དེ་རིང་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་ ༡༠།༣༠ སྟེང་དྷ་ས་ས་གནས་མགོ་འཛིན་གྱི་ཚོགས་ཁང་དུ། སྐབས་ ༡༨ པའི་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོའི་ནང་མཉམ་ཞུགས་བྱེད་མཁན་འོས་མི་ཁག་ཅིག་ནས་ཡོངས་ཁྱབ་གསར་འགོད་གསལ་བསྒྲགས་ཤིག་སྤེལ་སོང་།
ཐོག་མར་བོད་གནས་ལྟ་ཞིབ་ཁང་གི་ཉམས་ཞིབ་པ་དང་འབུམ་རམས་པ་བསོད་ནམས་སྟོབས་རྒྱལ་ལགས་ཀྱིས། ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ནང་དབུས་གཙང་གི་སྤྱི་འཐུས་འོས་མིར་ལང་རྒྱུའི་གསལ་བསྒྲགས་སྤེལ་གྱི་ཡོད། སྤྱི་འཐུས་ནང་ཆ་ཤས་ལེན་དགོས་པའི་རྒྱུ་མཚན་ནི་ད་ལྟའི་ཆར་མི་ཐོགས་གསར་པས་འགན་འཁུར་གྱི་རྣམ་པའི་ཐོག་ནས་ཆ་ཤས་ལེན་གྱི་ཡོད། འདས་པའི་ལོ་བཅུའི་ནང་སྤྱི་ཚོགས་ནང་ཆོལ་ཁ་ཆོས་ལུགས་ཀྱི་འཐེན་འཁྱེར་གྱི་རྣམ་པ་མང་པོ་ཐོན་གྱི་ཡོད་པར་བརྟེན། གཞོན་སྐྱེས་མང་པོ་ཞིག་བོད་པའི་སྤྱི་ཚོགས་དང་བོད་པའི་འཐབ་རྩོད་དང་སེམས་ཐག་རིང་དུ་འགྲོ་བ་སོགས་གནོད་སྐྱོན་ཡོང་གི་ཡོད་པར་སེམས་འཚབ་བྱུང་གི་འདུག ད་ལྟའི་ཆར་བཙན་བྱོལ་ནང་བོད་དོན་ལས་འགུལ་སྤེལ་མཁན་དང་། བོད་ནང་གི་གནས་སྟངས་ལ་ཞིབ་འཇུག་བྱེད་མཁན་ཉུང་དུ་འགྲོ་ཡི་འདུག དེར་བརྟེན་གོ་སྐབས་འབྱུང་ན་སོ་སོའི་ངོས་ནས་བྱེད་ཀྱི་ཡིན་ཞེས་བརྗོད་དེ་སྤྱི་འཐུས་སུ་ལངས་པ་ཡིན། ཞེས་བརྗོད་བྱུང་།
ནོར་གླིང་མཐོ་སློབ་ཀྱི་རྒྱ་ཡིག་དགེ་རྒན་རྒྱལ་མཚན་ཆོས་སྐྱིད་ལགས་ཀྱིས། བོད་ཀྱི་སྐད་ཡིག་དར་སྤེལ་དང་རྒྱུན་འཛིན་བྱེད་ཐུབ་པ་དང་། རྒྱ་ནག་གི་ཆབ་སྲིད་ལ་དབྱེ་ཞིབ་ཀྱི་ནུས་པ་འདོན་ཐུབ་པ། བོད་ནང་གི་གནས་སྟངས་རྒྱལ་སྤྱིའི་སྡིངས་ཆའི་སྟེང་གླེང་སློང་བྱེད་ཐུབ་པ་བཅས་དོན་ཚན་གསུམ་ལ་དམིགས་ཏེ་མདོ་སྟོད་སྤྱི་འཐུས་ཀྱི་འོས་མིར་ལངས་ཀྱི་ཡོད། དེ་ཡང་ང་ཚོ་བོད་མི་རིགས་གནས་དང་མ་གནས་ཀྱི་གཙོ་བོ་དེ་སྐད་ཡིག་ལ་ཐུག་ཡོད། ལོ་མང་པོའི་རིང་སོ་སོའི་སྐད་ཡིག་ཐོག་སློབ་སྦྱོང་བྱས་པར་བརྟེན། བོད་ཀྱི་སྐད་ཡིག་རྒྱུན་འཛིན་དང་དར་སྤེལ་བྱེད་འོས་པ་ཞིག་ཡིན་པ་མ་ཟད། བོད་ཀྱི་སྤྱི་ཚོགས་ནང་གི་ན་གཞོན་མང་པོ་ཞིག་ལ་མི་རིགས་ཀྱི་ལ་རྒྱ་དང་། སྐད་ཡིག་ལ་ཞེན་པ། རྒྱལ་ཞེན་གྱི་བསམ་བློ་གོང་མཐོར་གཏོང་ཐུབ་པ་བྱ་རྒྱུའི་དམ་བཅའ་ཡོད། བོད་དོན་འཐབ་རྩོད་བྱེད་པར་རྒྱ་ནག་གི་ཆབ་སྲིད་ཀྱི་གནས་བབ་དང་། ཆབ་སྲིད་ཀྱི་འགྱུར་འགྲོས་ཐོག་དབྱེ་ཞིབ་བྱེད་ཐུབ་པ་དགོས་ཀྱི་ཡོད་པ་རེད། ངས་རྒྱ་ཡིག་ཤེས་ཀྱི་ཡོད་པར་བརྟེན་རྒྱ་སྐད་ཐོག་དབྱེ་ཞིབ་བྱེད་པའི་ནུས་པ་དམིགས་བསལ་ཞིག་ཡོད་བསམ་གྱི་འདུག བོད་མིའི་སྐུ་ཚབ་ཅིག་ཡིན་པའི་ཆ་ནས་བོད་ཀྱི་གནད་དོན་དེ་རྒྱལ་སྤྱིའི་སྡིངས་ཆའི་སྟེང་གླེང་སློང་དགོས་གལ་ཆེན་པོ་འདུག་ལ། ང་རང་བོད་ནང་འཚར་ལོངས་བྱུང་བ་ཞིག་ཡིན་པའི་ཆ་ནས་བོད་ནང་་འགྲོ་བ་མིའི་ཐོབ་ཐང་ཡོད་མེད་དང་། བོད་ནང་གི་བོད་མིའི་འཚོ་བ་དང་སེམས་ཚོར། བོད་ནང་གི་གནས་སྟངས་སོགས་ལ་རྒྱུས་མངའ་ཡོད་པར་བརྟེན། རྒྱལ་སྤྱིའི་སྟེང་བོད་ནང་གི་གནས་སྟངས་གླེང་སློང་བྱ་རྒྱུའི་འོས་འགན་ཡོད་པ་དང་བྱེད་འོས་པ་ཞིག་ཡིན། ཞེས་བརྗོད་བྱུང་།
ཚེ་རིང་མཐར་ཕྱིན་ལགས་ཀྱིས། ང་སྐབས་ ༡༨ པའི་བོད་མི་མང་གི་དབུས་གཙང་ཆོལ་ཁའི་སྤྱི་འཐུས་འོས་མིར་ལངས་ཀྱི་ཡོད། མི་རབས་གཞོན་པའི་བོད་ཀྱི་དམངས་གཙོར་བདག་པོ་རྒྱག་རྒྱུ་གལ་ཆེན་ཡིན། ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་དེ་ཚ་ཚ་འུར་འུར་དང་བགྲོ་གླེང་སོགས་གང་མང་དགོས་གལ་ཆེ་བ་སོགས་ལ་བརྟེན་ནས་ལངས་པ་ཡིན། ཕྱི་ལོ་ ༢༠༢༡ ལོར་སྤྱི་འཐུས་ཀྱི་དམ་འབུལ་ཞུ་ཐུབ་མེད་པ་དང་། སྤྱི་འཐུས་རྣམས་ཕྱོགས་གཉིས་ལ་ཆགས་པ་དང་། རྒྱལ་ཞེན་དང་ཆོལ་ཞེན་གཉིས་འཁྲུག་སྟེ་དུམ་བུ་གཉིས་ལ་གྱུར་བ་སོགས་སེམས་འཚབ་ཤུགས་ཆེན་བྱུང་། དེར་བརྟེན་ད་ལན་གྱི་འོས་བསྡུའི་ནང་སོ་སོ་མི་རབས་གསར་པ་ཞིག་ཡིན་པའི་ཆ་ནས་ཆོལ་ཁ་དང་ཆོས་ལུགས། ལྟ་བ། ལངས་ཕྱོགས་སོགས་མི་འདྲ་བ་ཡོད་ཀྱང་། འཐེན་འཁྱེར་མེད་པའི་ཐོག་ནས་ཕན་ཚུན་གུས་བརྩི་ཡོང་དགོས་གལ་ཆེ་བ། འཐེན་འཁྱེར་མེད་པ་དང་རྒྱལ་ཁབ་ལ་བསམ་བློ་གཏོང་མཁན་གྱི་འོས་མི་ཞིག་ཡོང་དགོས་རྒྱུ་གལ་ཆེན་པོ་མཐོང་གི་འདུག ང་ཚོ་བཙན་བྱོལ་བོད་མི་དང་འཐབ་རྩོད་ཀྱི་མི་རིགས་ཤིག་ཡིན་པའི་ཆ་ནས་བོད་ཀྱི་རྩ་དོན་ཐོག་ནུས་པ་འདོན་རྒྱུའི་ཆོད་སེམས་བརྟན་པོ་ཡོད། གལ་ཏེ་ང་རང་སྤྱི་འཐུས་ཆགས་ཚེ་རྒྱ་ནག་གི་ཆབ་སྲིད་ཀྱི་གནས་སྟངས་ཚུད་པའི་ཐོག་ནས་རྒྱ་ནག་གི་གནས་སྟངས་ཐོག་ཞིབ་འཇུག་བྱ་རྒྱུ་དང་། བོད་དོན་དང་འབྲེལ་བའི་འཆར་གཞི་སྒྲིག་རྒྱུ་དང་ལས་དོན་སྤེལ་ཐུབ་རྒྱུའི་དམིགས་ཡུལ་ཡོད། ད་ལན་གྱི་འོས་བསྡུ་དང་འབྲེལ་ནས་ས་གནས་ཁག་ལ་སྐོར་སྐྱོད་དུ་ཕྱིན་ཏེ་འོས་བསྡུའི་དྲིལ་བསྒྲགས་བྱ་རྒྱུ་དང་མི་མང་དང་ལྷན་དུ་གླེང་སློང་བྱེད་ཀྱི་ཡིན། ཞེས་བརྗོད་བྱུང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
