མི་འགྱང་བར་ཨ་རིའི་སྲིད་འཛིན་ཊོམ་ཕུ་མཆོག་རྒྱ་ནག་ནང་ཕེབས་འཆར་ཡོད་པས་ཨ་རིའི་རྒྱལ་ས་ཁུལ་གྱི་བོད་མི་རྣམས་ཀྱིས་སྲིད་འཛིན་མཆོག་གིས་རྒྱ་ནག་གི་མགོ་ཁྲིད་ཞི་ཅིང་ཕིན་ལ་ཐུག་འཕྲད་གནང་སྐབས་བོད་དོན་གླེང་སློང་གནང་དགོས་པའི་འབོད་སྐུལ་ཞུ་རྒྱུ་ཡིན་འདུག
ཟླ་འདིའི་ཕྱི་ཚེས་ ༡༤ དང་ ༡༥ ཉིན་གཉིས་རིང་ཨ་རིའི་སྲིད་འཛིན་ཊོ་ནལ་ཊོམ་ཕུ་མཆོག་རྒྱ་ནག་ནང་རྒྱལ་དོན་སྐོར་སྐྱོད་དུ་ཕེབས་འཆར་ཡོད་པ་དང་། ཐེངས་འདིའི་སྐོར་སྐྱོད་སྐབས་རྒྱ་ནག་གི་མགོ་ཁྲིད་ཞིས་ཅིན་ཕིང་དང་ཐུག་འཕྲད་གནང་སྟེ། ཨ་རྒྱ་གཉིས་ཀྱི་ཚོང་འབྲེལ་དང་ཐའེ་ཝན་གྱི་གནད་དོན་སོགས་ཀྱི་ཐོག་གྲོས་མོལ་གནང་འཆར་ཡོད་འདུག ཟླ་འདིའི་ཕྱི་ཚེས་ ༡༠ ཉིན་ནེའུ་ཡོག་དང་ནེའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་སྲིད་འཛིན་ཊོམ་ཕུ་མཆོག་ལ་བོད་དོན་གླེང་སློང་གནང་དགོས་པའི་འབོད་སྐུལ་ཞུ་རྒྱུ་དང་། ཝ་ཤིན་ཊོན་ཌི་སི་རུ་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་གནང་རྒྱུ་ཡིན་འདུག
ཁ་སང་རུའུ་ཊར་གསར་ཁང་གིས་ཨ་རིའི་ཕྱི་སྲིད་དྲུང་ཆེ་མཱར་ཁོ་རུ་བྷའོ་ (Marco Rubio)་ལགས་སུ་ཐེངས་འདིའི་སྲིད་འཛིན་གྱི་སྐོར་སྐྱོད་ཐད་དྲི་བ་དྲིས་པར་ཁོང་གིས། ཨ་རིའི་སྲིད་འཛིན་ཌོ་ནལ་ཊོམ་ཕུ་དང་རྒྱ་ནག་གི་སྲིད་འཛིན་ཞི་ཅིང་ཕིང་གཉིས་མཇལ་འཕྲད་སྐབས་གྲོས་མོལ་གྱི་བརྗོད་གཞི་གཙོ་བོ་ནི་ཐེ་ཝན་གྱི་གནད་དོན་ཡིན་པ་གཏན་ཁེལ་རེད། དེ་ནི་དུས་རྒྱུན་དུ་གླེང་སློང་བྱེད་བཞིན་པའི་གནད་དོན་ཞིག་ཡིན། ཨ་རྒྱ་རྒྱལ་ཁབ་གཉིས་ཀའི་ཕྱོགས་ནས་འཛམ་གླིང་འདི་ལ་བརྟན་ལྷིང་མེད་པའི་གནས་ཚུལ་ཡོང་རྒྱུར་སྤྲོ་སྣང་ཡོད་པ་མ་རེད་བསམ་གྱི་འདུག ང་ཚོར་ཐའེ་ཝན་དང་རྒྱ་གར་ཞི་བདེ་རྒྱ་མཚོའི་ས་ཁུལ་གང་དུའང་བརྟན་ལྷིང་མེད་པའི་གནད་དོན་ཞིག་དགོས་ཀྱི་མེད། ཅེས་བརྗོད་འདུག
གནད་དོན་དབྱེ་ཞིབ་བ་ཚོས། ད་ལན་ཨ་རྒྱ་རྒྱལ་ཁབ་གཉིས་བར་གྱི་ཚོང་ལས་སོགས་འཕྲལ་སེལ་གྱི་གནད་དོན་རིགས་ཆུང་དུ་གཏོང་སྲིད་ཀྱང་། ཐའེ་ཝན་གྱི་གནད་དོན་ནི་རྒྱལ་སྤྱིའི་འབྲེལ་ལམ་ནང་གི་རྙོག་འཛིང་ཆེ་ཤོས་དང་འཐབ་ཇུས་ཀྱི་གནད་འགག་ཆེ་ཤོས་ཤིག་ཏུ་མུ་མཐུད་གནས་རྒྱུ་ཡིན་སྐོར་རྗོད་ཀྱི་འདུག
ཟླ་འདིའི་ཕྱི་ཚེས་ ༢ ཉིན་ཨ་རིའི་ནེའུ་ཡོག་དང་ནེའུ་ཇར་སི་བོད་ཀྱི་གཞོན་ནུ་ལྷན་ཚོགས་ཀྱིས་བརྙན་ལམ་ནས་དེ་འབྲེལ་གསལ་བསྒྲགས་ཤིག་གནང་བའི་ནང་དུ། མགོ་འཁྲིད་གཉིས་ཀྱི་ཐུག་འཕྲད་སྐབས་བོད་དོན་གླེང་སློང་གནང་དགོས་པ་དང་བོད་དོན་འཐབ་རྩོད་ཐོག་རྒྱབ་སྐྱོར་གནང་དགོས་པའི་འབོད་སྐུལ་ཞུ་རྒྱུ་ཡིན་སྐོར་དང་། ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གློག་འཕྲིན་བརྒྱུད་ཨ་རིའི་ཕོ་བྲང་དཀར་པོར་རེ་སྐུལ་ཞུ་ཡིག་ཕུལ་ཡོད་ལ། ངོ་རྒོལ་ལས་འགུལ་གྱི་སྐབས་སུ་ཕོ་བྲང་དཀར་པོའི་གནད་ཡོད་མི་སྣ་རྣམས་ལ་དངོས་སུ་སྙན་ཞུ་ཕུལ་རྒྱུ་དང་སྦྲགས། ཨ་རི་ལ་རང་དབང་ཐོབ་ནས་ལོ་ ༢༥༠ འཁོར་བར་རྟེན་འབྲེལ་ཞུ་རྒྱུ་དང་། ཨ་རིའི་གཞུང་མང་གཉིས་ཀྱིས་བོད་དོན་ཐོག་མུ་མཐུད་དུ་རྒྱབ་སྐྱོར་གནང་རྒྱུར་འབོད་སྐུལ་ཞུ་རྒྱུ་ཡིན་སྐོར་དང་། རྒྱ་ནག་གཞུང་གིས་བོད་ནང་བློ་ཡུལ་ལས་འདས་པའི་བཙན་གནོན་གཏོང་བཞིན་པ་དང་བསྟུན། བོད་ཀྱི་ཆོས་དང་རིག་གཞུང་། སྐད་ཡིག་བཅས་རྩ་མེད་གཏོང་ཐབས་ཀྱི་སྲིད་ཇུས་གཏན་འབེབ་ལག་བསྟར་བྱེད་བཞིན་ཡོད་པས། བོད་མི་ཚོས་སོ་སོའི་ཁྱིམ་ཚང་མགོ་ཐོན་ཙམ་བྱུང་ན་འགྲིག་པའི་བསམ་བློ་མི་གཏོང་བར་བོད་རྒྱལ་ཁབ་དང་མི་རིགས་ཀྱི་རྒྱལ་ཞེན། འགན་འཁུར་ཡོད་པའི་ཐོག་ནས་བོད་དོན་བདེན་པའི་འཐབ་རྩོད་ལ་མི་རེ་ངོ་རེ་ནས་རྡོག་རྩ་ཆིག་སྒྲིལ་དང་ནུས་པ་མཉམ་སྤུངས་གནང་དགོས་པའི་དུས་ལ་བབ་ཡོད་སྐོར་བསྒྲགས་འདུག
འདི་ལོའི་ཕྱི་ཟླ་ ༤ ཚེས་ ༡༠ ཉིན་ནེའུ་ཡོག་དང་ནེའུ་ཇར་སི་བོད་ཀྱི་གཞོན་ནུ་ལྷན་ཚོགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ལ་དགོས་འདུན་དོན་ཚན་བདུན་གྱི་སྙན་ཞུ་ཞིག་ཕུལ་ཡོད་པའི་ནང་། ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ཡབ་ཡུམ་སྐུ་འཁོར་གཙོས་བོད་ཀྱི་ཆབ་སྲིད་ཀྱི་བཙོན་པ་ཡོངས་ཆ་རྐྱེན་གང་ཡང་མེད་པའི་ཐོག་འཕྲལ་དུ་ཀློད་གྲོལ་གཏོང་དགོས་དང་། བོད་མིའི་ཆོས་དང་རིག་གཞུང་། སྐད་ཡིག་བཅས་རྩ་མེད་བཟོ་བྱེད་ཀྱི་བཅའ་སྡོད་སློབ་གྲྭ་སོགས་སྲིད་བྱུས་ངན་པ་རྣམས་འཕྲལ་དུ་མཚམས་འཇོག་གིས་མི་རིགས་ཀྱི་སྐད་ཡིག་དང་རིག་གཞུང་བཟང་པོ་གཅེས་སྲུང་བྱ་རྒྱུའི་འགྲོ་བ་མིའི་ཐོབ་ཐང་སྤྲོད་དགོས། རྒྱ་ནག་གཞུང་གིས་བོད་མཐོ་སྒང་གི་རང་བྱུང་ཁོར་ཡུག་གཏོར་བཤིག་གཏོང་བཞིན་པའི་ལས་གཞི་ཤིང་ནགས་གཅོད་འབྲེག་དང་། གཏེར་ཁ་སྔོག་འདོན། ཆུ་རགས་བཟོ་སྐྲུན་སོགས་ཨེ་ཤ་ཡ་གཙོས་འཛམ་གླིང་སྤྱིའི་བདེ་འཇགས་དང་གནམ་གཤིས་འགྱུར་ལྡོག་ལ་གནོད་ཚབས་ཆེ་བའི་ལས་གཞི་ཡོངས་འཕྲལ་དུ་མཚམས་འཇོག་དགོས། ༧གོང་ས་མཆོག་གི་༧སྐུའི་ཡང་སྲིད་ངོས་འཛིན་ཐད་༧མགོན་པོ་གང་ཉིད་མཆོག་དང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་རྣམ་པར་མ་གཏོགས་རྒྱ་གཞུང་གིས་ཐེ་བྱུས་བྱ་རྒྱུ་འཕྲལ་དུ་མཚམས་འཇོག་དགོས། རྒྱ་ནག་གཞུང་གིས་ཉེ་ཆར་ཁྲིམས་སུ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དོན་དངོས་སུ་བོད་མི་རིགས་གཙོ་བོ་བྱས་པའི་གྲངས་ཉུང་མི་རིགས་ཡོངས་ཁྲིམས་ཀྱི་ཐོག་ནས་རྩ་མེད་གཏོང་རྒྱུའི་ངན་ཇུས་ཚབས་ཅན་གྱི་མི་རིགས་བཙན་བསྒྱུར་གྱི་ཁྲིམས་ཡིག་འཕྲལ་དུ་མཚམས་འཇོག་དགོས། གཞིས་བྱེས་གཉིས་སུ་བཞུགས་པའི་བོད་མི་ཡོངས་ལ་རྒྱལ་མཚམས་བརྒལ་བའི་དྲག་གནོན་བྱ་མཚམས་འཇོག་དགོས། རྒྱལ་སྤྱིའི་སྤྱི་ཚོགས་ནས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་བོད་རྒྱ་དཀའ་རྙོག་སེལ་བར་གྲོས་མོལ་ཡོང་ཐབས་སུ་རྒྱ་ནག་གཞུང་ལ་གནོན་ཤུགས་སྤྲོད་དགོས་བཅས་གསལ་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
