ལྡི་ལི་མཐོ་རིམ་ཁྲིམས་ཁང་གིས་བོད་སྒར་བསམ་ཡས་གླིང་དུ་ཡོད་པའི་ཟ་ཁང་ཇ་ཁང་དང་ཆང་ཁང་སོགས་ལ་ཁྲིམས་མཐུན་གྱི་བྱ་སྤྱོད་སྤེལ་དགོས་པའི་བཀའ་ཁྱབ་ཅིག་བཏང་གནང་འདུག
ཟླ་འདིའི་ཕྱི་ཚེས་ ༢༤ ཉིན་ལྡི་ལི་མཐོ་རིམ་ཁྲིམས་ཁང་གིས་ལྡི་ལི་བོད་སྒར་བསམ་ཡས་གླིང་གི་མ་ཇི་ནུ་ཀ་ཊི་ལ་ (Majnukatilla) ཁུལ་དུ་བདེ་འཇགས་ཀྱི་འཆར་གཞི་དང་ཆོག་མཆན་མེད་པར་ཇ་ཁང་དང་ཆང་ཁང་། ཟ་ཁང་འཛུགས་སྐྲུན་བྱས་པར་ཁྲིམས་མཐུན་གྱི་བྱ་སྤྱོད་སྤེལ་དགོས་པའི་བཀའ་ཁྱབ་གནང་བཏང་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བསམ་ཡས་གླིང་ས་གནས་མགོ་འཛིན་རྡོ་རྗེ་ཚེ་རིང་ལགས་སུ་ལྡི་ལི་མཐོ་རིམ་ཁྲིམས་ཁང་གི་བཀའ་རྒྱ་དང་འབྲེལ་བའི་ཁྲིམས་གཏུག་ག་རེ་བྱས་ཡོད་མེད་དྲིས་པར་ཁོང་གིས། ལྡི་ལི་ཆེས་མཐོའི་ཁྲིམས་ཁང་དུ་ཁྲིམས་རྩོད་པ་གཉིས་ཀྱིས་བསམ་ཡས་གླིང་དུ་ཁྲིམས་མཐུན་མ་ཡིན་པའི་ཁང་པ་ཐོག་རྩེག་འཛུགས་སྐྲུན་དང་། ཟ་ཁང་དང་ཚོང་ཁང་ལ་ཁྲིམས་མཐུན་གྱི་ཡིག་ཆ་མེད་པའི་སྐོར་ལ་སྙན་ཞུ་ཕུལ་ནས་ལམ་སྟོན་གནང་རོགས་གནང་ཞུས་ཡོད་པ་རེད། དེ་འབྲེལ་མཐོ་རིམ་ཁྲིམས་ཁང་གིས་ཉན་ཞིབ་གནང་སྟེ། ལྡི་ལིའི་འཛུགས་སྐྲུན་དང་གོང་འཕེལ་ལས་ཁུངས་དང་ས་གནས་ལས་ཁུངས་ལ་བཀའ་ཁྱབ་བཏང་ནས་དངོས་བདེན་གང་ཡིན་མིན་ཞིབ་འཇུག་གནང་དགོས་པ་དང་། ཁྲིམས་ལག་བསྟར་བྱེད་དགོས་པའི་བཀོད་ཁྱབ་གནང་ཡོད་པ་རེད། ད་ལྟའི་ཆར་ཞིབ་འཇུག་སླད་འབྲེལ་ཡོད་ལས་བྱེད་སོགས་འབྱོར་མ་སོང་། ཞེས་བརྗོད་བྱུང་།
ལྡི་ལི་མཐོ་རིམ་ཁྲིམས་ཁང་ལ་སྤྱི་དམངས་ཁེ་ཕན་གྱི་ཞུ་གཏུག་ (Public Interest Litigation) གི་སྙན་ཞུ་ཞིག་འབྱོར་བའི་ནང་། ཡ་མུ་ན་གཙང་པོའི་ཉེ་འདབས་སུ་ཆགས་པའི་བོད་སྒར་བསམ་ཡང་གླིང་གི་མ་ཇི་ནུ་ཀ་ཊི་ལའི་ཉེ་འགྲམ་དུ་ཡོད་པའི་ཐོག་རྩེག་ཅན་གྱི་ཁང་པ་རྣམས་ལ་ཞིབ་བཤེར་བྱེད་དགོས་སྐོར་དང་། ཁང་པ་དེ་དག་ལ་དགོས་ངེས་འཛུགས་སྐྲུན་གྱི་འཆར་གཞི་མེད་པའི་ཐོག་ནས་ཇ་ཁང་དང་ཟ་ཁང་སོགས་ཀྱིས་ཚོང་ལས་བྱེད་བཞིན་ཡོད་པར་བརྟེན། འབྲེལ་ཡོད་འཛིན་སྐྱོང་གིས་ཁྲིམས་མཐུན་གྱི་བྱ་སྤྱོད་སྤེལ་དགོས་པའི་རེ་འདུན་བཏོན་ཡོད་འདུག
ཉན་ཞིབ་གནང་སྐབས་ལྡི་ལིའི་འཛུགས་སྐྲུན་དང་གོང་འཕེལ་ལས་ཁུངས་ཀྱི་ཁྲིམས་རྩོད་པས། མང་ཚོགས་ཀྱི་ཁེ་ཕན་དང་འབྲེལ་བའི་གྱོད་གཞི་དེ་དམིགས་བསལ་ལས་དོན་ཚོགས་ཆུང་གིས་ཁྲིམས་ཀྱི་ངོས་བཞེས་ཀྱི་ཐོག་ནས་ཐོ་འགོད་བྱས་ཡོད་པ་དང་། འབྲེལ་ཡོད་ལས་ཁུངས་ཀྱིས་སྒྲིག་ཁྲིམས་ལྟར་འོས་འཚམ་གྱི་བྱ་སྤྱོད་སྤེལ་དགོས་པ་དང་། ཟླ་བ་གསུམ་གྱི་ནང་ཚུད་དུ་ཁྲིམས་མཐུན་གྱི་བྱ་སྤྱོད་སྤེལ་དགོས་པའི་བཀའ་ཁྱབ་གནང་ཡོད་སྐོར་སོགས་བརྗོད་འདུག
ད་དུང་ཁྲིམས་རྩོད་པ་དེས། ལྡི་ལི་བོད་སྒར་བསམ་ཡས་གླིང་དུ་ཡོད་པའི་ཁང་པ་ཁག་ཅིག་ཐོག་རྩེག་བདུན་ནས་བརྒྱད་བར་ཡོད་པ་དང་། ཁྲིམས་འགལ་གྱི་ཐོག་ནས་ཁང་པ་དང་དེའི་ཐོག་ཏུ་སྤྲོ་སྐྱིད་ཁང་སོགས་བཟོས་ཡོད་སྐོར་དང་། ཁང་པ་དེ་དག་གི་སྐས་འཛེགས་དང་འགྱོག་འབེབ་སོགས་ཚད་ལྡན་མེད་པ་མ་ཟད། ཁང་པའི་བཟོ་བཀོད་དང་ལས་ཀའི་གནས་སྟངས་སོགས་ལ་བལྟས་ན་མིའི་ཚེ་སྲོག་ལ་ཉེན་ཁ་ཡོད་སྐོར་བརྗོད་ཡོད་འདུག
ཕྱི་ལོ་ ༢༠༢༢ ཟླ་ ༧ ཚེས་ ༢༤ ཉིན་སྐབས་དེའི་ལྡི་ལིའི་སྤྱི་ཁྱབ་བློན་ཆེན་ཨར་ཝེ་ད་ཀེ་ཇེ་བལ་(Arvind Kejriwal )མཆོག་གིས། མན་ཇུ་ཊ་ལ ( Majnu Ka Tila) བོད་མིའི་གཞིས་སྒར་ཁུལ་དང་ཅན་ཏ་ནི་ཅོཀ་( Chandni Chowk ) གཉིས་ལྡི་ལི་གྲོང་ཁྱེར་གྱི་གཞི་རྒྱ་ཆེ་བའི་ཟས་རིགས་ཀྱི་ལྟེ་གནས་ཤིག་ཏུ་འཛུགས་སྐྲུན་བྱ་རྒྱུ་ཡིན་སྐོར་དང་། ལས་གཞི་དེའི་ཁྲོད་ལས་མེད་མི་མང་འབུམ་ ༢༠ ལྷག་ལ་ལས་ཀའི་གོ་སྐབས་བསྐྲུན་ཏེ། རྒྱ་གར་གྱི་གཞི་རྒྱ་ཆེ་བའི་ཟས་རིགས་གྲོང་ཁྱེར་ཞིག་བསྐྲུན་རྒྱུ་ཡིན་སྐོར་བསྒྲགས་ཡོད་པ་ལྟར། འདས་པའི་ལོ་ཤས་ནང་གཞིས་སྒར་བསམ་ཡས་གླིང་ནི་རྒྱ་གར་གྱི་གཞོན་སྐྱེས་འདུ་འཛི་ཆེ་ས་དང་ཕྱི་ནང་གི་ཟས་རིགས་སྣ་འཛོམས་ལོངས་སུ་སྤྱོད་སའི་ལྟེ་བ་ཞིག་ཏུ་གྱུར་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
