བོད་མི་ཚེ་རིང་བདེ་སྐྱིད་ལགས་ཕྱི་ལོ་ ༢༠༢༦ ལོའི་ (Queens) གྲོང་ཁྱེར་གྱི་སྟོབས་ཤུགས་ཆེ་བའི་མི་སྣ་ ༡༠༠ ནང་མཚན་འདོན་དང་བསྟན་འཛིན་གསལ་སྒྲོན་ལགས་ལོ་སི་ཨན་ཇི་ལེ་སི་གསར་ཤོག་གི་ཕྱི་ལོ་ ༢༠༢༦ ལོའི་དངུལ་ཁང་དང་དངུལ་རྩིས་ལས་དོན་གྱི་མཁས་པའི་ཆེ་བསྟོད་ཐོབ་འདུག
ལོ་ལྟར་ནེའུ་ཡོག་གྲོང་ཁྱེར་དང་མངའ་སྡེ་ (City & State New York: Home) ཞེས་པའི་གསར་ཁང་ཞིག་གིས་ལོ་གཅིག་ནང་ཨ་རིའི་ནེའུ་ཡོག་ནང་གི་གྲོང་ཁྱེར་ཆེ་ཤོས་(Queens) ནང་གི་ཆབ་སྲིད་དང་། ཚོང་འབྲེལ། སྤྱི་ཚོགས་ཞབས་ཞུ་སོགས་ཀྱི་ཐོག་ནས་ཤུགས་རྐྱེན་ཆེ་ཤོས་ཀྱི་མི་སྣ་རྣམས་མཚན་འདོན་གནང་གི་ཡོད་པ་ལྟར། ཕྱི་ལོ་ ༢༠༢༦ ལོའི་ཐོ་གཞུང་ནང་ཨ་རིའི་གྲོང་ཁྱེར་ནེའུ་ཡོག་ཏུ་གནས་བཞུགས་བོད་པའི་བུད་མེད་ཚེ་རིང་བདེ་སྐྱིད་ལགས་མཚན་འདོན་གནང་འདུག
ནེའུ་ཡོག་བོད་པའི་ཞབས་ཞུ་ཁང་ (NY Tibetan Service Center) གི་འཛིན་སྐྱོང་འགན་འཛིན་ཚེ་རིང་བདེ་སྐྱིད་ལགས་གྲོང་ཁྱེར་དེའི་སྤྱི་ཚོགས་ཞབས་ཞུའི་སྣེ་ཁྲིད་ཐོག་ཤུགས་རྐྱེན་ཆེ་ཤོས་ཡོད་པའི་ངོས་འཛིན་འོག ཕྱི་ལོ་ ༢༠༢༦ ལོའི་ (Queens) གྲོང་ཁྱེར་གྱི་སྟོབས་ཤུགས་ཆེ་བའི་མི་སྣ་ ༡༠༠ ནང་ནས་ཨང་རིམ་ ༩༨ པར་འདེམས་ཐོན་བྱུང་འདུག
དེ་འབྲེལ་ཚེ་རིང་བདེ་སྐྱིད་ལགས་ཀྱིས་སྒེར་གྱི་ངོ་དེབ་སྟེང་། ཕྱི་ལོ་ ༢༠༢༦ ལོའི་ (Queens) གྲོང་ཁྱེར་གྱི་སྟོབས་ཤུགས་ཆེ་བའི་མི་སྣ་ ༡༠༠ ནང་བསྐྱར་དུ་ཐོ་འགོད་བྱས་པར་ཐུགས་རྗེ་ཆེ་ཞུ་རྒྱུ་ཡིན། ང་ལ་རྒྱབ་སྐྱོར་བྱེད་མཁན་དང་ཡིད་ཆེས་བྱེད་མཁན་རྣམས་ལ་ཐུགས་རྗེ་ཆེ། ཁྱེད་ཚོའི་སེམས་ཤུགས་དེས་ཁྱད་པར་ཆེན་པོ་བཟོ་ཡི་འདུག ཅེས་བརྗོད་འདུག
ཚེ་རིང་བདེ་སྐྱིད་ལགས་ནི་ནེའུ་ཡོག་བོད་པའི་ཞབས་ཞུ་ཁང་གི་འཛིན་སྐྱོང་འགན་འཛིན་ཡིན་ལ། གནས་སྤོའི་ཁྱིམ་ཚང་རྣམས་ལ་སོ་སོའི་རིག་གཞུང་དང་སྐད་ཡིག་གི་ལས་རིམ་དང་། སྤྱི་ཚོགས་ཞབས་ཞུ། རྒྱལ་ཁབ་གཞན་ནས་གནས་སྤོ་བྱས་པའི་གཞོན་སྐྱེས་རྣམས་ལ་ཤེས་ཡོན་དང་ལས་ཀའི་གོ་སྐབས་སྤྲོད་ཀྱི་ཡོད་ཅིང་། དེ་བཞིན་ཁོང་མོས་བདེ་སྐྱིད་སྔོན་འགྲོའི་སློབ་གྲྭ་ཞེས་བྱིས་པ་ལྟ་སྐྱོང་ཁང་དྲུག་གསར་འཛུགས་བྱས་ཡོད་པའི་ཁྲོད། བྱིས་བཅོལ་ཁང་ལྔ་ནེའུ་ཡོག་གྲོང་ཁྱེར་དུ་གསར་འཛུགས་བྱས་འདུག འདས་ལོར་བྱིས་པ་ལྟ་སྐྱོང་ཁང་དུ་ཆུ་ཚོད་ཕར་འགྱངས་ཀྱི་ཚོད་ལྟའི་ལས་གཞི་སྤེལ་བར་གྲོང་ཁྱེར་གྱི་འཆར་དངུལ་ནས་འགྲོ་གྲོན་གཏོང་དགོས་པའི་ཞུ་གཏུག་བྱས་ཡོད་པ་མ་ཟད། ཁོང་མོས་ས་གནས་ཀྱི་ཧི་མ་ལ་ཡ་དང་བོད་པའི་ཚོགས་པ། དེ་བཞིན་གྲོང་ཁྱེར་ལྷན་ཚོགས་ཀྱི་འཐུས་མི་ཇུ་ལི་ (Julie Won) དང་ལྷན་དུ་ནེའུ་ཡོག་གྲོང་ཁྱེར་དུ་བོད་ཀྱི་ལོ་གསར་ཉིན་མོར་གཞུང་འབྲེལ་གྱི་ཐོག་ནས་གུང་གསེང་ཡིན་པའི་ཁྲིམས་གཞི་གཏན་འབེབས་བྱེད་པའི་རོགས་རམ་བྱས་ཡོད་པ་རེད། འདས་ལོར་ཡང་ཚེ་རིང་བདེ་སྐྱིད་ལགས་ནེའུ་ཡོག་གྲོང་ཁྱེར་དང་མངའ་སྡེ་ཞེས་པའི་གསར་ཁང་གི་ཕྱི་ལོ་ ༢༠༢༥ ལོའི་ (Queens) གྲོང་ཁྱེར་ནང་གི་སྟོབས་ཤུགས་ཆེ་བའི་མི་སྣ་ ༡༠༠ ཁོངས་སུ་ཚུད་འདུག
ནེའུ་ཡོག་བོད་པའི་ཞབས་ཞུ་ཁང་ནི་ཕྱི་ལོ་ ༢༠༡༢ ལོར་བོད་མི་དང་། རྒྱལ་ཁབ་གཞན་ནས་གནས་སྤོས་ཡུལ་མིའི་ཁྱིམ་ཚང་རྣམས་ཀྱིས་རྒྱལ་ཁབ་གཞན་དུ་འཚོ་བ་སྐྱེལ་བར་རྒྱབ་སྐྱོར་དང་། ལམ་སྟོན། སོ་སོའི་རིག་གཞུང་དང་འབྲེལ་བ་འཛུགས་ཐུབ་པའི་ས་ཆ་ཞིག་བསྐྲུན་རྒྱུའི་ཆེད་དུ་བཙུགས་པ་ཞིག་རེད། ཚོགས་པ་དེས་བྱིས་པ་དང་། ན་གཞོན། རྒན་རྒོན་སོགས་ལ་ཤེས་ཡོན་དང་ལས་ཀ དེ་བཞིན་སྨན་བཅོས་ལྟ་སྐྱོང་སོགས་ཀྱི་ཞབས་ཞུ་དང་། སོ་སོའི་རིག་གཞུང་སྲུང་སྐྱོབ་བྱ་རྒྱུར་རོགས་འདེགས་ཞུ་ཡི་ཡོད་འདུག
ཡང་། ལོ་ལྟར་ལོ་སི་ཨན་ཇི་ལེ་སི་དུས་བབ་གསར་ཤོག་གི་ཚོང་ལས་སྡེ་ཚན་གྱིས་དངུལ་ཁང་དང་དངུལ་རྩིས་ལས་རིགས་ནང་གི་ཆེད་ལས་མི་སྣ་གྲགས་ཅན་རྣམས་མིང་འདོན་གནང་གི་ཡོད་པ་ལྟར། ཨ་རིར་གནས་བཞུགས་བོད་པའི་བུད་མེད་བསྟན་འཛིན་གསལ་སྒྲོན་ལགས་ལ་ལོ་སི་ཨེན་ཇི་ལེ་སི་དུས་བབ་ (Los Angeles Times) གསར་ཤོག་གི་ཕྱི་ལོ་ ༢༠༢༦ ལོའི་དངུལ་ཁང་དང་དངུལ་རྩིས་ལས་དོན་གྱི་མཁས་པའི་ཆེ་བསྟོད་ (Finance Visionary) ཐོབ་ཡོད་འདུག་ལ། ཁོང་མོས་ཕྱི་ལོ་ ༢༠༢༢ ལོར་ཁེ་ལས་མ་རྩའི་ལས་ཁུངས་ (Pulse Fund) ཞེས་པ་གསར་འཛུགས་དང་དོ་དམ་མཉམ་ལས་གནང་ཡོད་འདུག ཕྱི་ལོ་ ༢༠༢༥ ལོར་ཐབས་ཇུས་ལྡན་པའི་མ་རྩ་འཛུགས་འཇོག་གི་ལས་གཞི་བཞི་དངོས་སུ་འཚོལ་སྒྲུབ་གནང་ཞིང་། དེ་ཡང་ནགས་ཚལ་བསྐྱར་གསོའི་ལས་གཞི་ (Mast Reforestation) ལ་ཨ་སྒོར་ས་ཡ་ ༢༥ ཡི་ (Series B) ཅན་གྱི་མ་རྩ་བསྡུ་རུབ་ནང་མཉམ་འབྲེལ་སྣེ་ཁྲིད་གནང་བ་དང་། གློག་ཤུགས་འཕྲུལ་ཆས་མཁོ་སྤྲོད་བྱེད་མཁན་ (Endera) ལ་ཨ་སྒོར་ས་ཡ་ ༤༩ ཡི་མ་རྩ་བསྡུ་རུབ་ནང་མཉམ་ཞུགས་གནང་ཡོད་འདུག
དེ་འབྲེལ་བསྟན་འཛིན་གསལ་སྒྲོན་ལགས་ཀྱིས་སྒེར་གྱི་སྤྱི་ཚོགས་དྲ་ལམ་ནང་། ཕྱི་ལོ་ ༢༠༢༦ ལོའི་ལོ་སི་ཨན་ཇི་ལེ་སི་དུས་བབ་གསར་ཤོག་གི་དངུལ་ཁང་དང་དངུལ་རྩིས་ལས་དོན་གྱི་མཁས་པའི་ཆེ་བསྟོན་ཐོབ་པར་དགའ་སྤོབས་ཆེན་པོ་བྱུང་། དུས་རྒྱུན་ནས་མི་རྣམས་ཀྱིས་དངུལ་ཁང་དང་དངུལ་རྩིས་ལས་དོན་གྱི་མཁས་པའི་ཆེ་བསྟོད་ (Finance Visionary) ཅེས་ཐོས་སྐབས་ལོ་ན་ ༣༠ སོན་པའི་བུད་མེད་ཅིག་ཡིན་པར་ཡིད་ཆེས་བྱེད་ཀྱི་མེད་པ་དང་། ངོས་འཛིན་དེ་ནི་ང་ཚོའི་རུ་ཁག་གིས་ལོ་མང་རིང་ཡིད་ཆེས་བརྟན་པོ་དང་དཀའ་ལས་རྒྱག་པའི་འབྲས་བུ་ཞིག་མཚོན་གྱི་ཡོད། ཅེས་སོགས་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
