རྒྱ་ནག་གཞུང་གིས་བོད་མི་རྣམས་ལ་བཙན་གྱིས་ངལ་རྩོལ་བྱེད་དུ་འཇུག་གི་ཡོད་པའི་སྙན་ཐོ་བཏོན།

མཉམ་འབྲེལ་རྒྱལ་ཚོགས་ཀྱིས་རྒྱ་ནག་གཞུང་གིས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ་གྲངས་ཉུང་མི་རིགས་རྣམས་ལ་བཙན་གྱིས་བྲན་གཡོག་བཞིན་ངལ་རྩོལ་བྱེད་དུ་འཇུག་གིན་པར་སྐྱོན་བརྗོད་གནང་འདུག

ཟླ་འདིའི་ཕྱི་ཚེས་ ༢༢ ཉིན་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གཞུང་གིས་བོད་དང་ཤར་ཏུར་ཀི་སི་ཐན། ཀར་ཛཱག་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ། གྲངས་ཉུང་མི་རིགས་རྣམས་ལ་བྲན་གཡོག་བཞིན་ངལ་རྩོལ་བཙན་གྱིས་བྱེད་དུ་འཇུག་གི་ཡོད་པའི་སྙན་ཐོ་ཞིག་བཏོན་ཡོད་པའི་ནང་། འགྲོ་བ་མིའི་ཐོབ་ཐང་ཆེད་མཁས་པ་རྣམས་ཀྱིས་རྒྱ་ནག་གཞུང་གིས་མི་ཆོས་ལས་འདས་པའི་བྱ་སྤྱོད་ཐད་སེམས་འཚབ་དང་། རྒྱ་ནག་གཞུང་གྱིས་བཙན་འཛུལ་བྱས་པའི་གྲངས་ཉུང་མི་རིགས་རྣམས་ཀྱི་གཞི་རྩའི་ཁེ་ཕན་སྲུང་སྐྱོབ་དགོས་པའི་རེ་སྐུལ་གནང་འདུག

གནད་དོན་དེ་དང་འབྲེལ་ནས་རྒྱལ་ཚོགས་ཀྱི་ཆེད་མཁས་པ་རྣམས་ཀྱིས། རྒྱ་ནག་གཞུང་གིས་བཙན་ཤེད་ཀྱིས་ངལ་རྩོལ་བྱེད་དུ་བཅུག་པའི་གནས་ཚུལ་རྒྱུན་མཐུད་ནས་འབྱུང་བཞིན་ཡོད་པ་དང་། དེ་ནི་ཞིང་ཆེན་མང་པོའི་ནང་གི་མི་རིགས་གྲངས་ཉུང་བ་ཚོར་ཁྱབ་ཡོད། གནས་ཚུལ་མང་པོའི་ནང་དུ་བཙན་གྱིས་འགྲོ་བ་མིའི་རིགས་ལ་གདུག་རྩུབ་གཏོང་མུས་ཡིན་པ་རེད། ཅེས་བརྗོད་འདུག

རྒྱལ་ཚོགས་ཀྱི་ཆེད་མཁས་པས་བཏོན་པའི་སྙན་ཐོ་ལྟར་ན། ངལ་རྩོལ་བསྒྱུར་བཀོད་ཁང་ནི་རྒྱ་ནག་གཞུང་གིས་དབུལ་ཕོངས་སེལ་ཐབས་སུ་ངལ་རྩོལ་གནས་སྤོར་(poverty alleviation through labour transfe) གྱི་ལས་གཞི་བརྒྱུད་ནས་བྱུང་བ་ཡིན་ཞིང་། དེས་ཤར་ཏུར་ཀི་སི་ཐན་དང་། ས་ཁུལ་གཞན་དག་ཏུ་ལས་ཀར་བཙན་སྐུལ་བྱས་ཡོད་པ་མ་ཟད། ཁྲིམས་སྒྲིག་རང་བཞིན་གྱི་ཐོག་ནས་ལྟ་ཞིབ་དང་། ལྟ་རྟོག བཙན་གནོན་བཅས་བྱས་ཡོད་པ་དང་། འཇིགས་སྐུལ་དང་དབང་ཡོད་ཀྱིས་བཀག་ཉར་བྱས་ཏེ་ལས་ཀ་དེ་དག་ལ་ངོས་ལེན་དང་བརྗེ་སྒྱུར་བྱ་རྒྱུའི་གདམ་ག་མེད། ཤར་ཏུར་ཀི་སི་ཐན་ནང་ལོ་ལྔའི་འཆར་གཞི་ (༢༠༢༡ ནས་ ༢༠༢༥ བར་) ཡིས་ངལ་རྩོལ་གནས་སྤོར་བ་ས་ཡ་ ༡༣། ༧༥ ལྷག་ཙམ་འཆར་འགོད་བྱས་ཡོད་ཅིང་། དོན་དངོས་སུ་དེ་ལས་མང་བ་ཡོད། ཅེས་གསལ་འདུག

ཡང་སྙན་ཐོའི་ནང་། བོད་མི་རྣམས་ཀྱང་སྦྱོང་བརྡར་དང་ངལ་རྩོལ་གནས་སྤོར་ལས་གཞི་( Training and Labour Transfer Action Plan) ལྟ་བུའི་ལས་གཞི་འདྲ་མཚུངས་བརྒྱུད་ནས་བཙན་བཀོལ་ངལ་རྩོལ་གྱི་ལས་ལ་ཞུགས་འཇུག་གི་ཡོད་ཅིང་། དེའི་ནང་དུ་སྦྱོང་བརྡར་དང་གྲོང་གསེབ་ཀྱི་ངལ་རྩོལ་བ་(rural surplus labourers) རྣམས་བཙན་གྱིས་གནས་སྤོར་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་དམག་དོན་རང་བཞིན་གྱི་ལས་རིགས་སྦྱོང་བརྡར་ལྟ་བུའི་བཙན་དབང་གི་སྲིད་ཇུས་འོག་ནས་བོད་མི་རྣམས་ངལ་རྩོལ་ལ་ཞུགས་འཇུག་གི་ཡོད་ཅིང་། ཕྱི་ལོ་ ༢༠༢༤ ལོར་ངལ་རྩོལ་གནས་སྤོར་གྱི་ལས་གཞིའི་ཁོངས་བོད་མི་འབུམ་དྲུག་དང་ཁྲི་ལྔ་ལྷག་ཚུད་ཡོད་པའི་ཚོད་དཔག་བྱེད་ཀྱི་ཡོད། ཅེས་དང་། བོད་མི་རྣམས་གྲོང་ཚོ་ཡོངས་རྫོགས་གནས་སྤོ་(whole-village relocation) ལས་གཞི་བརྒྱུད་ནས་ཀྱང་གནས་སྤོ་བྱེད་འཇུག་གི་ཡོད་པའི་ཁྲོད། ཁྱིམ་ཚང་ཁག་ཅིག་ལ་ཡང་ཡང་ཕྱིན་ཏེ་ཉེས་ཆད་བཅད་པ་དང་། སྐྱོན་བརྗོད་བྱ་མི་ཆོག་ལུགས་ཀྱི་བཙན་བཀའ་བཏང་བ་དང་།  ཁྱིམ་ཚང་ཁག་ལ་སྤྲོད་མུས་ཡིན་པའི་རོགས་སྐྱོབ་ཟེར་བ་ཡང་གཅད་རྒྱུ་ཡིན་ལུགས་ཀྱི་འཇིགས་སྐུལ་བྱེད་ཀྱི་ཡོད། ཅེས་གསལ་འདུག

རྒྱ་ནག་གཞུང་གིས་ཕྱི་ལོ་ ༢༠༠༠ ནས་༢༠༢༥ བར་དུ་བོད་ཀྱི་འབྲོག་པ་མི་གྲངས་ས་ཡ་༣།༣༦ ཙམ་ལ་བཙན་གྱིས་གནས་སྤོར་དང་། སྡོད་ཁང་གསར་སྐྲུན་དགོས་ལུགས་བཤད་ནས་གནས་སྤོར།  བཙན་གྱིས་རང་གི་ཕ་མེས་ཡང་མེས་ནས་བརྒྱུད་ནས་ཡོང་བའི་རྩྭ་ཐང་བཞག་ནས་ས་གནས་གཞན་དང་གཞན་དུ་བཙན་གྱིས་འགྲོ་བཅུག་ཡོད་པ་མ་ཟད། རྒྱ་ནག་གཞུང་གིས་ངལ་རྩོལ་ཁང་སོགས་སུ་བོད་མི་དང་ཡུ་གུར་བ་རྣམས་ཀྱིས་རང་རང་གི་སྐད་ཡིག་བཀོལ་སྤྱོད་དང་། ཆོས་ལུགས་དད་མོས་ཀྱི་རང་དབང་ལ་རྩིས་མེད་རྡོག་རོལ་གཏོང་མུས་ཡིན་པའི་ཁར། གཞི་རྩའི་ཐོབ་ཐང་ལའང་བརྩི་འཇོག་བྱེད་ཀྱིན་མེད་སྟབས།  རྒྱལ་སྤྱིའི་ཚོང་རྫས་ཁྲོད་རྒྱ་ནག་གཞུང་གིས་ངལ་རྩོལ་བསྒྱུར་བཀོད་ཁང་སོགས་ནས་བཟོ་བསྐྲུན་བྱས་པའི་ཅ་དངོས་རྣམས་ཚོང་འགྲེམས་མཚམས་འཇོག་དགོས་པའི་རེ་སྐུལ་ཡང་ཞུས་འདུག

རྒྱ་ནག་གཞུང་གིས་ཡུ་གུར་གཙོ་བོར་གྱུར་བའི་གྲངས་ཉུང་མི་རིགས་ཀྱི་ས་གནས་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ། གྲངས་ཉུང་མི་རིགས་རྣམས་ལ་དྲག་གནོན་ཤུགས་ཆེན་བྱེད་ཀྱི་ཡོད་པ་ལྟར། ཕྱི་ལོ་ ༢༠༢༢ ཟླ་ ༡ ནང་ཨ་རིས་རྒྱ་ནག་གཞུང་གི་ངལ་རྩོལ་བསྒྱུར་བཀོད་ཀྱི་ལས་གཞིའི་འོག་ནས་ཕྱིར་ཚོང་བྱས་པའི་ལྡུམ་སྒོང་དམར་པོ་ (tomato) དང་ཤིན་ཅང་ནས་བཟོ་སྐྲུན་བྱས་པའི་སྲིན་བལ་ ( cotton )གྱི་ཐོན་རྫས་ཉོ་མཚམས་བཞག་ཡོད་འདུག་ལ། ཕྱི་ལོ་ ༢༠༢༢ ལོར་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་སྐུ་ཚབ་སྐུ་ཞབས་ཀྲོ་མོ་ཡ་( Tomoya  Obakaata ) ལགས་ཀྱིས། རྒྱ་ནག་གཞུང་གིས་བོད་དང་ཡུ་གུར། ཀར་ཛཱག་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་ངལ་རྩོལ་བསྒྱུར་བཀོད་ཁང་སོགས་བཙུགས་ཏེ། གྲངས་ཉུང་མི་རིགས་རྣམས་ལ་བྲན་གཡོག་བཞིན་ངལ་རྩོལ་བཙན་གྱིས་བྱེད་དུ་འཇུག་གི་ཡོད་སྐོར་ཤོག་ངོས་ ༢༠ ཅན་གྱི་སྙན་ཐོ་ཞིག་འདོན་སྤེལ་གནང་སྟེ། རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་བོད་ཀྱི་རོང་འབྲོག་མང་ཚོགས་རྣམས་བཙན་གྱིས་གནས་སྤོར་བྱེད་དུ་བཅུག་སྟེ། ལག་རྩལ་སོགས་ཞན་པའི་རོང་འབྲོག་མང་ཚོགས་ལ་གླ་ཆ་ཉུང་ཉུང་རེ་སྤྲད་དེ། ངལ་རྩོལ་ཁང་དུ་འགྲོ་འདུག་སྤྱོད་གསུམ་ལ་ལྟ་རྟོག་ནན་པོ་བྱས་ཏེ་བྲན་གཡོག་བཞིན་ངལ་རྩོལ་བྱེད་དུ་འཇུག་གི་ཡོད་པར་སྐྱོན་བརྗོད་བྱས་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།