ཧྥ་རན་སིའི་ཕྱི་སྲིད་བློན་ཆེན་ཇོན་ནོལ་ (Jean-Noël Barrot)མཆོག་གིས་རྒྱ་ནག་གིས་བོད་ཕྲུག་རྣམས་བཙན་གྱིས་བཅའ་སྡོད་སློབ་གྲྭར་འཇུག་བཞིན་པ་ནི་རྒྱལ་ཚོགས་ཀྱིས་གཏན་ལ་ཕབ་པའི་བྱིས་པའི་ཐོབ་ཐང་སྲུང་སྐྱོབ་ཀྱི་ཁྲིམས་སྒྲིག་དང་ཡོངས་སུ་འགལ་ཡོད་པའི་སྐྱོན་བརྗོད་གནང་འདུག
ཧྥ་རན་སིའི་གྲོས་ཚོགས་འོག་མའི་ཚོགས་གཞོན་སྐུ་ཞབས་ཆར་ལི་སི་ཌི་ཁོར་སོན་(Charles de Courson) མཆོག་གིས་ཧྥ་རན་སིའི་ཕྱི་སྲིད་བློན་ཆེན་མཆོག་ལ་གཞུང་འབྲེལ་གྱི་ཡིག་ཆ་ཞིག་ཕུལ་བའི་ནང་། རྒྱ་ནག་གཞུང་གིས་བོད་ཀྱི་སྐད་ཡིག་དང་རིག་གཞུང་སོགས་རྩ་མེད་གཏོང་བཞིན་པའི་ཐད་སེམས་འཚབ་ཡོད་ལ། ཕྱི་ལོ་ ༢༠༢༦ ལོར་རྒྱ་ནག་གཞུང་གིས་བོད་ནང་གི་མཐོ་རིམ་སློབ་གཉེར་ཁང་གི་ཚུད་རྒྱུགས་ནང་བོད་ཀྱི་སྐད་ཡིག་དེ་སློབ་ཚན་གཙོ་བོའི་ཁོངས་སུ་མི་འཇུག་པའི་སྲིད་ཇུས་དེ། རྒྱ་ནག་གཞུང་གིས་བོད་ཀྱི་སྐད་ཡིག་རྩ་མེད་བཟོ་ཐབས་ཀྱི་ཐབས་ལམ་གསར་ཤོས་ཤིག་ཡིན་པ་མ་ཟད། སྲིད་ཇུས་དེའི་འོག་ནས་བོད་ཀྱི་རིན་ཐང་ལྡན་པའི་སྐད་ཡིག་དེ་མི་རབས་གཅིག་གི་ནང་ཚུད་རྩ་མེད་དུ་འགྱུར་ཉེན་ཡོད་སྐོར་སོགས་གསུངས་འདུག
ཡང་ཡིག་ཆ་དེའི་ནང་། རྒྱ་ནག་གཞུང་གིས་བོད་ཀྱི་རིག་གཞུང་རྩ་མེད་གཏོང་སླད་བོད་ཕྲུག་རྣམས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་ཡོད་ཅིང་། རྒྱལ་སྤྱིའི་སྙན་ཐོ་དང་། ཕྱི་ལོ་ ༢༠༢༣ ལོའི་ཡུ་རོབ་གྲོས་ཚོགས་ཀྱི་གྲོས་ཆོད་ནང་དུའང་། རྒྱ་ནག་གཞུང་གིས་བོད་ཕྲུག་ས་ཡ་གཅིག་ཙམ་རང་གི་ཕ་མ་དང་ཁ་བྲལ་དུ་བཅུག་སྟེ་བཅའ་སྡོད་སློབ་གྲྭར་བཅུག་ནས་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་གསལ་སྟོན་བྱས་ཡོད། ཅེས་དང་། ཡང་འབུམ་རམས་པ་རྒྱལ་ལོ་ལགས་ཀྱིས། གལ་ཏེ་རྒྱ་ནག་གཞུང་གིས་མི་སེར་སྤེལ་ཡུལ་གྱི་སྲིད་ཇུས་དེ་མུ་མཐུད་དུ་ལག་བསྟར་བྱེད་ཚེ། ཕྱི་ལོ་ ༢༠༦༠ ལོའི་བར་བོད་མིའི་སྤྱི་ཚོགས་ཀྱི་བརྒྱ་ཆ་ ༧༠ ཙམ་རང་གི་ཕ་སྐད་མི་ཤེས་པའི་ཉེན་ཁ་ཡོད། ཅེས་བརྗོད་པ་སོགས་ལུང་འདྲེན་གྱིས། སྐུ་ཞབས་ཆར་ལི་སི་མཆོག་གིས། རྒྱ་ནག་གཞུང་གིས་བོད་ཀྱི་རིག་གཞུང་དང་སྐད་ཡིག་རྩིས་མེད་རྡོག་རོལ་གཏོང་བཞིན་པའི་ལས་འགུལ་དང་། རྒྱ་ནག་གིས་རྒྱལ་སྤྱིའི་འགན་ཁུར་དང་བྱིས་པའི་ཐོབ་ཐང་སྲུང་སྐྱོབ་ཀྱི་གྲོས་མཐུན་ཁས་ལེན་བྱས་པ་བཞིན་འགན་ཁུར་དགོས་པའི་རེ་སྐུལ་ཞུས་འདུག
དེའི་ཐད་ཧྥ་རན་སིའི་ཕྱི་སྲིད་བློན་ཆེན་སྐུ་ཞབས་ཇོན་ནོལ་ (Jean-Noël Barrot) མཆོག་གིས་བཀའ་ལན་གནང་བའི་ནང་། བོད་མི་ཚོགས་སྒེར་ཁག་གཙོས་པའི་ཞིབ་འཇུག་ལྟེ་གནས་ཁང་དང་ཉམས་ཞིབ་པ་མང་དག་ཅིག་གིས་རྒྱ་གཞུང་གིས་བོད་ཕྲུག་རྣམས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱིན་ཡོད་པའི་གནད་དོན་དང་། བོད་ནང་གི་ཛ་དྲག་གི་གནས་སྟངས་སྐོར་སྙན་ཐོ་རིམ་པ་འབྱོར་བ་དེ་དག་རྒྱལ་ཚོགས་ཀྱི་གཏན་ལ་ཕབ་པའི་བྱིས་པའི་ཐོབ་ཐང་སྲུང་སྐྱོབ་ (Convention on the Rights of the Child) ཞེས་པའི་གྲོས་མཐུན་དང་འགལ་ཡོད་པ་ངོས་ལེན་དང་། བོད་ཀྱི་སྐད་ཡིག་དང་རིག་གཞུང་རྩ་མེད་གཏོང་བཞིན་ཡོད་པའི་ཐད་ཐུགས་འཚབ་གནང་བཞིན་ཡོད་སྐོར་དང་། ཧྥ་རན་སིའི་ངོས་ནས་བོད་ནང་གི་ཛ་དྲག་གི་གནས་སྟངས་སྐོར་གླེང་སྟེགས་འདྲ་མིན་ནང་གླེང་སློང་གནང་བཞིན་ཡོད་པ་དང་། ཕྱི་ལོ་ ༢༠༢༤ ལོའི་འགྲོ་བ་མིའི་ཐོབ་ཐང་གི་གནས་སྟངས་ཐད་དུས་བཀག་བསྐྱར་ཞིབ་ཚོགས་འདུའི་ཐོག་བོད་མི་གཙོས་ཡུ་གུར་དང་རྒྱ་ནག་གི་མནར་གཅོད་མྱོང་བཞིན་པའི་རྒྱལ་ཁབ་རྣམས་ཀྱི་ཆེད་དུ་རྒྱ་ནག་གཞུང་ལ་བརྡ་ལན་སྤྲད་ཡོད་སྐོར་དང་། ཧྥ་རན་སི་སྲིད་གཞུང་གིས་བོད་རྒྱའི་དཀའ་རྙོག་སེལ་སླད་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་རྒྱ་ནག་གི་དཔོན་རིགས་དབར་བོད་རྒྱ་འབྲེལ་མོལ་བསྐྱར་གསོ་དགོས་པའི་སྐུལ་འདེད་གནང་འདུག
འདི་ལོའི་ཕྱི་ཟླ་ ༡ ཚེས་ ༢༨ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས། ད་ལྟ་བོད་པའི་བྱིས་པ་ས་ཡ་གཅིག་ཙམ་རྒྱ་ནག་གིས་བཙུགས་པའི་བཅའ་སྡོད་སློབ་གྲྭར་བཅུག་ཡོད་པ་དང་། སློབ་གྲྭ་དེ་དག་གི་ནང་ཁོང་ཚོར་རང་གི་སྐད་ཡིག་དང་། རིག་གཞུང་། ཆོས་ལུགས་བཅས་སྦྱོང་སའི་ཁོར་ཡུག་མེད་ཅིང་། སློབ་གྲྭ་དེ་དག་གི་དམིགས་ཡུལ་ནི་བོད་པའི་བྱིས་པ་ཚོ་བོད་པའི་ངོ་བོ་དང་ཁ་བྲལ་དུ་གཏོང་རྒྱུ་དེ་ཡིན་པ་མ་ཟད། རྒྱ་ནག་དམར་ཤོག་ཚོགས་པས་བོད་དེ་རྒྱ་བསྒྱུར་བྱེད་པའི་གཡོ་ཇུས་ཤིག་ཡིན་པ་རེད། རྒྱ་ནག་གཞུང་གིས་བོད་དེ་ཨེ་ཤ་ཡའི་ས་ཁམས་ཆབ་སྲིད་ཀྱི་ལག་ཆར་བཀོལ་སྤྱོད་བྱས་ཏེ། ཁྱིམ་མཚེས་རྒྱལ་ཁབ་ཁག་ལའང་གནོན་ཤུགས་སྤྲོད་བཞིན་ཡོད་པ་དང་། ལྷག་པར་རྒྱ་ནག་གིས་འཛམ་གླིང་ནང་ཤིན་ཏུ་དཀོན་པའི་བོད་ཀྱི་རང་བྱུང་གཏེར་རིགས་བཀོལ་སྤྱོད་བྱས་ཏེ། ཨེ་ཤ་ཡ་དང་འཛམ་གླིང་ནང་ཆབ་སྲིད་དང་ཚོང་། དྲག་པོའི་མཚོན་ཆ་སོགས་ཀྱི་དབང་ཤུགས་སྐྱེད་ཐབས་བྱེད་བཞིན་ཡོད་སྟབས། དེས་དབྱིན་ཇིའི་གཞུང་ལའང་གནོད་ཤུགས་ཐེབས་ཀྱི་ཡོད་པར་ངོས་འཛིན་བྱེད་གལ་ཆེན་པོ་ཡིན་སྐོར་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
