བོད་དོན་ལས་འགུལ་བསྟི་གནས་ཁང་གིས། ཁེ་ན་ཌའི་སྲིད་བློན་མག་ཁཱར་ནེ་ལགས་ནས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐད་ཀར་བོད་དོན་དང་བོད་ནང་གི་བཅའ་སྡོད་སློབ་གྲྭའི་སྐོར་སོགས་གླེང་སློང་བྱེད་པའི་འབོད་སྐུལ་ཞུས་འདུག
དེ་རིང་ཕྱི་ཚེས་ ༡༣ ནས་ ༡༧ བར་ཁེ་ན་ཌའི་སྲིད་བློན་མག་ཁཱར་ནེ་ལགས་རྒྱ་ནག་ཏུ་གཞུང་འབྲེལ་སྐོར་སྐྱོད་གནང་གི་ཡོད་པ་དང་བསྟུན། སྲིད་བློན་མག་ཁཱར་ནེ་ལགས་ནས། རྒྱ་ནག་གཞུང་གིས་བོད་ཀྱི་བྱིས་པ་ས་ཡ་གཅིག་ཙམ་བཙན་དབང་གིས་ཁྱིམ་ཚང་དང་སྐད་ཡིག དེ་བཞིན་རིག་གཞུང་སོགས་ལས་ཁ་བྲལ་གཏོང་གི་ཡོད་པའི་གནད་དོན་གླེང་སློང་བྱས་ཏེ་བོད་ནང་གི་བཅའ་སྡོད་སློབ་གྲྭ་ཁག་གཏན་སྒོ་རྒྱག་པར་སྐུལ་མ་བྱེད་པའི་འབོད་སྐུལ་ཞུས་འདུག
དེ་འབྲེལ་བོད་དོན་ལས་འགུལ་བསྟི་གནས་ཁང་གིས། སྲིད་བློན་མག་ཁཱར་ནེ་ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐད་ཀར་བོད་ནང་གི་བཅའ་སྡོད་སློབ་གྲྭའི་ལམ་ལུགས་སྐོར་ལ་གླེང་སློང་བྱེད་དགོས་པའི་འབོད་སྐུལ་ཞུ་བཞིན་ཡོད། ཅེས་དང་། བོད་དོན་ལས་འགུལ་བསྟི་གནས་ཁང་གི་འགན་འཛིན་ལྷ་སྒྲོན་བཀྲས་མཐོང་ལགས་ཀྱིས། ཁེ་ན་ཌར་བྱིས་པ་རྣམས་རང་གི་ཁྱིམ་ཚང་དང་སྐད་ཡིག རིག་གཞུང་སོགས་ལས་བཙན་གྱིས་ཁ་བྲལ་བཏང་ན་གནོད་སྐྱོན་ག་འདྲ་ཡོང་གི་ཡོད་པའི་ཉམས་མྱོང་ཡོད། ཁ་ན་ཌ་ནི་བཅའ་སྡོད་སློབ་གྲྭའི་ལམ་ལུགས་ཀྱིས་ཤུགས་རྐྱེན་ཐེབས་ནས་ད་ལྟའང་གདོང་ལེན་བྱེད་བཞིན་པའི་རྒྱལ་ཁབ་ཅིག་ཡིན་སྟབས། དེ་འདྲ་བའི་བྱ་སྤྱོད་གང་དུ་བྱུང་ཡང་ངོ་རྒོལ་བྱ་རྒྱུའི་བཟང་སྤྱོད་ཀྱི་འགན་འཁྲི་ཡོད། ཅེས་བརྗོད་འདུག
བོད་དོན་ལས་འགུལ་བསྟི་གནས་ཁང་གིས་སྲིད་བློན་མག་ཁཱར་ནེ་ལགས་སུ་འབོད་སྐུལ་དོན་ཚན་གསུམ་ཞུས་ཡོད་པའི་ཁྲོད། གཅིག་བོད་ནང་གི་བཅའ་སྡོད་སློབ་གྲྭའི་ལམ་ལུགས་དེ་ཐད་ཀར་ཞི་ཅིན་ཕིན་ལ་གླེང་སློང་བྱེད་དགོས། ཡོངས་གྲགས་ཀྱི་ཐོག་ནས་རྒྱ་ནག་གཞུང་ལ་བོད་ནང་གི་བཅའ་སྡོད་སློབ་གྲྭའི་ལམ་ལུགས་མེད་པ་བཟོ་དགོས་པའི་འབོད་སྐུལ་བྱེད་དགོས་པ་དང་གཉིས། གསུམ་རྒྱ་ནག་ལ་བོད་ས་ཁུལ་ཡོངས་སུ་རྒྱལ་སྤྱིའི་ལྟ་ཞིབ་པ་དང་འགྲོ་བ་མིའི་ཐོབ་ཐང་གི་ཆེད་མཁས་པ་ཚོར་ཆ་རྐྱེན་མེད་པར་རང་དབང་ཞིབ་འཇུག་བྱེད་ཆོག་པའི་ཐོབ་ཐང་སྤྲོད་དགོས་པའི་གནོན་ཤུགས་སྤྲོད་དགོས་པ་བཅས་རེད་འདུག
ཁེ་ན་ཌའི་སྲིད་བློན་མག་ཁཱར་ནེ་ལགས་ཀྱི་ཉིན་ལྔའི་རིང་གི་སྐོར་སྐྱོད་ཀྱི་ཁྲོད་དུ། རྒྱ་ནག་གི་དཔོན་རིགས་ཚོ་དང་ལྷན་དུ་གཙོ་བོ་ཚོང་འབྲེལ་དང་། ནུས་ཤུགས། ཞིང་ལས་དང་རྒྱལ་སྤྱིའི་བདེ་འཇགས་སོགས་ཀྱི་ཐད་ནས་གླེང་སློང་བྱ་རྒྱུ་ཡིན་ཞིང་། དམིགས་བསལ་ད་ལྟའི་ཆར་ཨ་རིའི་སྲིད་འཛིན་ཊོམ་ཕུའི་མགོ་ཁྲིད་ཀྱི་གནས་སྟངས་འོག བྱང་ཨ་མི་རི་ཁའི་རྒྱལ་ཁབ་ཁག་ཏུ་ཚོང་འབྲེལ་གྱི་ཁ་ཕྱོགས་ལ་བརྟན་ཆ་མེད་པའི་དཀའ་ངལ་འཕྲད་ཀྱི་ཡོད་པས། ད་ལན་རྒྱ་ནག་ཏུ་བསྐྱོད་དེ་རྒྱལ་ཁབ་གཉིས་བར་གྱི་ཚོང་འབྲེལ་གོང་འཕེལ་དུ་གཏོང་བར་དམིགས་ཡོད་འདུག
སྤྱིར་ཁེ་ན་ཌ་དང་རྒྱ་ནག་བར་གྱི་འབྲེལ་ལམ་དེ་ཕྱི་ལོ་ ༡༩༤༢ ལོར་རྒྱ་ནག་ཏུ་ཁེ་ན་ཌས་གཞུང་ཚབ་བསྐོ་གཞག་བྱས་པ་ནས་མགོ་བརྩམས་ཤིང་། ཕྱི་ལོ་ ༡༩༧༠ ལོར་ཁེ་ན་ཌས་རྒྱ་ནག་མི་དམངས་སྤྱི་འཐུས་རྒྱལ་ཁབ་ལ་ངོས་འཛིན་བྱས། ཕྱི་ལོ་ ༢༠༠༦ ལོར་ཁེ་ན་ཌའི་སྲིད་བློན་ཇཱོ་སི་ཧྥི་ཧར་པར་ (Stephen Joseph Harper) ལགས་ཀྱིས། ཁེ་ན་ཌའི་ཕྱི་སྲིད་དེ་དམངས་གཙོ་དང་འགྲོ་བ་མིའི་ཐོབ་ཐང་གཙིགས་སུ་བཟུང་བའི་ཁ་ཕྱོགས་གཙོ་འདོན་བྱས་ཏེ། ༸གོང་ས་རྒྱལ་བ་རིན་པོ་ཆེ་མཆོག་ལ་ཁེ་ན་ཌའི་མི་སེར་གྱི་ཆེ་བསྟོད་ཕུལ་བ་དང་། ཐའེ་ཝན་ལ་འབྲེལ་ལམ་བཟུང་སྟེ་རྒྱ་ནག་གཞུང་གི་འགྲོ་བ་མིའི་ཐོབ་ཐང་རྡོག་རོལ་བཏང་བར་སྐྱོན་བརྗོད་བྱས་པ་མ་ཟད། ཕྱི་ལོ་ ༢༠༠༨ ལོར་རྒྱ་ནག་གི་ཨོ་རྩལ་འགྲན་ཚོགས་སྟེང་མཉམ་ཞུགས་བྱས་མེད་པ་སོགས་བྱུང་ཡོད།
ཕྱི་ལོ་ ༢༠༡༨ ལོར་ཨ་རིའི་འབོད་སྐུལ་འོག་ཁེ་ན་ཌས་རྒྱ་ནག་གི་ཧཱ་ཝེ་འཕྲུལ་རིགས་བཟོ་ཚོང་ཁང་གི་ནོར་སྲིད་དོ་དམ་པ་མེན་ཝན་ཀྲོ་འཛིན་བཟུང་བྱས་པ་དང་རྒྱ་ནག་གིས་ཁེ་ན་ཌའི་མི་སེར་མེ་ཁེལ་དང་ཀོལ་རེགྷ་གཉིས་འཛིན་བཟུང་བྱས་ཏེ། ཡུལ་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན། ཡང་ཚོང་འབྲེལ་གྱི་ཐད་ནས་ཕྱི་ལོ་ ༢༠༢༤ ལོར་རྒྱ་ནག་ནི་ཁེ་ན་ཌའི་ནང་འདྲེན་དང་ཕྱིར་ཚོང་གི་ཚོང་ཤག་ཆེ་ཤོས་ཨང་གཉིས་པ་ཡིན་ཡང་། ལོ་དེའི་ཕྱི་ཟླ་ ༡༠ ནང་རྒྱལ་ཁབ་གཉིས་བར་ཕན་ཚུན་གྱི་དངོས་ཟོག་ཐོག་ཁྲལ་འགེལ་རེས་བྱས་ཏེ་ད་བར་འབྲེལ་ལམ་འགོག་ནས་བསྡད་ཡོད་པ་དང་། ཁེ་ན་ཌའི་སྲིད་བློན་མག་ཁཱར་ནེ་ལགས་ཀྱིས་རྒྱ་ནག་ལ་རྒྱལ་ཁབ་གཉིས་བར་འབྲེལ་ལམ་བསྐྱར་འགྲིག་གིས་མདུན་སྐྱོད་བྱེད་པའི་འདུན་པ་ཡོད་སྐོར་བརྗོད་འདུག་ལ། དབྱེ་ཞིབ་པ་ཚོས་ཀྱང་། ཐེངས་འདིར་རྒྱལ་ཁབ་གཉིས་ཀྱི་མགོ་ཁྲིད་ཐུག་འཕྲད་ཀྱིས་ཐུན་མོང་ཁེ་བཟང་ལྡན་པའི་ཚོང་འབྲེལ་སྔར་ལྷག་བྱེད་པར་གྲོས་མོལ་བྱ་རྒྱུ་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
