བོད་མི་མང་སྤྱི་འཐུས་ལྷན་ཚོགས་དང་སྦར་སིལ་སྐུ་ཚབ་དོན་ཁང་། བྱམས་བརྩེའི་ཁང་པ་བཅས་ཀྱིས་༸སྐུའི་གོ་སྟོན་སྲུང་གཙི་དང་འབྲེལ་ནས་པར་རིས་འགྲེམས་སྟོན་གནང་བཞིན་འདུག
ཕྱི་ཟླ་ ༡༡ ཚེས་ ༢༤ ནས་ཕྱི་ཟླ་ ༡༢ ཚེས་ ༢༤ བར་ཟླ་གཅིག་རིང་སྦེལ་ཇམ་གྱི་རྒྱལ་ས་སྦར་སིལ་དུ་སྦེལ་ཇམ་སྐུ་ཚབ་དོན་ཁང་དང་བྱམས་བརྩེའི་ཁང་པ་ (House of Compassion) གཉིས་མཉམ་འབྲེལ་ཐོག་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་སྲུང་གཙིའི་སླད་འགྲེམས་སྟོན་འཚོག་བཞིན་འདུག
སྐབས་དེར་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས། བྱམས་བརྩེའི་ཁང་པས་༸གོང་ས་མཆོག་གི་པར་རིས་འགྲེམས་སྟོན་གོ་སྒྲིག་གནང་བ་ནི་བསྟི་གནས་ཁང་དེས་སྤྱི་ཚོགས་དྲང་བདེན་གྱི་འཐབ་རྩོད་ལ་དམིགས་པ་དང་མཚུངས་ཤིང་། ༸མགོན་པོ་གང་ཉིད་མཆོག་གིས་ཆོས་ལུགས་མཐུན་སྒྲིལ་ཐོག་སྐུ་ལས་བསྐྱོན་ཡོད་པ་གསལ་སྟོན་དང་། འགྲེམས་སྟོན་གོ་སྒྲིག་གནང་བ་དེ་དྲང་བདེན་དང་། བྱམས་བརྩེའི་སྤྱི་ཚོགས་ཤིག་བསྐྲུན་པར་ཆོད་སེམས་བརྟན་པོ་ཡོད་པ་བསྐྱར་ནན་གནང་གི་ཡོད་སྐོར་འགྲེལ་བརྗོད་གནང་འདུག
ཐེངས་འདིའི་འགྲེམས་སྟོན་ནང་༸མགོན་པོ་གང་ཉིད་མཆོག་གི་བྱམས་སྙིང་རྗེ་དང་འཚེ་མེད་ཞི་བའི་ལྟ་གྲུབ་གོང་འཕེལ་གྱི་མཛད་པ་འཕྲིན་ལས་ལ་ཆེ་བསྟོད་ཕུལ་བ་དང་། ༸གོང་ས་མཆོག་རྒྱ་གར་དུ་བཙན་བྱོལ་ལ་ཕེབས་པ། རྒྱལ་སྤྱིའི་སྟེང་འགྲོ་བ་མིའི་ཆེ་མཐོང་ཆེད་སྐུ་ལས་བསྐྱོན་པ་སོགས་ཀྱི་པར་རིས་རྣམས་འགྲེམས་སྟོན་གནང་གི་འདུག
༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་དང་བྱམས་བརྩེའི་ལོ་སྲུང་གཙིའི་སླད། ཕྱི་ཟླ་ ༡༡ ཚེས་ ༤ ནས་ ༢༠ བར་ཉིན་གྲངས་དགུའི་རིང་བོད་མི་མང་སྤྱི་འཐུས་ལྷན་ཚོགས་ནས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཇ་ཝ་ཧར་ལལ་ནེ་རུ་གཙུག་ལག་སློབ་གཉེར་ཁང་ (Jawaharlal Nehru University) དང་། སེན་ཊི་སི་ཊི་ཧྥན་མཐོ་སློབ་ (St. Stephen’s College)། པན་ཇབ་གཙུག་ལག་སློབ་གཉེར་ཁང་། ཇ་ལན་དྷར་གྲོང་ཁྱེར་དུ་ཡོད་པའི་ལབ་ལི་ཆེད་ལས་གཙུག་ལག་སློབ་གཉེར་ཁང་ (Lovely Professional University) སོགས་རྒྱ་གར་གྱི་མཐོ་སློབ་ཁག་ཏུ་༸གོང་ས་རྒྱལ་བ་རིན་པོ་ཆེ་མཆོག་གིས་གསོལ་སྩལ་གནང་བའི་བོད་མིའི་མང་གཙོ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གནང་སྟེ། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ལ་གོ་རྟོགས་སྤེལ་ཐུབ་པ་བྱུང་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
