འབྲས་སྤུངས་བློ་གསལ་གླིང་དུ་རིས་མེད་མཁས་པའི་བགྲོ་གླེང་དབུ་འཛུགས་གནང་།

༧སྐུའི་གོ་སྟོན་དང་བྱམས་བརྩེའི་ལོ་དང་བསྟུན། ༧རྒྱལ་བའི་མཛད་རྣམ་དང་སྤྱོད་འཇུག་ཆེན་མོ་དང་འབྲེལ་བའི་རིས་མེད་མཁས་པའི་བགྲོ་གླེང་ཞིག་འཚོག་མགོ་བཙུགས་སོང་།

དེ་རིང་ནས་ཉིན་གྲངས་ལྔ་ཡི་རིང་ལ་བྱེས་ཀྱི་གདན་ས་ཆེན་མོ་དཔལ་ལྡན་འབྲས་སྤུངས་བློ་གསལ་གླིང་དུ། ༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དང་བྱམས་བརྩེའི་ལོ་སྲུང་གཙི་སླད། ༧རྒྱལ་བའི་མཛད་རྣམ་དང་སྤྱོད་འཇུག་ཆེན་མོ་དང་འབྲེལ་བའི་རིས་མེད་མཁས་པའི་བགྲོ་གླེང་ཞིག་འཚོག་མགོ་བཙུགས་ཡོད་ཅིང་། དེ་རིང་དབུ་འབྱེད་མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་གིས་དབུས།  སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག སྒོ་མང་དང་བློ་གསལ་གླིང་གི་མཁན་རིན་པོ་ཆེ་མཆོག་རྣམ་གཉིས། རྒྱ་གར་གྱི་དབུས་གཞུང་གྲོས་ཚོགས་བདེ་དོན་བློན་ཆེན་ཀི་རན་རི་ཇི་ཇུ་མཆོག དབུས་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག དེ་བཞིན་ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་ལགས། ཕྱོགས་མཐའ་ཁག་ནས་ཕེབས་པའི་མཁས་དབང་རྣམ་པ་སོགས་འཛོམས་ཡོད་འདུག 

བློ་གསལ་གླིང་གི་མཁན་རིན་པོ་ཆེ་མཆོག་ཡི་ཤེས་ལྷུན་གྲུབ་མཆོག་གིས་མཛད་སྒོ་འབྲེལ་བའི་གསུང་བཤད་ནང་། དེ་རིང་༸གོང་ས་རྒྱལ་བ་རིན་པོ་ཆེ་མཆོག་སྐུ་བལྟམས་ནས་མི་ལོ་དགུ་བཅུ་ཧྲིལ་པོ་ཕྱིན་ཡོད་ཅིང་། དགུང་ལོ་ཧྲིལ་པོ་དགུ་བཅུ་དེའི་རིང་ལ་༸གོང་ས་རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་རྗེས་དྲན་བྱས་པའི་ཐོག་ནས་༸གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་སྲུང་གཙི་ཡི་ཡོད་པ་རེད། ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་གསུང་ཐུགས་ཀྱི་འཕྲིན་ལས་ཀྱི་ཡོན་ཏན་དང་། ལྷག་པར་༸གོང་ས་རྒྱལ་བ་རིན་པོ་ཆེ་མཆོག་སྐུ་བལྟམས་ནས་མི་ལོ་དགུ་བཅུ་སོང་བའི་དུས་ཡུན་དེ་དག་གི་ཁྲོད། ༸གོང་ས་རྒྱལ་བ་རིན་པོ་ཆེ་མཆོག་ནས་གཞིས་བྱེས་བོད་མི་ཡོངས་དང་། ཧི་མ་ལ་ཡའི་རི་རྒྱུད་ཀྱི་མི་རྣམས་ཀྱིས་གཙོས། འཛམ་གླིང་ཤར་ནུབ་ཀྱི་མི་ཚོགས་གྲངས་ལས་འདས་པར་ཚེ་འདི་དང་། སྐྱེས་པ་ཕྱི་མར་ཕན་པའི་ཚོགས་དང་། ངེས་པར་ལེན་པ། ཐར་པ་དང་ཐམས་ཅད་མཁྱེན་པའི་ལམ་སྟོན་དང་སྣེ་ཁྲིད། ཐབས་ལམ་རྣམ་པ་སྣ་ཚོགས་ཀྱི་ཐོག་ནས་བསམ་གྱིས་མི་ཁྱབ་པའི་མཛད་པ་བསྐྱངས་པ་དང་སྐྱོང་བཞིན་པའི་བཀའ་དྲིན་འདི་ཞིབ་ཅིང་ཕྲ་བ་ཞིག་སྐྱེས་བུ་ཐ་མལ་བ་ཞིག་གིས་བཤད་ག་ལ་ཐུབ་ཀྱང་། བསམ་གྱིས་མི་ཁྱབ་པ་ཞིག་ཡིན་པ་ནི་ཤེས་རྟོགས་འབྱུང་གི་ཡོད་རེད། དེ་འདྲ་ཡིན་པ་སོང་། ཚང་མས་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་དྲིན་དེ་འཇལ་དགོས་ཤིང་། སྐུ་དྲིན་འཇལ་སླད་ང་ཚོས་སྦྱོར་བ་ལག་ལེན་གྱི་ཐོག་ནས་བཀའ་བཞིན་སྒྲུབ་པའི་མཆོད་པའི་ཐོག་ནས་སྙིང་སྟོབས་དང་དམ་བཅའ་ཆོད་སེམས་དེ་སླར་ལྷག་སྐྱེད་ཡ་དེ་གལ་ཆེན་པོ་ཡིན་པ་མཟད། བཀའ་བཞིན་ལག་ལེན་བསྟར་བ་ཡིན་ན་དེ་ནི་སྐུའི་གོ་སྟོན་སྲུང་གཙི་ངོ་མ་དེ་ཡིན། ཞེས་སོགས་གསུངས་སོང་།

 དབུས་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་འདི་འདྲ་བའི་འཛོམས་ས་ཞིག་དང་གནས་སྟངས་འདི་འདྲ་ཞིག་ལ་ག་རེ་ཞུ་དགོས་མིན་ཤེས་ཀྱི་མི་འདུག་ཀྱང་། ༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་གྱིས་བོད་རྒྱལ་ཁབ་ཀྱི་གནས་བབ་བལྟས་ན་ཐབས་སྐྱོ་བོ་ཞིག་ཏུ་གྱུར་ཡོད་ཀྱང་། ང་ཚོ་བོད་ཀྱི་བདེན་མཐའ་གསལ་བའི་རེ་བ་བྱེད་སའི་གཞི་ཞིག་ཡོད་པ་མ་ཟད། གནས་སྟངས་སྡུག་པའི་ནང་ནས་ད་ལྟ་ལས་སྐྱིད་པ་ཞིག་མེད་པ་རེད། ངས་དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་དབུ་འཁྲིད་འོག ང་ཚོ་གང་ནས་མགྱོགས་ཉིད་དུ་རང་ཡུལ་ལ་ལོག་ཐུབ་རྒྱུ་ཞིག་དང་། ༸གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞབས་པད་བརྟན་པ། བོད་ལ་བདེ་སྐྱིད་ཡོང་བ། འཇིག་རྟེན་འདི་ལ་བདེ་སྐྱིད་ཡོང་ཆེད། དེ་རིང་ཕེབས་པའི་བླ་མ་སྤྲུལ་སོགས་ལ་གསོལ་འདེབས་སྐྱབས་འཇུག་ཞུ་རྒྱུ་ཡིན། དེ་བཞིན་ངས་དེ་རིང་གི་མགྲོན་གྱི་གཙོ་བོ་༸གོང་ས་རྒྱལ་བ་རིན་པོ་ཆེ་མཆོག་གི་ཡང་དག་པའི་རྗེས་འཇུག་པ་དང་བོད་ཀྱི་ངེས་པ་དོན་གྱི་བོད་ཀྱི་གྲོགས་མཆོག་རྒྱ་གར་དབུས་གཞུང་གྲོས་ཚོགས་བདེ་དོན་བློན་ཆེན་ཀི་རན་རི་ཇི་ཇུ་མཆོག་ལ་འཚམས་འདྲི་དང་ཡི་རངས་ཞུ་ཡི་ཡོད། ཅེས་གསུངས་སོང་། 

 སྐུ་མགྲོན་གཙོ་བོ་གྲོས་ཚོགས་ཀྱི་བདེ་དོན་བློན་ཆེན་ཀི་རན་རི་ཇི་ཇུ་མཆོག་གིས། དེ་རིང་འདིར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། དེ་རིང་ཞོགས་པར་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ་བྱིན་རླབས་ཞུས་པ་ཡིན། དེ་རིང་འདིར་འཛོམས་པ་དང་། ༧གོང་ས་མཆོག་ཀྱང་མོན་གྷོར་དུ་བཞུགས་ཡོད་པས། ང་ཚོ་ཧ་ཅང་བསོད་ནམས་ཆེན་པོ་ཡོད།  ༧ གོང་ས་རྒྱལ་བ་རིན་པོ་ཆེ་མཆོག་གི་དྲུང་དུ་ཆོས་ལུགས་སྣ་ཚོགས་ཀྱི་བླ་མ་དང་ལྷན་དུ། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་དང་དགའ་སྟོན་སྲུང་གཙི་བྱ་རྒྱུའི་གོ་སྐབས་ཡག་ཤོས་ཤིག་རེད། དེ་བཞིན་༧གོང་ས་རྒྱལ་བ་མཆོག་གི་སྐུ་ཚེ་བརྟན་པ་དང་། ང་ཚོ་ཚང་མར་བྱིན་རླབས་གནང་བ། འཛམ་གླིང་ཞི་བདེ་དང་མཐུན་སྒྲིལ་ཡོང་བར་སྨོན་ལམ་འདེབས་རྒྱུ་ཡིན། ང་ཚོ་ཚང་མས་༧གོང་ས་རྒྱལ་བ་རིན་པོ་ཆེ་མཆོག་ལ་དགའ་ཞེན་ཆེན་པོ་ཡོད་པའི་མུར། ཁོང་ནི་འཛམ་གླིང་འདིར་ད་ལྟ་བཞུགས་པའི་བློ་གྲོས་དང་ལྡན་པའི་སྐྱེས་བུ་ཞིག་ཡིན་པ་ཤེས་ཀྱི་ཡོད། ང་ཚོའི་དུས་འདིར་༧གོང་ས་རྒྱལ་བ་རིན་པོ་མཆོག་གི་དྲུང་དུ་བཅར་ཐུབ་པ་དང་། ཁོང་གི་བྱིན་རླབས་དང་ལམ་སྟོན་ཐོབ་པ་ནི་བསོད་ནམས་ཆེན་པོ་ཡིན་ལ། ༧གོང་ས་རིན་པོ་ཆེ་མཆོག་གི་འཁྲུངས་སྐར་དུས་ཆེན་སྲུང་གཙི་བྱེད་པ་དང་། ཆོས་ལུགས་དང་གྲུབ་མཐའ་གང་ལའང་མ་བལྟོས་པའི་མཁས་པའི་བགྲོ་གླེང་ཚོགས་འདུ་ཞིག་གོ་སྒྲིག་བྱེད་པ་དེ་ནི་གོ་སྐབས་ཁྱད་པར་ཅན་ཞིག་རེད། དེ་རིང་གི་མཛད་སྒོའི་ཐོག་བླ་ཆེན་མང་དག་ཅིག་དང་། དགེ་འདུན་པ། བཙུན་མ་མང་པོ་འཛོམས་པའི་དབུས་སུ། བགྲོ་གླེང་ཚོགས་འདུ་འདི་ནི་ཧ་ཅང་ཕན་ཐོགས་ཆེན་པོ་ཡོང་རྒྱུ་དང་། ང་ཚོ་ཚང་མར་བློ་སྐྱེད་གསར་པ་ཞིག་སྟེར་རྒྱུ་རེད། ཅེས་གསུངས་སོང་།

 ༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དང་བྱམས་བརྩེའི་ལོ་སྲུང་གཙི་སླད། ༧རྒྱལ་བའི་མཛད་རྣམ་དང་སྤྱོད་འཇུག་ཆེན་མོ་དང་འབྲེལ་བའི་རིས་མེད་མཁས་པའི་བགྲོ་གླེང་ཞིག་ཚོགས་འདུའི་ཐོག བོད་ཀྱི་དཔེ་མཛོད་ཁང་གི་ངེས་དོན་པ་དགེ་བཤེས་ལྷག་རྡོར་ལགས་དང་། དགེ་བཤེས་གཉེན་ཆེན་མོ་ཏྲེ་ཧོར་ཟླ་བ་ཚེ་རིང་ལགས། དགེ་བའི་བཤེས་གཉེན་ཆེན་མོ་ཡ་མ་རིན་ཆེན་ལགས། རོང་བོ་བློ་བཟང་སྙན་གྲགས་ལགས་སོགས་ཆེད་ཕེབས་གནང་འདུག 

གསར་འགོད་པ་དཔལ་ལྡན་གྱིས་སྒོ་མང་ཟུང་ཆུ་ཁང་ཚན་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།