དུས་ཆེན་གཉིས་འཛོམས་དང་བསྟུན་ཇོ་ནང་གཞིས་བྱེས་གཉིས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་དང་བཀའ་དྲིན་རྗེས་དྲན་དུ་ཇོ་ནང་ཏཱ་ར་ནཱ་ཐ་གཟེངས་རྟགས་འབུལ་ལམ་ཞུས་སོང་།
དེ་རིང་དཔལ་དུས་ཀྱི་འཁོར་ལོ་རྗེས་སུ་བཟུང་བའི་དུས་ཆེན་དང་ཚེས་པ་བཅོ་ལྔར་བསྟུན། ཞོགས་པའི་ཆུ་ཚོད་ ༨ ཙམ་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་དུས་འཁོར་སྒྲུབ་མཆོད་ཀྱི་དངོས་གཞིའི་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་སོང་། དེ་བཞིན་དེ་རིང་ཕྱི་ཚེས་ ༡ ཉིན་བཞུགས་སྒར་༧རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་ཇོ་ནང་གཞིས་བྱེས་གཉིས་ཀྱི་ངོས་ནས་བརྟན་བཞུགས་བསྟར་འབུལ་དང་། ཇོ་ནང་ཏཱ་ར་ནཱ་ཐ་གཟེངས་རྟགས་འབུལ་ལམ་ཞུས་སོང་། སྐབས་དེར་ཇོ་ནང་གི་དགོན་པ་གསུམ་དང་། མི་མང་བཅས་ཁྱོན་མི་གྲངས་ ༡༤༠ ལྷག་ལ་མཇལ་ཁ་གནང་སོང་ལ། ཇོ་ནང་གི་དགེ་འདུན་པ་རྣམས་ཀྱིས་དུས་འཁོར་རྒྱུད་ཀྱི་སྙིང་པོའི་ཀློག་རྒྱུགས་ཕུལ་སོང་།
ཇོ་ནང་༧རྒྱལ་ཚབ་རིན་པོ་ཆེ་ཆོས་ཀྱི་སྣང་བ་མཆོག་གིས་འདི་གའི་གསར་འགོད་པར། དེ་རིང་དཔལ་རྒྱལ་བ་ཇོ་ནང་པའི་བོད་གཞིས་བྱེས་གཉིས་ཀྱི་ཆོས་རྒྱུད་འཛིན་པ་ཡོངས་ཀྱི་ཚབ་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་དང་གཟེངས་རྟགས་ཤིག་ཕུལ་ཡོད། དེའི་ཐོག་མའི་བྱུང་རིམ་ནི་འདས་པའི་ལོ་གཅིག་གི་སྔོན་དུ་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་འདུ་ཐེངས་ཁ་ཤས་ཤིག་འཚོགས་པའི་སྐབས། ༧གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་ཤིག་དབུལ་དགོས་པའི་གྲོས་མཐུན་བྱུང་བ་དང་། གཟེངས་རྟགས་དེའི་མིང་ལ་ཇོ་ནང་ཏཱ་ར་ནཱ་ཐ་གཟེངས་རྟགས་ཞེས་གཏན་འབེབས་བྱུང་བ་རེད། ཁ་སང་ང་ཚོས་སྒྲུབ་བཤགས་འཚོགས་ཏེ། ཀུན་མཁྱེན་ཡབ་སྲས་བཅོ་ལྔ་ཡི་ཆོ་གའི་སྒོ་ནས་བརྟན་བཞུགས་དངོས་སུ་ཕུལ་བ་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནི་བོད་གངས་ཅན་ལྗོངས་ཀྱི་བསྟན་པ་སྤྱི་དང་བྱེ་བྲག་ཏུ་༧རྒྱལ་བ་ཇོ་ནང་པར་མ་དགོན་སོགས་གནང་ནས་དཔལ་རྒྱལ་བ་ཇོ་ནང་པའི་བསྟན་པ་ལ་བཀའ་དྲིན་ཆེན་པོ་ཡིན། ད་ལན་དགོན་སྡེ་གསུམ་གྱི་མཁན་བླ་སྤྲུལ་དགེ་བའི་བཤེས་གཉེན་རྣམ་པ་དང་། དགེ་འདུན་པ། སྦྱིན་བདག་སོགས་མི་གྲངས་བརྒྱ་དང་བཞི་བཅུ་ལྷག་ཅིག་འཛོམས་ནས། སྐུའི་དྲུང་དུ་བཅར་ནས་སྐུ་གསུང་ཐུགས་རྟེན་དང་། མནྜལ། གཟེངས་རྟགས་དང་བཅས་ཕུལ་ཟིན་པ་ཡིན། ཞེས་གསུངས་བྱུང་།
ཇོ་ནང་ཏཱ་ར་ནཱ་ཐ་གཟེངས་རྟགས་ཀྱི་མཚོན་དོན་ནི། ༧མགོན་པོ་གང་ཉིད་ཚེ་ཡི་ལྷ་ཚོགས་ཀྱིས་རྗེས་སུ་བཟུང་ནས་སྐུ་ཚེ་མི་ཤིགས་རྡོ་རྗེ་ཁམས་སུ་བརྟན་པ་མཚོན་ཆེད་དུ་ཚེ་བུམ་གྱི་དབྱིབས་དང་ལྡན་པ། ལྷ་གཅིག་འཕགས་མཆོག་ཕྱག་ན་པད་མོའི་སྐུའི་རྣམ་པར་རོལ་བ་མཚོན་ཆེད་དུ་པད་མ་དཀར་པོ་འདབ་མ་བརྒྱད་པ། དེའི་སྟེང་དུ་བཀའ་འཁོར་ལོ་གསུམ་གྱི་དགོངས་དོན་མ་ལུས་པ་ཐུགས་སུ་ཆུད་ཅིང་སྡེ་སྣོད་གསུམ་གྱི་བསྟན་པའི་རྒྱལ་མཚན་སྒྲེང་བའི་བསྟན་པའི་བདག་པོ་མཚོན་ཆེད་དུ་གསེར་དངུལ་གྱིས་གྲུབ་པའི་ཆོས་ཀྱི་འཁོར་ལོ་གསུམ། དེའི་སྟེང་དུ་ཐབས་དང་ཤེས་རབ་གཉིས་ཏེ་སྟོང་ཉིད་སྙིང་རྗེ་ཟུང་དུ་འཇུག་པའི་ལམ་བཟང་གསལ་བར་མཛད་པ་མཚོན་བྱེད་ཉི་ཟླའི་གདན། དེའི་སྟེང་དུ་རྒྱུད་སྡེ་བཞི་ཡི་དགོངས་དོན་དང་ལྷག་པར་དུ་རྒྱུད་ཐམས་ཅད་ཀྱི་རྒྱལ་པོ་དཔལ་མཆོག་དུས་ཀྱི་འཁོར་ལོའི་བསྟན་པ་ལ་མངའ་བརྙེས་པ་མཚོན་ཆེད། ཕྱི་འཇིག་རྟེན་གྱི་རྣམ་བཞག་དང་། ནང་རྡོ་རྗེ་ལུས་ཀྱི་གནས་ཚུལ། གསང་བ་བསྐྱེད་རྫོགས་གཉིས་ཀྱི་ངོ་བོ། ཡང་གསང་འབྲས་བུ་སངས་རྒྱས་ཀྱི་རང་བཞིན་མཚོན་པའི་ཇོ་ནང་པའི་ལུགས་ཀྱི་རྣམ་བཅུ་དབང་ལྡན་བཅས་གདུལ་བྱ་འདུལ་བྱེད་སོགས་ཀྱི་རྟེན་འབྲེལ་གྱི་གནད་དུ་མ་ཉེ་བར་མཚོན་པའི་རིན་པོ་ཆེའི་མཚོན་བྱེད་གསེར་དངུལ་ལས་བཞེངས་པ་ཞིག་ཡིན་འདུག
༧གོང་ས་མཆོག་ལ་མཇལ་བཅར་ཞུས་ཏེ་ཚོར་སྣང་ཇི་བྱུང་དང་འབྲེལ་ནས་མཁན་སྤྲུལ་ཀུན་དགའ་ཆོས་འཕེལ་ལགས་ཀྱིས། ད་ལན་ང་ཚོ་དཔལ་རྒྱལ་བ་ཇོ་ནང་པའི་གཞིས་བྱེས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ལ་ཕེབས་པ་དང་། དེ་རིང་དམིགས་བསལ་གྱིས་དཔལ་དུས་ཀྱི་འཁོར་ལོ་རྗེས་སུ་བཟུང་བའི་དུས་ཆེན་ཁྱད་པར་ཅན་ལ་ཇོ་ནང་ཏཱ་ར་ནཱ་ཐ་གཟེངས་རྟགས་ཕུལ་ཐུབ་པ་དེ་ཧ་ཅང་གི་སྐལ་བ་བཟང་པོ་དང་། མི་ཚེའི་ནང་གི་རྡོ་རིང་ཆེན་པོ་ཞིག་དང་། དྲན་རྟེན་ཆེན་པོ་ཞིག་ཆགས་སོང་བསམ་པའི་ཚོར་སྣང་དང་དགའ་སྤོབས་ཆེན་པོ་བྱུང་། ད་ལན་གྱི་འདི་ལ་བརྟེན་ནས་༧གོང་ས་མཆོག་སྐུ་ཚེ་སྐལ་བརྒྱར་བརྟན་པ་དང་། བོད་གཞིས་བྱེས་ཡོངས་མཚོན་པའི་འཛམ་གླིང་ཞི་བདེ་ཡོང་རྒྱུའི་སྨོན་ལམ་རྒྱག་གི་ཡོད། ཅེས་འགྲེལ་བརྗོད་གནང་བྱུང་།
དགའ་ལྡན་ཕོ་བྲང་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྷ་སའི་ཐེག་ཆེན་ཆོས་གླིང་གཙུག་ལག་ཁང་དུ་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
