དེ་རིང་ཕྱི་ཚེས་ ༩ ནས་ ༡༠ བར་ཉིན་གྲངས་གཉིས་ཀྱི་རིང་ཕྱི་ལོ་ ༢༠༢༦ ལོའི་ཇི་ནི་ཝའི་གླེང་སྟེགས་ (Geneva Forum 2026) སྟེང་དྲག་གནོན་དང་གདོང་ལེན། རྒྱ་ནག་གི་བཙན་གནོན་འོག་ཡོད་པའི་བོད་སོགས་ས་ཁུལ་ཁག་གི་འགྲོ་བ་མིའི་ཐོབ་ཐང་གི་གནས་བབ་ཅེས་པའི་བརྗོད་གཞིའི་ཐོག་ཚོགས་འདུ་དབུ་འཛུགས་གནང་སོང་།
སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། འཇར་མན་གྱི་མངའ་སྡེའི་གྲོས་ཚོགས་ཀྱི་དྲུང་ཆེ་ (Michael Brand)། ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་པ་ཝལ་ (Pavel Fischer)ལགས། སུད་སིའི་རྒྱལ་ཡོངས་ལྷན་ཚོགས་ (National Council) ཀྱི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་ཚོགས་པའི་ཚོགས་མི་ལོ་རན་སི་ (Lawrence Fehlmann Rielle) ལགས། ཇི་ནི་ཝའི་གྲོས་ཚོགས་ཀྱི་ཚོགས་གཞོན་དྷི་ལ་ར་ (Dilara Bayrak) ལགས། མེག་སི་ཁོའི་གྲོས་ཚོགས་འཐུས་མི་པ་ལོ་མ་ (Paloma Dominguez Ugarte)། ཇི་ནི་ཝའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། བོད་དོན་རྒྱབ་སྐྱོར་ཚོགས་པའི་ཚོགས་མི་སོགས་མཉམ་ཞུགས་གནང་འདུག
གླེང་སྟེགས་ཐོག་སྲིད་སྐྱོང་སྤེན་པ་ཚེ་རིང་མཆོག་གིས། ངས་དེབ་མཐུག་པོ་ཞིག་འཁྱེར་ཡོད་པ་ཁྱེད་ཚོ་ཡ་མཚན་སྐྱེས་ཀྱི་ཡོད་ངེས་རེད། འདི་ནི་བོད་ཀྱི་ལོ་རྒྱུས་ཀྱི་དེབ་རེད། དེ་རིང་འདིར་སུད་སི་དང་མེ་སི་ཁོ་སོགས་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་སོགས་མང་པོ་ཞིག་ཕེབས་པར་དགའ་བསུ་ཞུ་ཡི་ཡོད། ཐའེ་ཝན་གྲོས་ཚོགས་འཐུས་མིར་ཐེངས་དང་པོ་ཐུག་པ་ཡིན། ཁྱེད་རྣམ་པ་འདིར་ཕེབས་པ་ནི་བོད་
ཡང་སྲིད་སྐྱོང་སྤེན་པ་ཚེ་རིང་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་ནས་བཀའ་སློབ་ལམ་སྟོན་གནང་བ་གཞིར་བཟུང་། བོད་རྒྱའི་དཀའ་རྙོག་སེལ་ཐབས་སུ་དབུ་མའི་ལམ་གྱི་སྲིད་ཇུས་ཐོག་ཤར་སྐྱོད་བྱེད་བཞིན་ཡོད། ཨ་རིའི་གཞུང་གིས་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབ་གནང་ཡོད་ཅིང་། དེའི་ནང་བོད་རྒྱའི་དཀའ་རྙོག་སེལ་མེད་པ་དང་། རྒྱལ་སྤྱིའི་ཁྲིམས་ལུགས་གཞིར་བཟུང་བོད་རྒྱའི་དཀའ་རྙོག་སེལ་དགོས་པ་དང་། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་དགོས་པ། རྒྱ་ནག་གིས་བོད་ཀྱི་ལོ་རྒྱུས་འཁྱོག་བརྗོད་བྱེད་བཞིན་པར་གདོང་ལེན་བྱེད་དགོས་པ། ༸གོང་ས་མཆོག་གི་སྐུའི་ཡང་སྲིད་ངོས་འཛིན་ཞུ་རྒྱུའི་ཐད་ཨ་རིའི་གཞུང་འབྲེལ་སྲིད་བྱུས་གཏན་འབེབ་གནང་སྟེ། ༧གོང་ས་མཆོག་གི་ཡང་སྲིད་ནི་ནང་པའི་རྗེས་འབྲང་པ་དང་༸གོང་ས་མཆོག་སྐུ་སྒེར་གྱི་ལམ་སྟོན་འོག་ནས་འགྲོ་དགོས་པ་ལས་སྲིད་གཞུང་གང་གིས་ཀྱང་ཐེ་གཏོགས་བྱ་མི་ཆོག་པ་དང་། མ་འོངས་པའི་༸གོང་ས་མཆོག་གི་ཡང་སྲིད་ཐད་ཐེ་གཏོགས་བྱེད་མཁན་རྒྱ་ནག་གི་མགོ་ཁྲིད་ཚོར་ཉེས་ཆད་གཅོད་རྒྱུ་ཡིན་སྐོར་སོགས་གསལ་ཡོད་པ་རེད། འདས་ལོའི་ཕྱི་ཟླ་ ༧ ཚེས་ ༢ ཉིན་༸གོང་ས་རྒྱལ་བ་རིན་པོ་ཆེ་མཆོག་ནས་༸རྒྱལ་དབང་སྐུ་ཕྲེང་རྒྱུན་མཐུད་ནས་ཕེབས་ངེས་ཡིན་པའི་ཡོངས་ཁྱབ་གསལ་བསྒྲགས་མཛད་པ་དང་། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང། ཁོང་ཚོས་བོད་ཀྱི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་དུ་འགྲོགས་པའི་དམ་ལྡན་ལྷ་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་བྱུས་མི་ཆོག་པའི་གནས་བབས་ལ་འགྱུར་བ་གང་ཡང་མེད་ཅེས་གསུངས་ཡོད་སྐོར་སོགས་འགྲེལ་བརྗོད་གནང་སོང་།
དེ་བཞིན་སྲིད་སྐྱོང་མཆོག་གིས། དབྱིན་ཡུལ་དང་། འཇར་མན། ཧྥ་རན་སི། ཧོ་ལན་ཌི། ཨ་སི་ལན་ཌི། ཨི་སི་ཊོ་ནི་ཡ་སོགས་ཀྱིས་མཉམ་འབྲེལ་གྱི་བསྒྲགས་གཏམ་ཞིག་སྤེལ་ཏེ། ༸གོང་ས་མཆོག་གི་ཡང་སྲིད་ཐད་རྒྱ་ནག་གིས་ཐེ་གཏོགས་བྱེད་མི་ཆོག་པའི་གསལ་བསྒྲགས་གནང་ཡོད་པ་རེད། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ཧ་ཝལ་ (Václav Havel) མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་ཅེག་སྤྱི་མཐུན་རྒྱལ་ཁབ་ཏུ་གདན་ཞུས་གནང་ཡོད་པ་དང་། འདས་ལོར་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་པི་ཊར་ (Petr Pavel) མཆོག་ལ་དྭགས་སུ་ཕེབས་ཏེ་༸གོང་ས་མཆོག་ལ་མཇལ་བཅར་ཞུས་ཡོད་པ་རེད། ད་དུང་སྲིད་འཛིན་པི་ཊར་མཆོག་གིས་ཅེག་སྤྱི་མཐུན་རྒྱལ་ཁབ་ཏུ་མནའ་འབྲེལ་ཆོས་དད་རང་དབང་གི་ཚོགས་ཆེན་ཐེངས་བཅོ་བརྒྱད་པ་ (Alliance 18th Conference of Religious Freedom) གོ་སྒྲིག་ཞུས་ཡོད་ལ། ཚོགས་ཆེན་ཐོག་དངོས་སུ་ཕེབས་ཏེ་གསུང་བཤད་གནང་ཡོད་སྐོར་དང་། བོད་མི་དང་ཡུ་གུར་བ། ཧོང་ཀོང་བ་སོགས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་ཡི་ཡོད་ཅེས་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
