ཕྱི་ལོ་ ༢༠༢༢ ནས་ ༢༠༢༥ བར་ལོ་བཞི་བསྟུད་མར་བོད་ནང་གི་ཚ་དྲོད་ཇེ་ཆེར་ཕྱིན་ནས་ད་སྔ་བར་བྱུང་མ་མྱོང་བའི་ཚ་དྲོད་ཆེ་ཤོས་སུ་གྱུར་ཡོད་འདུག
རྒྱ་ནག་དབུས་གནམ་གཤིས་བརྟག་དཔྱད་ཁང་གིས་གནས་ཚུལ་བསྒྲགས་པ་ལྟར་ན། ཕྱི་ལོ་ ༢༠༢༢ ནས་ ༢༠༢༥ བར་འདས་པའི་ལོ་ངོ་བཞི་བསྟུད་མར་བོད་ནང་གི་གནམ་གཤིས་ཚ་དྲོད་ཇེ་ཆེར་ཕྱིན་ཞིང་། ཕྱི་ལོ་ ༢༠༢༥ ལོར་བོད་ནང་གི་གནམ་གཤིས་དྲོད་ཚད་དེ་རྒྱུན་ལྡན་གྱི་ཚད་གཞི་ལས་ ༡ དང་ཚགས་ ༡༢ མཐོ་རུ་ཕྱིན་ཡོད་འདུག་ལ། དེ་ནི་ད་སྔ་བར་བོད་ནང་གི་གནམ་གཤིས་ཚ་དྲོད་ཀྱི་ཟིན་ཐོ་གསར་པ་ཞིག་ཆགས་ཡོད་འདུག
ཡང་རྒྱ་ནག་གཞུང་འབྲེལ་གྱི་གནས་ཚུལ་ནང་། འདས་ལོར་རྒྱ་ནག་གི་ཞིང་ཆེན་རིམ་པའི་ས་ཁུལ་ ༡༦ ནང་ཕྱི་ལོ་ ༡༩༦༡ གི་རྗེས་ནས་ཚ་བ་ཆེ་ཤོས་བྱུང་བ་དང་། རྒྱ་ནག་རྒྱལ་ཡོངས་སུ་ཆ་སྙོམས་ཉིན་ ༡༦ ལྷག་གི་རིང་ཚ་དྲོད་ ༣༥ ཡན་བྱུང་སྟེ་ལོ་རྒྱུས་ནང་ཚ་དྲོད་ཆེ་ཤོས་ཤིག་ཏུ་གྱུར་ཡོད། ཕྱི་ལོ་ ༢༠༢༥ ལོར་འཛམ་གླིང་ཁྱོན་ཡོངས་ཀྱི་ཚ་དྲོད་ཆ་སྙོམས་སུ་འཕར་ཏེ་འདས་ལོ་གསུམ་ནང་གི་ཚ་དྲོད་མཐོ་ཤོས་སུ་གྱུར་ཡོད་ཅིང་། དེས་གོ་ལའི་ཚ་དྲོད་འཕར་ཚད་ཇེ་མགྱོགས་སུ་འགྲོ་བཞིན་པ་བསྟན་ཡོད་སྐོར་སོགས་བརྗོད་འདུག
བོད་ནང་ལོ་རེ་བཞིན་གནམ་གཤིས་ཚ་དྲོད་ཇེ་ཆེ་རུ་འགྲོ་བཞིན་པ་ནི་ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ལ་བཙན་འཛུལ་བྱས་པ་ནས་བཟུང་། དེང་རབས་འཛུགས་སྐྲུན་དང་ཡར་རྒྱས་ལ་ཁ་གཡར་ནས། གཏེར་ཁ་སྔོག་འདོན་དང་རྩ་ཐང་བྱེ་བསྒྱུར། ཆུ་མཛོད་གསར་རྒྱག དེ་བཞིན། ཕུགས་ལམ་དང་མཁའ་ལམ། ལྕགས་ལམ། ཉི་གློག་དང་རླུང་གློག་སོགས་ས་གནས་བོད་མིར་འདོད་བློ་མེད་བཞིན་དུ་བཙན་གྱིས་བོད་ཀྱི་སྣོད་བཅུད་གཉིས་ལ་གཏོར་བརླག་གཏོང་བའི་འཛུགས་སྐྲུན་མང་པོ་བྱས་དང་བྱེད་བཞིན་ཡོད་པ་ལས་བྱུང་ཞིང་། དེའི་ཁྲོད་ཀྱི་གསར་ཤོས་ཤིག་ནི་འདས་ལོའི་ཕྱི་ཟླ་ ༡༡ ནང་རྒྱ་ནག་གཞུང་གིས་བོད་རྫ་ཆུ་ཁའི་ཀ་བཞིའི་གསེར་ཁོག་ལ་གཏོར་ཁ་སྔོག་འདོན་བྱས་པ་དང་འབྲེལ། ས་གནས་བོད་མི་ཚོས་ངོ་རྒོལ་བྱས་པར་བརྟེན་བོད་མི་ ༨༠ ལྷག་འཛིན་བཟུང་བཙོན་འཇུག་དང་ཕྱི་ནང་སོགས་ནས་འབྲེལ་བ་བྱེད་པར་དམ་དྲག་ཤུགས་ཆེན་བྱས་ཡོད།
འདས་ལོར་རྒྱ་ནག་གཞུང་གིས་བོད་ཀོང་པོ་ཉིང་ཁྲིའི་ཁུལ་ནས་རྒྱུག་བཞིན་པའི་ཡར་ཀླུང་གཙང་པོའི་ཐོག་ཏུ་ཆུ་མཛོད་གསར་རྒྱག་གི་གཞི་རྒྱ་ཆེ་བའི་ལས་གཞི་ཞིག་མགོ་བཙུགས་ཡོད་པ་དང་། དེ་ལ་བརྟེན་ནས་བོད་ནང་གི་བོད་མིའི་དཔལ་ཡོན་དང་འཚོ་གནས། རིག་གཞུང་། ཁོར་ཡུག་སོགས་ལ་གནོད་སྐྱོན་བཟོ་བཞིན་པ་མ་ཟད། རྒྱ་ནག་གི་ཆུ་མཛོད་གསར་རྒྱག་གི་ལས་གཞིའི་ཤུགས་རྐྱེན་འོག་བོད་མི་ས་ཡ་ ༡།༢ ཙམ་གནས་སྤོ་བྱེད་དགོས་པ་སོགས་བཅོས་ཐབས་མེད་པའི་གནོད་སྐྱོན་བཟོ་བཞིན་ཡོད་པ་མངོན་གསལ་ཆགས་ཡོད་ལ། གནད་དོན་དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་སོགས་ཀྱིས་རྒྱ་ནག་གཞུང་ལ་སྐྱོན་བརྗོད་བྱས་ཡོད།
གསར་འགོད་པ། སྐལ་བཟང་སྦྱིན་པ།
