མེག་གྷན་གྱི་རྟག་བརྟན་ལའི་གཞུང་ལམ་བསྐྱར་གསོ་བྱུང་ནས་འགྲུལ་བ་ཤར་གཏོང་བྱས་ཡོད་ཀྱང་གཙུག་ལག་ཁང་གི་གཤམ་འོག་གཞུང་ལམ་ཞིག་གསོ་ཐུབ་ཀྱི་མེད་པ་དེར་མི་མང་པོས་སེམས་འཚབ་གནང་གི་འདུག
འདས་ལོའི་ཆར་དུས་བསླེབས་སྔ་བ་དང་ཆར་ཤུགས་ཆེ་བའི་རྐྱེན་གྱིས་གངས་སྐྱིད་ནས་མེག་ལོར་བར་གྱི་རྗོ་གྷི་ཝ་ར་ལམ་གྱི་ཁུག་སོ་གསུམ་ལྷག་ལ་རྡིབ་སྐྱོན་བྱུང་ཡོད་པ་རེད། འདས་ལོའི་ཕྱི་ཟླ་ ༨ ཚེས ༢༠ ཉིན་གངས་སྐྱིད་ནས་མེག་ལོར་བར་གྱི་རྗོ་གྷི་ཝ་ར་ལམ་གྱི་རྟག་བརྟན་ཁང་གསར་གྱི་རི་ངོས་སུ་ས་རུད་བྱུང་ནས་ལམ་ཆད་ཡོད་ཀྱང་། ཟླ་བ ༧ ཙམ་གྱི་རྗེས་ནས་རླངས་འཁོར་འགྲོ་སྐྱོད་ཐུབ་པ་བྱུང་འདུག གཙུག་ལག་ཁང་གི་གཤམ་འོག་པོ་ཏ་ལ་གཞུང་ལམ་རྡིབ་སྐྱོན་ད་དུང་ཡང་ཞིག་གསོ་མ་ཐུབ་པར་དེ་མུར་ལྷག་འདུག་སྟབས། འདི་ལོའི་ཆར་དུས་བསླེབ་རྒྱུར་ཟླ་གསུམ་ལྷག་ལས་མེད་པས་གང་མགྱོགས་ཞིག་གསོ་མ་ཐུབ་ཚེ་ཆར་དུས་སུ་འགྲོ་ལམ་རྦད་དེ་ཆད་ཉེན་ཆེན་པོ་འདུག
དྷ་སའི་གཞུང་ལམ་ཐད་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས། སྤྱིར་བཏང་རྗོ་གྷི་ཝ་ར་ (Jogiwara) གཞུང་ལམ་མང་ཆེ་བ་ཞིག་དཀའ་ངལ་འཕྲད་བསྡད་ཡོད་རེད། ང་ཚོས་ཇོ་ཀི་ཝ་ར་གཞུང་ལམ་ཐོག་མ་ཉམས་གསོ་ཐུབ་པ་རེད། དེ་བཞིན་སྨན་རྩིས་ཁང་འོག་གི་གཞུང་ལམ་དེའང་ཉམས་གསོ་ཐུབ་པ་རེད། རྟག་བརྟན་ཡོད་སའི་ལམ་ག་དེ་ཁ་སང་ནས་མོ་ཊ་འགྲོ་ཐུབ་པའི་གནས་སྟངས་ཤིག་ཆགས་ཡོད་པ་རེད། གཙོ་བོབདེ་འཇགས་ལས་ཁུངས་ (Public Works Department) ཀྱིས་རོགས་འདེགས་གནང་གི་ཡོད་རེད། དེ་ལ་སྟངས་འཛིན་དེ་རྫོང་དཔོན་མཆོག་གིས་གནང་གི་ཡོད་རེད། ས་གནས་མགོ་འཛིན་ངོས་ནས་ཡང་དང་བསྐྱར་དུ་བཅར་ནས་འབོད་སྐུལ་ཞུ་རྒྱུ་མ་གཏོགས། ས་གནས་མགོ་འཛིན་གྱི་ངོས་ནས་དཔལ་འབྱོར་གྱི་འགྲོ་གྲོན་གཏང་ཐུབ་ཀྱི་ཡོད་མ་རེད། ང་ཚོའི་ངོས་ནས་རྫོང་དཔོན་ལས་ཁུངས་ལ་གང་མགྱོགས་མགྱོགས་གནང་རོགས་ཞེས་སྙན་ཞུ་རིམ་པར་ཕུལ་ཏེ། ད་ལྟའི་གནས་སྟངས་དེ་འདྲ་ཞིག་ཆགས་ཡོད་རེད། མ་འོངས་པའང་ང་ཚོས་ཤུགས་རྒྱག་དགོས་ས་མང་པོ་ཞིག་ཡོད་དུས། རྒྱ་གར་གྱི་གནས་ཡོད་མི་སྣ་མང་པོ་ཞིག་ཐུག་གི་ཡོད། དེ་དག་ལ་ད་བར་ཞུས་ཡིན་ལ་མ་འོངས་པའང་ཞུ་འཆར་ཡོད། ཅེས་བརྗོད་བྱུང་།
འདས་ལོའི་ཕྱི་ཟླ་ ༧ ཚེས་ ༢༥ ཉིན་སྙན་གྲགས་བཟོ་བཀོད་ཁང་ (Studio Nyandak) དང་། དྷ་ས་བོད་ཀྱི་དཔེ་མཛོད་ཁང་གཉིས་ཟུང་འབྲེལ་ཐོག དཔེ་མཛོད་ཁང་གི་ཚོགས་ཁང་དུ། དྷ་རམ་ས་ལའི་ས་ཡོམ་སྐོར་ཉམས་ཞིབ་གནང་བའི་ལྷན་ཚོགས་སྐབས། ས་ཁམས་ཆེད་མཁས་པ་མང་པོ་ཞིག་གིས་འབྱུང་འགྱུར་མི་ལོ་ ༥༠ ནས་ ༡༠༠ བར་དྷ་སའི་ཁུལ་དུ་ས་ཡོམ་གྱི་གོད་ཆག་ཆེན་པོ་ཞིག་ཡོང་རྒྱུའི་ཚོད་དཔག་བྱེད་ཀྱི་ཡོད་ཅིང་། དྷ་ས་ནི་གཡང་གཟར་གྱི་ས་ཁུལ་ཞིག་ཡིན་པ་མ་ཟད། འདིར་འཛུགས་སྐྲུན་བྱས་པའི་ཁང་རྩེག་མང་པོ་ཞིག་ནི་ཨར་འདམ་གྱིས་བཟོས་པ་ཡིན་སྟབས་ས་ཡོམ་གྱི་འཇིག་པ་ཤུགས་ཆེན་ཡོང་ཉེན་ཡོད་པས། ས་ཡོམ་གྱི་འཇིག་པ་དེ་དག་ལས་གཡོལ་སླད། ཆེད་ལས་རང་བཞིན་ཅན་གྱི་མི་སྣས་ཆེད་འཛུགས་བྱས་པའི་ཁང་པ་བཟོ་སྐྲུན་དང་། ཁང་པ་རྙིང་པ་དག་ལ་ཀ་བ་གསར་འཛུགས་དང་། ཇེ་བརྟན། སྲ་བརྟན་འཛུགས་ཐབས་བྱ་དགོས་སྐོར་སོགས་གསལ་སྟོན་བྱས་ཡོད་ཅིང་། ལོ་ལྟར་ཆར་དུས་སྐབས་དྷ་སར་རང་བྱུང་གོད་ཆག་གི་དཀའ་ངལ་མི་ཉུང་བ་ཞིག་འཕྲད་ཀྱིན་ཡོད་པ་རེད།
མེག་གྷན་ནི་རྒྱ་གར་བྱང་ཕྱོགས་ཀང་རཱ་རྫོང་ཁོངས་ཀྱི་ཡུལ་སྐོར་སྤྲོ་འཆམ་པ་ཆེས་མང་བའི་རི་གྲོང་ཞིག་ཡིན་ཞིང་། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཞུགས་སྒར་དང་དབུས་བོད་མིའི་སྒྲིག་འཛུགས་ཀྱི་ལྟེ་གནས་ཡིན་པ་མ་ཟད། མི་རིགས་སྣ་མང་དང་རིག་གཞུང་སྣ་མང་འཛོམས་ས་ཞིག་ཀྱང་ཡིན་པ་རེད། ཕྱི་ལོ ༢༠༢༣ ལོར་ཁོར་ཡུག་ཚན་རིག་གི་སློབ་དཔོན་དང་སྙན་གྲགས་ཅན་གྱི་ས་ཁམས་རིག་པ་བ་མ་ཧ་ཇན་ (AK Mahajan) ལགས་ཀྱིས་གཙོས། ཆེད་མཁས་པ་ཁག་ཅིག་གིས་ཞིབ་འཇུག་སྙན་ཐོ་བཏོན་པ་ལྟར་ན། དྷ་སའི་གྷམ་རུ་ (Gamru) དང་རྗོ་གྷི་ཝ་ར་ (Jogiwara)། དེ་བཞིན་ཏི་རཱ་ (Tirah Lines) དང་བྷ་ར་ཀོ་ཊི་ (Barakoti)། ཀཱརྗ་ལོཌ་ (Kajlot)། དྷི་ཨལ་ (Dhial)། ཆོ་ལཱ་ (Chohla) སོགས་སུ་ས་རུད་འབྱུང་སླ་བའི་ས་གནས་ཀྱི་ཁོངས་སུ་ངོས་འཛིན་བྱས་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
