མོན་རྟ་དབང་དུ་རྒྱལ་སྤྱིའི་རྒྱལ་དབང་ཚངས་དབྱངས་རྒྱ་མཚོའི་ཞིབ་འཇུག་ཚོགས་ཆེན་བསྡུས།

མོན་ཡུལ་དད་ལྡན་མི་མང་གིས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་སྲུང་གཙི་དང་འབྲེལ་༧རྒྱལ་བ་ཚངས་དབྱངས་རྒྱ་མཚོའི་འཁྲུངས་ཡུལ་མོན་རྟ་དབང་དུ་ཚངས་དབྱངས་རྒྱ་མཚོའི་ཞིབ་འཇུག་ཚོགས་འདུ་ཞིག་འཚོག་བཞིན་འདུག

དེ་རིང་ཕྱི་ཟླ་༡༢ ཚེས་ ༣ ནས་ ༦ བར་རྒྱ་གར་བྱང་ཤར་ཨ་རུ་ན་ཅལ་མངའ་སྡེ་གཞུང་གི་ཆོས་རིག་ལས་ཁུངས་དང་། ཐུབ་བསྟན་བཤད་སྒྲུབ་གླིང་སོགས་ཀྱི་གོ་སྒྲིག་འོག སྐུའི་གོ་སྟོན་དང་རྒྱལ་སྤྱིའི་རྒྱལ་བ་ཚངས་དབྱངས་རྒྱ་མཚོའི་ཞིབ་འཇུག་ཚོགས་ཆེན་ཐེངས་དང་པོ་འཚོག་བཞིན་འདུག་ལ། དབུ་འབྱེད་མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་དབུས། རྒྱལ་སྤྱིའི་ཆེད་མཁས་པ་དང་། ཉམས་ཞིབ་པ་མང་པོ་འཛོམས་འདུག

ཚོགས་འདུ་གོ་སྒྲིག་ཚོགས་ཆུང་གི་ཚོགས་གཙོ་སྤྲུལ་སྐུ་བསྟན་འཛིན་འགྱུར་ལགས་ཀྱིས་འདི་ག་བོད་ཀྱི་དུས་བབ་གསར་ཁང་ལ། སྤྱིར་བཏང་ལོ་རྒྱུས་ཐོག་ལ་བལྟས་པ་ཡིན་ན། ༸རྒྱལ་དབང་ཚངས་དབྱངས་རྒྱ་མཚོ་མཆོག་ནི། ༸རྒྱལ་དབང་སྐུ་ཕྲེང་རིམ་བྱོན་ནང་ནས་ཁྱད་དུ་འཕགས་པ་ཞིག་དང་། ཅུང་མི་འདྲ་བའི་ལོ་རྒྱུས་ཤིག་ཡོད་པ་ཚང་མས་མཁྱེན་གསལ་རེད། ལྷག་པར་མོན་ཡུལ་དུ་སྐུ་འཁྲུངས་པ་ཞིག་ཆགས་ཀྱི་ཡོད། ཁོང་གི་སྐུ་ཚེའི་མཛད་པ་དེ་ཆོས་ཕྱོགས་དང་རྣམ་ཐར། གསུང་མགུར་སོགས་བོད་ཡུལ་དང་ཧི་མ་ལ་ཡ་ཙམ་མ་ཡིན་པའི་འཛམ་གླིང་ས་ཕྱོགས་གང་སར་མཚན་སྙན་གྱི་བ་གདན་ཡོངས་སུ་ཁྱབ་པ་ཆགས་ཡོད། འོན་ཀྱང་། ད་བར་མོན་ཡུལ་གཙོ་བོ་གྱུར་བའི་རྒྱལ་བ་ཚངས་དབྱངས་རྒྱ་མཚོའི་གསུང་རྩོམ་དང་། དེ་དང་འབྲེལ་ཡོད་ཀྱི་མཁས་དབང་རྣམ་པ་ཚོའི་ཡིག་ཆ། དེ་བཞིན་གནའ་ཪབས་ཀྱི་ཕྱག་དཔེ་ཁག་དང་འབྲེལ་བའི་ཚོགས་ཆེན་ཞིག་ད་བར་ཚོགས་ཐུབ་མེད་པ་ཞིག་ཆགས་འདུག ད་ལན་རྒྱལ་སྤྱིའི་རྒྱལ་དབང་ཚངས་དབྱངས་རྒྱ་མཚོའི་ཞིབ་འཇུག་ཚོགས་འདུ་འདིའི་དམིགས་ཡུལ་གཙོ་བོ་ནི། རྒྱལ་དབང་ཚངས་དབྱངས་རྒྱ་མཚོའི་ལོ་རྒྱུས་སོགས་ཀྱི་སྐོར་ལ་ཉམས་ཞིབ་གནང་མཁན་གྱི་རྒྱལ་སྤྱི་དང་། མོན་ཡུལ། བཙན་བྱོལ་བོད་པའི་སྤྱི་ཚོགས་བཅས་ནས་མཁས་དབང་ཁག་གདན་འདྲེན་ཞུས་ནས། དམིགས་ཡུལ་གཙོ་བོ་རྒྱལ་བ་ཚངས་དབྱངས་རྒྱ་མཚོའི་གསུང་འབུམ་ཞིག་བོད་ཡིག་དང་། དབྱིན་ཡིག སྐད་རིགས་ཁག་འདྲ་མིན་གྱི་ནང་དཔར་སྐྲུན་ཞུ་ཐུབ་པ་ཞིག་དང་། སྤྱིར་བཏང་རྒྱལ་སྤྱིའི་ནང་དང་། བཙན་བྱོལ་བོད་པའི་སྤྱི་ཚོགས། དེ་བཞིན་མོན་ཡུལ་བཅས་ནས་རྒྱལ་བ་ཚངས་དབྱངས་རྒྱ་མཚོ་མཆོག་གི་ལོ་རྒྱུས་སྐོར་གནད་ལ་ཁེལ་བའི་ཞིབ་འཇུག་གནང་མཁན་ཉུང་ཉུང་ཡིན་ཡང་། ཨ་རི་གཙོ་བོར་གྱུར་བའི་མཐོ་སློབ་ཁག་མང་པོ་ཞིག་ལ་འབྲེལ་བ་ཞུས་ཏེ། ད་ལན་ཕྱི་རྒྱལ་ནས་ཕེབས་མཁན་གཏམ་བཤད་པ་བཅུ་དང་། དམིགས་བསལ་སྐུ་མགྲོན་དང་མཁས་དབང་བཅས་མི་གྲངས་བཅོ་ལྔ་ལྷག་ཕེབས་ཡོད་པས། ད་ལན་ས་གོ་ལ་འདིའི་སྒང་ལ་རྒྱལ་བ་ཚངས་དབྱངས་རྒྱ་མཚོའི་ལོ་རྒྱུས་ཞིབ་འཇུག་གནང་མཁན་མེད་ན་མ་གཏོགས་ཚང་མ་གདན་འདྲེན་ཞུས་ཡོད། ཅེས་གསུངས་བྱུང་།

ཡང་ཁོང་གིས། འདི་ལོར་༸གོང་ས་རྒྱལ་བ་རིན་པོ་ཆེ་མཆོག་དགུངས་གྲངས་དགུ་བཅུ་ཧྲིལ་པོར་ཕེབས་པའི་གོ་སྟོན་དེ་འཛམ་གླིང་ཁྱོན་ཡོངས་སུ་སྲུང་གཙི་ཞུ་མུས་ཡིན་སྟབས། མོན་ཡུལ་དུ་ཆོས་དང་སྲིད་ཀྱི་ཐོག་ནས་མཛད་རིམ་སྔ་ཕྱི་མང་དག་ཅིག་གོ་སྒྲིག་ཞུས་ཡོད། དེ་བཞིན་མངའ་སྡེའི་བློན་ཆེན་པདྨ་མཁའ་འགྲོ་མཆོག་གི་དགོངས་བཞེད་བླ་ན་མེད་པའི་ཐོག་ནས་ད་ལན་ཞིབ་འཇུག་དེ་གནད་ལ་ཁེལ་བ་ཞིག་བྱུང་བ་ཡིན་ན། དེ་༸གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་དུ་བརྟན་པའི་གསོལ་འདེབས་དང་། མོན་ཡུལ་མི་མང་ཡོད་དོ་ཅོག་༸གོང་ས་རྒྱལ་བ་རིན་པོ་ཆེ་མཆོག་གི་གདུལ་བྱ་ཆགས་ཡོད་སྟབས། མ་འོངས་པ་ཡིན་ནའང་༸གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་དུ་བརྟན་པ་དང་། མོན་ཡུལ་གྱི་མི་མང་ཚང་མ་ཚེ་རབས་ནས་ཚེ་རབས་བར་བསོད་ནམས་ཕྲན་བུ་ཞིག་གསག་རྒྱུར་དམིགས་ནས་ད་ལན་གྱི་ཚོགས་འདུ་འདི་མཆོད་པ་ཕུལ་བ་ཞིག་ཡིན། ཞེས་གསུངས་བྱུང་།

མཛད་སྒོའི་ཐོག་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས། ༧རྒྱལ་བ་ཚང་དབྱངས་རྒྱ་མཚོ་རྒྱལ་དབང་གི་སྐུའི་ཁྲི་དབང་ལ་ངོས་འཛིན་མི་བྱེད་ཅེས་དགག་པ་རྒགབ་སྡོད་མཁན་རིགས་གཅིག་དང་། ཡང་རྒྱལ་དབང་གི་སྐུའི་ཁྲི་ལ་རྩེ་གཅིག་ཏུ་དད་པ་བྱས་སྡོད་མཁན་དེ་འདྲའི་རིགས་གཉིས་ཡོད་པ་དང་། ལྟ་ཚུལ་མི་འདྲ་བ་ཡོད་བསྡད་པ་དེ་ལོ་རྒྱུས་ཀྱི་རྒྱུ་ཆ་དེ་ཚོའི་ནང་དུའང་ཐོན་བསྡད་འདུག དེ་བས་དེ་འདྲའི་སྐད་ཆ་བཤད་སྟངས་སྣ་ཚོགས་པ་ཞིག་ཡོང་གི་ཡོད་པ་རེད། ག་རེ་བཤད་ན་མ་བཤད་ན་ངས་གོང་དུ་ཞུས་པ་ནང་བཞིན། བཤད་སྟངས་སྣ་ཚོགས་པ་ཞིག་ཡོད་ནའང་། གནས་སྟངས་མི་འདྲ་བ་རིམ་པ་གསུམ་བྱུང་བསྡད་ཡོད་པ་རེད། ང་ཚོས་དངོས་ཡོད་གནས་ཚུལ་རང་ལ་བལྟས་པ་ཡིན་ན། ང་ཚོ་ཚང་མས་མཐུན་སྣང་དུ་གྲུབ་པའི་ཆོས་ཤིག་ལ་བལྟས་པ་ཡིན་ན། དེ་འདྲའི་ཕྱོགས་གཉིས་ཀྱི་ལྟ་ཚུལ་མི་འདྲ་བ་རིགས་གཉིས་ཡོད་པ་ཡིན་ན་རེད། སྐུའི་ཁྲི་དབང་ལ་ངོས་འཛིན་མ་བྱས་པ་དེ་འདྲའི་ལྟ་ཚུལ་དེ་ཤུགས་ཆེ་ཆུང་ག་ཚོད་ཅིག་ཡོད་མེད་ལ་མ་ལྟོས་པར།  བོད་མི་མང་ཚང་མའི་སེམས་ནང་དུ་རྒྱལ་དབང་སྐུ་ཕྲེང་དྲུག་པ་ལབ་དུས། སྐུ་ཕྲེང་དྲུག་པ་ཚང་དབྱངས་རྒྱ་མཚོ་མ་གཏོགས་མེད་པ་ལྟ་བུ། སྐབས་དེ་དུས་རྒྱལ་དབང་གི་ཁྲི་ལ་བཀོད་བཞག་པའི་སྐུ་ཚབ་གཞན་པ་དེ་མི་མང་གི་ཁྲོད་དུ་ཧ་ལམ་སྒྲ་ཙམ་ཡང་གོ་རྒྱུ་མེད་པ་ལྟ་བུ། ད་ལྟའི་གནས་སྐབས་སུ་དེ་འདྲ་བོ་ཞིག་མཐོང་ཡོང་གི་འདུག ཅེས་དང་། གང་ལྟར་རྒྱལ་བ་ཚངས་དབྱངས་རྒྱ་མཚོས་བཞུགས་ཁྲི་མཐོན་པོའི་སྒང་དུ་བཞུགས་ནས་ཆོས་རྒྱ་ཆེན་པོ་དེ་འདྲ་གནང་བ་རེད་ཟེར་བ་ཡོངས་གྲགས་སུ་མེད་པ་འདྲ། བཞུགས་ཁྲི་མཐོན་པོར་གཞུགས་ནས་ཆོས་རྒྱ་ཆེན་པོ་དེ་འདྲ་མ་གནང་ནའང་། རྣམ་པ་གཞན་ཞིག་གི་ཐོག་ནས་ཆོས་རྒྱ་ཆེན་པོ་དེ་འདྲ་གསུང་ཡོད་མེད་དེའང་དགོངས་པ་བཞེས་དགོས་པ་ཞིག་རེད། སྐུ་ཡི་རྣམ་འགྱུར་མི་འདྲ་བའི་ཐོག་ནས་ཆོས་རྒྱ་ཆེན་པོ་གསུང་བ་དང་། ངག་གི་རྣམ་འགྱུར་མི་འདྲ་བའི་ཐོག་ནས། ཡོངས་གྲགས་ཀྱི་ཆོས་གསུང་སྟངས་ཡིན་པའི་རྣམ་པ་ཞིག་ཐོག་ནས་ཆོས་རྒྱ་ཆེན་པོ་གསུང་བ། ཐུགས་སུ་ཆོས་སྒོམ་ཡོང་དུས་དོན་དག་གི་རིམ་པ་དེའང་རྣམ་པ་རྦད་དེ་མི་འདྲ་བ་ཞིག་ཐོག་ནས་ཆོས་རྒྱ་ཆེན་པོ་གསུང་རྒྱུ་དེ་འདྲ་ཞིག་གནང་པ་ཡིན་ན། གནང་རྒྱུ་ཡོད་བསྡད་པ་སངས་རྒྱས་བཅོམ་ལྡན་འདས་རང་གྱི་མདོ་ནང་གསུངས་ཡོད་པ་རེད་ཅེས་དང་། འཛམ་བུ་གླིང་འདི་ག་ཚོད་ཅིག་ཁྱབ་པའི་ས་དེར་རྒྱལ་དབང་གི་མཚན་དེ་ཁྱབ་བསྡད་ཡོད་པ་རེད། རྒྱལ་དབང་གི་མཚན་དེ་ག་ཚོད་ཅིག་ཁྱབ་པའི་ས་དེ་ལ་རྒྱལ་བ་ཚངས་དབྱངས་རྒྱ་མཚོའི་མཚན་དེ་ཁྱབ་བསྡད་ཡོད་པ་རེད་ཅེས་སོགས་གསུངས་སོང་།

ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས།  ད་ལན་ཨ་རུ་ན་ཅལ་མངའ་སྡེ་དང་ལྷག་པར་དུ་མོན་ཡུལ་ལ་མཚོན་ན་ལོ་རྒྱུས་ཀྱི་དོན་སྙིང་ལྡན་པའི་དུས་སྐབས་ཤིག་རེད། རྒྱུ་མཚན་ནི་ཐེངས་དང་པོར་རྟ་དབང་རྫོང་དུ་རྒྱལ་བ་སྐུ་ཕྲེང་དྲུག་པའི་གལ་ཆེན་རང་བཞིན་དང་དོན་སྙིང་སྐོར་གྱི་རྒྱལ་སྤྱིའི་ཚོགས་འདུ་ཞིག་གོ་སྒྲིག་བྱས་ཡོད། ང་ཚོས་ཤེས་གསལ་ལྟར། རྒྱལ་བ་སྐུ་ཕྲེང་དྲུག་པ་ནི་མོན་ཡུལ་གྱི་རྟ་དབང་ས་ཁུལ་དུ་སྐུ་འཁྲུངས་པ་ཡིན་ནའང་། འདི་ནི་འཛམ་གླིང་གི་མི་མང་པོ་ཞིག་གིས་ཤེས་རྟོགས་མེད་པ་ཞིག་རེད། དེར་བརྟེན་ང་ཚོ་མོན་པ་རྣམས་ཀྱིས་རྒྱལ་བ་སྐུ་ཕྲེང་དྲུག་པའི་བསྟན་པ་དང་། ལྷག་པར་དུ་ཁོང་གིས་མཛད་པའི་སྙན་ངག་མཛེས་པོ་རྣམས་འཛམ་གླིང་ཡོངས་ལ་ཁྱབ་སྤེལ་བྱ་རྒྱུའི་བསམ་བློ་བཏང་ཡོད། ངས་རྒྱལ་སྤྱིའི་མི་སྣ་མང་པོ་ཞིག་ཚོགས་འདུ་འདིར་མཉམ་ཞུགས་བྱ་རྒྱུར་རེ་བ་ཆེན་པོ་བརྒྱབ་ཡོད། ཅེས་དང་། ངས་རྒྱལ་ཁབ་དང་འཛམ་གླིང་ཡོངས་ནས་ཕེབས་པའི་མཁས་པ་དང་མཁས་དབང་ཚོའི་བགྲོ་གླེང་བརྒྱུད། ཚོགས་འདུ་འདི་ནས་གྲུབ་འབྲས་ལེགས་པོ་ཞིག་ཐོན་རྒྱུར་རེ་བ་ཆེན་པོ་བརྒྱབ་ཡོད། དོན་དངོས་སུ། རྟ་དབང་ས་ཁུལ་གྱི་མོན་པ་རྣམས་ཀྱིས་ང་ཚོ་ལ་རྒྱལ་བ་རིན་པོ་ཆེའི་བླ་བྲང་དང་དམིགས་བསལ་གྱི་འབྲེལ་བ་ཡོད་པ་ཚོར་གྱི་ཡོད། རྒྱུ་མཚན་ནི་གྲགས་ཅན་གྱི་རྟ་དབང་དགོན་པ་སྟེ། དགའ་ལྡན་རྣམ་རྒྱལ་ལྷ་རྩེ་དགོན་པ་ནི་རྒྱལ་བ་སྐུ་ཕྲེང་ལྔ་པའི་དགོངས་པའི་འོག་བཞེངས་པ་རེད། སྟབས་ལེགས་པ་ཞིག་ལ་རྒྱལ་བ་སྐུ་ཕྲེང་དྲུག་པ་ནི་རྟ་དབང་དུ་སྐུ་འཁྲུངས་པ་རེད། ད་དུང་། ༸གོང་ས་རྒྱལ་བ་རིན་པོ་ཆེ་མཆོག་བོད་ལ་ཆག་སྒོ་བྱུང་སྐབས་རྒྱ་གར་ལ་ང་ཚོའི་མོན་ས་ཁུལ་རྟ་དབང་བརྒྱུད་ཕེབས་པ་རེད། དེར་བརྟེན་ང་ཚོ་ལ་༸གོང་ས་མཆོག་གི་བླ་བྲང་དང་དམིགས་བསལ་གྱི་འབྲེལ་བ་ཡོད་པ་དང་། མོན་ས་ཁུལ་གྱི་མི་མང་གིས་༸གོང་ས་མཆོག་དང་བླ་བྲང་ལ་སྙིང་ཁོང་རུས་པའི་གཏིང་ནས་གུས་བཀུར་ཞུ་གི་ཡོད། ཅེས་གསུངས་སོང་།

ཡང་ཁོང་གིས། ང་ཚོ་ནང་པ་ཞིག་ཡིན་པའི་ཆ་ནས་གསལ་པོ་རེད། རྒྱུ་མཚན་ནི་ང་ཚོས་༸རྒྱལ་བ་རིན་པོ་ཆེའི་བླ་བྲང་གི་ལས་དོན་ཇི་ལྟར་འགྲོ་བཞིན་ཡོད་པ་དང་། ༸རྒྱལ་བ་རིན་པོ་ཆེའི་ཡང་སྲིད་རྣམས་དགའ་ལྡན་ཕོ་བྲང་གིས་དུས་ཡུན་རིང་པོའི་ནང་ཇི་ལྟར་བརྒྱུད་འཛིན་བྱས་ཡོད་པ་ཤེས་ཀྱི་ཡོད། དེར་བརྟེན་རྒྱ་ནག་གི་དབང་འཛིན་པ་ཚོས་༸རྒྱལ་བ་རིན་པོ་ཆེའི་ཡང་སྲིད་རྗེས་མ་རྒྱ་ནག་གི་དབང་འཛིན་པས་བསྐོ་བཞག་བྱ་རྒྱུ་ཡིན་ཞེས་བརྗོད་པ་དེ་སུས་ཀྱང་ངོས་ལེན་བྱ་རྒྱུ་མ་རེད། རྒྱུ་མཚན་ནི་༸རྒྱལ་བ་རིན་པོ་ཆེའི་བླ་བྲང་ནི་བོད་མི་དང་ཧི་མ་ལ་ཡའི་མི་མང་ཙམ་མ་ཡིན་པར་འཛམ་གླིང་ཡོངས་ལ་དགོས་མཁོ་ཡོད། དུས་སྐབས་འདིར། ༸གོང་ས་མཆོག་དགུང་གྲངས་ ༩༠ ཕེབས་པ་སྲུང་གཙི་ཞུ་སྐབས། ༸གོང་ས་མཆོག་གི་དགུང་གྲངས་དགུ་བཅུའི་གོ་སྟོན་གྱི་ཉིན་འགའི་སྔོན་ལ། ༸གོང་ས་མཆོག་གིས་གསལ་པོར་གསུངས་དོན་བཞིན་༸རྒྱལ་བ་རིན་པོ་ཆེའི་ཡང་སྲིད་རྗེས་མ་ནི་དགའ་ལྡན་ཕོ་བྲང་གིས་ཐག་གཅོད་གནང་རྒྱུ་ཡིན་པ་དང་། སུའང་དེར་དབང་ཚད་མེད་པ་རེད། དེ་ནི་གསལ་པོ་རེད། གསལ་བཤད་བྱ་རྒྱུ་གང་ཡང་མེད། དེ་ནི་ཤིན་ཏུ་གསལ་པོ་རེད། ཅེས་གསུངས་སོང་།

ཐེངས་འདིའི་རྒྱལ་སྤྱིའི་རང་བཞིན་གྱི་༧རྒྱལ་དབང་ཚངས་དབྱངས་རྒྱ་མཚོའི་ལོ་རྒྱུས་ཞིབ་འཇུག་གི་ཚོགས་འདུའི་ཐོག་ཕྱི་རྒྱལ་གྱི་གཙུག་ལག་སློབ་ཆེན་ཁག་ནས་ཕེབས་པའི་ཆེད་མཁས་པ་ ༡༠ དང་། དེ་བཞིན་མོན་དང་བཙན་བྱོལ་བོད་མིའི་མཁས་པ་དང་ཞིབ་འཇུག་པ་མང་པོས་༧རྒྱལ་དབང་ཚངས་དབྱངས་རྒྱ་མཚོའི་མཛད་པ་འཕྲིན་ལས་དང་ཁོང་གི་གསུང་མགུར་སོགས་ཀྱི་བརྗོད་གཞི་མང་པོའི་ཐོག་དཔྱད་ཞིབ་ཀྱི་གསུང་བཤད་གནང་གི་ཡོད་པ་རེད།

གསར་འགོད་པ་དཔལ་ལྡན་གྱིས་མོན་རྟ་དབང་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།