རྒྱ་ནག་གཞུང་གིས་དམག་དཔོན་ཆེན་མོ་ལྔ་དང་དམག་དཔོན་ལས་རོགས་གཅིག དམག་དཔོན་ཆུང་བ་གསུམ། ཞིང་ཆེན་རིམ་པའི་དམར་ཤོག་དྲུང་ཆེ་ཟུར་བ་དང་བློན་ཆེན་སོགས་དཔོན་རིགས་བཅུ་དགུ་མི་དམངས་འཐུས་མི་ཚོགས་ཆེན་གྱི་ཁོངས་ནས་ཕྱིར་ཕུད་བཏང་འདུག
ཕྱི་ཟླ་ ༣ ཚེས་ ༤ ཉིན་ནས་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་དང་སྲིད་གྲོས་ཏེ་ཚོགས་ཆེན་གཉིས་ཟེར་བ་འཚོག་རྒྱུ་ཡིན་པ་ལྟར། དེ་རིང་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཆབ་སྲིད་རྒྱུན་ལས་ཁང་གིས། མི་དམངས་འཐུས་མི་ཚོགས་ཆེན་གྱི་འཐུས་མི་དཔོན་རིགས་བཅུ་དགུ་ཕྱིར་ཕུད་བཏང་བའི་གནས་ཚུལ་ཡོངས་བསྒྲགས་བྱས་ཡོད་འདུག
ད་སྔ་བར་རྒྱ་ནག་གིས་དཔོན་རིགས་བཅུ་དགུ་ཕྱིར་ཕུད་གཏོང་དགོས་དོན་གྱི་གཞུང་འབྲེལ་གསལ་བཤད་གང་ཡང་བྱས་མེད་ཀྱང་། དབྱེ་ཞིབ་པ་ཚོས་དེ་ནི་ཆབ་སྲིད་ཀྱི་ཁ་གཏད་གཅོག་ཐབས་ལ་དམིགས་ཡོད་པ་མ་ཟད། ད་ལན་དམིགས་བསལ་བཅིངས་གྲོལ་དམག་གི་དམག་དཔོན་མཐོ་གྲས་ཁག་ཅིག་ཕྱིར་ཕུད་བཏང་བ་དེས། ཞི་ཅིན་ཕིན་གྱི་ལྐོག་ཟ་རུལ་སུངས་ཚར་གཅོད་ཀྱི་ལས་འགུལ་དེ་དམག་གི་དབང་ཆའི་ཐོག་གཏད་ཅིང་། དེའི་ནང་དུ་མཁའ་དམག་དང་། མཚོ་དམག མེ་ཤུགས་འཕུར་མདའི་དམག་དཔུང་བཅས་ཚུད་ཡོད་པ་བསྟན་ཡོད་སྐོར་བརྗོད་འདུག་ལ། ད་ལྟ་ཞི་ཅིན་ཕིན་གྱིས་ཉེ་ལམ་ཞིབ་བཤེར་འོག་བཅུག་པའི་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་དང་། རྒྱ་ནག་དབུས་དམག་དོན་ལྷན་ཁང་གི་འགན་འཛིན་གཞོན་པ་ཀྲང་ཡུ་ཤཱ་ (zhang youxia) ཡི་ཕྱོགས་ཁག་ཚང་མ་རྩ་རྫོགས་བྱེད་པར་དམིགས་འབེན་བཟུང་ཡོད་འདུག
ཐེངས་འདིའི་ཕྱིར་ཕུད་བཏང་བའི་དཔོན་རིགས་ཀྱི་ཁྲོད་དུ། བཅིངས་གྲོལ་དམག་གི་སྐམ་དམག་བཀོད་འདོམས་པའམ་དམག་སྤྱི་ལི་ཆའོ་མིང་ (Li Qiaoming) དང་། ཆ་འཕྲིན་རོགས་སྐྱོར་དམག་དཔུང་གི་ཆབ་སྲིད་ལས་དོན་གྱི་དམག་སྤྱི་ལི་ཝེ་ (Li Wei)། མཚོ་དམག་གི་དམག་སྤྱི་ཟུར་བ་ཧྲེན་ཅིན་ལོང་ (Shen Jinlong) དང་མཚོ་དམག་གི་ཆབ་སྲིད་འགན་འཛིན་ཟུར་བ་ཅིན་ཧྲེང་ཞང་ (Qin Shengxiang) ། མཁའ་དམག་གི་ཆབ་སྲིད་ལས་དོན་གྱི་དམག་སྤྱི་ཟུར་བ་ཡུས་ཀྲུང་ཧྥུ་ (Yu Zhongfu)། རྒྱ་ནག་གི་རྒྱལ་སྲུང་སྒུལ་ཤུགས་ལྷན་ཁང་གི་ཆབ་སྲིད་ལས་དོན་ཚན་པའི་དམག་སྤྱི་ཝང་ཏུང་ཧའེ་ (Wang Donghai) དང་། རྒྱ་ནག་དབུས་དམག་དོན་ལས་ཁུངས་ཀྱི་ཆབ་སྲིད་ལས་དོན་གྱི་དམག་སྤྱི་གཞོན་པ་བྷི་ཡན་རུའེ་ཧྥེང་ (Bian Ruifeng)། སྐམ་དམག་གི་དམག་སྒེར་ ༧༣ པའི་དམག་སྤྱི་ཏིན་ལའེ་ཧྥུའུ་ (Ding Laifu) དང་མེ་ཤུགས་འཕུར་མདའི་དམག་སྒེར་ ༦༤ པའི་དམག་སྤྱི་ཡང་ཀོང་ (Yang Guang) བཅས་དམག་དཔོན་ཆེན་མོ་ལྔ་དང་། དམག་དཔོན་ལས་རོགས་གཅིག དམག་དཔོན་ཆུང་བ་གསུམ་བཅས་འདུག
གཞན་ཡང་དམག་གི་ལས་བྱེད་པ་དང་ཞིང་ཆེན་རིམ་པའི་དཔོན་རིགས་ནང་སོག་ཁུལ་གྱི་དམར་ཤོག་དྲུང་ཆེ་ཟུར་བ་སུན་ཤའོ་ཆོན་ (Sun Shaochong)། རྒྱ་ནག་གི་ཛ་དྲག་དོ་དམ་བློན་ཆེན་ཝང་ཞང་ཧྲི་ (Wang Xiangxi) དང་། མི་དམངས་འཐུས་མི་ཚོགས་ཆེན་གྱི་ཕྱི་སྲིད་ལས་དོན་ཚོགས་ཆུང་གི་ཚོགས་མི་ཅང་ཁྲེང་ཧྭ་ (Jiang Chenghua)། དེ་བཞིན། བཅིངས་གྲོལ་དམག་གི་ཁྲིམས་ཁང་གི་གཙོ་འཛིན་ལིའུ་ཤའོ་ཡུན་ (Liu Shaoyun) སོགས་ཕྱིར་ཕུད་བཏང་ཡོད་འདུག་ལ། རྒྱ་ནག་གཞུང་གིས་འདི་ལོའི་ཚོགས་ཆེན་གཉིས་ཀྱི་སྟེང་དུ་དམག་དང་ཉེན་རྟོག་པའི་འཐུས་མི་ཇེ་ཉུང་དུ་བཏང་སྟེ་འཐུས་མི་ཁྱོན་ ༢༤༣ ལས་མེད་པར་བཟོས་ཡོད་འདུག
ཕྱི་ཟླ་ ༣ ཚེས་ ༤ ཉིན་རྒྱ་ནག་གི་སྐབས་བཅུ་བཞི་བའི་རྒྱལ་ཡོངས་མི་དམངས་འཐུས་མིའི་སྲིད་གྲོས་ཚོགས་ཐེངས་ ༤ བ་དང་ཚེས་ ༥ ཉིན་སྐབས་བཅུ་བཞི་བའི་མི་དམངས་འཐུས་མི་ཚོགས་ཆེན་ཐེངས་ ༤ བ་གཉིས་བསྟུད་མར་འཚོག་རྒྱུ་ཡིན་ཞིང་། ཚོགས་ཆེན་དེ་གཉིས་ནི་རྒྱ་ནག་དམར་ཤོག་ཚོགས་པའི་ལོ་འཁོར་ཚོགས་ཆེན་གལ་ཆེ་ཤོས་སུ་བརྩི་བ་དང་། ཚོགས་འདུའི་སྟེང་དུ་རྒྱ་ནག་གི་ལོ་ལྔའི་འཆར་གཞི་བཅོ་ལྔ་པའི་འཆར་ཟིན་(2026-30) ལ་ཞིབ་བཤེར་བྱེད་རྒྱུ་དང་། རྒྱལ་ཁབ་ཀྱི་སྲིད་བྱུས་འཆར་གཞི་དང་དམག་དོན། དཔལ་འབྱོར་དང་ཚོང་འབྲེལ། ཕྱི་འབྲེལ་སོགས་ཀྱི་སྐོར་ལ་གྲོས་བསྡུར་བྱས་ཏེ་འཆར་གཞི་རྣམས་ཕྱིར་བསྒྲགས་བྱེད་སྲོལ་ཡོད་པ་རེད་ལ། འདི་ལོའི་ཚོགས་ཆེན་སྟེང་འཐུས་མི་ ༢༩༠༠༠ ཙམ་འཛོམས་ཀྱི་ཡོད་པའི་ཚོད་དཔག་བྱེད་བཞིན་འདུག
གསར་འགོད་པ། སྐལ་བཟང་སྦྱིན་པ།
