འཇིའུ་འོད་སྣང་དུས་ཆེན་ཉིན་ཨོ་གླིང་གི་སི་ཌི་ནི་གྲོང་ཁྱེར་གྱི་བྷོན་ཌི་མཚོ་ཁ་རུ་ཕ་བུ་གཉིས་ཀྱིས་མེ་མདའ་གང་བྱུང་འཕངས་ཏེ་མི་གྲངས་ ༡༥ བསད་པ་དང་མི་གྲངས་ ༤༠ ཙམ་ལ་རྨས་སྐྱོན་བཟོས་བར་ཨོ་གླིང་སྐུ་ཚབ་དོན་གཅོད་ཁང་ནས་གདུང་སེམས་མཉམ་སྐྱེད་ཞུས་འདུག
ཁ་སང་ཕྱི་ཚེས་ ༡༤ ཉིན་ཨོ་གླིང་གི་གྲོང་ཁྱེར་སི་ཌི་ནི་ (Sydney) བྷོན་ཌི་མཚོ་ཁ་ (Bondi Beach) རུ་ཤི་རྨས་ཀྱི་དོན་རྐྱེན་ཚབས་ཆེན་བྱུང་ཡོད་པར་བརྟེན། རྒྱལ་ས་ཁེན་བྷེ་རར་ཡོད་པའི་ཨོ་གླིང་སྐུ་ཚབ་དོན་གཅོད་ཁང་གིས་དེ་འབྲེལ་གདུང་སེམས་མཉམ་སྐྱེད་གནང་བའི་ནང་། བྷོན་ཌིའི་མཚོ་ཁ་རུ་ཤི་རྨས་ཀྱི་དོན་རྐྱེན་བྱུང་བ་དེ་ཧང་སངས་དགོས་པ་ཞིག་དང་བློ་ཕམ་བྱུང་། དོན་རྐྱེན་དེའི་ཁྲོད་རྐྱེན་འདས་སུ་ཕྱིན་པའི་མི་དེ་དག་གི་ནང་མི་རྣམས་ལ་གདུང་སེམས་མཉམ་སྐྱེད་ཞུ་རྒྱུ་དང་། རྨས་སྐྱོན་ཕོག་པ་རྣམས་གང་མགྱོགས་དྲག་སྐྱེད་ཡོང་བའི་སྨོན་ལམ་ཡོད། ཅེས་དོན་ཁང་གི་ངོ་དེབ་ཏུ་བཀོད་འདུག་ལ། དཀའ་ཚེགས་ཆེ་བའི་དུས་སྐབས་འདིར་ཨོ་གླིང་སྐུ་ཚབ་དོན་ཁང་གིས་བོད་མི་ཡོངས་ཀྱི་ཚབ་ཞུས་ཏེ་ཨོ་གླིང་མི་མང་ལ་གདུང་སེམས་མཉམ་སྐྱེད་ཞུ་རྒྱུ་དང་། ཨོ་གླིང་མི་མང་དང་མཉམ་དུ་ཡོད། ཅེས་བརྗོད་འདུག
ཁ་སང་ཨོ་གླིང་གི་གྲོང་ཁྱེར་སི་ཌི་ནིའི་ (Sydney) བྷོན་ཌི་མཚོ་ཁ་ (Bondi Beach) རུ་འཇིའུ་ཆོས་ལུགས་ཀྱི་འོད་སྣང་དུས་ཆེན་སྲུང་གཙི་བྱེད་བཞིན་པའི་སྐབས། རང་ལོ་ ༥༠ ཡིན་པའི་ས་ཇི་ཏི་ (Sajid Akram) དང་། ཁོའི་བུ་རང་ལོ་ ༢༤ ཡིན་པ་ན་ཝི་ཌི་ (Naveed Akram) གཉིས་ཀྱིས། ཉེ་འགྲམ་གྱི་ཟམ་པ་ཞིག་གི་ཐོག་ནས་མེ་མདའ་གང་བྱུང་འཕངས་ཏེ། མཚོ་འགྲམ་གྱི་མི་ ༡༥ བསད་པ་དང་། ཉེན་རྟོག་པ་ ༢ ཚུད་པའི་མི་གྲངས་ ༤༠ ལ་རྨས་སྐྱོན་ཕོག་སྟེ་སྨན་ཁང་དུ་སྨན་བཅོས་བྱེད་མུས་ཡིན་འདུག
དེ་རིང་ཉེན་རྟོག་པས་གསར་འགོད་གསལ་བསྒྲགས་ཤིག་སྤེལ་བའི་ནང་། ཉེན་རྟོག་པས་ཁོ་གཉིས་ལ་མེ་མདའ་བརྒྱབ་སྟེ་ཕ་རྒན་བསད་ཡོད་པ་དང་། ཛ་དྲག་ངང་བུ་དེར་སྨན་ཁང་དུ་སྨན་བཅོས་བྱེད་མུས་ཡིན་ལ། ཕྱི་ལོ་ ༢༠༡༥ ནས་བཟུང་ཕ་རྒན་དེ་ལ་མེ་མདའ་ཉར་ཆོག་པའི་ཆོག་མཆན་རག་ཡོད་པ་དང་། ཐོ་འགོད་བྱས་པའི་མཚོན་ཆ་ ༦ ཡོད་སྐོར་བརྗོད་འདུག
ཨོ་གླིང་གི་སྲིད་བློན་ཨེན་ཐོ་ནི་ཨལ་བྷེ་ནི་སི་ (Anthony Albanese) མཆོག་གིས། ཨོ་གླིང་གཞུང་གིས་མཚོན་ཆའི་ཆོག་མཆན་དུས་ཡུན་ལ་ཚད་བཀག་བཟོ་རྒྱུ་དང་། ཆོག་མཆན་ཡོད་པའི་མཚོན་ཆའི་གྲངས་འབོར་ཉུང་དུ་གཏོང་བ་སོགས་མེ་མདའི་ཁྲིམས་ལུགས་དམ་དུ་གཏོང་རྒྱུ་ཡིན་སྐོར་གསུངས་འདུག
རང་ལོ་ ༤༣ ཡིན་པའི་ཨེ་མ་ཌི་ (Ahmed el Ahmed) ཞེས་པའི་ཤིང་ཏོག་བཙོང་མཁན་གྱི་སྐྱེས་པ་ཞིག་གིས་མེ་མདའ་རྒྱག་མཁན་གྱི་ལག་ནས་མེ་མདའ་འཕྲོག་པ་དང་། ཁོང་གི་དཔུང་པའི་སྟེང་མེ་མདའ་ཐེངས་ ༥ ཙམ་ཕོག་སྟེ་རྨས་སྐྱོན་ཚབས་ཆེན་ཕོག་ཡོད་ཀྱང་། མི་མང་པོ་ཞིག་གི་ཚེ་སྲོག་བསྐྱབས་ཐུབ་འདུག དེ་འབྲེལ་ཨ་རིའི་སྲིད་འཛིན་ཊོམ་ཕུ་མཆོག་གིས། ཁོང་གིས་མི་མང་པོའི་ཚེ་སྲོག་བསྐྱབས་ཡོད་པ་དང་། རྨས་སྐྱོན་ཚབས་ཆེན་ཕོག་སྟེ་ད་ལྟ་སྨན་ཁང་དུ་ཡོད་པའི་མི་དེ་བློ་ཁོག་ཆེན་པོ་ཡོད་པ་དང་། ཁོང་ལ་གུས་བཀུར་ཆེན་པོ་ཡོད། ཅེས་གསུངས་འདུག་ལ། རྒྱལ་སྤྱིའི་ཐོག་ནས་བསྟོད་བསྔགས་བྱེད་བཞིན་འདུག ད་དུང་ཨི་ཛི་རེལ་གྱི་སྲིད་བློན་བྷེན་ཇ་མིན་ (Benjamin Netanyahu) གྱིས། བྷོན་ཌི་མཚོ་ཁ་རུ་འཇིའུ་ཆོས་ལུགས་པ་ཞིག་གིས་མེ་མདའ་རྒྱག་མཁན་གྱི་ལག་ནས་མེ་མདའ་འཕྲོག་སྟེ། མི་མང་པོ་ཞིག་གི་ཚེ་སྲོག་བསྐྱབས་ཡོད་པ་རེད། ཅེས་བརྗོད་འདུག
དེ་བཞིན་ཨ་རིའི་ཕྱུག་བདག་ཨེག་མན་ (Bill Ackman) ལགས་ཀྱིས་ཨེ་མ་ཌི་ལགས་ལ་དྲ་ཐོག་ནས་དངུལ་བསྡུ་རུབ་བྱས་པའི་ནང་ཨ་སྒོར་འབུམ་ ༡ ཞལ་འདེབས་གནང་ཡོད་འདུག་ལ། འདས་པའི་ཆུ་ཚོད་ ༡༢ ནང་ཨེ་མ་ཌི་ལགས་ལ་དྲ་ཐོག་ནས་དངུལ་བསྡུ་རུབ་བྱས་ཏེ་ཨ་སྒོར་ ༥༥༠,༠༠༠ རོགས་སྐྱོར་ཐོབ་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
