དེ་རིང་ཕྱི་ཚེས་ ༩ ཉིན་རྒྱ་གར་ལྷོ་ཕྱོགས་ཀྱི་མཛད་འཕྲིན་རྣམས་ལེགས་པར་གྲུབ་སྟེ་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལིར་ཞབས་སོར་བདེ་བར་འཁོད་ཡོད་པ་དང་ཟླ་འདིའི་ཕྱི་ཚེས་ ༡༣ ཉིན་བཞུགས་སྒར་དུ་ཕེབས་འབྱོར་གནང་འཆར་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་རྒྱལ་ས་ལྡི་ལིར་ཞབས་སོར་བདེ་བར་བཀོད། ལྡི་ལི་དོན་གཅོད་ཀྱི་སྐུ་པར། ༢༠༢༦།༠༢།༠༩
འདས་ལོའི་ཕྱི་ཟླ་ ༡༢ ཚེས་ ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་འབྲས་སྤུངས་སྒོ་མང་གྲྭ་ཚང་དུ་ཉིན་གྲངས་ ༥༩ རིང་བཞུགས་ཏེ་ས་གནས་སུ་མཛད་འཕྲིན་རྒྱ་ཆེན་བསྐྱངས་ཡོད་པ་དང་། དེ་རིང་སྔ་དྲོར་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་ཞབས་སོར་བདེ་བར་འཁོད་ཡོད་པ་དང་། ཟླ་གཉིས་ཙམ་གྱི་རིང་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་ཡུལ་མི་ ༢༥༨༥ དང་། ཕྱི་རྒྱལ་བ་ ༡༤༨༠། བོད་དང་ཧི་མ་ལ་ཡའི་རྒྱུད་ཀྱི་དད་ལྡན་ ༡༢༡༩༣ བཅས་ཁྱོན་དད་ལྡན་དོན་གཉེར་བ་མི་གྲངས་ ༡༦༢༥༨ ལྷག་ལ་མཇལ་ཁ་བསྩལ་འདུག གཞན་ཡང་། ཕྱི་ཟླ་ ༡༢ ཚེས་ ༢༤ ཉིན་༧རྒྱལ་བ་སྐུ་ཕྲེང་གཉིས་པ་དགེ་འདུན་གྲུབ་པ་དང་། སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོ་མཆོག སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་བཅས་ཀྱིས་འབྲས་སྤུངས་ཁྲི་པ་མཛད་པའི་ལོ་རྒྱུས་གཞིར་བཟུང་སྐུ་ཕྲེང་བཅུ་བཞི་པ་མཆོག་འབྲས་སྤུངས་ཁྲི་པར་མངའ་གསོལ་མཛད་ཡོད་པ་དང་། དེ་བཞིན་འབྲས་སྤུངས་སྒོ་མང་གི་མཁན་པོ་བླ་སྤྲུལ་རྣམ་པ་སྤྱི་མོས་ཐོག་དཔལ་ལྡན་འབྲས་སྤུངས་གྲྭ་ཚང་གི་༧གོང་ས་རྒྱལ་བ་རིན་པོ་ཆེ་མཆོག་གི་ཕོ་བྲང་དང་ཆོས་ར་གསར་པ་བཅས་དགའ་ལྡན་ཕོ་བྲང་ལ་ཕུལ་ཡོད་འདུག
གནས་ཚུལ་འདིའི་ཐད་འབྲས་སྤུངས་སྒོ་མང་མཁན་རིན་པོ་ཆེ་འཇིགས་མེད་རྒྱ་མཚོ་མཆོག་གིས་འདི་ག་དུས་བབ་ཀྱི་གསར་འགོད་པར། ༧གོང་ས་རྒྱལ་བ་རིན་པོ་ཆེ་མཆོག་ནི་དཔལ་ལྡན་ཕོ་བྲང་གི་བླ་མ་ཞིག་ཡིན་པ་ག་དུས་ཡིན་ཡང་གསུང་གི་ཡོད་རེད། དེའི་ནང་ནས་ད་ལོར་འབྲས་སྤུངས་ཁྲི་པར་བཞུགས་པ་རེད། དེ་འདྲ་ཡིན་དུས་འབྲསསྤུངས་དགོན་པའི་དགོན་བདག་ཟེར་ནའང་༧རྒྱལ་བ་རིན་པོ་ཆེ་མཆོག་ཡིན་ཞིང་། ལྷག་པར་༧མགོན་པོ་གང་ཉིད་ནས་སྒོ་མང་གྲྭ་ཚང་གི་བསམ་བློ་ཁང་ཚན་ཡིན་ཞེས་སྐབས་སྐབས་ལ་མང་པོ་གསུང་གི་འདུག་གཱ། དེ་འདྲ་ཡིན་དུས། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་སྒོ་མང་གྲྭ་ཚང་གི་མཚན་ཐོ་དང་པོར་བཞུགས་རོགས་ཞེས་སྙན་གསེང་ཞུ་སྐབས། འགྲིག་གི་རེད་གསུངས་ནས་བཞུགས་པ་རེད། དེ་འདྲ་ཡིན་ཙང་༧གོང་ས་རྒྱལ་བ་རིན་པོ་ཆེ་མཆོག་འབྲས་སྤུངས་ཀྱི་བླ་མ་དང་། འབྲས་སྤུངས་ཀྱི་ཁྲི་པ། སྒོ་མང་གྲྭ་ཚང་གི་བླ་མ་ཆགས་ཡོད་རེད་ཟེར་ནའང་མི་ཆོག་པ་ཡོད་མ་རེད། དགའ་ལྡན་ཕོ་བྲང་ཡོད་རེད་དེ། ད་ལྟ་སྐུ་འཁོར་རྣམས་དེའི་ནང་བཞུགས་ཐབས་མེད་པ་ཞིག་ཆགས་ཡོད་རེད། ཁོང་བཞུགས་སའི་བླ་བྲང་ཞིག་འབྲས་སྤུངས་ལ་དགོས་ནའང་། ད་གཅིག་གསར་དུ་བརྒྱག་དགོས་ཟེར་ན། བརྒྱག་སའི་ས་ཆ་སོགས་གང་གི་ཆ་ནས་དཀའ་ལས་ཁག་པོ་ཆགས་ཀྱི་འདུག་ཀྱང་། ད་ལོ་བཞིན་སྐུ་ལྷོད་ལྷོད་གནང་ནས་བཞུགས་ས་ཞིག་དགོས་ཙང་། གང་ཡོད་པ་དེ་ཕུལ་ཐུབ་པ་ཞིག་ཆགས་ཀྱི་རེད། ད་ལྟ་རྒྱ་གར་གྱི་ས་གནས་གང་དུ་བལྟས་ཀྱང་། སྐུ་འཁོར་ལྷོད་ལྷོད་བཞུགས་ས། ཡོངས་སུ་རྫོགས་པ་ཚང་ས། འཁོད་ཡངས་པོ་ཡོད་ས། ཁུ་སིམ་སིམ་སོགས་འདི་ལས་ལྷག་ཅིག་མེད་པ་དྲུང་ཆེ་ཚང་མས་གསུང་གི་འདུག་པས། དགའ་ལྡན་ཕོ་བྲང་གི་སྐུ་འཁོར་ཚང་མ་འབྲས་སྤུངས་ན་བཞུགས་ས་ཞིག་འབྲས་སྤུངས་ལ་ཡོད་དགོས་པ་ཞིག་ཆགས་ཀྱི་ཡོད་ཙང་། དེ་ཡར་ལ་ཕུལ་བ་ཡིན་ན་དགའ་ལྡན་ཕོ་བྲང་ལ་དངོས་གནས་དྲང་གནས་ཐུགས་ཕན་དང་། སྟབས་བདེ་ཞིག་ཆགས་ཀྱི་ཡོད་རེད། ཅེས་གསུངས་སོང་།
དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་མོན་གྷོ་འདོད་རྒུ་གླིང་ནས་ཕེབས་ཟིན་རྗེས། འདི་ག་བོད་ཀྱི་དུས་བབ་གསར་ཁང་ལ་ས་གནས་བོད་མི་ཞིག་གིས། ༧གོང་ས་རྒྱལ་བ་རིན་པོ་ཆེ་མཆོག་ཟླ་བ་གཉིས་ཙམ་ཞིག་འདིར་བཞུགས་པའི་རིང་དཔེ་མི་སྲིད་པའི་སེམས་པ་སྐྱིད་པོ་དང་། ད་ལོ་ནང་བཞིན་སྐྱིད་པོ་ཞིག་ཡོང་མ་མྱོང་། ཁོང་སྐུ་ཚེ་ཁྲི་ལོར་བརྟན་པའི་སྨོན་ལམ་ཡོད། མ་འོངས་པར་སླར་ཡང་འདིར་ཆིབས་བསྒྱུར་གནང་ཐུབ་པའི་སྨོན་ལམ་ཡོད། ཅེས་དང་། ཡང་བོད་མི་ཞིག་གིས། ད་ལོར་༧གོང་ས་རྒྱལ་བ་རིན་པོ་ཆེ་མཆོག་དུས་ཚོད་དཔེ་མང་པོ་ཞིག་འདིར་བཞུགས་ནས། དཔེ་མི་སྲིད་པའི་བྱིན་རླབས་ཆེན་པོ་བྱུང་། མ་འོངས་པར་བོད་གཞིས་བྱེས་མཉམ་འཛོམས་བྱུང་ནས། གཟིམ་ཆུང་པོ་ཏ་ལར་སྐུ་བཞུགས་མཛད་ནས། མི་མང་རྣམས་གཞིས་བྱེས་ལྷན་འཛོམས་ཡོད་པའི་སྨོན་ལམ་ཞུ། ཞེས་བརྗོད་བྱུང་།
དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ཕྱི་ཚེས་ ༡༣ བར་རྒྱ་གར་གྱི་རྒྱལ་ས་ལྡི་ལིར་བཞུགས་གནང་རྒྱུ་དང་། དགའ་ལྡན་ཕོ་བྲང་གི་དྲ་རྒྱར་གསལ་བའི་མཛད་འཆར་ལྟར་ན། ཕྱི་ལོ་ ༢༠༢༦ ལོའི་ཟླ་ ༢ ཚེས་ ༢༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་དུ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་ཚོགས་པ་གཉིས་ཀྱིས་ཚེ་དཔག་མེད་དྭགས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
