མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་དོན་སྐོར་བགྲོ་གླེང་ཐེངས་ ༡༨ པའི་ཐོག་བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་རྒན་པ་བསྟན་འཛིན་རྡོ་རྗེ་ལགས་ཀྱིས་རྒྱ་ནག་གིས་བོད་ནང་གི་བཅའ་སྡོད་སློབ་གྲྭ་རྣམས་སྒོ་རྒྱག་དགོས་སྐོར་གཏམ་བཤད་གནང་སོང་།
ཕྱི་ཟླ་ ༡༡ ཚེས་ ༢༧ དང་ ༢༨ ཉིན་གྲངས་གཉིས་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་དོན་སྐོར་བགྲོ་གླེང་ཐེངས་ ༡༨ པ་འཚོགས་ཡོད་ཅིང་། ཚོགས་ཐོག་ཏུ་བོད་མིའི་ཁྲིམས་ལུགས་རིག་པ་བའི་ཚོགས་པ་ནས་བསྟན་འཛིན་སྒྲོལ་དཀར་ལགས། ཨ་རིའི་བོད་རང་བཙན་སློབ་ཕྲུག་ཚོགས་པ་ནས་སྤེན་པ་སྒྲོལ་མ་ལགས་དང་ཚེ་ལྷ་ལགས། མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་མཆེད་གྲོགས་ལས་གཞིའི་ནང་མཉམ་ཞུགས་བྱེད་མཁན་བོད་རིགས་སློབ་མ་བྱམས་པ་ལགས། སུད་སི་དོན་ཁང་གི་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་ལགས། བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་རྒན་པ་དང་འཐབ་ཇུས་པ་བསྟན་འཛིན་རྡོ་རྗེ་ལགས་མཉམ་ཞུགས་གནང་ཡོད་པ་དང་། བགྲོ་གླེང་ཐོག་འཛམ་གླིང་གི་རྒྱལ་ཁབ་ ༢༦ གི་སྐུ་ཚབ་དང་གནད་ཡོད་མི་སྣ་འཛོམས་ཡོད་འདུག
ཕྱི་ཚེས་ ༢༨ ཉིན་ཉམས་ཞིབ་པ་བསྟན་འཛིན་རྡོ་རྗེ་ལགས་ཀྱིས། རྒྱལ་སྤྱིའི་སྤྱི་ཚོགས་ཀྱིས་གྲངས་ཉུང་མི་རིགས་ཀྱི་གནད་དོན་ཐད་སྣང་མེད་གཏོང་གི་ཡོད་པ་དང་། བོད་མི་རྣམས་གྲངས་ཉུང་མི་རིགས་ཤིག་མིན་ཡང་། རྒྱ་ནག་གཞུང་གིས་བོད་མི་རྣམས་གྲངས་ཉུང་མི་རིགས་སུ་བསྒྱུར་བ་ཞིག་རེད། ཕྱི་ལོ་ ༢༠༡༢ ནས་བཟུང་རྒྱ་ནག་གཞུང་གིས་སྲིད་ཇུས་འདྲ་མིན་ལག་བསྟར་བྱས་ཏེ་བོད་མི་དང་། ཡུ་གུར་བ། ལྷོ་སོག་སོགས་གྲངས་ཉུང་མི་རིགས་རྣམས་ལ་དྲག་གནོན་ཤུགས་ཆེན་བྱེད་བཞིན་ཡོད་པ་དང་། སོ་སོའི་རིག་གཞུང་དང་སྐད་ཡིག ངོ་བོ་སོགས་རྩ་མེད་གཏོང་ཐབས་བྱས་དང་བྱེད་མུས་ཡིན་པར་མ་ཟད། བཙན་གྱིས་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་རེད། རྒྱ་ནག་གིས་རྒྱལ་ཁབ་བརྟན་ལྷིང་ཡོང་བར་གྲངས་ཉུང་མི་རིགས་ཀྱི་ངོ་བོ་རྩ་མེད་ངེས་པར་དུ་བཟོ་དགོས་ཀྱི་ཡོད་ཚུལ་བསྒྲགས་ཡོད་པ་རེད། ཅེས་བརྗོད་འདུག
རྒྱ་གཞུང་གིས་ཤར་ཊུར་ཀི་སི་ཐན་ནང་ཡུ་གུར་བ་ས་ཡ་གཅིག་ལྷག་འཛིན་བཟུང་བཀག་ཉར་བྱས་ཡོད་པ་དང་། རྒྱ་ནག་གིས་ལྷོ་སོག་མི་རིགས་རྣམས་ལ་སོ་སོའི་སྐད་ཡིག་བཀོལ་སྤྱོད་བྱེད་པར་བཀག་སྡོམ་བྱས་ཡོད་པར་བརྟེན། ལྷོ་སོག་མི་མང་བརྒྱ་ཆ་ ༣༠ ལྷག་གིས་ཕ་སྐད་བཤད་ཤེས་ཀྱི་མེད་པ་རེད། དེ་བཞིན་བོད་ནང་གི་བོད་ཕྲུག་ས་ཡ་ ༡ ལྷག་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་ཡོད་པ་དང་། རྒྱ་གཞུང་གིས་བཅའ་སྡོད་སློབ་གྲྭ་དེ་དག་སྒོ་རྒྱག་དགོས་པ་དང་། ས་གནས་ཀྱི་སློབ་གྲྭ་སྒོ་ཕྱེས་ཏེ་བོད་ཕྲུག་རྣམས་ཕ་མ་དང་ཁ་ཐག་ཉེ་རུ་གཏོང་དགོས་པ། གྲངས་ཉུང་མི་རིགས་རྣམས་ལ་སོ་སོའི་སྐད་ཡིག་དང་རིག་གཞུང་བཀོལ་སྤྱོད་དང་ཡར་རྒྱས་གཏོང་བའི་ཐོབ་ཐང་སྤྲོད་དགོས་སྐོར་སོགས་འགྲེལ་བརྗོད་གནང་འདུག
ཁོང་གིས་གཏམ་བཤད་གནང་བཞིན་པའི་སྐབས་སུ་རྒྱ་ནག་གཞུང་གི་སྐུ་ཚབ་ཀྱིས། གཏམ་བཤད་པས་བདེན་དཔང་གང་ཡང་མེད་པའི་ཐོག་ནས་རྒྱ་ནག་ལ་སྐྱོན་བརྗོད་བྱེད་ཀྱི་ཡོད་པ་དང་། རྒྱ་ནག་གི་བཅའ་སྡོད་སློབ་གྲྭའི་སྲིད་ཇུས་དེ་མི་སེར་སྤེལ་ཡུལ་གྱི་ལག་ཆ་ཡིན་ཚུལ་བརྗོད་དེ་རྒྱ་ནག་ལ་མིང་ཆད་ངན་པ་བཟོ་ཡི་འདུག་པས། གཏམ་བཤད་མཚམས་འཇོག་དགོས་པའི་འབོད་སྐུལ་ཐེངས་གཉིས་ཞུས་སོང་། ཡིན་ནའང་། བསྟན་འཛིན་རྡོ་རྗེ་ལགས་ལ་མུ་མཐུད་གཏམ་བཤད་གནང་བའི་གོ་སྐབས་གནང་བ་ལྟར། བོད་ནང་གི་ཛ་དྲག་གི་གནས་སྟངས་དང་། རྒྱ་ནག་གིས་བོད་དང་། ཤར་ཊུར་ཀི་སི་ཐན། ལྷོ་སོག་ནང་དྲག་གནོན་ཚབས་ཆེན་བྱེད་ཀྱི་ཡོད་པའི་གནད་དོན་སྐོར་བཤད་པ་དང་། ཚོགས་ཞུགས་པ་རྣམས་ཀྱིས་ཁོང་གི་གཏམ་བཤད་ལ་དགའ་བསུའི་ཕྱག་བརྡབས་སོང་།
ཚོགས་འདུའི་ཉིན་དང་པོར་སུད་སི་དོན་ཁང་གི་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་ལགས་ཀྱིས་འཛམ་གླིང་ནང་གི་བོད་བརྒྱུད་ནང་བསྟན་སློབ་གཉེར་ཁང་ཆེ་ཤོས་སུ་གྲགས་པའི་གསེར་རྟ་བླ་རུང་སྒར་གྱི་ཛ་དྲག་གི་གནས་སྟངས་ཐེར་འདོན་དང་། གསེར་རྟ་བླ་རུང་སྒར་དུ་སློབ་གཉེར་གནང་མཁན་གྱི་གྲྭ་བཙུན་ ༡༠༠༠ ལྷག་ལ་ཉེས་མེད་ཉེས་འཛུགས་བྱས་ཏེ་ཕྱིར་ཕུད་བཏང་བ་མ་ཟད། རྒྱ་ནག་གིས་དམ་དྲག་ཤུགས་ཆེན་བྱེད་བཞིན་པའི་སྐོར་གསལ་སྟོན་དང་། ཁུལ་དེར་གནས་མཇལ་དུ་ཡོང་མཁན་ཡུལ་སྐོར་སྤྲོ་འཆམ་པ་རྣམས་བཀག་སྡོམ་དང་། ཕྱི་ཟླ་ ༨ ཚེས་ ༡༨ ཉིན་དགེ་འདུན་པ་ཤེར་བཟང་རྒྱ་མཚོ་ལགས་རྒྱ་ནག་གཞུང་གི་དམ་དྲག་ལ་མ་བཟོད་པར་རང་སྲོག་བཅད་པའི་སྐོར་ནན་བརྗོད་གནང་འདུག
རྒྱ་ནག་གཞུང་གིས་བོད་ཀྱི་རིག་གཞུང་དང་སྐད་ཡིག་ཐོག་དམ་དྲག་ཤུགས་ཆེ་བྱེད་མུས་ཡིན་པ་དང་འབྲེལ་ནས་ཕུན་ཚོགས་སྟོབས་རྒྱལ་ལགས་ཀྱིས། ཉེ་ལམ་རྒྱ་ནག་གཞུང་གིས་རྒྱ་ནག་ལ་ངོ་རྒོལ་བྱེད་མཁན་རྣམས་ལ་བཀག་སྡོམ་དགོས་པའི་དོན་ཚན་བཅུ་དྲུག་འདོན་སྤེལ་བྱས་པ་དང་། བོད་སྐད་ཐོག་སློབ་ཁྲིད་བྱ་རྒྱུ་མཚམས་འཇོག་བྱེད་པ་དང་། ཕྲུ་གུ་རྣམས་ལ་སོ་སོའི་སྐད་ཡིག་ཐོག་སློབ་སྦྱོང་བྱེད་པའི་ཐོབ་ཐང་སྤྲད་མེད་པར་བརྟེན། སོ་སོའི་ཐུན་མོང་མ་ཡིན་པའི་སྐད་ཡིག་གི་ངོ་བོ་ཉམས་ཆག་འགྲོ་མུས་ཡིན་སྐོར་དང་། ཕྱི་ལོ་ ༢༠༢༤ ཟླ ༥ པའི་ནང་མཁན་པོ་བསྟན་པ་དར་རྒྱས་ལགས་དང་གྲོང་པའི་མི་ ༢༠ ཡིས་སྐད་ཡིག་སྲུང་སྐྱོབ་ཚོགས་པ་ཞེས་པ་ཞིག་བཙུགས་པར་བརྟེན་བཙན་བཟུང་བྱས་ཡོད་པ་དང་། བོད་ནང་གི་རིག་གཞུང་སྲུང་སྐྱོབ་པ་རྣམས་ལ་ཉེན་ཁ་འཕྲད་བཞིན་ཡོད་པ། དེ་བཞིན་རྒྱ་ནག་གི་བཙོན་ཁང་དུ་འདས་གྲོངས་སུ་ཕྱིན་པའི་བོད་ཀྱི་ཆབ་སྲིད་བཙོན་ཟུར་མགོན་པོ་རྣམ་རྒྱལ་ལགས་ཀྱི་གནད་དོན་གསལ་སྟོན་གནང་འདུག
ཁོང་གིས། ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་ལ་ཁྲིམས་རྩོད་པ་དང་ཐུག་འཕྲད་བྱེད་བཅུག་མེད་པ་དེ་བོད་ནང་ཁྲིམས་ལུགས་ཀྱི་སྒྲིག་གཞི་ལ་དྲང་བདེན་དང་ཁ་གསལ་མེད་པ་གསལ་སྟོན་དང་། སྤྲུལ་སྐུ་ཧཱུྃ་ཀར་རྡོ་རྗེ་མཆོག་རྒྱ་གཞུང་གིས་བཙན་བཟུང་བཀག་ཉར་དང་། བཙན་གནོན་འོག་གར་སོང་ཆ་མེད་དུ་གྱུར་བ་མ་ཟད། ཝི་ཐི་ནམ་དུ་དོགས་གཞི་ཆེན་པོས་འདས་གྲོངས་སུ་གྱུར་བའི་སྐོར་སོགས་འགྲེལ་བརྗོད་གནང་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
