དཔལ་ས་སྐྱའི་༸སྐྱབས་མགོན་༸གོང་མ་ཁྲི་འཛིན་ ༤༣ པ་ཛྙཱན་བཛྲ་རིན་པོ་ཆེ་མཆོག་གིས་ཟླ་ ༣ ཚེས་ ༦ ནས་ཟླ་གཉིས་རིང་ཨོ་གླིང་དུ་ཆོས་ཚོགས་ཁག་བརྒྱད་ལ་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་པའི་ཁྲོད། ཨོ་གླིང་གི་དཔལ་འབྱོར་བློན་ཆེན་གྱིས་དབུས་པའི་གནད་ཡོད་མི་སྣ་དང་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་གཙོ་བྱས་པའི་བོད་རིགས་རྣམས་ལ་བཀའ་ཆོས་མཛད་འཕྲིན་བསྐྱངས་དང་སྐྱོང་མུས་ཡིན།
ཟླ་སྔོན་མ་ཕྱི་ཟླ་ ༣ ཚེས་ ༦ ཉིན་དཔལ་ས་སྐྱའི་༸སྐྱབས་མགོན་༸གོང་མ་ཁྲི་འཛིན་ ༤༣ པ་ཛྙཱན་བཛྲ་རིན་པོ་ཆེ་མཆོག་ཨོ་སི་ཊོ་ལི་ཡའི་གྲོང་ཁྱེར་མེལ་བྷོན་དུ་ཞབས་སོར་འཁོད་གནང་ཡོད་པ་དང་རིམ་བཞིན་ས་སྐྱ་ཆོས་འཁོར་ལྷུན་པོ་ཆོས་ཚོགས་དང་ཝིག་ཊོ་རི་ཡ་བོད་རིགས་ཚོགས་པ་སོགས་ནས་གསོལ་འདེབས་བཞིན་དྲག་པོ་གསུམ་སྒྲིལ་རྗེས་གནང་དང་མི་མང་མཇལ་ཁ་དང་ཕུར་པའི་བཀའ་བསྒོ་སོགས་གནང་ནས་རིམ་བཞིན་མཛད་རིམ་ཁག་དབུ་འཛུགས་ཞུས། ཚེས་ ༡༨ ཉིན་བླ་མ་ཆོས་གྲགས་རིན་པོ་ཆེའི་ (SIBA) ཆོས་ཚོགས་སུ་ཞབས་སོར་འཁོད་ནས་ཀྱེ་རྡོར་རྒྱུ་དབང་སོགས་གསུང་ཆོས་ཁག་དང་ཚེས་ ༢༨ ཉིན་ཉེ་འཆར་གསར་བཞེངས་མཛད་པའི་དཔལ་ས་སྐྱའི་ཞི་བདེ་གཙུག་ལག་ཁང་དབུ་འབྱེད་བཀའ་དྲིན་བསྐྱངས། མཛད་སྒོའི་སྐུ་མགྲོན་དུ་ཨོ་སེ་ཊོ་ལི་ཡའི་དབུས་གཞུང་གི་དཔལ་འབྱོར་བློན་ཆེན་ (Minister for Finance, Katy Gallaghe) ཀེ་ཊི་གྷ་ལ་གྷེ་དང་རང་གཞུང་དོན་གཅོད་ཀརྨ་སེང་གེ་མཆོག་ཡེ་ཤུ་བླ་ཆེན་ཨར་ཅ་བི་ཤོབ་སོགས་ས་གནས་དཔོན་རིགས་མང་པོ་དང་། བླ་མ་ཆོས་གྲགས་དབུས་པའི་ཆོས་ཚོགས་ཀྱི་ཚོགས་མི་དང་སྦྱིན་བདག ས་གནས་བོད་རིགས་བཅས་མི་མང་སུམ་བརྒྱ་བརྒལ་བ་མཉམ་འཛོམ་ཐོག་༸སྐྱབས་མགོན་༸གོང་མ་ཁྲི་འཛིན་མཆོག་གི་གསུང་བཤད་བཀའ་སློབ་དང། དབུས་གཞུང་བློན་ཆེན་གྱི་གསུང་བཤད་གྲུབ་རྗེས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཆོག་གི་གསུང་འཕྲིན་བྱིན་ཅན་རང་གཞུང་གི་དོན་གཅོད་སྐུ་ངོ་ཀརྨ་སེངྒེ་མཆོག་ནས་ལྗགས་ཀློག་གནང་གྲུབ་རྗེས་བསྟན་པའི་སྦྱིན་བདག་ཆེ་བ་བཅུ་ལ་ལེགས་སྐྱེས་སྟོན་པའི་ཞལ་ཐང་སྤུས་ལེགས་རེ་༸སྐྱབས་མགོན་མཆོག་གི་ཕྱག་ནས་གསོལ་རས་སྩོལ་གནང་བ་དང་། དཔལ་ས་སྐྱའི་ཞི་བདེའི་བསྟི་གནས་སྒོ་འབྱེད་རྟེན་འབྲེལ་གསོལ་ཐུད་གཏུབ་གནང་གྲུབ་རྗེས་ཁེན་བེ་རའི་བོད་རིགས་དང་འབྲུག་རིགས་སོགས་ནས་གཞས་སྣ་འཁྲབ་སྟོན་དང་སྐུ་མགྲོན་རྣམས་ལ་དཀར་ཟས་གསོལ་སྟོན་ཕུལ་གནང་བ་བཅས་ཀྱི་མཛད་སྒོ་རྒྱལ་ཁའི་ངང་ལེགས་པར་གྲུབ།
སྤྱིར་བོད་རིགས་ཉུང་ཤས་གཅིག་ཨོ་གླིང་དུ་གཞིས་སྤོས་གནང་བའི་གྲས་སུ་ཚར་པ་ལོ་ཆེན་བླ་མ་ཆོས་གྲགས་རིན་པོ་ཆེ་མཆོག་ཨོ་གླིང་དུ་སྤྱི་ལོ་ ༡༩༨༥ ལོར་གཞིས་སྤོས་ཀྱིས་མཐོ་རིམ་སློབ་གྲྭར་གཙུག་ལག་རབ་འབྱམས་པའི་སློབ་གཉེར་གནང་ཞོར་དུ་ནང་ཆོས་ངོ་སྤྲོད་དང་ཞི་གནས་སྒོམ་སྒྲུབ་སོགས་འཆད་འཁྲིད་གནང་ནས་ས་སྐྱ་བློ་གསལ་ཆོས་རྫོང་གི་གཙོས་པའི་ཆོས་ཚོགས་བཅུ་ལྷག་ཆེད་འཛུགས་གནང་ནས་༸གོང་ས་མཆོག་དང་། དཔལ་ས་སྐྱའི་བླ་ཆེན་༸གོང་མ་ཡབ་སྲས་གསུམ་དང་བདེ་བར་གཤེགས་པ་བཅོ་བརྒྱད་ཁྲི་ཆེན་རིན་པོ་ཆེ་སོགས་གདན་ཞུས་ཀྱིས་དད་ལྡན་སྟོང་ཕྲག་མང་པོར་ཐར་པའི་ས་བོན་བསྐྲུན་པ་མ་ཟད། ཨོ་གླིང་གཞི་རིམ་སློབ་གྲྭ་དུ་མར་སེམས་ཁམས་རིགས་པ་དང་བཟང་སྤྱོད་སྐོར་འཆད་འཁྲིད་དང་སྤྱི་ཚོགས་ཞབས་ཞུ་ཇི་སྙེད་གཅིག་གནང་བར། ཨོ་གླིང་ས་གནས་དང་དབུས་གཞུང་ནས་ཆེ་མཐོང་གིས་གཟེངས་རྟགས་མང་པོ་ཐོབ་ཡོད། སྤྱི་ལོ་༢༠༡༧ ལོར་ཨོ་གླིང་སྲིད་གཞུང་ནས་རྒྱལ་སའི་མངའ་ཁུལ་དུ་ཞི་བདེའི་བསྟི་གནས་འདེབས་ཡུལ་ས་ཆ་སྤུས་ལེགས་ཤིག་གནང་བ་ལྟར་འདས་པའི་ལོ་མང་རིང་བོད་ལུགས་གཙུག་ལག་ཁང་བཟོ་བཀོད་ལེགས་པ་ཕྱི་ནང་གི་རྟེན་དང་བརྟེན་པར་བཅས་གསར་བཞེངས་ལེགས་གྲུབ་དང་། བདེ་བར་གཤེགས་པ་༸སྐྱབས་རྗེ་བཅོ་བརྒྱད་ཁྲི་ཆེན་རིན་པོ་ཆེ་མཆོག་གི་གདུང་རྟེན་བྱང་ཆུབ་མཆོད་རྟེན་མཐོ་ཚད་ཕེ་ཊི་ཉེར་བརྒྱད་ཅན་ཅིག་ཀྱང་གསར་བཞེངས་ལེགས་གྲུབ་ཀྱིས་ད་ལམ་དཔལ་ས་སྐྱའི་ཁྲི་འཛིན་ཞེ་གསུམ་པ་༸སྐྱབས་མགོན་ཛྙན་བཛྲ་རིན་པོ་མཆོག་གིས་དཔལ་ཀྱེ་རྡོ་རྗེའི་སྒོ་ནས་རབ་གནས་ཉིན་གཅིག་དང་བསྟན་པ་རྒྱས་ཞིང་བླ་མའི་སྐུ་ཚེ་བརྟན་པ་སོགས་ལ་དམིགས་ནས་ཉིན་གསུམ་རིང་ཨོ་གླིང་དུ་འཁོན་ལུགས་རྡོ་རྗེ་ཕུར་པའི་སྒྲུབ་མཆོད་ཐོག་མ་དེ་ཚོགས་གནང་ཡོད། ཨོ་གླིང་དུ་བོད་ཀྱི་ཐུན་མོང་མ་ཡིན་པའི་གཙུག་ལག་ཁང་སྤུས་ལེགས་གསར་བཞེངས་གྲུབ་པ་འདིའང་༸རྒྱལ་བའི་གོ་སྟོན་དང་བྱམས་བརྩེའི་ལོ་བསྲུང་བརྩི་ཞུ་རྒྱུའི་ཆ་རྐྱེན་བླ་ན་མེད་པ་མ་བསྒྲིགས་ལྷུན་འགྲུབ་བྱུང་བ་འདིའང་གོང་ས་མཆོག་གི་ཐུགས་རྗེ་ཁོ་ན་ཡིན་པ་གོར་མ་ཆག
ཕྱི་ཚེས་ ༣༠ ཉིན་༸སྐྱབས་མགོན་༸གོང་མ་ཁྲི་འཛིན་ཛྙཱན་བཛྲ་རིན་པོ་ཆེ་མཆོག་ནས་ཨོས་ཊེ་ལི་ཡའི་རྒྱལ་ས་ཁེན་བྷེ་རའི་དཔལ་ས་སྐྱའི་ཞི་བདེའི་གཙུག་ལག་ཁང་དུ་མི་མང་ལ་ཚེ་དབང་དང་། ཁེན་བྷེ་ར་བོད་རིགས་མཐུན་ཚོགས་ནས་ཇི་ལྟར་གསོལ་བ་བཏབ་པ་ལྟར་མང་ཚོགས་ལ་བླང་དོར་བཀའ་སློབ་དང་ཕུར་པའི་བཀའ་བསྒོ་བཅས་བཀྲིན་སྩལ། ཉིན་རྒྱབ་ཨོས་ཊེ་ལི་ཡའི་རྒྱལ་ས་ཁེན་བྷ་ར་ནས་ཆིབས་ཐོན་གྱིས་གྲོང་སྡེ་མིལ་ཊོན་དུ་ཞབས་སོར་འཁོད་ནས་དེར་ཡོད་བོད་རིགས་རྣམས་ལ་བཀའ་བསྒོ་དང་མཇལ་ཁ། གཞན་ཡང་ཨ་ལ་ཌ་ལ་སློབ་ཆེན་དུ་ཤེས་ཡོན་དང་ནང་སེམས་ཀྱི་གལ་གནད་སྐོར་སློབ་ཕྲུག་དང་ཕ་མ་རྣམས་ལ་བཀའ་སློབ་གནང་། དགོང་མོ་འཇམ་དབྱངས་ཆོས་ཚོགས་སུ་འཕགས་མཆོག་ཐུགས་རྗེ་ཆེན་པོ་ཚེམ་བུ་ལུགས་ཀྱི་རྗེས་གནང་དང་སློབ་གསར་ཁག་ཅིག་ལ་སྐྱབས་སྡོམ་འབོགས་ཆོག་བསྩལ། ཟླ་འདིའི་ཕྱི་ཚེས་ ༥ ནས་ ༧ བར་བྲོག་མི་ཆོས་ཚོགས་དང་སྐྱེ་དགོན་བརྩེ་ཆེན་བསམ་འགྲུབ་གླིང་ཆོས་ཚོགས་སོ་སོར་ཆིབས་བསྒྱུར་གྱིས་གསུང་ཆོས་དང་བཀའ་སློབ་སོགས་ཀྱི་མཛད་རིམ་བསྐྱངས་ཡོད། 
