བོད་དཔེ་རུ་བླངས་ཏེ་རྒྱ་ནག་ལ་འགོག་རྒོལ་དགོས་པའི་འབོད་སྐུལ་གནང་།

ཐའེ་ཝན་གྱི་སྲིད་འཛིན་ལེ་ཆིན་ཏི་མཆོག་གིས་བོད་དང་ཅེག་རྒྱལ་ཁབ་ཀྱི་ལོ་རྒྱུས་དཔེར་དྲངས་ཏེ་ཐའེ་ཝན་གཞུང་མང་གཉིས་ཀྱིས་ཆོད་སེམས་བརྟན་པོའི་ཐོག་ནས་རྒྱ་ནག་གི་བཙན་འཛུལ་འགོག་རྒོལ་བྱ་རྒྱུ་ཡིན་སྐོར་གསུངས།

ཕྱི་ཟླ་ ༡༡ ཚེས་ ༢༦ ཉིན་ཐའེ་ཝན་རྒྱལ་ཁབ་ཀྱི་བདེ་འཇགས་མཐོ་རིམ་གྲོས་ཚོགས་འཚོགས་ཡོད་ཅིང་། ཚོགས་ཐོག་ཏུ་ཐའེ་ཝན་སྲིད་འཛིན་ལེ་ཆིན་ཏི་མཆོག་གིས་ཐའེ་ཝན་གྱི་དམངས་གཙོ་སྲུང་སྐྱོབ་བྱེད་པའི་འཆར་གཞིའི་སྐོར་ངོ་སྤྲོད་གནང་སྟེ། རྒྱ་ནག་གིས་ཐའེ་ཝན་དང་ཞི་བདེ་རྒྱ་མཚོའི་ཁུལ་ལ་འཇིགས་སྐུལ་ཇེ་ཆེར་འགྲོ་བཞིན་པའི་གནད་དོན་ལ་གདོང་ལེན་བྱ་ཆེད།  རྒྱལ་སྲུང་གི་ནུས་པ་གོང་མཐོར་གཏོང་བར་མ་དངུལ་ཨ་སྒོར་ཐེར་འབུམ་ ༤༠༠ གཏང་འཆར་ཡོད་པ་དང་། རྒྱ་ནག་གིས་ཐའེ་ཝན་ནང་བཙན་འཛུལ་བྱེད་པར་འགོག་རྒོལ་གྱི་ཆོད་སེམས་བརྟན་པོ་ཡོད་སྐོར་གསུངས་འདུག

སྐབས་དེར་སྲིད་འཛིན་ལེ་ཆིན་ཏི་མཆོག་གིས། པེ་ཅིང་སྲིད་གཞུང་གིས་ཐའེ་ཝན་དམངས་གཙོ་རྒྱལ་ཁབ་འདི་ཉིད་རྒྱ་ནག་གི་ཐའེ་ཝན་དུ་བསྒྱུར་བའི་འབད་བརྩོན་བྱེད་བཞིན་ཡོད་པ་དེས། ཐའེ་ཝན་རྒྱལ་ཁབ་ཀྱི་བདེ་འཇགས་དང་རང་དབང་དམངས་གཙོ་ལ་ཉེན་ཁ་ཚབས་ཆེན་བཟོས་ཡོད། ང་ཚོས་ཐའེ་ཝན་དམངས་གཙོ་རྒྱལ་ཁབ་ཀྱི་བདེ་འཇགས་སྲུང་སྐྱོབ་བྱེད་པར་འཆར་གཞི་གཏན་འབེབ་བྱས་ཏེ། དེར་འོས་འཚམ་གྱི་ཐབས་ཇུས་སུ་བེད་སྤྱོད་བྱ་རྒྱུ་ཡིན། རྒྱལ་སྤྱིའི་ཐོག་ནས་དོ་སྣང་བྱེད་བཞིན་ཡོད་པ་ལྟར།  རྒྱ་ནག་གིས་ཐའེ་ཝན་དང་ཞི་བདེ་རྒྱ་མཚོ་ཆེན་མོའི་ཁུལ་ལ་འཇིགས་སྐུལ་བྱེད་ཤུགས་ཆེ་རུ་འགྲོ་བཞིན་ཡོད། ཉེ་ཆར་ཉི་ཧོང་དང་། ཧྥི་ལི་ཕིན། ཐའེ་ཝན་མཚོ་འགག་གི་ཉེ་འཁོར་དུ་དམག་དོན་དང་མཚོ་ཁུལ་གྱི་ཐབས་ཇུས་བཅས་ཀྱི་ཐོག་གནས་ཚུལ་རྫུན་བཟོ་བྱས་པ་སོགས་དཀའ་ངལ་ཆེན་པོ་བཟོས་ཡོད་པ་མ་ཟད། པེ་ཅིང་སྲིད་གཞུང་གིས་ཕྱི་ལོ་ ༢༠༢༧ ལོའི་ཐའེ་ཝན་དམག་དོན་གྲ་སྒྲིག་ཡོངས་སུ་འགྲུབ་སྟེ། དམག་ཤུགས་ཀྱི་ཐོག་ནས་མགྱོགས་པོར་བཙན་འཛུལ་བྱེད་པའི་དམིགས་ཡུལ་བཟུང་ཡོད། དེ་བཞིན་རྒྱ་ནག་གིས་ཁྲིམས་ལུགས་དང་། སེམས་ཁམས། དྲིལ་བསྒྲགས་བཅས་སྤེལ་ནས་ཐའེ་ཝན་གྱི་རང་བཙན་གྱི་གནས་བབ་འཛམ་གླིང་གི་སྟེགས་བུ་ནས་མེད་པར་བཟོ་ཐབས་བྱེད་བཞིན་ཡོད། ཅེས་གསུངས་འདུག

ཡང་ཁོང་གིས། རྒྱ་ནག་གིས་ཐའེ་ཝན་གྱི་མཐུན་སྒྲིལ་ནུས་པར་གཏོར་བཤིག་གཏོང་གི་ཡོད་ལ། དབྱེ་འབྱེད་ཀྱི་སྲིད་ཇུས་ཤུགས་ཆེ་རུ་གཏོང་བཞིན་ཡོད།  མི་མང་གི་ཁྲོད་དུ་རྒྱལ་ཁབ་ཀྱི་ངོས་འཛིན་ལ་མགོ་རྨོངས་སུ་བཅུག་སྟེ། ང་ཚོའི་མཐུན་སྒྲིལ་ཉམས་དམས་སུ་གཏོང་བཞིན་ཡོད་པ་མ་ཟད། ཁོ་ཚོས་བཤད་བཞིན་པའི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ཐའེ་ཝན་གྱི་འཆར་གཞི་དང་། རྒྱལ་གཅེས་པས་ཐའེ་ཝན་སྐྱོང་བའི་དམིགས་ཡུལ་དེ་དོན་འཁྱོལ་ཡོང་བར་བྱེད་ཀྱི་ཡོད། འདི་དག་གི་དམིགས་ཡུལ་ནི་འཛམ་གླིང་ཐོག་རང་དབང་གི་གཟི་འོད་འཕྲོ་བའི་ཐའེ་ཝན་དམངས་གཙོ་རྒྱལ་ཁབ་དེ། དབང་ཆ་གཅིག་སྡུད་དང་སྒེར་གཅོད་ཀྱི་རྒྱ་ནག་གི་ཁོངས་སུ་བཅུག་སྟེ། ཞི་བདེ་རྒྱ་མཚོ་ཆེན་མོའི་ཁུལ་ཡོངས་རྫོགས་དབང་བསྒྱུར་བྱེད་འདོད་ཀྱི་ཧམ་སེམས་མངོན་འགྱུར་བྱ་རྒྱུ་དེ་ཡིན་འདུག སྔར་བྱུང་མ་མྱོང་བའི་ཛ་དྲག་གི་གནས་སྟངས་ལ་གཞིགས་ཏེ། ང་ཚོས་རྒྱལ་ཁབ་ཀྱི་ཉེན་ཁར་གདོང་ལེན་བྱེད་པ་དང་། ཐའེ་ཝན་གྱི་དམངས་གཙོ་སྲུང་སྐྱོབ་བྱ་རྒྱུ་ཡིན། ཞེས་གསུངས་འདུག

དེ་བཞིན་ཁོང་གིས། དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས། གཞུང་འཛིན་ཚོགས་པ་དང་ཁ་གཏད་ཚོགས་པ་གཉིས་ཀར་ལངས་ཕྱོགས་མི་འདྲ་བ་ཡོད་སྲིད་ཀྱང་། ཐའེ་ཝན་རྒྱལ་ཁབ་ཀྱི་དམངས་གཙོ་དང་རང་དབང་ལ་སྲུང་སྐྱོབ་བྱ་དགོས་ལ། ཞི་བདེ་དང་བརྟན་ལྷིང་གི་གནས་སྟངས་གཏོར་བར་ངོ་རྒོལ་བྱ་དགོས། དེ་ནི་གཞུང་འཛིན་ཚོགས་པ་དང་། ཁ་གཏད་ཚོགས་པ། ཐའེ་ཝན་མི་མང་ཡོངས་ཀྱི་འོས་འགན་ཡིན། ང་ཚོ་གཅིག་སྒྲིལ་བྱེད་ཐུབ་ལ། ངེས་པར་དུ་གཅིག་སྒྲིལ་བྱ་དགོས། དེ་ལྟར་བྱས་ན་ང་ཚོས་ཐའེ་ཝན་རྒྱལ་ཁབ་དང་། ཐའེ་ཝན་མི་དམངས་ཀྱི་རང་དབང་སྲུང་སྐྱོབ་བྱ་ཐུབ། ཅེས་གསུངས་འདུག

བོད་དང་ཅེག་རྒྱལ་ཁབ་ཀྱི་ལོ་རྒྱུས་དང་འབྲེལ་ནས་ཁོང་གིས། བཙན་འཛུལ་ལ་མགོ་སྒུར་བ་ནི་མཐར་གཏུགས་ན་མུ་མཐུད་དུ་དམག་འཁྲུག་དང་བྲན་གཡོག་གི་སྡུག་བསྔལ་འབྱུང་བའི་རྒྱུ་རུ་འགྱུར་ངེས་རེད། ཕྱི་ལོ་ ༡༩༣༨ ལོའི་ཡུ་རོབ་ཀྱི་མི་མང་པོས་ཅེག་སི་ལོ་ཝ་གི་ཕ་ཡའི་ས་ཆ་འགའ་ཧྥ་ཤི་སི་ལ་སྤྲད་ན། མི་རབས་གཅིག་གི་ཞི་བདེ་འཐོབ་ཐུབ་པར་ཡིད་ཆེས་བྱས་ཡོད་ཀྱང་། དེའི་ཚབ་ཏུ་འཛམ་གླིང་དམག་ཆེན་གཉིས་པ་ཡོངས་སུ་མགོ་བཙུགས་ཏེ་བསམ་ཡུལ་ལས་འདས་པའི་སྡུག་བསྔལ་དང་ཆག་སྒོ་བྱུང་ཡོད། ཕྱི་ལོ་ ༡༩༥༡ ལོར་བོད་མི་རྣམས་ཀྱིས་པེ་ཅིང་དང་མཉམ་དུ་གྲོས་མཐུན་དོན་ཚན་བཅུ་བདུན་ལ་མིང་རྟགས་བཀོད་པ་དེས། བོད་ཀྱི་རིག་གཞུང་དང་འཚོ་བའི་སྐྱེལ་ཕྱོགས་འགྲུབ་པར་བསམས་ཡོད་ཀྱང་། མཇུག་འབྲས་ནི་བོད་མི་རྣམས་ཀྱི་གངས་ལྗོངས་ཀྱི་རྒྱལ་ཁབ་དེ་གུང་ཁྲན་ཏང་གི་རྐང་འོག་གི་དམར་པོའི་མཐོ་སྒང་དུ་བསྒྱུར། ཞེས་གསུངས་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།