རྩོམ་པ་པོ། བློ་བཟང་ཨོ་རྒྱན།
རྩོམ་ཁུངས། བོད་ཀྱི་དུས་བབ།
དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༦ ཟླ་ ༢ ཚེས་ ༡༣ ཉིན་སྲིད་སྤྱི་འོས་བསྡུ་ཆེན་མོའི་གྲུབ་འབྲས་གསལ་བསྒྲགས་གནང་བའི་ནང་། སྲིད་སྐྱོང་ལས་ཐོག་སྤེན་པ་ཚེ་རིང་ལ་འོས་གྲངས་ ༣༡༣༢༥ ཐོབ་ཡོད་པ་དེ་འོས་ཐོབ་བརྒྱ་ཆ་ ༦༡་༠༢༥ ཡོད་ལུགས་བཀོད་འདུག
གསལ་བསྒྲགས་དེའི་ནང་། སྔོན་འགྲོ་འོས་བསྡུའི་ནང་ཆ་ཤས་ལེན་མཁན་འོས་འཕེན་པ་གྲངས་ ༥༡༡༤༠ ནས་སྲིད་སྐྱོང་གི་འོས་མི་གྲངས་ ༡༠༣ ལ་འོས་ཤོག་འཕངས་ཚུལ་གསལ་བ་ལྟར་ན། རྩིས་རིག་གི་ལམ་ནས་རྩིས་བསྐོར་བྱས་པའི་རྩིས་འབྲས་ནི་(༣༡༣༢༥÷༥༡༡༤༠)x༡༠༠%=༦༡.༢༥༣༤% ཡིན་པས། འོས་བསྡུ་ལས་ཁང་ནས་གྲངས་ཆུང་ ༢༥ ཡི་ཚབ་ཏུ་གྲངས་ཆུང་ ༠༢༥ བཀོད་པ་དེས་སྤེན་པ་ཚེ་རིང་གི་འོས་ཐོབ་བརྒྱ་ཆ་གྲངས་ཆུང་ ༢༣ ཉུང་འཕྲི་བྱས་ཏེ། འོས་ཤོག་གྲངས་ ༡༡༧.༦ རྩིས་མེད་བཏང་བ་ཆགས་ཡོད། ཨང་རྩིས་ཀྱི་ནོར་འཁྲུལ་འདི་ལྟ་བུའང་དབུས་འོས་བསྡུ་ལས་ཁང་ནས་ད་བར་བཟོ་བཅོས་གནང་མི་འདུག
བལ་ཡུལ་མཆོད་འཇོར་ས་གནས་འགོ་འཛིན་ལས་ཁུངས་ཀྱི་ལས་ཐམ་དང་མིང་རྟགས། ས་གནས་འོས་བསྡུའི་ཚོགས་མི་དང་ཟུར་དཔང་ ༩ ཡི་མིང་རྟགས་བཀོད་པའི་ཡིག་ཆ་གཞིར་བཟུང་ཚེ། མཆོད་འཇོར་ས་གནས་སུ་སྲིད་སྤྱིའི་སྔོན་འགྲོའི་འོས་བསྡུའི་ནང་མཉམ་ཞུགས་གནང་མཁན་ཁྱབ་ཁོངས་དགོན་སྡེ་ཁག་དང་། སློབ་གྲྭ། སྐྱིད་སྡུག་དང་ཁ་འཐོར་མི་མང་བཅས་ས་གནས་ཁག་ ༢༤ ནང་འོས་འཕེན་པ་ ༡༨༣༡ བྱུང་ཡོད་པ་དང་། སྤེན་པ་ཚེ་རིང་ལ་འོས་ཤོག་གྲངས་ ༡༠༢༥ ཐོབ་ཡོད།
གལ་སྲིད་དབུས་འོས་བསྡུ་ལས་ཁང་ནས་སྤེན་པ་ཚེ་རིང་གི་མཆོད་འཇོར་ས་གནས་ཀྱི་སྔོན་འགྲོའི་འོས་ཐོབ་ཆ་ཚང་རྩིས་མེད་བཏང་བའི་དབང་དུ་བཏང་ན། སྤེན་པ་ཚེ་རིང་གི་འོས་ཐོབ་བསྡོམས་འབོར་(31325–1025=) ༣༠༣༠༠ ལ་ཆག་གི་ཡོད་ནའང་། འོས་འཕེན་པའི་བསྡོམས་འབོར་ཡང་(51140–1381) ༤༩༧༥༩ ལ་ཆག་གི་ཡོད་པས། འོས་ཐོབ་བརྒྱ་ཆ་རྩིས་བསྐོར་བྱས་ན་(༣༠༣༠༠÷༤༩༧༥༩)x༡༠༠%=༦༠་༨༩%ལ་སླེབས་ཀྱི་ཡོད།
དབུས་འོས་བསྡུ་ལས་ཁང་ནས་ཁྲིམས་སྒྲིག་གིས་བསྐུར་བའི་འགན་དབང་ལ་ལྟོས་མེད་དང་། མང་གཙོའི་འགྲོ་ལུགས་སྣང་མེད་དུ་བསྐྱུར་ཏེ། མཆོད་འཇོར་ས་གནས་མི་མང་གི་དངོས་གཞི་འོས་བསྡུའི་ཐོབ་ཐང་འཕྲོག་ལེན་བྱས་པའི་ནོར་འཁྲུལ་ཚབས་ཆེན་དེ་རིགས་ལ་ཡོ་བསྲང་གི་ཐབས་ཤེས་གང་ཡང་རྙེད་ཀྱི་མེད་སྟབས། སྤྱི་ཚོགས་ནང་གཞི་མེད་ཀྱི་དཀྲོགས་གཏམ་དཀྲུགས་ཤིང་སྣ་ཚོགས་ཤིག་བྲིན་རྒྱུགས་བྱེད་ཀྱི་ཡོད།
དབུས་འོས་བསྡུ་ལས་ཁང་གི་འགན་ཁུར་ལེན་སྟངས་དེ་ལྟ་བུའི་རྗེས་འབྲེལ་དུ། དེང་སང་མི་རེ་ཟུང་གིས་མཆོད་འཇོར་མི་མང་གི་འོས་བསྡུའི་ཐོབ་ཐང་འཕྲོག་པ་དེ་ཐོབ་ཁུངས་རེ་གཉིས་ཀྱི་འོས་ཐོབ་ཁ་ལོ་བསྒྱུར་བའི་ཆེད་དུ་ཡིན་ལུགས་དང་། སྲིད་སྐྱོང་འོས་ཐོབ་བརྒྱ་ཆ་ ༦༠ ལོན་ཆེད་ཡིན་ལུགས་ཆེད་སྒྲོགས་བྱེད་པ་དེ་ནི་རྦད་དེ་གནད་དོན་ཐ་དད་ཡིན།
གལ་སྲིད་དབུས་འོས་བསྡུ་ལས་ཁང་ནས་ས་གནས་ཀྱི་སྔོན་འགྲོའི་འོས་ཐོབ་གསལ་བསྒྲགས་བྱས་ཡོད་ན། མི་ཚང་མས་གྲངས་ཀའི་ཐོག་ནས་དངོས་གཞིའི་སྐབས་སུ་ཐོབ་ཁུངས་གང་དང་གང་གི་འོས་ཤོག་ལ་ཁྱད་པར་ཤོར་གྱི་ཡོད་པ་གསལ་པོ་མཐོང་ཐུབ་ཀྱི་རེད།
སྤེན་པ་ཚེ་རིང་གི་སྲིད་སྐྱོང་འོས་ཐོབ་བརྒྱ་ཆ་ ༦༠ སྐོར་ལ་དོགས་སློང་བྱེད་པ་དེ་ནི་སྔོན་འགྲོའི་འོས་ཐོབ་ཁོ་ན་ཟེར་གྱི་ཡོད་པ་དང་། དེ་ཡང་འོས་བསྡུ་ལས་ཁང་ནས་འོས་ཤོག་རྩིས་མེད་བཏང་དང་མ་བཏང་གི་ཐོག་ནས་ཤོད་ཀྱི་ཡོད།
ཁྲིམས་སྒྲིག་གི་དགོངས་དོན་ལྟར་ན། འོས་བསྡུའི་སྒྲིག་གཞི་དོན་ཚན་སོ་བཞི་པ་འོས་ཤོག་གྲངས་བཤེར་སྐབས་དང་། དོན་ཚན་ཞེ་དགུ་པ་འོས་གཞི་གསལ་བསྒྲགས། དོན་ཚན་དྲུག་ཅུ་རེ་བདུན་པ་སྲིད་སྐྱོང་གི་སྔོན་འགྲོ་དང་དངོས་གཞིའི་འོས་བསྡུ་བྱེད་ཕྱོགས་བཅས་སུ་དབུས་འོས་བསྡུ་ལས་ཁང་ནས་སྔོན་འགྲོ་དང་དངོས་གཞིའི་འོས་བསྡུ་གྲངས་བཤེར་ཁོ་ནའི་སྐབས་སུ་ཞིབ་འཇུག་དང་། འོས་ཤོག་རྩིས་མེད། འོས་ཐོབ་རྩིས་མེད། གདམ་བྱ་འདེམས་བྱེད་བཀག་བསྐྱིལ་བྱེད་ཕྱོགས་བསྟན་ཡོད་ནའང་། འོས་ཐོན་གྲུབ་འབྲས་གསལ་བསྒྲགས་བྱས་རྗེས་ད་དུང་ཞིབ་འཇུག་དང་རྩིས་མེད་ཀྱི་བྱ་རིམ་ལག་བསྟར་བྱེད་ཆོག་པའི་གནང་བ་མེད།
དཔེར་ན། དངོས་གཞིའི་འོས་གཞི་གསལ་བསྒྲགས་ཟིན་པའི་རྗེས་སུའང་འོས་ཆོས་ཚང་མིན་གྱི་ཀླན་ཀ་བྱུང་ན། སྤྱི་འཐུས་(༤༩།༤)དང་སྲིད་སྐྱོང་(༦༧།༣ག)འོས་གཞི་ཕྱིར་འཐེན་ཆོག་གི་ཡོད་ནའང་། འདེམས་ཐོན་གསལ་བསྒྲགས་བྱས་རྗེས་དབུས་འོས་བསྡུ་ལས་ཁང་ལ་སྤྱི་འཐུས་དང་སྲིད་སྐྱོང་འདེམས་ཐོན་རྩིས་མེད་དང་། དེ་དག་གི་འོས་ཐོབ་རྩིས་མེད་གཏོང་བའི་དབང་ཚད་མེད།
དེར་བརྟེན། གལ་སྲིད་མཆོད་འཇོར་ས་གནས་ཀྱི་སྲིད་སྐྱོང་གི་སྔོན་འགྲོ་འོས་ཤོག་ཆ་ཚང་རྩིས་མེད་བཏང་བའི་དབང་དུ་བཏང་ནའང་། སྤེན་པ་ཚེ་རིང་ལ་འོས་ཤོག་ཁྱོན་འབོར་གྱི་བརྒྱ་ཆ་ ༦༠་༨༩ ཐོབ་འདུག
མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།
