བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་བོད་རྫ་ཆུ་ཁའི་གཏེར་ཁ་སྔོག་འདོན་གྱི་དོན་རྐྱེན་དང་འབྲེལ་བའི་ཐོག་རྒྱ་གཞུང་ལ་དགོས་འདུན་དོན་ཚན་བདུན་གྱི་ཐོག་ནས་འབོད་སྐུལ་གནང་སོང་།
དེ་རིང་ཕྱི་ཚེས་ ༡༦ ཉིན་གྱི་ཕྱི་དྲོའི་ཆུ་ཚོད་ ༢ པའི་ཐོག་བོད་མིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ། ཉེ་ལམ་བོད་དཀར་མཛེས་ཁུལ་སེར་ཤུལ་རྫོང་རྫ་ཆུ་ཁར་གཏེར་ཁ་སྔོག་འདོན་དང་འབྲེལ་ནས་བོད་མི་ ༨༠ ལྷག་འཛིན་བཟུང་བྱས་ཡོད་པ་མ་ཟད། ད་ལྟའི་ཆར་ས་གནས་བོད་མི་རྣམས་ལ་དཀའ་ངལ་འཕྲད་བཞིན་པའི་གནས་སྟངས་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་། གསར་འགོད་གསལ་བསྒྲགས་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས། འདི་ལོའི་ཕྱི་ཟླ་ ༡༡ ཚེས་ ༥ ཉིན་བོད་རྫ་ཆུ་ཁའི་ཀ་བཞི་སྡེ་བའི་གསེར་ཁོག་ཞེས་པའི་ས་ཆ་དེར་རྒྱ་ནག་གི་གསེར་གྱི་གཏེར་ཁ་སྔོག་འདོན་བྱེད་མཁན་ཚོང་པ་ཁག་ཅིག་ཡོང་གཏེར་ཁ་སྔོག་འདོན་བྱེད་བཞིན་པའི་སྐབས་སུ། ས་གནས་ཀྱིས་ཡུལ་མི་ཚོས་གཏེར་ཁ་སྔོན་འདོན་བཀག་འགོག་བྱས་ཏེ་ཁ་རྩོད་ཅུང་ཙམ་ཤོར་འདུག ཕྱི་ཟླ་ ༡༡ ཚེས་ ༦ ཉིན་གྱི་དགོང་མོ་ ༦།༥༠ ཙམ་ལ་རྒྱ་གཞུང་གི་དམག་མི་དང་ཉེན་རྟོག་པས་ཁྱིམ་ཚང་རེ་རེའི་ནང་དུ་འཛུལ་ནས་བོད་མི་ ༨༠ ལྷག་འཛིན་བཟུང་བྱས་འདུག དེའི་རྗེས་སུ་ཡུལ་མི་ཁག་ཅིག་ཀློད་གྲོལ་བཏང་བ་དང་ཁག་ཅིག་བསྐྱར་དུ་འཛིན་བཟུང་བྱས་ཡོད་པ་དང་། བར་སྐབས་བོད་མི་གྲངས་ ༡༨ གར་སོང་ཆ་མེད་དུ་གྱུར་འདུག ད་ལྟའི་གནས་ཚུལ་གསར་ཤོས་ནི་བོད་ཀྱི་རྫ་ཆུ་ཁ་དང་ཐད་གར་འབྲེལ་བ་ཡོད་མཁན་གྱིས་བསྐུར་བ་ཆགས་ཡོད། རྫ་ཆུ་ཁའི་འབྲེལ་ཡོད་རྣམས་ཀྱི་དགོས་དམིགས་དང་བསྟུན། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་དེའི་སྐོར་གྱི་གསར་འགོད་གསལ་བསྒྲགས་བྱེད་དགོས་པ་གལ་ཆེན་པོ་མཐོང་སྟེ་སྤེལ་བ་ཞིག་ཆགས་ཀྱི་ཡོད། སྤྱིར་བཏང་གནས་ཚུལ་འདི་ནི་བོད་ཀྱི་སྲིད་བྱུས་ཉམས་ཞིབ་ཁང་བརྒྱུད་ནས་( the wall street journal )གསར་ལམ་ཐོག་སྤེལ་ཡོད། ཐོག་མའི་གནས་ཚུལ་ཐོན་སྐབས་རྫ་་ཆུ་ཁའི་ཡུལ་མི་རྣམས་འཛིན་བཟུང་བྱེད་པ་དང་།ཉེས་རྡུང་གཏོང་བ་ཉུང་དུ་འགྲོ་བ། གཏེར་ཁ་སྔོོག་འདོན་དང་ཁོར་ཡུག་སྲུང་སྐྱོབ་བྱེད་པར་ཕན་ཐོགས་པར་བསམ་ནས་ཕྱི་རྒྱལ་གྱི་གསར་ཁང་ཆེན་པོ་ཞིག་ཏུ་སྤེལ་བ་དང་། དེའི་གནས་ཚུལ་ཁྱབ་རྗེས་གསར་འགོད་གསལ་བསྒྲགས་ཤིག་སྤེལ་བསམ་པ་རེད། གསར་འགོད་གསལ་བསྒྲགས་ཀྱི་སྐབས་སུ་རྫ་ཆུ་ཁའི་འབྲེལ་མཐུད་པ་ཞིག་མཉམ་ཞུགས་བྱ་འཆར་ཡོད་ཀྱང་། ཉེ་ལམ་རྒྱ་ནག་གཞུང་གིས་རྫ་ཆུ་ཁའི་ཡུལ་མི་རྣམས་ལ་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད། འབྲེལ་ཡོད་ནང་མིར་ཡང་དམ་དྲག་བྱེད་བཞིན་ཡོད་པས། གསར་འགོད་གསལ་བསྒྲགས་ཐོག་མཉམ་ཞུགས་བྱེད་ཐུབ་མ་སོང་། ཞེས་བརྗོད་སོང་།
ཡང་ཁོང་གིས། ནམ་རྒྱུན་རྒྱ་ནག་གཞུང་གིས་ཁོར་ཡུག་སྲུང་སྐྱོབ་བྱེད་བཞིན་པའི་དྲིལ་བསྒྲགས་བྱེད་ཀྱི་ཡོད་ལ། རྒྱལ་ཁབ་ཀྱི་ཁྲིམས་དང་སྒྲིག་གཞི་ལག་བསྟར་བྱེད་བཞིན་ཡོད་ཚུལ་བསྒྲགས་བཞིན་ཡོད་པ་རེད། ཡིན་ནའང་། གཏེར་ཁ་སྔོན་འདོན་བྱེད་བཞིན་པའི་སྐབས་སུ་རྒྱ་ནག་གཞུང་གིས་གཏེར་ཁ་སྔོག་འདོན་བྱེད་མཁན་ལ་རྒྱབ་སྐྱོར་བྱས་ཏེ། མི་མང་ལ་གཅེར་རྡུང་བཏང་བ་དེ་རྒྱ་གཞུང་གི་དྲིལ་བསྒྲགས་དང་མཐུན་གྱི་ཡོད་པ་མ་རེད། ཅེས་དང་། རྒྱལ་སྤྱིའི་མགོ་ཁྲིད་རྣམས་ཀྱིས་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་ཀྱི་ཁྲིམས་དང་སྒྲིག་གཞི་གལ་ཆེན་པོར་བརྩི་བཞིན་ཡོད་ཚེ། ད་ལྟའི་ཆར་བོད་ནང་གི་བོད་མི་རྣམས་ལ་དོན་མེད་གཅར་རྡུང་བྱེད་པ་དང་། གཏེར་ཁ་སྔོག་འདོན་བྱས་ཏེ་ཁོར་ཡུག་གཏོར་བཤིག་གཏོང་བ་མྱུར་དུ་འགོག་དགོས་པའི་གནོན་ཤུགས་སྤྲོད་རོགས། ཞེས་བརྗོད་སོང་།
གསར་འགོད་གསལ་བསྒྲགས་ཐོག་རྒྱ་གཞུང་ལ་དགོས་འདུན་དོན་ཚན་བདུན་བཏོན་ཡོད་པའི་ནང་། གཅིག ད་ལྟའི་ཆར་བོད་རྫ་ཆུ་ཁའི་ཡུལ་མི་འཛིན་བཟུང་བྱས་ཡོད་པ་རྣམས་མྱུར་དུ་ཀློད་གྲོལ་གཏོང་རྒྱུ་གལ་ཆེན་པོ་ཆགས་ཡོད། གཉིས། ས་གནས་མི་མང་གི་དགོས་འདུན་ལ་རྒྱ་ནག་གཞུང་གིས་གུས་བརྩི་བྱ་དགོས། གསུམ། རྒྱ་ནག་གཞུང་གིས་ཚོང་པ་ཁག་ཅིག་གི་ཁེ་ཕན་ཆེད་དུ་བོད་མི་མང་ལ་གཅར་རྡུང་བྱེད་པ་དང་ཁོར་ཡུག་གཏོར་བཤིག་གཏོང་ཆོག་གི་མེད། བཞི། གལ་སྲིད་རྒྱ་ནག་གཞུང་ལ་ཁོར་ཡུག་སྲུང་སྐྱོབ་ཀྱི་ཁྲིམས་དང་སྒྲིག་གཞི་ཡོད་ཚེ། དོན་དང་མཐུན་པའི་ཐོག་ནས་ལག་བསྟར་བྱ་དགོས། ལྔ། ས་གནས་དེའི་གཏེར་ཁ་སྔོག་འདོན་མྱུར་དུ་མཚམས་འཇོག་བྱ་དགོས། དྲུག། ས་གནས་ཡུལ་མིར་ཉེས་རྡུང་བཏང་བའི་ནད་པ་སྨན་བཅོས་ཚད་ལྡན་བྱ་དགོས་པ་དང་། ནད་པ་རྣམས་ཀྱི་གནས་ཚུལ་ཕྱི་གསལ་ནང་གསལ་བྱ་དགོས། བདུན། རྒྱ་ནག་གཞུང་གིས་བོད་ཀྱི་ཆོས་དང་ཡུལ་སྲོལ་གོམས་གཤིས་དང་། མི་མང་གི་བསམ་འདུན་ལ་གུས་བརྩི་བྱ་དགོས་པ་བཅས་འཁོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
