དེ་རིང་ཉིན་རྒྱབ་ཏུ་བལ་ཡུལ་ནས་ཕེབས་པའི་བློ་བཟང་ཚེ་རིང་ལགས་ཀྱིས། བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་བརྒྱུད། བལ་ཡུལ་མཆོད་འཇོར་མི་མང་ལ་དངོས་གཞི་འོས་བསྡུའི་ཐོབ་ཐང་འཕྲོག་པའི་གནད་དོན་དང་འབྲེལ་ནས། དབུས་འོས་བསྡུ་ལས་ཁང་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་བྱས་སོང་།
གནད་དོན་དེའི་ཐད་བློ་བཟང་ཚེ་རིང་ལགས་ཀྱིས། ང་དེ་རིང་བལ་ཡུལ་མི་མང་སེར་སྐྱ་ཡོངས་ཀྱི་ཚབ་བྱས་ཏེ་འདིར་ཡོང་བ་ཡིན། དེ་རིང་ཞུ་གཏུག་བྱེད་དགོས་དོན་ནི་ཚང་མས་མཁྱེན་གསལ་ལྟར་བལ་ཡུལ་མཆོད་འཇོར་མི་མང་ལ་དམངས་གཙོའི་ཐོབ་ཐང་སྤྲད་མེད་སྟབས། ཕྲུ་གུ་ངུ་ས་ཕ་མ་ཡིན་པ་ལྟར་དེའི་ཆེད་དུ་བཅར་བ་ཡིན། གཞན་ཚང་མ་ཡིག་ཐོག་ཏུ་བཀོད་བཞག་ཡོད། ཅེས་བརྗོད་བྱུང་།
བོད་མིའི་ཁྲིམས་ལུགས་རིག་པ་བའི་ཚོགས་གཙོ་བསྟན་འཛིན་སྒྲོལ་དཀར་ལགས་ཀྱིས། བོད་ཀྱི་ཁྲིམས་ལུགས་རིག་པ་བའི་ཚོགས་པས་ཁྲིམས་ཀྱི་ཐོག་ནས་དཀའ་ངལ་ཅན་རྣམས་ལ་རོགས་པ་བྱེད་བཞིན་ཡོད། དམིགས་བསལ་གྱིས་རྒྱ་གར་གྱི་ཁྲིམས་ལུགས་གཙོ་བོར་འཛིན་གྱི་ཡོད། ད་ལྟའི་ཆར་པ་བློ་བཟང་ཚེ་རིང་ལགས་བལ་ཡུལ་མཆོད་འཇོར་ནས་ཕེབས་བསྡད་ཡོད། འོས་བསྡུའི་ཐོབ་ཐང་གི་གནད་དོན་སྐོར་རེད། ཁོང་གི་ཁྲིམས་རྩོད་པ་ང་ཚོས་བྱེད་བཞིན་ཡོད། དེ་རིང་གྱོད་དོན་སྙན་ཞུ་ཕུལ་བ་ཡིན། ཞེས་དང་། ཡང་ཁྲིམས་ལུགས་རིག་པ་བའི་ཁྲིམས་རྩོད་པ་གཞན་ཞིག་གིས། དེ་རིང་འདིར་བལ་ཡུལ་མཆོད་འཇོར་མི་མང་གི་དགོས་འདུན་ཚང་མ་ཡིག་ཐོག་ཏུ་འཁོད་པའི་ཞུ་སྙན་ཆེས་མཐོའི་ཁྲིམས་ཞིབ་ཁང་ལ་ཕུལ་ཡོད་པ་དང་། ཁྲིམས་ཀྱིས་ངོས་བཞེས་གནང་དང་མ་གནང་བར་དུས་ཡུན་གང་འཚམ་ཞིག་འགོར་སྲིད་སྐོར་དང་། བློ་བཟང་ཚེ་རིང་ལགས་སུ་བལ་ཡུལ་མཆོད་འཇོར་གྱི་དགོན་སྡེ་དྲུག་དང་མི་མང་སུམ་བརྒྱ་ཡས་མས་ཙམ་གྱི་རྒྱབ་གཉེར་དཔང་རྟགས་བཅས་ཡོད་སྐོར་བརྗོད་བྱུང་།
ཁྲིམས་གཏུག་གི་གནད་དོན་ཐད་དབུས་འོས་བསྡུའི་འགན་འཛིན་བློ་བཟང་ཡེ་ཤེས་ལགས་ཀྱིས། འོས་བསྡུའི་སྒྲིག་གཞི་དང་བཅའ་ཁྲིམས་ནང་མཐུན་རྐྱེན་ཡོད་ཡོད་པ་རེད། དེར་བརྟེན། ང་ཚོ་ནོར་བ་ཡིན་ན་ང་ཚོས་འོས་བསྡུའི་ལས་རིམ་སྒང་ལ་ག་རེ་བྱས་བྱས་དང་རང་སྣང་གང་ཤར་ཡིན་ཞུ་ས་ཡོད་མ་རེད། སྒང་ལ་ཆེས་མཐོའི་ཁྲིམས་ཞིབ་ཁང་ཡོད་ཡོད་པ་རེད། ཅེས་དང་། ཟླ་འདིའི་ཕྱི་ཚེས་ ༡༣ ཉིན་དབུས་འོས་བསྡུ་ལས་ཁང་གིས་འོས་བསྡུ་དང་འབྲེལ་བའི་གནད་དོན་དེ་དག་ལ་ཡིག་ཐོག་ནས་གསལ་བཤད་ཞུ་རྒྱུ་ཡིན་སྐོར་གསུངས་བྱུང་།
གསར་འགོད་པ། སྐལ་བཟང་སྦྱིན་པ།
