རྒྱལ་སྤྱིའི་བོད་དོན་དྲིལ་བསྒྲགས་ ICT བརྒྱུད་ནས་ཨ་རི་ལྟར་གྲོས་ཚོགས་ནང་ལྟར་ཡུལ་ལུང་སོ་སོའི་གྲོས་ཚོགས་ནང་བོད་དོན་བདེན་སྐུལ་གྱི་ལས་གཞི་གང་འོང་ལོ་ཤས་སྔོན་ནས་འགྲོ་བཞིན་ཐོག་སྲིད་སྐྱོང་སྤེན་ཚེ་ལགས་ཀྱི་ལས་འཆར་ V-TAG ལས་འཆར་ནས་ཕན་རླབས་བྱུང་ཡོད་ན་དགེ་བའི་རང་བཞིན་ཀྱང་དེ་ལྟའི་ལས་གཞི་སྤེལ་བ་ཞིག་གོ་མ་སོང་། གཞི་ནས་རྒྱལ་སྤྱིའི་ནང་བོད་དོན་དྲིལ་བསྒྲགས་ལས་གཞི་ལོ་མང་ཞིག་ནས་འགྲོ་བཞིན་མ་ཚད་ཨ་རི་ལྟབུར་མཚོན་ན་གྲོས་མཆོད་གནས་སྟངས་གོང་ནས་གོང་དུ་རྒྱས་ནས་བོད་དེ་རང་བཙན་རྒྱལ་ཁབ་ཞིག་ཏུ་ངོས་འཛིན་གནས་ཚད་ཏུ་ཕྱོགས་ཡོད། ད་དུང་ཡང་བོད་ནང་བོད་མིའི་འདོད་མོས་ལྟར་གྱི་གནས་ལུགས་སུ་མ་ཚུད་བར་སྲིད་སྐྱོང་སོ་སོའོ་རྣམ་དཔྱོད་ལས་ཐབས་བྱུས་ཇི་ཡོད་ཞུ་དགོས་ལྟར་དབུ་དཀར་ཚང་སྐལ་རྡོར་ལགས་ཀྱི་སྲིད་སྐྱོང་འོས་མིའི་ལས་འཆར་ནང་བོད་དོན་དྲིལ་བསྒྲགས་རྒྱ་བསྐྱེད་ལས་འཆར་འཁོད་མཉམ་ལས་དོན་འགེལ་ཕྱོགས་ཐད་ད་གནས་ལས་མི་འདྲ་གནང་རྒྱུ་ཡོད་འདོག་གསུངས་ན་བལྟ་ཞིབ་གནས་སུ་འཇོག་དགོས་པ་ལས་དེ་ལས་ད་ལྟའི་སྲིད་སྐྱོང་མ་འཇོན་མ་ཐུབ་པའི་སྐྱོན་གནོང་དུ་ལེན་དགོས་ཨེ་འདུག་གམ།།
རང་ཁ་རང་གསོ་དང་དཔལ་འབྱོར་སྲ་བརྟན། གནས་དོན་འདི་གཞུང་དང་མི་དམངས་གཉིས་སུ་གལ་གནད་ཆེ་བའི་གནད་དོན་ལ་སོང་དབུ་དཀར་ཚང་སྐལ་རྡོར་ལགས་ཀྱི་སྲིད་སྐྱོང་ལོས་མིའི་དམ་བཅའ་ཞིག་ཡིན་ལ་ང་ནོར་མེད་ན་ལོ་ལྔའི་སྔོན་གྱི་འོས་བསྡུའི་ནང་དུའང་ཡོད་བསམས། སྲིད་སྐྱོང་སྤེན་ཚེ་ལགས་སྔོན་གྱི་གཞུང་གི་མཛད་གཙོ་ཚང་མས་རོགས་དངུལ་ཐབས་འཚོལ་ཐུབ་ན་མི་དམངས་ལ་གསལ་བསྒྲགས་ཕལ་ཆེར་ཞུ་འོང་། སྲིད་སྐྱོང་གོང་མ་བློ་སེང་ལགས་སྐབས་སུའང་བཀའ་བློན་ཞིག་ས་གནས་སུ་འཚམས་གཟིགས་སུ་ཕེབས་དུས་རོགས་རམ་ཨ་སྒོར་ས་ཡ་འགའ་ཤས་ཐོབ་པའི་བཀའ་ལ་ཧ་སང་མི་དགོས་དེ་སྔ་ཡང་དེ་ལས་མང་པ་ཐོབ་པ་གླེང་མྱོང་། སྲིད་སྐྱོང་སྤེན་ཚེ་ལགས་ས་གནས་སུ་ཐེངས་གཉིས་ཕེབས་སྐབས་རོགས་རམ་ཐོབ་པའི་བཀའ་མོས་གོ་མ་སོང་ལ་ས་གནས་གཞན་ལ་གསུངས་བའང་ཚོར་མ་སོང་། སྤེན་ཚེ་ལགས་གངས་སྐྱིད་ཁོར་ཡུག་ནང་ཡུན་རིང་བཞུགས་པའི་མཁྱེན་གྱི་ཡོད་ཀྱང་མ་གསུང་བ་དེ་མཁྱེན་ཚར་རམ་མེད་པའི་མ་གསུང་ཡིན་ནམ།
ཉིན་ཤས་སྔོན་དྲྭ་ལམ་ཐོག་གཤམ་དུ་ཡིག་ཆེན་ནང་གསལ་པའི་གྲོས་ཚོགས་སྔོན་རྩིས་མཐོང་དུས། ཨོ། གནས་ཚུལ་འདི་ལ་ལན་རྒྱབ་རྒྱུ་ཁག་འདུག སྔོན་རྩིས་མ་དངུལ་ནི་འཕར་འདུག ཡིག་ཆ་རྗུན་མ་ནི་ཕལ་ཆེར་བཟོ་ཡི་མ་རེད་དམ་བསམ་པའི་དོག་པ་ཞིག་བྱུང་། སླར་ཡང་ཡིག་ཆ་དག་དུས་བབས་ནང་མཐོང་དུས་བསམ་ལོ་ཞིག་གཏོང་དགོས་པ་བྱུང་སོང་།
རོགས་དངུལ་སྐོར་ལ་བཀའ་ཤག་སྐབས་འདིས་གྲོས་ཚོགས་སུ་རྩིས་ལོ་ ༢༠༢༢་་༢༣ དང་། ༢༠༢༣་་༢༤། ༢༠༢༤་་༢༥། ༢༠༢༥་་༢༦ བཅས་ཀྱི་སྔོན་རྩིས་གཏམ་བཤད་ཁག་ལ་བལྟས་ན། རྩིས་ལོ་ ༢༠༡༦་་༡༧ ལོའི་སྔོན་རྩིས་མ་དངུལ་ཧིན་སྒོར་ས་ཡ་ ༡༩༤༡་༠༡ ནས་ ༢༠༢༠་་༢༡ ལོར་ས་ཡ་ ༣༥༤༣་༨༩ ཡིན་པ་དང་། ༢༠༢༣་་༢༤ ལོར་ས་ཡ་ ༥༣༠༡་༩༨ གསལ་འདུག་པས། བཀའ་ཤག་སྐབས་སྔོན་མའི་རྩིས་ལོ་ ༢༠༢༠་་༢༡ དང་བསྡུར་ན་ད་ལྟའི་བཀའ་ཤག་གིས་བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ཧིན་སྒོར་ས་ཡ་ ༡༧༥༨ ལྷག་ཐབས་ཤེས་བྱེད་ཐུབ་འདུག་པ་དེ་འཕར་སྣོན་བརྒྱ་ཆ་ ༤༩་༦ ཙམ་བྱུང་འདུག་པ་ཁོ་ནས་རོགས་དངུལ་ཉམ་ཆག་ཕྱིན་འདུག་ཟེར་མཁན་དེ་ཚོ་ཚང་མའི་ཁ་ལ་རྡོ་རྗེ་རྒྱ་གྲམ་གྱི་ལྕགས་གཟེར་རྒྱག་ཆོག་གི་ཡོད། ༢༠༢༤ ལོར་ཨ་རིའི་སྲིད་གཞུང་གསར་པས་རོགས་དངུལ་བཀག་རྗེས། ཟླ་གསུམ་བཞི་པའི་འགྲོ་གྲོན་ཧིན་སྒོར་དུང་ཕྱུར་གཅིག་དང་བྱེ་བ་བདུན་ལྷག་བཀའ་ཤག་གིས་ཐབས་འཚོལ་གནང་སྟེ་བར་བརྒལ་བཀའ་འཁྲོལ་ཞུས་པ་དང་། ཨ་རིའི་ PRM རོགས་ཚོགས་ཀྱི་རོགས་དངུལ་རྣམས་ ༢༠༢༥།༣།༧ ཉིན་བསྐྱར་གསོ་ཐུབ་འདུག་པའི་སྐོར་འདི་ལོའི་སྔོན་རྩིས་གྲོས་ཚོགས་ཀྱི་ལས་རིམ་ནས་མཐོང་ཐུབ་ལ། ཨ་སྒོར་ས་ཡ་ ༦་༨ བསྐྱར་གསོ་བྱུང་ལུགས་ཕྱི་ཟླ་ ༧ ཚེས་ ༢ ཉིན་སྲིད་སྐྱོང་གིས་བོད་མིའི་ཆོས་ཚོགས་ཐེངས་ ༡༥ པའི་གསར་འགོད་ལྷན་ཚོགས་སྐབས་གསུངས་འདུག་པས། རོགས་དངུལ་ཞན་པོ་ཆགས་ལུགས་ཀྱི་ཀླན་ཀ་དེ་རིགས་ལ་གཞི་འཛིན་ས་ག་རེ་ཡོད་དམ།
གོང་གི་སྔོན་རྩིས་ཁག་ལ་ཤིབ་སྐབས་གནས་ཚུལ་ཆ་མི་ཚང་བའམ། སྔོན་རྩིས་མ་དངུལ་འགའ་རེས་དམངས་ཀྱི་བསམ་ཞིབ་ནས་སྦས་དགོས་པའི་རྒྱུ་རྐྱེན་ཡང་བྱུང་མེད་དམ་བསམ་གནས་འདུག གཅིག་བྱས་ན་ལེགས་པ་ཁག་ཡར་གནམ་ལ་ཕྱར། ཉེས་པ་ཁག་མར་ཀུམ་པའི་གནས་ཀྱང་བྱུང་མེད་དམ་བསམ། རྩིས་ལོ་༢༠།༢༡ དང་རྩིས་ལོ་༢༣།༢༤ གཉིས་ཀྱི་མ་དངུལ་བསྡུར་ནས་ ༢༣།༢༤ ལ་སྒོར་ས་ཡ་ ༡༧༥༨ མང་བ་བྱུང་གནས་དེ་ བརྒྱ་ཆ་ ༤༩་༦་མང་བ་བྱུང་ཙང་རོགས་དངུལ་ཉམ་ཆག་ཕྱིན་འདུག་ཟེར་མཁན་དེ་ཚོ་ཚང་མའི་ཁ་ལ་རྡོ་རྗེ་རྒྱ་གྲམ་གྱི་ལྕགས་གཟེར་རྒྱག་ཆོག་གི་ཡོད། ཅེས་པའི་རྒྱ་གྲམ་དེ་ཀྱོག་ཀྱོག་རྒྱབ་པའི་མཉམ་རྒྱབ་ཡུལ་ལ་མ་ཟུག་པ་ཡར་འཕར་ནས་རྒྱབ་མཁན་ལ་ཟུག་ས་འདུག
རྩིས་ལོ་༢༠།༢༡་དེ་སྲིད་ཟུར་བློ་སེང་ལགས་སྐབས་དང་། རྩིས་ལོ་༢༣།༢༤དེ་སྲིད་སྐྱོང་སྤེན་ཚེ་ལགས་སྐབས་ཡིན། རྩིས་ལོ་༢༡།༢༢ དེ་གང་གི་ཕྱིར་མི་གསལ། རྩིས་ལོ་འདིའི་སྐབས་སྲིད་ཟུར་ལགས་ནས་སྔོན་རྩིས་བཀའ་གྲོལ་ཐོབ་ཀྱང་སྲིད་སྐྱོང་སྤེན་ཚེ་ལགས་སུ་རྩིས་འབུལ་ཞུས་ཡོད། དེ་བཞིན་ད་ཡོད་སྲིད་སྐྱོང་གི་རྩིས་ལོ་༢༤།༢༥ དང་༢༥།༢༦ འགྲོ་བཞིན་ཡོད་པའི་ཁྱེད་ཚོའི་རྡོ་རྗེ་རྒྱ་གྲམ་ནང་མི་གསལ་བ་གང་ཡིན་ནམ། ཕལ་ཆེར་གདོང་བསྟན་ནུས་པ་མེད་པའི་གནད་ཞིག་ལས་ཡིན་དགོས། དེ་མིན་ཕྱོགས་ཞེན་མེད་པར་དངོས་ཡོད་ཅིག་མི་དམངས་གཟིགས་ཞིབ་ཆེད་འབུལ་དགོས་རྒྱུ་ཁྱེད་རྣམ་མ་ཤེས་པ་གང་ནས་ཡིན། གཅིག་བྱས་ན་སྟོན་མི་དགོས་པའི་བཀའ་ཡང་བྱུང་སྲིད། གཟིགས་དང་། སྲིད་ཟུར་སྐབས་རྩིས་ལོ་་༢༠༡༦།༡༧་ནང་སྔོན་རྩིས་མ་དངུལ་ས་ཡ་ ༡༩༤༡ དང་། ༢༠།༢༡ ནས་མ་དངུལ་ས་ཡ་ ༣༥༤༣ ཡིན་དུས་བརྒྱ་ཆ་ ༨༢་༥ འཕར་མིན་འདུག་གམ། ཁྱེད་རྣམ་པའི་མ་སྟོན་པ་རྩིས་ལོ་ ༢༡།༢༢ དེ་སྲིད་ཟུར་སྐབས་བཀའ་གྲོལ་གྱིས་སྲིད་སྐྱོང་སྤེན་ཚེ་ལགས་མ་དངུལ་དེ་ནས་ཕྱག་ལས་འགོ་བཙུགས་ཡོད། ༢༡།༢༢་ལོའི་མ་དངུལ་དེ་རྩིས་ལོ་༢༠།༢༡ ལས་མང་པ་ཞིག་ཡོད་ངེས་ཡིན། འདི་སྤེན་ཚེ་ལགས་སྔོན་གྱི་རྩིས་ལོའི་ལོ་རྒྱུས་ཤིག་ཡིན། བོད་གཞུང་སྔོན་རྩིས་དེ་ལས་སླ་པོ་ཞིག་ནས་འགྲེལ་བཤད་ཁྱེད་རྣམ་པའི་གནང་ནང་བཞིན་མེད་ལ་ལམ་སེང་མཐོང་བ་ཙམ་གྱི་མགོ་ཚོས་རྒྱུ་ཡང་ཁག་པོ་རེད། ཁྱེད་རྣམ་པས་སྟོན་གནང་པའི་སྔོན་རྩིས་མ་དངུལ་ལམ་འགྲོ་གྲོན་མ་དངུལ་མཉམ་བོད་གཞུང་གི་སྤྱི་ཡོང་མ་དངུལ་རྩིས་དེ་ལ་ཡང་བལྟ་དགོས་ཡོད། དེ་བཞིན་རྒྱུན་གྲོན་མིན་པའི་ཡར་རྒྱས་ལས་གཞི་དཔེ་ན་སྲིད་ཟུར་སྐབས་༢༠།༢༡ འམ་ རྩིས་ལོ་ ༢༡།༢༢ ནང་རོགས་རམ་ཐབས་འཚོལ་ཐུབ་པའི་ལས་གཞི་ལོ་འགའ་ཤས་འགྲོ་དགོས་ཁག་གི་དངུལ་ཡོང་རྒྱུ་ཡོད་ཁག་སྲིད་སྐྱོང་སྐབས་མུ་འཐུད་ཡོང་རྒྱུ་ཡོད་གནས། དེ་བཞིན་རང་གཞུང་གི་རྒྱུན་གྲོན་ལ་མཚོན་ན་རོགས་རམ་ཡོད་མེད་ལ་མ་བལྟོས་པར་གཏོང་དགོས་ལ་སོང་གཞུང་གི་མ་དངུལ་འཕར་ཆག་གི་རྩིས་དེ་ཡང་མཐོང་དགོས། མགོ་རྙོག་ཙམ་མིན་འདུག་གམ། འགྲོ་སོང་མང་བ་གཏང་བའི་དངུལ་མང་བ་བཟོས་པའི་ཁྱབ་པ་མིན་འདུག་ག།
ངས་གོང་དུ་དངུལ་བཟོས་ན་བཟོས་པའི་བརྡ་དེ་དེ་སྔ་ལྟར་སྤེན་ཚི་ལགས་ས་གནས་སུ་ཐེངས་གཉིས་ཕེབས་སྐབས་གོ་མ་སོང་ཞུས་ཡིན།་ཐེངས་གཉིས་དེ་ཡང་ལོ་ཤས་ལོ་ཤས་རྗེས་ཕེབས་ཡོད། དེ་བཞིན་སོ་སོས་ཐེངས་གཉིས་པའི་སྐབས་བློ་སེང་ལགས་སུ་འོས་འབུལ་དགོས་དོན་ནང་གཙོ་བོ་ཞིག་ཁོངས་སྐབས་བོད་ཕྲུག་ཚོའི་ཤེས་ཡོན་རྒྱས་ཐབས་སུ་མཐོ་སློབ་འགྲོ་རྒྱུར་སློབ་ཡོན་གོ་སྐབས་བཟང་དུ་བཏང་བའི་མཉམ་ཕྱིར་སྡོད་བོད་ཕྲུག་གཞོན་སྐྱེས་ཁག་རང་རེའི་སྤྱི་ཚོགས་ནང་མཉམ་བསྡུ་མཉམ་བགྲོད་ཀྱི་གོ་སྐབས་སྤེལ་བ་སོགས་ལས་ཡིན་ཀྱང། སྲིད་སྐྱོང་སྤེན་ཚེ་ལགས་སྐབས་མཐོ་སློབ་སློབ་ཡོན་ཡང་དེ་སྔ་ལྟར་གནང་རྒྱུ་དཀའ་གནད་དུ་གྱར་བའམ་ཉུང་དུ་གཏང་གནས་་གོ་རྒྱུ་འདུག་པ་སོགས་ནི་རོགས་དངུལ་འབད་བརྩོན་ཞུ་མ་ཐུབ་པའི་རྐྱེན་ལས་མིན་ན་དེ་མིན་ཅིའི་མཆིར། ཡིན་ཀྱང་རོགས་རམ་ཐབས་འཚོལ་ཐུབ་པའམ། ཡང་ན་ཉམས་པ་ཕྲན་ཙམ་སླར་གསོའི་སྐབས་སྤེན་ཚེ་ལགས་ནས་ཀྱང་གསར་འགོད་བརྡ་ཁྱབ་གནང་འདུག་ག མདོ་དོན་སྐལ་རྡོར་ལགས་སུ་རོགས་དངུལ་གོང་རྒྱས་གཏོང་རྒྱུའི་མངོན་འདོད་དེ་ང་ཚོར་དགོས་གནད་ཅིག་ཡིན་པས་མི་དགའ་ནའང་སྨོད་ཚིག་ཞུ་ག་ནས་དགོས། ཡང་། ཁ་གཅིག་ནས་སྲིད་སྐྱོང་འོས་མིས་སོ་སོའི་མངོན་འཆར་སོགས་སྤྱི་ཚོགས་ནང་གསལ་བཤད་ཁྱབ་སྤེལ་བྱས་ནའང་འགྲིག་འཐུས་ངོས་ལེན་ཀྱང་ཕྱོགས་གཞན་དེར་སྐལ་རྡོར་ལགས་སུ་གཟབ་གཟབ་བྱེད་དགོས་པའི་སྡིག་ར་ལྟ་བུ་གཏང་འདུག སྐྱོན་མཚང་འདྲུ་རེས་ཀྱི་འོས་བསྡུའི་ཁ་ཕྱོགས་སུ་ཕྱིན་པ་ཡིན་ན། སྐལ་རྡོར་ལགས་ཀྱི་གནས་ཚུལ་མང་པོ་ཞིག་དྲ་རྒྱའི་བརྒྱུད་ལམ་ནས་སྔོག་ཆོག་ཆོག་ཡོད་པས་ཅེས། སྐལ་རྡོར་ལགས་སུ་སྐྱོན་གང་ཡོད་དེ་ཁྱེད་རྣམ་པའམ་སྲིད་སྐྱོང་ནས་འོས་བསྡུའི་སྐབས་ཁྱབ་བསྒྲགས་གནང་ཟིན་པའི་དེ་ལས་མང་བ་ཞིག་ཅི་ལབ། དེ་ལས་ལྷག་པ་སྤེན་ཚེ་ལགས་སུ་ཡོད་པའང་ཡིག་ཆ་ནང་དང་མིའི་དྲན་པ་ལ་ཡོད་མ་རེད་དམ། འདི་ཚད་མེད་ཀྱི་བྱེད་ཕྱོགས་ཤིག་མ་རེད་དམ། ང་ནོར་ཡོད་ན་དགོངས་དག། མཐུན་སྒྲིལ་དགོས་ན་སྐད་ཆ་འདི་འདྲ་གསུང་རྒྱུ་མེད། འདྲི་མཁན་གྱི་དྲིས་ནའང་ཕན་སྤྱོད་པའམ་གནད་དོན་དང་འགྲེལ་པོ་སྤེན་ཚེ་ལགས་ནས་ངོས་ལེན་མེད་པའམ་གཟབ་དགོས་པའི་གསུང་བྱོན་ན་མི་ལེགས་སམ། འོས་བསྡུ་སྔོན་མའི་སྐབས་ལའང་གསུངས་མ་བྱོན་པའི་ད་ལྟ་མཐུན་སྒྲིལ་མིན་འདུག་མཐུན་སྒྲིལ་མིན་འདུག་ཞུ་དགོས་པའི་རྐྱེན་ཞིག་བྱུང་བ་མ་རེད་དམ། སྲིད་ཟུར་བློ་སེང་གིས་འོས་བསྡུའི་ལས་རིན་ཐེངས་གཉིས་ཞུས་ནས་དང་པོའི་སྐབས་མཐུན་སྒྲིལ་ལ་གནོད་པའི་རྙོག་ཁྲ་ཕལ་ཆེར་བྱུང་མེད། མཐུན་སྒྲིལ་ལ་གནོད་པའི་རྙོག་ཁྲ་དེ་སྲིད་ཟུར་དང་སྲིད་སྐྱོང་གཉིས་སྐབས་བྱུང་བ་རེད། དགོས་གནད་ཡོད་མེད་སྐད་ཆ་དང་དགོས་གནད་ཡོད་མེད་ཀྱི་གཞུང་གི་ཡིག་ཆ་སྤེན་ཚེ་ལགས་ནས་སྟོན་པ་སོགས་ནས་སྤྱི་ཚོགས་ནང་ལབ་གླེང་རྫོགས་རྒྱུ་མེད་པ་དེ་ལས་ད་ཆ་མཐུན་སྒྲིལ་མིན་འདུག་མཐུན་སྒྲིལ་མིན་འདུག་ཞུ་དགོས་ཆག་རེད་དོ།།
ལབ་གླེང་འདི་མཇུག་མ་བསྡུས་གོང་སྲིད་སྐྱོང་འོས་མི་སོ་སོའི་མངོན་འདོད་དམ་སྲིད་སྐྱོང་འོས་ཐོབ་ན་ལས་འཆར་གཙོ་བོ་གང་ཞུ་འདོད་པ་དེ་གསལ་བསྒྲགས་གནང་གལ་ཡིན། དེ་ཡང་འཇོན་ཚོད་དཔག་ཚོད་ཅིག་དགོས་རྒྱུ་དེ་མི་དམངས་ལ་འགན་འཁུར་བའི་དམ་བཅའ་གཅིག་ཡིན། ངས་རྒྱ་བོད་དཀའ་གནད་སེལ་གྱི་ཡིན་ཟེར་ན་ཆེར་ཁག་པའི་དམ་བཅའ་མི་དམངས་ཀྱི་འོས་ཐོབ་ཐབས་གཅིག་པོའི་ཆེད་ཡིན་པ་ངེས། དེ་ལས་མི་དམངས་མགོ་འཁོར་སྲིད་རེད། སེལ་རྒྱུ་དེ་ཁག་པོ་ཞེ་དྲག་རེད། དེ་ལས་ངས་བོད་པའི་དཀའ་སེལ་ཐབས་ལམ་གང་ཡོང་ཞུ་ཡི་ཟེར་ན་ལེགས་ཆེ། བོད་རྒྱའི་དཀའ་ངལ་སེལ་རྒྱུའི་གནད་དོན་སྐོར་མ་གསལ་པའི་གནད་དོན་དེར་དོ་འཁུར་མེད་པ་ག་ནས་ཡིན་དགོས། སྐྱབས་བཅོལ་གཞུང་འཛིན་དགོས་པའི་དགོས་པ་རྒྱུ་མཚན་གཙོ་བོ་ཡང་དེ་ཡིན་པའི་གཞུང་གི་ལས་དོན་ཚང་མ་དེར་ཕྱོགས་ཡོད། དེར་སོང་སྐལ་རྡོར་ལགས་དམ་བཅའ་དེ་ཡང་མི་དམངས་ལ་འགན་འཁུར་བ་ཞིག་ཡིན་འདུག དེ་སྔ་སྤེན་ཚེ་ལགས་ཀྱི་དམ་བཅའ་གང་ཡོད་དེ་དྲ་ལམ་ནས་ཆེད་མངགས་ཤེས་ཚོར་ཞུས་མེད་པར་དེ་མུར་ཧ་གོ་སོང་བ་བཞི་ནས་སྐྱབས་བཅོལ་མི་དམངས་བདེ་དོན་ལ་འབད་རྒྱུ་ཅེས་པ་གཅིག་པུ་ཙམ་བསྒྲུབས་པར་ཆ་འཛིན་ན་ལས་དེ་མིན། བོད་ཀྱི་གནད་དོན་སེལ་རྒྱུ། ལམ་གང་ཡོད་བརྒྱུད་༧གོང་ས་མཆོག་རྒྱ་ནག་ཏུ་གཟིགས་སྐོར་ཕེབས་ཐབས་དང་། པཎ་ཆེན་རིན་པོ་ཆེ་མཆོག་དང་བོད་ཀྱི་ཆབ་སྲིད་རྩོན་པ་རྣམས་གློད་གྲོལ་ཐོབ་ཐབས་གནང་རྒྱུ་ཅེས་པ་གནད་དོན་གསུམ་ཐད་ཐབས་ཤུག་ཆེ་བ་ཞུས་པ་ངས་ནི་གང་ཡང་ཧ་གོ་མ་སོང་ལ་མི་གཞན་ནས་ཀྱང་ཞུས་མེད་པའི་གནས་ཚུལ་དྲྭ་ལམ་ནང་མཐོང་རྒྱུ་འདུག
ལན་འདེབས་འདི་ཞུ་དགོས་དོན་གཙོ་བོ་ནི་དགོས་པ་ཆེ་མེད་ཀྱི་སྐལ་རྡོར་ལགས་སུ་སྐྱོན་འཇུག་མཉམ་དྲང་ལམ་མེད་པའི་གསལ་བཤད་ཁག་མི་དམངས་མགོ་སྐོར་མ་འཐེབ་ཆེད་དམིགས་ནས་ཞུས་པ་ལས་དེ་མིན་གནད་དོན་ཆེར་མེད། དབུས་གཙང་པ་ཚོས་མདོ་སྟོད་དང་མདོ་སྨད་གཉིས་སུ་སྲིད་སྐྱོང་གོ་སྐབས་ཕུལ་ཟིན་ཡིན། ང་ལ་ནི་ད་རེས་སུ་དབུས་གཙང་མི་མང་པའི་ཁོངས་ནས་སྲིད་སྐྱོང་འོས་མི་ཞིག་དང་སྲིད་སྐྱོང་ཞིག་བྱུང་ན་ཆོལ་གསུམ་ཆིག་སྒྲིལ་ལ་ཕན་པའི་དགེ་མཚན་ཤེས་པའི་ཐོག་ནས་ད་ཆ་དབུས་གཙང་པ་དམིགས་ཟུང་ཐོག་ཆོལ་ཁ་གཞན་གཉིས་ནས་དབུས་གཙང་པའི་སྲིད་སྐྱོང་ཞིག་འདེམས་ཐབས་འབོད་སྐུལ་ཞུ་ཡི་ཡོད། ཆོལ་གསུམ་གང་ནས་ཡིན་པའི་བུད་མེད་ཀྱི་སྲིད་སྐྱོང་ཞིག་བྱུང་ནའང་༧གང་ཉིད་ཀྱི་ཐུགས་དགོངས་བསྒྲུབས་པའི་ཐུགས་རེ་བཟུང་བཞིན་ཡོད། དབུས་གཙང་པའི་འོས་མི་ཚད་ངེས་ཤིག་ཐོན་པའི་རེ་བ་མཉམ་དབུས་གཙང་པར་ཆོལ་གསུམ་མཐུན་སྒྲིལ་ནུས་པ་དེ་བཟང་དུ་འགྲོ་རྒྱུའི་རེ་ཆེ་ཡོད་མཉམ་དགོས་མེད་ཀྱི་གླེང་རྩོད་དེ་ཡང་རིམ་གྱིས་འཇམ་ནས་བོད་རིག་ང་ཚོས་ནུས་པ་དེ་གཅིག་ཏུ་དཔུང་ནས་བོད་ཀྱི་བདེན་དོན་དེ་མགྱོགས་ནས་མྱུར་དུ་སེལ་རྒྱུའི་འབད་པར་རོལ་ཆོག་པའི་དགེ་ལེགས་ན། དེ་རེས་བུད་མེད་དམ་དབུས་གཙང་པར་དགོང་བཞེས་གནང་རོགས་ཅེས་སླར་གསོལ་རྒྱུ་དང་དབུས་གཙང་པས་དེ་ལྟར་ཐུགས་འཇགས་ཞུ།། །།