རྒྱ་ནག་གིས་བོད་ཀྱི་ས་ཆ་གང་སར་གཞུང་ལམ་འཛུགས་སྐྲུན་བྱས་ཏེ་བོད་ཀྱི་གཏོར་ཁ་སྔོག་འདྲེན་དང་བོད་ནང་ཆུ་རླུང་ཉི་གསུམ་སོགས་ཀྱི་གློག་འདོན་ལས་གཞི་རྒྱ་སྐྱེད་མུས་ཡིན་འདུག
འདི་གའི་གསར་འགོད་པས་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ། རྒྱ་ནག་གིས་བོད་ནང་གཞུང་ལམ་རྒྱ་ཆེ་འཛུགས་སྐྲུན་བྱས་ཚར་ཡོད་སྐོར་བསྒྲགས་པའི་དགོས་དམིགས་གང་ཡིན་དྲིས་པར་ཁོང་གིས། རྒྱ་ནག་གཞུང་གིས་བོད་ནང་དུ་གཞུང་ལམ་དང་མཁའ་ལམ། མེ་འཁོར་ལྕགས་ལམ་སོགས་འཛུགས་སྐྲུན་བྱས་ཏེ། ས་གནས་བོད་རིགས་མང་ཚོགས་ཀྱི་འཚོ་བ་ཡར་རྒྱས་དང་ཁེ་ཕན་བསྐྲུན་གྱི་ཡོད་སྐོར་རྗོད་ཀྱིན་ཡོད་ནའང་། དོན་དངོས་སུ་འདི་དག་ཚང་མ་བོད་ཀྱི་རང་བྱུང་ཐོན་ཁུངས་སྔོག་འདོན་བྱེད་པར་དམིགས་ཡོད་པ་གསལ་བོ་རེད། གལ་སྲིད་ས་གནས་བོད་མི་རྣམས་ལ་ཁེ་ཕན་བསྐྲུན་གྱི་ཡོད་ཚེ། རྒྱ་ནག་གི་གཞུང་ལམ་སོགས་འཛུགས་སྐྲུན་གྱི་ལས་གཞིའི་ནང་ཞུགས་མཁན་ཚང་མ་རྒྱ་རིགས་རྐྱང་ཡིན་པའི་རྒྱུ་མཚན་གང་ཡིན་ནམ། རྒྱ་ནག་གཞུང་གིས་ས་གནས་མང་ཚོགས་ཀྱི་བདེ་སྡུག་ལ་ཁ་ལ་འཁྱེར་ནས་སོ་སོའི་ཁེ་ཕན་སྒྲུབ་བཞིན་ཡོད་པ་གསལ་བོ་རེད། སྤྱིར་བཏང་གཞུང་ལམ་ཞིག་འཛུགས་སྐྲུན་བྱས་པ་ཡིན་ན་མི་འགྲོ་སའི་ལམ་ཞིག་ཆགས་རྒྱུ་ཡིན་པ་ཆོས་ཉིད་རེད། འོན་ཀྱང་། རྒྱ་ནག་གི་གཞུང་ལམ་མཐུད་སྟངས་ཀྱི་གནས་སྟངས་ལ་གཞིགས་ན། ད་སྔ་བར་བགྲོད་ལམ་མེད་པའི་ས་ཁུལ་ཟེར་ནས་དོན་གྱི་གཏེར་རིགས་ཡོད་སའི་ས་ཁུལ་གྱི་གཏེར་ཁ་སྔོག་འདྲེན་བྱེད་པར་དམིགས་ཡོད། རྒྱ་ནག་གིས་བོད་ནང་ཉི་གློག་དང་རླུང་གློག ཆུ་གློག་སོགས་ཀྱི་འཛུགས་སྐྲུན་མང་པོ་ཞིག་བྱས་དང་བྱེད་བཞིན་ཡོད་པར་གཞུང་ལམ་ནི་མེད་དུ་མི་རུང་བ་ཆགས་བསྡད་ཡོད། ཅེས་བརྗོད་བྱུང་།
ཡང་རྒྱ་ནག་གཞུང་གིས་མཐའ་མཚམས་ཁུལ་དུ་གཞུང་ལམ་འཛུགས་སྐྲུན་གྱིས་དམག་གི་རྩ་འཛུགས་རྒྱ་སྐྱེད་གཏོང་གི་ཡོད་སྐོར་ལ་ཁོང་གིས། རྒྱ་ནག་གཞུང་གིས་འདས་པའི་ལོ་ཤས་རིང་བོད་རང་སྐྱོང་ལྗོངས་ཟེར་བའི་མཐའ་མཚམས་ཀྱི་ཁུལ་དུ་གཞུང་ལམ་འཛུགས་སྐྲུན་རྒྱ་ཆེ་བྱས་ཏེ། མཐའ་མཚམས་སྲུང་སྐྱོབ་ཀྱི་མིང་འོག་ནས་རྒྱ་གར་དང་བལ་ཡུལ། འབྲུག་སོགས་ཀྱི་མཐའ་མཚམས་ཁུལ་དུའང་སིམ་འཛུལ་གྱིས་མཐའ་མཚམས་རྒྱ་སྐྱེད་བཏང་དང་གཏོང་མུས་ཡིན་པ་མ་ཟད། མཐའ་མཚམས་ཁུལ་དུ་དམག་གི་རྩ་འཛུགས་དང་གོ་མཚོན་དབོར་འདྲེན་བྱེད་ཀྱི་ཡོད་པ་མངོན་གསལ་ཆགས་ཡོད་ལ། ཕྱོགས་གཞན་ཞིག་ནས་གཞུང་ལམ་འཛུགས་སྐྲུན་བྱས་པ་འདིས་བོད་ནང་གི་གྲོང་རྡལ་དང་གྲོང་ཚོ་རེ་རེ་བཅས་ལ་དབང་བསྒྱུར་བྱེད་པར་སྟབས་ཇེ་བདེ་རུ་ཕྱིན་ཡོད་ཅེས་བརྗོད་བྱུང་།
བོད་རང་སྐྱོང་ལྗོངས་ཀྱི་ས་གནས་སྲིད་གཞུང་གིས་བསྒྲགས་པའི་གནས་ཚུལ་ལྟར་ན། ཕྱི་ལོ་ ༢༠༢༥ ལོར་རྒྱ་ནག་གིས་བོད་རང་སྐྱོང་ལྗོངས་ཟེར་བའི་གྲོང་གསེབ་ཀྱི་གཞུང་ལམ་འཛུགས་སྐྲུན་ལས་གཞི་ ༡༦༧ དང་རྙིང་ཞན་དུ་གྱུར་བའི་གྲོང་གསེབ་ཀྱི་ཟམ་པ་ ༡༧༠ ལྷག་བསྐྱར་བཟོ་བྱས་པ། གྲོང་སྡེ་ ༦༢༣ དང་གྲོང་གསེབ་ ༣༩༠༢ ལ་སྤྱི་སྤྱོད་རླངས་འཁོར་བགྲོད་ལམ་མཐུད་ཡོད་པ་དང་། ཕྱི་ལོ་ ༢༠༢༥ ལོར་བོད་རང་སྐྱོང་ལྗོངས་ཟེར་བའི་ས་ཁྱོན་སྤྱི་ལེ་ ༦༥༩༥ རིང་གཞུང་ལམ་བསྐྲུན་པ་དང་གཞུང་ལམ་རྒྱ་སྐྱེད་དུ་བཏང་བ་སོགས་ཁྱོན་སྤྱི་ལེ་ ༩༤༤༠༠ ཡི་བགྲོད་ལམ་མཐུད་ཡོད་འདུག
རྒྱ་ནག་གཞུང་གིས་བོད་ལ་དབང་བསྒྱུར་བྱེད་ཐབས་སུ་ཕྱི་ལོ་ ༡༩༥༠ ཁྲོན་བོད་གཞུང་ལམ་ཟེར་བ་འཛུགས་སྐྲུན་བྱས་ཏེ། ཕྱི་ལོ་ ༡༩༥༤ ལོར་ལས་གཞི་དངོས་སུ་གྲུབ་པ་དང་། དེ་ནས་སི་ཁྲོན་ཞིང་ཆེན་གྱི་རྒྱལ་ས་ཁྲི་ཏུའུ་ནས་ལྷ་སའི་བར་གཞུང་ལམ་མཐུད་ལ། ཕྱི་ལོ་ ༡༩༥༤ ལོར་མཚོ་སྔོན་ནས་ལྷ་སའི་བར་གྱི་གཞུང་ལམ་ཡང་མཐུད་ཐུབ་པ་སོགས་བྱུང་བས། ཕྱི་ལོ་ ༡༩༥༩ ལོར་རྒྱ་དམག་གིས་བོད་ལ་བཙན་འཛུལ་བྱེད་པར་སྟབས་བདེ་བསྐྲུན་ཡོད།
གསར་འགོད་པ། སྐལ་བཟང་སྦྱིན་པ།
