རྒྱལ་མཚམས་ལས་བརྒལ་བའི་དྲག་གནོན་ཞེས་པའི་བརྗོད་གཞིའི་ཐོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཟུར་ཚོགས་ཤིག་བསྐངས་ཏེ་རྒྱ་ནག་གིས་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ་དེ་རྒྱལ་སྤྱིའི་ཁྲིམས་དང་འགལ་ཡོད་པ་ཐེར་འདོན་བྱས།
འདི་ལོའི་ཕྱི་ཟླ་ ༢ ཚེས་ ༢༣ ནས་ཕྱི་ཟླ་ ༣ ཚེས་ ༣༡ བར་སུད་སིའི་ཇི་ནི་ཝ་རུ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༦༡ འཚོག་མུས་ཡིན་པ་ལྟར། ཁ་སང་ཕྱི་ཚེས་ ༣ ཉིན་འཇིག་ཉེན་ཡོད་པའི་མི་རིགས་ལྷན་ཚོགས་ཀྱི་གོ་སྒྲིག་འོག རྒྱལ་མཚམས་ལས་བརྒལ་བའི་དྲག་གནོན་ཞེས་པའི་བརྗོད་གཞིའི་ཐོག་ཟུར་ཚོགས་ཤིག་འཚོགས་ཡོད་འདུག སྐབས་དེར་ཡུ་གུར་གྲོས་ཚོགས་འཐུས་མི་ཛུམ་རི་ཏ་ (Zumrita Akrin) ལགས་དང་། རྩ་རླུང་སྒོམ་སྒྲུབ་པའི་སྐུ་ཚབ་ཏུ་ལེ་བྷིན་ (Lebin Ding) ལགས། ཇི་ནི་ཝར་རྟེན་གཞི་བྱས་པའི་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། སུད་སི་དང་འཇར་མན་སོགས་རྒྱལ་ཁབ་ ༡༢ ཀྱི་སྐུ་ཚབ་ ༡༢། གཞན་ཡང་། ཚོགས་སྡེ་ཁག་འདྲ་མིན་གྱི་སྐུ་ཚབ་སོགས་ཁྱོན་མི་གྲངས་ ༤༠ ལྷག་མཉམ་ཞུགས་གནང་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་སུ་ཟུར་ཚོགས་དེ་གང་འདྲ་བྱུང་ཡོད་མེད་སྐོར་དྲིས་པར་ཁོང་མོས། ད་བར་རྒྱ་ནག་གཞུང་གིས་བོད་དང་། ཡུ་གུར་གཙོས་པའི་རྒྱལ་ཁབ་ཁག་ལ་རྒྱལ་མཚམས་ལས་བརྒལ་བའི་དྲག་གནོན་སྤེལ་དང་སྤེལ་མུས་ཡིན་པ་དང་། རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་དང་རང་དབང་སོགས་རྩིས་མེད་རྡོག་རོལ་གཏོང་མུས་ཡིན་པ་མ་ཟད། བོད་ཕྲུག་ས་ཡ་གཅིག་ཙམ་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་མུས་ཡིན་པ་སོགས་བོད་ཕྱི་ནང་གཉིས་སུ་རྒྱལ་མཚམས་ལས་བརྒལ་བའི་དྲག་གནོན་སྤེལ་གྱི་ཡོད་ལ། བཙན་བྱོལ་དུ་ཡོད་པའི་བོད་མི་རྣམས་ཀྱིས་བོད་ནང་གི་ཛ་དྲག་གི་གནས་སྟངས་དང་འབྲེལ་ནས་ལས་འགུལ་སྤེལ་དུ་མི་འཇུག་པའི་ལས་དོན་སྤེལ་བ་དང་། བོད་མིའི་སྒྲིག་འཛུགས་སོགས་རྩ་མེད་གཏོང་ཐབས་དང་། བོད་ཕྱི་ནང་གཉིས་སུ་ཡོད་པའི་བོད་མི་ཕན་ཚུན་འབྲེལ་བ་བྱེད་མི་བཅུག་པ་སོགས་ཀྱི་གནད་དོན་རྣམས་འགྲེལ་བརྗོད་བྱས་ཡོད། ཅེས་དང་། རྒྱ་ནག་གིས་བོད་མི་རྣམས་ལ་རྒྱལ་མཚམས་ལས་བརྒལ་བའི་དྲག་གནོན་སྤེལ་བཞིན་པ་དེ་རྒྱལ་སྤྱིའི་ཁྲིམས་དང་འགལ་གྱི་ཡོད་པ་དང་། རྒྱ་ནག་གིས་རྒྱལ་སྤྱིའི་ཁྲིམས་དང་མཐུན་པའི་ལས་དོན་སྤེལ་དགོས་པའི་སྐོར་གླེང་སློང་བྱས་ཡོད་སྐོར་སོགས་འགྲེལ་བརྗོད་གནང་བྱུང་།
ཟུར་ཚོགས་སྟེང་འཕྲིན་ལས་ཆོས་སྐྱིད་ལགས་ཀྱིས། རྒྱལ་མཚམས་ལས་བརྒལ་བའི་དྲག་གནོན་འོག་མྱོང་བཞིན་པ་རྣམས་ཀྱི་ཉམས་མྱོང་མཉམ་སྤྱོད་དང་། མ་འོངས་པར་ཐབས་ལམ་འཚོལ་རྒྱུའི་གལ་གནད་ཐོག་གཏམ་བཤད་གནང་བ་མ་ཟད། ད་ལྟའི་ཆར་འགྲོ་བ་མིའི་ཐོབ་ཐང་གི་ལམ་ལུགས་ལ་འཕྲད་བཞིན་པའི་དཀའ་ངལ་དང་། རྒྱལ་སྤྱིའི་ཁྲིམས་ནང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ཁྲིམས་གཏན་འབེབས་གནང་ཡོད་ཀྱང་། དོན་དངོས་སུ་འགྲོ་བ་མིའི་ཐོབ་ཐང་དོན་གཉེར་བ་དང་སྲུང་སྐྱོབ་པ་རྣམས་ལ་སྲུང་སྐྱོབ་ཚད་ལྡན་བྱེད་ཐུབ་ཀྱི་མེད་པ་སོགས་ཐེར་འདོན་དང་། རྒྱ་གཞུང་གིས་བོད་མི་རྣམས་ལ་ལྟ་ཞིབ་དང་སུན་གཙེར་བྱེད་བཞིན་ཡོད་པ་དང་། བཙན་བྱོལ་སྒྲིག་འཛུགས་ཁག་དང་། ལྷག་པར་བོད་མིའི་སྒྲིག་འཛུགས་ཀྱི་མཚན་མཐོང་ལ་གནོད་པའི་ཆེད་དུ་དམིགས་ཏེ་རྒོལ་རྡུང་གི་བྱ་སྤྱོད་ཀྱང་སྤེལ་བཞིན་ཡོད་པ་མ་ཟད། རྒྱལ་མཚམས་ལས་བརྒལ་བའི་དྲག་གནོན་སྤེལ་བཞིན་པ། དེ་བཞིན་དྲ་ལམ་ནས་སུན་གཙེར་སོགས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མུས་ཡིན་པ་སོགས་འགྲེལ་བརྗོད་གནང་སྟེ། རྒྱལ་སྤྱིའི་ཚོགས་སྡེ་ཁག་གིས་རྒྱལ་མཚམས་ལས་བརྒལ་བའི་དྲག་གནོན་ནི་རང་དབང་དང་འགྲོ་བ་མིའི་ཐོབ་ཐང་གཉིས་ཀར་རྡོག་རོལ་གཏོང་བའི་བྱ་སྤྱོད་ཅིག་ཡིན་པར་ངོས་འཛིན་དགོས་པའི་འབོད་སྐུལ་དང་། སུད་སི་གཞུང་ནས་བྱ་སྤྱོད་དེ་དག་ལ་ངོས་འཛིན་བྱས་པའི་ཐོག་ནས་གཞུང་འབྲེལ་གྱི་ཞིབ་འཇུག་སྙན་ཐོ་ཞིག་བཏོན་པར་བསྔགས་བརྗོད་དང་འབྲེལ། དེ་མཚུངས་རྒྱལ་ཁབ་གཞན་ནས་ཀྱང་དེ་ལྟར་གནང་སྐྱོང་ཡོང་བའི་རེ་སྐུལ་ཞུ་རྒྱུ་དང་། གཞུང་ནས་ཁྲིམས་མཐུན་དང་ཁྲིམས་ལུགས་ལག་བསྟར་བྱེད་མཁན་རྣམས་ལ་དེའི་སྐོར་གོ་རྟོགས་སྤེལ་དགོས་སྐོར་ནན་བརྗོད་གནང་ཡོད་འདུག
ཐེངས་འདིའི་ཟུར་ཚོགས་སྟེང་མཉམ་འབྲེལ་རྒྱལ་ཚོགས་ནང་སྙན་ཞུ་འབུལ་མཁན་དང་། གཏམ་བཤད་གནང་མཁན་གྱི་འཐབ་རྩོད་པ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་རྣམས་ལ་སྲུང་སྐྱོབ་བྱེད་དགོས་པའི་འབོད་སྐུལ་དང་། རྒྱ་ནག་གིས་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ་དེ་མཚམས་འཇོག་དང་། འགྲོ་བ་མིའི་ཐོབ་ཐང་སྲུང་སྐྱོབ་པ་རྣམས་ལ་རང་དབང་གི་ཐོག་ནས་ལས་དོན་སྤེལ་ཐུབ་པར་རྒྱལ་སྤྱིའི་ཐོག་ནས་ངོས་འཛིན་དང་། སྲུང་སྐྱོབ། མཉམ་འབྲེལ་གྱིས་འབད་བརྩོན་གནང་དགོས་པ་སོགས་ཀྱི་སྐོར་གླེང་སློང་གནང་ཡོད་འདུག
ལོ་ལྟར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་འཚོགས་པ་དང་བསྟུན་ཟུར་ཚོགས་འཚོག་གི་ཡོད་པ་ལྟར། ད་ལན་ཟུར་ཚོགས་སྟེང་རྒྱལ་མཚམས་ལས་བརྒལ་བའི་དྲག་གནོན་དང་འབྲེལ་ནས་གླེང་སློང་བྱས་མེད་པ་དང་། དེ་སྔ་ཕྱི་ལོ་ ༢༠༢༢ ལོར་རྒྱལ་ཚོགས་ཀྱི་ལྷན་ཚོགས་དང་བསྟུན། ༸སྐུའི་ཡང་སྲིད་ཀྱི་གནས་བབ་ཐོག་ཟུར་ཚོགས་གནང་ཡོད་པ་དང་། ཕྱི་ལོ་ ༢༠༢༣ ལོར་བོད་ནག་གི་ཛ་དྲག་གནས་སྟངས་དང་འབྲེལ་ནས་ཟུར་ཚོགས་གནང་ཡོད་འདུག ཕྱི་ལོ་ ༢༠༢༤ ལོར་རྒྱལ་ཚོགས་ཀྱི་རྒྱ་ནག་གི་འགྲོ་བ་མིའི་ཐོབ་ཐང་གནས་བབ་ཐོག་དུས་བཀག་བསྐྱར་ཞིབ་དང་བོད་མིའི་འགྲོ་བ་མིའི་ཐོབ་ཐང་གསལ་སྟོན་ཞེས་པའི་བརྗོད་གཞིའི་ཐོག་ཟུར་ཚོགས་ཤིག་འཚོགས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
