རྒྱ་གར་ལྷོ་ཕྱོགས་ནས་མཇལ་ཁ་དབུ་འཛུགས་མཛད།

དེ་རིང་ཕྱི་ཟླ་ ༡༢ ཚེས་ ༡༦ ཉིན་གྱི་སྔ་དྲོར་༸གོང་ས་རྒྱལ་བ་རིན་པོ་ཆེ་མཆོག་ནས་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཕོ་བྲང་དུ་ཕྱིའི་རྒྱལ་ཁབ་བརྒྱད་དང་། ཧི་མ་ཡ་ལའི་རི་རྒྱུད་པ། རྒྱ་གར་ཡུལ་མི་དང་བོད་པ་བཅས་དད་ལྡན་སེར་སྐྱ་མི་མང་ ༢༠༠ ལྷག་ལ་མཇལ་ཁ་སྩལ་གནང་མཛད་སོང་།

དེའི་ཐད་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་འདི་གའི་གསར་འགོད་པར། དྷ་སར་གནམ་གཤིས་གྲང་མོ་དང་། ས་གནས་གཞན་དུ་ཁོར་ཡུག་འབག་བཙོག་གི་དབང་གིས། མོན་གྷོ་འདོད་རྒུ་གླིང་ས་གནས་སུ་གནམ་གཤིས་སྙོམ་པོ་དང་ཁོར་ཡུག་གཙང་མ་ཡོད་པས། སྐུ་ངལ་གསོ་སླད་འདིར་ཆིབས་བསྒྱུར་བསྐྱངས་པ་ཞིག་རེད་དེ། ༸གོང་ས་རྒྱལ་བ་རིན་པོ་ཆེ་མཆོག་ནས་ཐུགས་སྙིང་རྗེ་ཆེན་པོའི་ཐོག་ནས། དེ་རིང་འདིར་མི་མང་ལ་མཇལ་ཁ་བསྩལ་གནང་བའི་ཉིན་དང་པོ་ཆགས་ཡོད་པ་རེད། མོན་གྷོ་འདོད་རྒུ་གླིང་གཞིས་ཆགས་འདི་ཀ་ན་ཊ་ཀར་རྫོང་གསུམ་ཡོད་པའི་ནང་ནས་རྫོང་ཨུ་ཏར་ཀ་ན་ཊ་ཆགས་བསྡད་ཡོད་པས། འདིའི་གཡས་གཡོན་གྱི་ཡུལ་མི་རྣམས་ཞེ་དྲགས་གལ་ཆེན་པོ་ཡིན་པས། དེ་རིང་མཇལ་ཁའི་ནང་གཡས་གཡོན་ཡུལ་མི་ནས་མི་གྲངས་བཅོ་བརྒྱད་ཅིག་དང་། བྷལ་གེ་རི་ཡ། ཨོ་གླིང་། ཨ་རི། ཨུ་རུ་སུ། ཅེག་སྤྱི་མཐུན་རྒྱལ་ཁབ། སོག་པོ་བཅས་ཕྱི་རྒྱལ་རྒྱལ་ཁབ་བརྒྱད་ནས་མི་གྲངས་ ༡༨ དང་། བོད་པ་དང་ཧི་མ་ལ་ཡའི་རི་རྒྱུད་ནས་ཡིན་པའི་ནང་པ་ཡིན་མིན་ལ་མ་ལྟོས་པར་མི་གྲངས་ ༢༠༠ ལྷག་ཅིག དེ་བཞིན་ཀ་ན་ཊ་ཀའི་མངའ་སྡེའི་ཕྱི་ལ་ཡོད་པའི་རྒྱ་གར་ཡུལ་མི་མི་གྲངས་ལྔ། ཨེ་མོ་རི་ཚན་རིག་ལྟེ་གནས་ཁང་གི་ཁེ་ལས་པ་དང་། སློབ་དགེ། གསུང་བསྒྱུར་བ་གསུམ་བཅས་དེ་རིང་གི་མཇལ་ཁའི་ཞིབ་ཕྲ་དེ་འདྲ་ཞིག་རེད། ཅེས་འགྲེལ་བརྗོད་གནང་བྱུང་།

རྒྱ་གར་ལྷོ་ཕྱོགས་ནས་མཇལ་ཁ་ཞུ་ཕྱོགས་སྐོར་ལ་ཁོང་གིས། མཇལ་ཁ་ཞུ་བར་ཆ་རྐྱེན་ག་རེ་ག་རེ་ཚང་དགོས་ཡོད་མེད་འདི་སྔོན་ཟླ་འདིའི་ཕྱི་ཚེས་ ༦ ཉིན་གསལ་བསྒྲགས་ཤིག་སྤེལ་ཡོད་པས་ཞིབ་ཕྲ་ཞུ་ཡི་མིན། ཡིན་ཡང་། ཕྱི་རྒྱལ་བ་ཞིག་ས་གནས་འདིར་ཕེབས་ཚེ། ངེས་པར་དུ་ཆ་རྐྱེན་ཁག་ཅིག་ཡིན་གཅིག་མིན་གཅིག་ཚང་དགོས་རེད། ཆ་རྐྱེན་དེ་Dalailamainmungod@gmail.com ཁ་བྱང་དེ་བརྒྱུད་ནས་སྙན་གསེང་ཞུ་དགོས་རེད། གོང་ལ་སྙན་གསེང་ཞུས་པ་བཞིན་འདི་ལོའི་ཕྱི་ཟླ ༡ ཚེས་ ༥ ནས་ཕྱི་ཟླ་ ༢ ཚེས་ ༡༨ བར་ཉིན་གྲངས་བཞི་བཅུ་ཞེ་དྲུག་རིང་༸གོང་ས་རྒྱལ་བ་རིན་པོ་ཆེེ་མཆོག་སྦེལ་ཀོབ་དང་ཧུན་སོར་ལ་བཞུགས་བཞག་མཛད་གནང་བ་ཡིན་ཙང་། སྐབས་དེར་དགུང་ལོ་དྲུག་ཅུ་ཡན་དང་དབང་པོ་སྐྱོན་ཅན། ནད་པ་དེ་དག་ལ་དམིགས་བསལ་མཇལ་ཁ་ཞིག་གནང་ཡོད་རེད། དེ་རིང་མཇལ་ཁ་དེའི་ཁྲོད་ལ་མ་ཚུད་པ་ཁག་ཅིག་བཅས་ལོ་ ༥༠ ནས་ ༥༩ བར་ལ་མཇལ་ཁ་གནང་གི་ཡོད་སྟབས། ད་ལྟ་ཐོ་གཞུང་ཁག་ཅིག་བསྡུ་རུབ་གནང་གྲུབ་ཡོད་ཀྱང་ཁག་ཅིག་འགྲུབ་མི་འདུག ཅེས་བརྗོད་བྱུང་།

ཟླ་འདིའི་ཕྱི་ཚེས་ ༦ ཉིན་གྱི་མཇལ་ཁ་དང་འབྲེལ་བའི་གསལ་བསྒྲགས་གནང་དུ། རྒྱ་གར་དང་ཁྱིམ་མཚེས་རྒྱལ་ཁབ་ཁག་ནང་དུ་གནས་བཞུགས་བོད་མི་དང་རྒྱ་གར་བ། འབྲུག་པ། བལ་པོ་སོགས་དད་ལྡན་མི་མང་རྣམས་ཀྱིས་༸གོང་ས་མཆོག་ལ་མཇལ་ཁ་ཞུ་སླད་  dalailamainmundgod@gmail.com དྲྭ་ཚིགས་ཐོག་གློག་འཕྲིན་བསྐུར་དགོས་པ་མ་ཟད། དེའི་ནང་རང་ཉིད་མོན་གྷོ་གཞིས་ཆགས་ནང་ཚེས་གྲངས་ག་དུས་བར་འདུག་རྒྱུ་དང་།  རྒྱ་གར་ནང་གནས་བཞུགས་རྣམས་ཀྱིས་ཨ་ཊར་ལག་དེབ་ (Aadhar Card)  དང་འབྲུག་པ་རྣམས་ཀྱིས་མི་སེར་ལག་ཁྱེར། དེ་བཞིན་བལ་པོ་རྣམས་ཀྱིས་ནག་རི་ཊ་( Nagrikta Card)  བཅས་ཀྱི་པར་བཤུས་མཉམ་འཁྱེར་དགོས་ཡོད་པ་མ་ཟད།  ཕྱི་རྒྱལ་ཁག་ཏུ་གནས་སྡོད་བོད་མི་གཙོས་པའི་ཧི་མ་ལ་ཡའི་མི་རིགས་རྣམས་ཀྱིས་ཀྱང་ dalailamainmundgod@gmail.com དྲྭ་ཚིགས་ཐོག་གློག་འཕྲིན་ཆེད་གཏོང་གིས་རང་ཉིད་མོན་གྷོར་ནང་ཚེས་གྲངས་ག་དུས་བར་འདུག་རྒྱུ་དང་། ཕྱི་བསྐྱོད་ལག་འཁྱེར་དང་ཐོངས་མཆན།   དེ་བཞིན་རྒྱ་གར་གཞུང་གིས་གནང་བའི་ PAP ཞེས་པའི་སྲུང་སྐྱོབ་ས་ཁུལ་གྱི་ཆོག་མཆན་བཅས་ཁུར་དགོས། ཞེས་གསལ་ཡོད་པ་རེད།

གསར་འགོད་པ་དཔལ་ལྡན་གྱིས་འབྲས་སྤུངས་ཟུང་ཆུ་ཁང་ཚན་ནས་སྤེལ།  རྩོམ་སྒྲིག་བྱེད་མཁན། པདྨ་མཚོ།