དེ་རིང་ནས་ཉིན་གྲངས་བཅུ་གསུམ་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་གྲོས་ཚོགས་སྐབས། རྩིས་ལོ་ ༢༠༢༦- ༢༠༢༧ ལོའི་སྔོན་རྩིས་ཐོག་བགྲོ་གླེང་དང་གཏན་འབེབས་གནང་གི་ཡོད་འདུག
དེ་རིང་ཕྱི་ཚེས་ ༡༦ ནས་ ༣༠ བར་ལས་ཡུན་ཉིན་གྲངས་བཅུ་གསུམ་རིང་བོད་མི་མང་སྤྱི་འཐུས་སྐབས་བཅུ་བདུན་པའི་གྲོས་ཚོགས་གྲོས་མཐའ་མ་དེ་དངོས་སུ་འཚོག་མགོ་བཙུགས་ཡོད་ཅིང་། ད་ལན་གྱི་གྲོས་ཚོགས་སྐབས་དབུས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༦- ༢༠༢༧ ལོའི་སྔོན་རྩིས་ཐོག་བགྲོ་གླེང་དང་གཏན་འབེབས་གནང་གི་ཡོད་འདུག་ལ། དེ་རིང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ལས་ཉིན་དང་པོའི་སྔ་དྲོའི་ཚོགས་ཐུན་སྟེང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ང་ཚོ་ཆབ་སྲིད་ཀྱི་སྐྱབས་བཅོལ་བ་ཡིན་པའི་ཆ་ནས་བོད་ཀྱི་ཆབ་སྲིད་འཐབ་རྩོད་ཐོག་བོད་ཀྱི་ལོ་རྒྱུས་གནས་བབ་མཚོན་པའི་རྒྱལ་སྤྱིའི་ཁྱོན་དུ་འབྲེལ་ལམ་འཛུགས་པ་དང་རྒྱབ་སྐྱོར་འཚོལ་བར་༸གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་གྱི་སྟོབས་ལས་བྱུང་བ་ཞིག་ཡིན་དུས། རྒྱལ་སྤྱིའི་ནང་དུ་བོད་དང་བོད་མིའི་ཐོག་དོ་སྣང་བསླེབས་ཡོད་སྐོར་སོགས་གསུངས་སོང་། དེ་བཞིན་ཚོགས་ཐུན་དང་པོའི་སྟེང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་༢༠༢༦ དང་ ༢༠༢༧ ལོའི་སྔོན་རྩིས་འགོད་འབུལ་གསུང་བཤད་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་ཆོས་གྲགས་རྒྱ་མཚོ་མཆོག་གིས་རྩིས་ལོ་ ༢༠༢༦ དང་ ༢༠༢༧ ལོའི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་སོགས་གནང་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་སྐབས། ཕྱི་ཟླ་གསུམ་པ་ནི་དམིགས་བསལ་གྱི་ཟླ་བ་ཞིག་ཆགས་ཡོད། བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཉིན་མོ་ཟླ་བ་འདིའི་ནང་དུ་ཁེལ་ཡོད། བོད་ནང་དུའང་རྒྱ་ནག་གཞུང་གིས་དམིགས་བསལ་དམ་དྲག་ཤུགས་ཆེན་བྱེད་སའི་ཟླ་བ་དེ་ཆགས་ཡོད། འདི་ལོ་གསུམ་བཅུའི་དུས་དྲན་ཐེངས་ ༦༧ པ་ཆགས་ཡོད། ང་ཚོ་བཙན་བྱོལ་དུ་གྱར་ནས་ལོ་ངོ་ ༦༧ འགྲོ་བཞིན་ཡོད། མི་ཞིག་གི་མི་ཚེ་ལ་སྡོམ་བརྒྱབ་ན་ནུས་པ་ཡོད་པའི་དུས་ཚོད་དེ་རྫོགས་བཞིན་ཡོད་ལ། དེ་ནས་རིམ་བཞིན་མི་ཚེའི་ནུས་པ་དེ་གཅོག་མི་གཅོག་གི་གནས་སྟངས་ཆགས་ཀྱི་ཡོད། ཡིན་ནའང་། ང་ཚོ་བོད་པ་ཆབ་སྲིད་ཀྱི་སྐྱབས་བཅོལ་ཡིན་པའི་ཆ་ནས་ཐོག་མར་རྒྱ་གར་ནང་བཙན་བྱོལ་དུ་བསླེབས། ༸གོང་ས་རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་། རྒྱ་གར་གཞུང་གི་མཐུན་སྦྱོར། ང་ཚོའི་མི་རབས་རྒན་པ་རྣམས་ཀྱི་བློས་གཏོང་དང་ལྷག་བསམ་རྣམ་དག་གི་ཞབས་འདེགས་ལ་བརྟེན་ནས། བཙན་བྱོལ་ནང་བོད་མིའི་གཞིས་ཆགས་ཁག་དང་དགོན་སྡེའི་ནང་བཤད་སྒྲུབ་ཚད་ལྡན་བྱུང་ཡོད། དེ་བཞིན་བོད་ཀྱི་ཆོས་དང་རིག་གཞུང་སྐད་ཡིག་བཅས་མ་ཉམས་པར་སླར་གསོ་གནང་བ་དང་། རྒྱལ་སྤྱིའི་ཐོག་བོད་ཀྱི་སྐད་ཡིག་དང་ནང་ཆོས་ལ་དོ་སྣང་ཤུགས་ཆེན་བསླེབས་ཐུབ་པའི་གནས་བབ་ཅིག་ཆགས་ཡོད། དེ་ཡང་ང་ཚོས་དགའ་བ་བསྒོམ་དགོས་པའི་གནས་སྟངས་ཤིག་ཆགས་ཡོད། ཅེས་གསུངས་སོང་།
ཚོགས་གཙོ་མཆོག་གིས། ང་ཚོ་ཆབ་སྲིད་ཀྱི་སྐྱབས་བཅོལ་བ་ཡིན་པའི་ཆ་ནས་བོད་ཀྱི་ཆབ་སྲིད་འཐབ་རྩོད་ཐོག་བོད་ཀྱི་ལོ་རྒྱུས་གནས་བབ་མཚོན་པའི་རྒྱལ་སྤྱིའི་ཁྱོན་དུ་འབྲེལ་ལམ་འཛུགས་པ་དང་རྒྱབ་སྐྱོར་འཚོལ་བར་༸གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་གྱི་སྟོབས་ལས་བྱུང་བ་ཞིག་ཡིན་དུས། རྒྱལ་སྤྱིའི་ནང་དུ་བོད་དང་བོད་མིའི་ཐོག་དོ་སྣང་བསླེབས་ཡོད་པ་རེད། རྒྱལ་སྤྱིའི་ཐོག་སྲིད་འཛིན་དང་སྲིད་བློན་གྱི་མཚོན་པའི་དབུ་འཁྲིད་དང་འགྲོ་བ་མིའི་ཐོབ་ཐང་གི་ལས་ཁུངས་སོགས་ཀྱིས་བོད་ཀྱི་གནས་སྟངས་ཐོག་དོ་སྣང་ཆེན་པོ་བྱེད་ཀྱིན་ཡོད། ལྷག་པར་དུ་ཨ་རིའི་གྲོས་ཚོགས་ནང་ཁྲིམས་ཡིག་གཏན་འབེབས་གནང་ཡོད་ལ། ཡུ་རོབ་གྲོས་ཚོགས་སོགས་སུ་བོད་དོན་གྲོས་ཆོད་བཞག་ཡོད། རྒྱ་གར་གཙོས་གྲོས་ཚོགས་ཁག་ཏུ་བོད་དོན་གླེང་སློང་གནང་བ་སོགས་བོད་དོན་ཐོག་རྒྱབ་སྐྱོར་བྱེད་སའི་གནས་བབ་ཅིག་ཆགས་ཡོད། ལོ་ངོ་ ༦༧ ལ་ཕྱིར་མིག་ཞིག་བལྟས་ཚེ་སྤོབས་པ་སྐྱེ་དགོས་པ་ཆགས་ཀྱི་འདུག ཅེས་གསུངས་སོང་།
ཡང་ཚོགས་གཙོ་མཆོག་གིས། ང་ཚོས་གདོང་ལེན་བྱེད་དགོས་ས་དེ་རྒྱ་ནག་གཞུང་ཆགས་ཡོད། རྒྱ་གཞུང་གི་དཔལ་འབྱོར་དང་ཕྱི་སྲིད་ཀྱི་འབྲེལ་ལམ་སོགས་གང་འཚམ་ཚད་མཐོ་བོ་ཡོད་ཀྱང་། རྒྱལ་སྤྱིའི་ཁྱོན་དུ་བོད་ཅེས་པ་བློས་མ་བཏང་བའི་ཐོག་ནས་ད་ལྟའང་རྒྱབ་སྐྱོར་ཤུགས་ཆེན་པོ་ཐོབ་པ་དེ། གཙོ་བོ་༸གོང་ས་རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པའི་འགན་འཁུར་བྱེད་ཕྱོགས། དེ་བཞིན་བོད་ནང་གི་བོད་མིའི་བློས་གཏོང་དང་ཆོད་སེམས་སོགས་གལ་ཆེན་ཡིན་པ་གཞི་རྩར་བཟུང་བའི་ཐོག་ནས་བོད་ཀྱི་གནས་སྟངས་ལ་ཐུགས་གནང་འཛིན་ས་ཆགས་འདུག དེང་སང་རྒྱལ་སྤྱིའི་ཁྱོན་དུ་དམག་འཁྲུག་སོགས་ཀྱི་ཐོག་ནས་འགྱུར་བ་ཆེན་པོ་འགྲོ་བཞིན་ཡོད་ཀྱང་། བོད་ཀྱི་གནས་སྟངས་བརྒྱུད་ནས་རྒྱ་ནག་གི་ཆབ་སྲིད་གནས་བབ་ལ་ཤུགས་རྐྱེན་འགྲོ་བཞིན་པ་ངོས་འཛིན་གསལ་བོ་ཆགས་ཡོད། མ་འོངས་པའང་དེའི་ཐོག་ཏུ་ང་ཚོས་འབད་བརྩོན་བྱ་དགོས་པའི་གནས་སྟངས་ཤིག་ཆགས་ཡོད། ཕྱི་ལོ་ ༡༩༧༠ ནང་དུ་རྒྱ་ནག་གཞུང་དང་མཉམ་དུ་སྐུ་ཚབ་ཀྱི་ལམ་ནས་འབྲེལ་བ་བཙུགས་ཡོད་པ་དང་། ད་ལྟ་འབྲེལ་བ་ཆད་ཡོད་པ་དེ་བསྐྱར་གསོ་ཡོང་ཐུབ་པའི་འབད་བརྩོན་བྱེད་པར་འགན་འཁུར་བཞིན་ཡོད། དེ་བཞིན་བོད་ནང་གི་འགྲོ་བ་མིའི་ཐོབ་ཐང་དང་། ཁོར་ཡུག་གི་གནས་སྟངས། ཆོས་དད་རང་དབང་། སྐད་ཡིག་གི་རང་དབང་སོགས་ལ་རྒྱ་ནག་གི་སྲིད་ཇུས་དང་མཉམ་དུ་འགྱུར་བ་ཐེབས་ཡོད་དུས། དེ་དག་རྒྱལ་སྤྱིའི་སྟེང་ཞུ་སྐུལ་བྱེད་ཐུབ་པའི་གནས་སྟངས་ཤིག་ཆགས་ཡོད། ཅེས་གསུངས་སོང་།
དེ་བཞིན་ཚོགས་ཐུན་དང་པོའི་སྟེང་སྤྱི་འཐུས་རྣམས་ཀྱིས་༸སྐུའི་གཅུང་པོ་མངའ་རིས་རིན་པོ་ཆེ་མཆོག་དགོངས་པར་རྫོགས་པར་ངག་བཅད་མྱ་ངན་གུས་འདུད་སྐར་མ་གཅིག་རིང་གནང་བ་དང་། སྐུ་གཤེགས་དེ་ཉིད་ཀྱི་མཛད་རྗེས་ལ་ཡི་རངས་དང་། དམ་པ་ཁོང་གི་ཚེ་རབས་ཀུན་ཏུ་བྱས་བསགས་སྡིག་ལྟུང་རྣམས་བྱང་ཞིང་དག་ནས་དལ་རྟེན་རིམ་བརྒྱུད་ཀྱིས་ཐར་པ་དང་ཐམས་ཅད་མཁྱེན་པའི་གོ་འཕང་ལ་མྱུར་དུ་རེག་པའི་སྨོན་འདུན་དང༌། ཤུལ་ལུས་ནང་མི་སྐུ་འཁོར་ཉེ་འབྲེལ་སློབ་ཚོགས་ལྟོས་བཅས་ཡོངས་ལ་ཞུ་རྒྱུ་བཅས་ཀྱི་མྱ་ངན་གུས་འདུད་ཀྱི་རྗེས་དྲན་གྲོས་འཆར་ཞིག་བཏོན་སོང་ལ། སྤྱི་ཟུར་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་མཆོག་ནི་ཕྱི་ལོ་ ༡༩༤༦ ལོར་བོད་ཀྱི་རྒྱལ་ས་ལྷ་སར་འཁྲུངས། ཕྱི་ལོ་ ༡༩༥༠ ལོར་མངའ་རིས་རིན་པོ་ཆེ་སྐུ་ཕྲེང་བཅོ་ལྔ་པའི་ཡང་སྲིད་དུ་ངོས་འཛིན་གྱིས་འབྲས་སྤུངས་སུ་ཆོས་ཞུགས་གནང༌། ཕྱི་ལོ་ ༡༩༧༡ ལོར་བཙན་བྱོལ་བོད་གཞུང་ཁོངས་སྲི་ཞུ་མགོ་འཛུགས་ཀྱིས། བོད་ཁྱིམ་དགེ་རྒན་དང་། བདེ་སྲུང་དྲུང་ཆེ་ལས་རོགས། སྐུ་སྒེར་ཡིག་ཚང་གི་དམིགས་བསལ་དྲུང་ཆེ་བཅས་ཀྱི་ཕྱག་ལས་ཕྱི་ལོ་ ༡༩༨༨ བར་རིམ་པར་གནང་བ་དང༌། དེའི་ནང་ཕྱི་ལོ་ ༡༩༧༤ ནས་ ༡༩༧༧ བར། གཞོན་ལྷན་སྤྱི་ཁྱབ་དབུས་རྒྱུན་སྐབས་གཉིས་པའི་ཚོགས་གཙོ་དང་། ལོ་གཉིས་རིང་དྭང་སློབ་དམག་སྡེ་ཨང་ ༢༢ ནང་ཞབས་ཞུ་བསྒྲུབས། ཕྱི་ལོ་ ༡༩༩༡ ནས་ ༡༩༩༦ བར་སྐབས་ ༡༡ པའི་བོད་མི་མང་སྤྱི་འཐུས་ལྷན་ཚོགས་སུ་མདོ་སྨད་སྤྱི་འཐུས་ཀྱི་ཐུགས་འགན་བཞེས། ཕྱི་ལོ་ ༢༠༠༧ ནས་ ༢༠༡༦ བར། ༸གོང་ས་༸ཏཱ་ལའི་བླ་མའི་དགེ་རྩའི་འགན་འཛིན་ལྷན་ཚོགས་ཀྱི་ཚོགས་མི་གནང༌། ཕྱི་ལོ་ ༢༠༡༡ ནས་ ༢༠༡༦ བར། ༸གོང་ས་༸སྐྱབས་མགོན་ཏཱ་ལའི་བླ་མའི་ལས་ཁུངས་དགའ་ལྡན་ཕོ་བྲང་ཡིད་ཆེས་དགེ་རྩའི་འགན་ལྷན་ཚོགས་མིའི་ཐུགས་འགན་བཞེས་པ་སོགས། སྐུ་ཚེ་ཧྲིལ་པོར་བོད་བསྟན་སྲིད་མི་རིགས་དང་། བོད་མིའི་སྒྲིག་འཛུགས། བོད་རྒྱ་ཆེའི་མང་ཚོགས་བཅས་ཀྱི་དོན་དུ་ཞབས་ཞུ་མཐར་སོན་གནང་བའི་ལྷག་བསམ་གྱི་འཇུག་སྒོ་ཆེར་བསྐྱེད་གནང་མཁན་མཛད་རྗེས་ཅན་ཞིག་ཡིན།
གསར་འགོད་པ། དཔལ་ལྡན། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
