རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ནས་ལས་འཁྱུར་གནང་། 

བོད་མིའི་སྒྲིག་འཛུགས་ཀྱི་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ནས་ཟླ་འདིའི་ཕྱི་ཚེས་ ༡༡ ཉིན་དོན་གཅོད་ནས་འཁྱུར་གྱི་ཡོད་ཀྱང་བོད་མི་རིགས་ལ་རྒྱབ་སྐྱོར་དང་བོད་དོན་ཞུ་གཏུག་གནང་རྒྱུ་ནམ་ཡང་མཇུག་སྒྲིལ་མི་སྲིད་སྐོར་གསུངས་འདུག

ཟླ་འདིའི་ཕྱི་ཚེས་ ༡༡ ཉིན་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་སྐུ་སྒེར་གྱི་སྤྱི་ཚོགས་དྲ་ལམ་སྟེང་། དེ་རིང་ཕྱི་ལོ་ ༢༠༢༦ ལོའི་ཟླ་ ༥ ཚེས་ ༡༡ ཉིན་ནི་ངས་༧གོང་ས་རྒྱལ་བ་རིན་པོ་ཆེ་མཆོག་དང་དབུས་བོད་མིའི་སྒྲིག་འཛུགས་ཀྱི་སྐུ་ཚབ་ཀྱི་ལས་འགན་འཁྱེར་བའི་ཉིན་མཐའ་མ་དེ་ཡིན་ཞེས་གསུངས་འདུག་ལ། རིན་པོ་ཆེ་མཆོག་ཕྱི་ལོ་ ༢༠༡༤ ཟླ་ ༡༠ པའི་ནང་རུ་སོག་སྐུ་ཚབ་དོན་གཅོད་དུ་བསྐོས་གཞག་གནང་ཡོད་འདུག

རིན་པོ་ཆེ་མཆོག་གིས་ཕྱི་ལོ་ ༢༠༡༥ ཟླ་ ༢ པའི་སྐུ་ཚབ་ཀྱི་ཐུགས་འགན་བཞེས་སྐབས། མ་འོངས་པའི་ལས་དོན་གྱི་བགྲོད་ལམ་དུ་བཞུགས་པ་ནི་བསམ་ཡུལ་དུ་འཆར་དཀའ་བའི་གནད་དོན་ཞིག་ཏུ་གྱུར། འདས་པའི་མི་ལོ་བཅུ་གཅིག་ལྷག་གི་རིང་ལ་ཞབས་ཕྱི་ཞུ་རྒྱུ་བྱུང་བ་ནི་རང་ཉིད་ཀྱི་མི་ཚེའི་ནང་གི་གཟི་བརྗིད་ཆེ་ཤོས་དེ་ཡིན་པར་འདོད། བོད་མི་མ་ཡིན་པ་ཞིག་གིས་སྐུ་ཚབ་དོན་གཅོད་ཀྱི་ལས་འགན་ཁུར་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མི་རྣམས་ལ་ཞབས་འདེགས་ཞུ་རྒྱུ་བྱུང་ནི་མི་ཚེའི་བྱིན་རླབས་དང་གཟི་བརྗོད་ཅིག་ཏུ་སེམས་ཀྱིན་ཡོད། ཅེས་གསུངས་འདུག 

ཡང་རིན་པོ་ཆེ་མཆོག་གིས། ངའི་ལས་འགན་དངོས་སུ་མཇུག་བསྒྲིལ་ཟིན་ནའང་། ངའི་ལྷག་བསམ་ནི་མཇུག་སྒྲིལ་མེད། ངས་མུ་མཐུད་དུ་བོད་མི་རིགས་ལ་རྒྱབ་སྐྱོར་དང་། བོད་དོན་ཞུ་གཏུག བོད་མི་རིགས་དང་མཉམ་དུ་འགྲེང་རྒྱུ་ཡིན། དེ་ནི་དུས་རྟག་ཏུ་མཇུག་སྒྲིལ་མི་སྲིད་པའི་ལམ་བུ་ཞིག་རེད། ཅེས་གསུངས་འདུག

ཕྱི་ལོ་ ༢༠༡༤ ཟླ་ ༡༠ ཚེས་ ༢༤ ཉིན་སྐབས་དེའི་ཨུ་རུ་སུའི་སྐུ་ཚབ་དོན་གཅོད་ཞིང་ནོར་ངག་དབང་རབ་རྒྱས་ལགས་ཤེས་རིག་ལས་ཁུངས་ཀྱི་དྲུང་ཆེར་བསྐོ་གཞག་བྱུང་བ་དང་། ཁོང་གི་ཚབ་ཏུ་སྐབས་དེའི་སོག་ཡུལ་ནང་བའི་མཐུན་ཚོགས་ཀྱི་ཚོགས་གཙོ་ཏེ་ལོ་རིན་པོ་ཆེ་མཆོག་ལ་ཆེ་བསྟོད་མཚན་གནས་ཐོག་རུ་སོག་སྐུ་ཚབ་དོན་གཅོད་དུ་བསྐོ་གཞག་གནང་ཏེ། འདས་པའི་མི་ལོ་བཅུ་གཅིག་ལྷག་གི་རིང་ཏེ་ལོ་རིན་པོ་ཆེ་མཆོག་གིས་རུ་སོག་སྐུ་ཚབ་དོན་གཅོད་ཀྱི་ཕྱག་ལས་གནང་ཡོད་འདུག་ལ། ཕྱི་ལོ་ ༢༠༢༢ ལོ་ནས་ཨུ་རུ་སུའི་དཀའ་རྙོག་བྱུང་བའི་སྐབས་སུ་ཁོང་ཕྱི་རྒྱལ་དུ་ཕེབས་དགོས་བྱུང་ཡོད་པ་རེད།

ཏེ་ལོ་སྤྲུལ་སྐུ་རིན་པོ་ཆེ་མཆོག་ནི། ཨ་རིར་འཁྲུངས་ཤིང་༸གོང་ས་མཆོག་ནས་ཏེ་ལོ་རིན་པོ་ཆེ་སྐུ་གོང་མའི་ཡང་སྲིད་དུ་ངོས་འཛིན་མཛད་རྗེས་དགུང་ལོ་བདུན་ལ་སོན་སྐབས་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་ནང་ཆོས་བཞུགས་གནང་སྟེ། གཞུང་ཆེན་བཀའ་པོད་ལྔ་ལ་གསན་བསམ་གནང། ཁོང་གིས་ཁལ་མུཀ་སྤྱི་མཐུན་རྒྱལ་ཁབ་ཀྱི་ནང་པའི་གཙོ་འཛིན་གྱི་འགན་བཞེས་ཏེ་བསྟན་འགྲོའི་དོན་རྒྱ་ཆེར་བསྐྱངས་དང་སྐྱོང་བཞིན་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།