ཐའེ་ལན་ཌིའི་གསར་འགོད་པ་གྲགས་ཅན་ཝུའུ་ཌི་ལགས་ཀྱིས་འགྲོ་བ་མི་ཚང་མར་བདེ་སྐྱིད་དགོས་པའི་མངོན་འདོད་དང་དམིགས་ཡུལ་གཅིག་མཚུངས་ཡིན་ལ་དོན་དངོས་སུ་ཚང་མར་བདེ་སྐྱིད་དགོས་ན་རང་བཞིན་གྱིས་འབྲེལ་བ་ཡོང་གི་ཡོད་སྐོར་བརྗོད་བྱུང་།
དེ་རིང་བཞུགས་སྒར་༧རྒྱལ་བའི་ཕོ་བྲང་དུ། ཐའེ་ལན་ཌིའི་གསར་འགོད་པ་ཝུའུ་ཌི་མི་ལིན་ཊ་ཆིན་ཊ་ (Woody Milintachinda) ལགས་ཀྱིས་སྣེ་འཁྲིད་པའི་ནང་པའི་ཚོགས་པ་ཐའེ་ལན་ཌི་ཝུའུ་ཌི་ཝོལ་ཌི་ (Woody World Thailand) ཡི་ཚོགས་མི་ ༢༠ དང་། དེ་མིན་རྒྱ་གར་དང་ཉི་ཧོང་སོགས་ནས་མཇལ་བཅར་བ་ ༣༦༠ ལྷག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་འདུག་ལ། ཚོགས་མི་རྣམ་པས་མཇལ་རྟེན་གྱི་སྟོན་པའི་སྐུ་བརྙན་ཞིག་ཕུལ་ཡོད་འདུག
ཐའེ་ལན་ཌིའི་གསར་འགོད་པ་ཝུའུ་ཌི་མི་ལིན་ཊ་ཆིན་ཊ་ལགས་ཀྱིས་འདི་གའི་གསར་འགོད་པར། ངས་མི་ཚེ་གང་པོར་ཆོས་ཉམས་ལེན་བྱས་པ་ཡིན། དེ་རིང་༧གོང་ས་མཆོག་ལ་མཇལ་བཅར་ཞུ་རྒྱུའི་གོ་སྐབས་བྱུང་བར་སྐལ་བ་བཟང་པོ་དང་བཀའ་དྲིན་ཆེན་པོ་བྱུང་། ད་ལན་དགེ་འདུན་པ་དང་ཚོགས་པའི་ཚོགས་མི་ཁག་ཅིག་དང་མཉམ་དུ་༧གོང་ས་མཆོག་ལ་པཱ་ལི་དང་ལེགས་སྦྱར་ཆོས་བརྒྱུད་འཛིན་པའི་བར་གྱི་ཤེས་ཡོན་བརྗེ་ལེན་ལས་གཞིའི་སྐོར་ངོ་སྤྲོད་དང་། འདས་པའི་ལོ་གཉིས་རིང་དོན་སྙིང་ལྡན་པའི་གླེང་སློང་བྱུང་ཡོད་པ་མ་ཟད། སླད་མར་མུ་མཐུད་དུ་བགྲོ་གླེང་བྱ་རྒྱུ་དང་ཕྱོགས་གཉིས་ལ་ཕན་པའི་ལམ་ཁ་ཞིག་འཚོལ་རྒྱུའི་འབད་བརྩོན་བྱེད་ཀྱི་ཡིན། ཆོས་བརྒྱུད་འཛིན་པ་དེ་གཉིས་ཀྱི་ཉམས་ལེན་བྱེད་ཕྱོགས་མི་འདྲ་བ་ཡོད་ཀྱང་། དེ་དག་གིས་སངས་རྒྱས་བཅོམ་ལྡན་འདས་ཀྱི་སློབ་སྟོན་གྱི་རྨང་གཞི་གཅིག་པ་རེད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་སྐབས་ཁག་ཅིག་གིས་༧མགོན་པོ་གང་ཉིད་མཆོག་ལ་ཁོང་ཁྲོ་དང་ཞེ་སྡང་གིས་ཁེངས་པའི་འཛམ་གླིང་ནང་བདེ་སྐྱིད་ཇི་ལྟར་འཚོལ་དགོས་མིན་བཀའ་འདྲི་ཞུས་པར་༧མགོན་པོ་གང་ཉིད་ཀྱིས། འཛམ་གླིང་འདིར་དོན་དངོས་སུ་ཞི་བདེ་ཡོང་བར་ཐོག་མར་ང་ཚོས་སོ་སོའི་སེམས་ལ་གོ་བ་བླངས་ཏེ། གོ་རྟོགས་དང་བྱམས་སྙིང་རྗེའི་ཐོག་ནས་བྱ་སྤྱོད་སྤེལ་དགོས་པའི་ལམ་སྟོན་གནང་སོང་ཞེས་དང་། ང་རང་ལོ་ན་གཞོན་དུས་ནས་༧གོང་ས་མཆོག་གི་མཛད་འཕྲིན་ཡོངས་ལ་རྗེས་སུ་འབྲང་གི་ཡོད། ཐོག་མར་༧མགོན་པོ་གང་ཉིད་མཆོག་ནི་དགོད་བྲོ་བ་དང་དགའ་སྤྲོ་ལྡན་པའི་དགེ་འདུན་པ་ཞིག་ལ་ངོས་འཛིན་གྱི་ཡོད། འོན་ཀྱང་། རིམ་པས་༧གོང་ས་མཆོག་གི་ཤེས་རབ་གཏིང་ཟབ་ཅིང་། ཆོས་ལུགས་ཕན་ཚུན་མཐུན་འབྲེལ་གནང་བའི་ནུས་པར་བརྩི་མཐོང་དང་རྗེས་སུ་ཡི་རངས་ཞུ་ཡི་ཡོད། ཅེས་དང་། ནང་ཆོས་ནི་ངོ་བོ་དང་མིང་བྱང་སྐོར་མ་རེད། སངས་རྒྱས་དང་ཏཱ་ལའི་བླ་མ་ཞེས་མི་གཅིག་གི་སྐོར་མ་རེད། ནང་ཆོས་ནི་སེམས་ཀྱི་རང་བཞིན་ཤེས་རྟོགས་ཐུབ་པ་དང་། བྱམས་སྙིང་རྗེ་སྐྱེད་སྲིང་བྱེད་པའི་སྐོར་རེད། ང་ཚོའི་ནུས་པ་ནི་རང་ཉིད་ལ་ཡོད་པའི་བརྩེ་བ་དང་། བརྩེ་བ་དེ་གཞན་ལ་གང་འདྲ་བྱས་ནས་རྒྱ་སྐྱེད་གཏོང་དགོས་མིན་ལ་རག་ལས་ཡོད་སྐོར་སོགས་བརྗོད་བྱུང་།
ནང་ཆོས་དང་འབྲེལ་ནས་ཁོང་གིས། ད་ལྟ་འགྲན་རྩོད་ཆེ་བའི་འཛམ་གླིང་འདིའི་ནང་ནང་ཆོས་ཀྱི་སྙིང་པོ་དེ་སྔར་ལས་གལ་ཆེ་བ་ཆགས་ཀྱི་ཡོད། མི་རྣམས་ཀྱིས་ནང་ཆོས་ཞེས་འབོད་ཀྱི་ཡོད་མེད་ལ་མ་ལྟོས་པར། ད་ལྟའི་དུས་སྐབས་འདིར་སེམས་ཁམས་དང་། སྙིང་རྗེ། འཚོ་བ་སྐྱེལ་བའི་གཞི་རྩ་དེ་དག་ཡོངས་ཁྱབ་རེད། མིའི་མི་ཚེ་ཧ་ཅང་ཐུང་ཐུང་དང་མི་རྟག་པ་རེད། དེར་བརྟེན་ད་ལྟའི་དུས་སྐབས་འདི་དམ་འཛིན་བྱ་དགོས་རྒྱུ་གལ་ཆེན་པོ་རེད། གྲོས་མོལ་གྱིས་མི་རྣམས་མཐུན་སྒྲིལ་བྱེད་ཐུབ་པའི་དཔེ་མཚོན་དེ་ཐའེ་ལན་ཌི་དང་བོད་བར་གྱི་འབྲེལ་ལམ་ལྟ་བུ་ཞིག་རེད། ས་ཁུལ་དང་རིག་གཞུང་མི་འདྲ་བ་ཇི་ཙམ་ཡོད་རུང་། འགྲོ་བ་མི་ཚང་མར་བདེ་སྐྱིད་དགོས་པའི་མངོན་འདོད་དང་དམིགས་ཡུལ་གཅིག་མཚུངས་ཡིན་ལ། དོན་དངོས་སུ་ཚང་མར་བདེ་སྐྱིད་དགོས་ན། རང་བཞིན་གྱིས་འབྲེལ་བ་ཡོང་གི་ཡོད་སྐོར་བརྗོད་བྱུང་།
ཝུའུ་ཌི་མི་ལིན་ཊ་ཆིན་ཊ་ (Woody Milintachinda) ལགས་ནི་ཐའེ་ལན་ཌིའི་བརྙན་འཕྲིན་དང་དྲ་ཐོག་གི་ལས་རིམ་གཙོ་སྐྱོང་བ་གྲགས་ཅན་ཞིག་ཡིན་ལ། ཁོང་གིས་ (S20) ཞེས་པའི་རོལ་དབྱངས་དུས་སྟོན་དང་། ཐའེ་ལན་ཌིའི་འཕྲོད་བསྟེན་དང་ལུས་རྩལ་གྱི་དུས་ཆེན་སོགས་གསར་འཛུགས་དང་། བརྙན་འཕྲིན་གྱི་མདོ་འཛིན་པ་དང་། གློག་བརྙན་འཁྲབ་སྟོན་པ་སོགས་ལས་དོན་སྣ་མང་གཉེར། ཕྱི་ལོ་ ༢༠༠༤ ལོར་ཐའེ་ལན་ཌིའི་རྒྱལ་ས་བྷེང་ཀོག (Bangkok) ཏུ་ཝུའུ་ཝོལ་ཌི་ (Wood World Co.) ཞེས་པའི་གསར་ཁང་ཞིག་གསར་འཛུགས་གནང་སྟེ། བརྙན་འཕྲིན་དང་། དྲ་ལམ། དེ་བཞིན་ཐད་གཏོང་བརྒྱུད་ལས་རིམ་གཙོ་སྐྱོང་གནང་གི་ཡོད་པ་རེད། ཕྱི་ལོ་ ༢༠༡༦ ལོར་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་བྱམས་སྙིང་རྗེ་དང་མི་ཚེའི་སྙིང་པོ་སོགས་ཀྱི་སྐོར་ལ་བཅར་འདྲི་ཞུས་ཡོད་འདུག་ལ། རྐང་སྤོལ་རྩེད་འགྲན་པ་གྲགས་ཅན་ཌེ་ཝི་ཌི་བྷེཀ་ཁཱམ་ (David Beckham) སོགས་ལའང་བཅར་འདྲི་ཞུས་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
